Nagapakitag Kristohanong Pagkamaunongon Diha sa New Caledonia

DILI maayo ang lakat diha sa paraiso. Sa sayo sa 1985, nakapatay ang kagubot sa politika ug 20 ka kinabuhi sa isla sa South Pacific sa New Caledonia. Kini ang nagtultol sa magasing Maclean’s sa pagkomento: “Ang isla hapit nang magkapareho sa Northern Ireland, nga nabahin sa duha ka armado ug nag-awayay nga mga pundok.”

Misamot ka delikado ang kahimtang sa Enero 1985 nga tungod niini si Presidente François Mitterrand sa Pransiya midalidali sa paghimog wala sa panahong bisita sa katunga sa kalibotan sa Nouméa, ang kaulohan sa isla. Ang mga taga isla, nga nabahin sa ilang pagkamaunongon, mahingawaon sa pagpahayag sa ilang mga pagbati sa panahon sa iyang pagduaw. Ang orihinal nga mga molupyo, nga gitulod sa ilang relihiyosong mga lider ug sa kusganong pagbati sa pagpabiling maunongon sa ilang mga kagikang Melanesianhon, nakigbisog sa pagtapos sa kapin sa 130 ka tuig sa pagmando gikan sa Pransiya. Sa laing bahin, daghan nga may mga kagikang Uropanhon Polynesianhon ug mga laling taga Asia, ug gani mga Melanesianhon, mipahayag sa ilang pagkamaunongon sa kagamhanang Pranses ug milaban sa padayong pagmando niini.

Kasamtangan, niana gihapong maong Sabado, 1,567 ka Saksi ni Jehova ug ang ilang mga higala nagtigom usab sa Nouméa aron sa pagpakita sa katilingban sa ilang pagkamaunongon. Apan, ang ilang pagkamaunongon, dili sa usa ka partikular lumad nga grupo o sa usa ka yutan-ong gobyerno; kadto maoy pagkamaunongon alang sa natukod nga Gingharian sa Diyos. Apan sa unsang paagi nga didto sila sa Nouméa niadtong partikular nga adlaw? Bahin niana, sa unsang paagi nahaadto sila didto sa New Caledonia?

Ang mga Sinugdanan sa Kristohanong Pagkamaunongon

Ang New Caledonia maoy lugar nga imong madahom nga usa ka paraiso sa South Pacific​—maayong klima sa tibuok tuig, lamiang mga prutas nga makapukaw sa gana, abunda ang lunhawng talamnon nga makalingaw sa mata, ug may mabulokong panagsagol sa kapin sa 150,000 ka Melanesianhon, Polynesianhon, Asianhon, ug Uropanhon.

Nadiskobrehan kini sa 1774 ni Kapitan James Cook, ang iladong nabigador nga taga Britanya ug eksplorador, apan nahimong koloniya sa Pranses sa 1853. Naulahi lag diyutay sa unang mga eksplorador ug mga negosyante miabot ang mga misyonero sa Kakristiyanohan. Ilang nakita ang mga tawo nga nagkinahanglang makagawas sa pipila ka daotang mga batasan. Milampos ang mga misyonero, pananglitan, sa pagpapha sa kanibalismo. Ilang gipailaila usab ang mga tawo sa Bibliya ug gani nakahubad niini sa upat ka lokal nga pinulongan. Sa dalayegon, ilang giapil ang ngalan sa Diyos, gihubad ang Iehova o Jehova sa lokal nga sinultihan. Apan, labaw pa ang gikinahanglan.

Sa katuigan sa 1930 usa ka pundok sa mga Saksi ni Jehova milawig ngadto sa Loyalty Islands nga nag-apod-apod sa mga literatura sa Bibliya. Sa tungatunga sa katuigan sa 1950 daghang Australianong mga Saksi mibalhin ngadto sa New Caledonia. Bisag gipagawas sila sa nasod sa ulahi, miuswag ang buluhaton, ug sa pagka 1967 ang numero sa lokal nga mga Saksi miuswag sa kapin sa usa ka gatos. Sa 1976 nagtukod ang Watch Tower Society ug sangang opisina sa Nouméa ug maoy nagdumala sa konstruksiyon sa unang Kingdom Hall sa isla.a

Sukad niadto, dagkong paningkamot ang gihimo sa pagtigom sa maunongong mga sakop alang sa natukod nga Gingharian ni Jehova gikan sa tanang nagkalainlaing lumad nga mga grupo. Pananglitan, mga 17,000 ka tawo nga gikan sa Wallis ug Futuna​—gamayng pulo nga nahimutang sa amihanan sa Fiji​—nagpuyo sa New Caledonia. Ang kadaghanan sa mga taga Wallis mga Katoliko ug debotado sa ilang relihiyon. Apan nausab ang ilang tinamdan dihang dugang ug dugang pa kanila misugod sa pagpaminaw sa balita sa Gingharian. Usa ka pari, nga nasuko bahin niini, nagpadalag babaye nga maoy naghawid sa panalapi sa simbahan sa “pagluwas sa karnero nga nahisalaag.” Apan, siya namati usab. Dayon ang iyang anak nga babaye, nga nagtuon sa Roma aron mahimong misyonero, mipauli ug midawat sa kamatuoran sa Bibliya nga gitudlo sa mga Saksi ni Jehova. Karon siya ug ang iyang inahan nahimong dedikado, maunongong mga Saksi.

Karon ang mga Saksi ilado bisan asa niining mga islaha; sa pipila ka lugar, adunay usa ka Saksi kada 80 ka tawo. Diha sa isla sa Lifou, nahimong Pentekostal ang usa ka batan-ong panday. Iyang giduaw ang tanang balangay, sa pagpahibalo nga mobalik si Kristo nga makita sa mata diha sa isla. Sa pagpamatuod sa iyang pagtuo nga ang materyal nga mga butang walay bili, iyang gisunog sa atubangan sa katilingban ang iyang mga besti ug salapi. Apan naikag siya sa iyang nabasa diha sa tract nga gipatik sa mga Saksi ni Jehova. Usa ka regular nga pagtuon sa Bibliya ang nakatabang kaniya sa pagbaton sa tukmang kahibalo sa Pulong sa Diyos. Karon, usa na siya ka timbang nga Kristohanon, bug-os panahong ministro.

Pagkamaunongon sa Gingharian sa Diyos Nasulayan

Ang politikanhong kagubot ug ang samok nga kahimtang nga mibuto sa 1984 nakamugnag mga problema alang sa daghang mga taga New Caledonia, lakip sa mga Saksi. Ang uban kanila gisamok sa mga tawo ug gibun-og samtang nagsangyaw. Tulo ka lalaki misulod sa balay sa usa ka Saksi, gipangayo ang yawi sa awto nga gitionan ug posil, ug gikawat ang iyang awto. Nadiskobrehan sa usa ka misyonero nga ang iyang awto gisunog ug giguba samtang nagdumala siyag pagtuon sa Bibliya.

Samtang nabahin ang mga taga isla sa ilang pagkamaunongon, ang mga Saksi,​—bisan unsa pay ilang kagikan​—nahiusa sa ilang neyutral nga baroganan. Ang klero, nga nalangkit sa politika, migamit sa situwasyon sa kagubot sa pagpukaw ug pagdumot sa mga Saksi. Pananglitan, ang mga Saksi nga nagmaneho aron sa paghapit sa mga tawo alang sa tigom gipahunong. Ang ilang nagapanawng magtatan-aw, nga miduaw kanila niadtong semanaha, giguroy gikan sa usa sa duha ka awto ug gisumbag, ug nabuak ang iyang antipara. Giduso ang usa ka tawong interesado sa bungbong ug gisumbag hangtod nga nagkadugo ang iyang ulo, ang iyang nagsabak nga asawa gipugos sa pagpatan-aw.

Apan nasayod ang mga Saksi nga husto ang ilang pagkamaunongon. Sila nakahinumdom sa mga pulong ni Pablo: “Ang tanan nga nagatinguha sa pagpuyo nga may diyosnong debosyon uban kang Kristo Jesus pagalutoson usab.”​—2 Timoteo 3:12; tan-awa usab ang Mateo 10:16.

Maunongong Nagapadako Bisan pa sa Kagubot

Sa tungatunga sa 1984 nakita sa mga Saksi ang panginahanglan sa pagtukod ug Assembly Hall. Nakit-an ang usa ka maayong lugar diha sa bakilid nga nagbantaaw sa pantalan sa Nouméa, ug gisugdan ang trabaho sa Septiyembre. Apan sa pagka Nobyembre, tungod sa politikanhong kagubot, nagpakanaog ang kagamhanan ug curfew, ug gideklarar ang emerhensiya sa nasod. Bisan pa sa mga kalisod, ang mga Saksi gikan sa tibuok isla misanong sa panginahanglan ug tabang diha sa lugar sa konstruksiyon. Miabot ang mga 400 ka buluntaryo sa usa ka panahon, sa dakong katingala sa mga tumatan-aw. Sanglit gisugdan man ang trabaho sa konstruksiyon sa mga piyesta opisyal sa tunghaan, daghang mga batan-on ang mitabang. Ang usa ka batan-ong babaye miingon: “Mao kini ang labing maayong bakasyon nga akong napalabay sukad.” Matingala gayod ang bisan kinsang propesyonal nga mga magtutukod sa pagkakitag 60-anyos nga babayeng Saksi nga nagpalag semento ug graba ngadto sa tigsagol sa semento!

Tapos lamang sa upat ka bulan nahuman ang proyekto. Gihimo ang plano sa dedikasyon, apan kadto mismong hinapos nga semana naatol sa wala sa panahong pagduaw ni Mitterrand! Tungod sa mainit nga kahimtang sa politika, mihangyo ang mga awtoridad sa mga Saksi sa pagkanselar sa ilang programa. Apan, usa ka tawo nga tagbantay sa sekuridad, nga nakakita nag kombensiyon sa Saksi sa Pransiya, misulti kanila: “Nakaila ako kaninyo. Dili mahimo namo kamong mga problema. Pag-amping lang kamo; dili kami manghilabot sa inyong mga tigom.”

Kapin sa 1,500 ka tawo ang mitambong sa maayong programa sa dedikasyon, nga gitapos sa pakigpulong sa dedikasyon nga gipahayag ni Lyman Swingle, usa ka nagaduawng membro sa Nagamandong Lawas sa mga Saksi ni Jehova. Ang mitambong niining tigoma, bisan pa sa sibil nga kagubot, nagpasundayag sa pagkamaunongon sa Gingharian ni Jehova, usa ka pagkamaunongon nga nagapamunga diha sa New Caledonia. Nakab-ot ang bag-ong kinatas-ang ihap nga 889 ka magmamantala sa Gingharian, ug maayo kaayo ang palaabutong dugang pag-uswag. Ang pamatuod niini nakita sa 2,145 ka tumatambong sa Memoryal sa kamatayon ni Kristo sa 1986.

Ang dili pa dugayng yugto sa politikanhong kagubot tin-awng nagpakita nga ang kadaghanang mga taga New Caledonia nagalaom sa tawhanong mga kagamhanan sa pagsulbad sa ilang mga problema. Apan dili alang sa mga maunongon sa Gingharian sa Diyos, kinsa nagabutang sa ilang bug-os nga pagsalig sa pagmando sa Diyos. Niining mga kalisora, usa ka karatula ang nakit-an diha sa baybay sa sidlakan nga mabasa: “Jehova Gawas!” Apan si Jehova, nga gihawasan sa iyang natukod nga Gingharian, magpabilin dinhi. Ingon man ang “iyang mga maunongon.”​—Salmo 37:28; tan-awa usab ang mga bersikulo 9-11, 22, 29, ug 34.

[Mga footnote]

[Mapa sa panid 25]

(Alang sa bug-os nga pagkahan-ay sa teksto, tan-awa ang publikasyon)

AUSTRALIA

[Mapa]

NEW CALEDONIA

Lifou

LOYALTY ISLANDS

Nouméa