‘Pagpangisdag mga Tawo’ Diha sa Arctic

Kada ting-init daghang mga Saksi ni Jehova magwali sa “wala maasayn nga mga teritoryo”​—sa hilit nga mga lugar nga walay mga kongregasyon. Kadaghanan kanila may mga trabaho ug mga estudyante nga nagagugol sa ilang bakasyon sa pagbuhat niini. Ang uban maoy bug-os panahong mga payunir nga nagpalapad sa ilang ministeryo. Ilang nasinati ang kalipay sa paghatod sa maayong balita ngadto sa nahilain nga mga tawo ug nasuod sa ilang pamilya ug espirituwal nga mga igsoon. Kini maoy asoy sa maong panaw sa halayong amihanan.

HINAYNG madailos ang lantsa nga may layag nga Skagstein sa pantalan. Sayo nga gabii kadto sa ting-init. Ang mabugnawng huyohoy sa timog nga nagpabalodbalod sa dagat nakapapresko gikan sa baho sa isda ug sa manteka sa isdang tagbak. Nagbarog sa barandilya sa barko, mibabay kami sa Båtsfjord, ang labing isdaanong balangay sa East Finnmark, Norway.

Walo ang tripulante sa lantsa. Si Øivind ug Åshild miabot sa Båtsfjold sa miaging 11 ka tuig sa pagtabang sa buluhaton sa pagsangyaw niining wala maasayn nga teritoryo. Karon, sa migikan sila sa laing lugar, usa ka kongregasyon nga duolan sa 40 ka magmamantala sa Gingharian ang milambo dinhi. Ang nanghibilin sa mga tripulante mao ang kapitan sa barko, si Jarle (usa ka mananagat ug “panapanahon” nga payunir), duha ka igsoong babayeng payunir, usa ka magkakalot nga makinista, ug usa ka trabahante sa pabrika, ug usa ka iskribente sa opisina nga gikan sa Puloy-anang Bethel sa Norway. Unsay nagpatigom niining grupoha? Ug unsang matanga sa panaw ang ilang sugdan?

Pagduaw sa Isla ug Isla

Karong panahona dili interesado si Jarle sa bakalaw. Ang among plano mao ang pagduaw sa nagkalainlaing isla ug sa nagkalainlaing bantayan sakay sa Skagstein gikan sa Båtsfjord sa halayong amihanan ngadto sa Brønnøysund sa lungsod sa Nordland. Among kobrehan ang kapin sa katungang baybay sa Norway. Ngano? Buweno, ang kadaghanang niining mga dapita maabot lamang pinaagig pribadong barko, ug kas-a sa daghang mga tuig nga ang mga Saksi ni Jehova nagaduaw niining mga dapita sa balita sa Gingharian. Kami mihukom sa ‘pagpangisdag mga tawo’ niining mga bantayan.​—Mateo 4:18, 19.

Ang barko milawig sa Båtsfjorden ug namaybay paingon sa kasadpan sa tibuok gabii. Unang adlaw kadto sa Hulyo. Ang adlaw sa tungag-gabii, nga natabonan sa mga panganod, misidlak sa abuhon, mabugnawng kahayag. Libolibong mga kanaway ug ananakyod ang makita diha sa mga pangpang. Mahinay ra ang paglukot ug pagbukad sa balod sa lawod, sumala sa kapitan. Apan alang sa pipila kanamo nga dili sakayanon, kusog na kadto.

Sa pagkabuntag midunggo kami sa pantalan sa Honningsvåg. Dinhi namo sugdan ang among “pangisda”​—buluhatong pagsangyaw. Gidungog ang mga taga Amihanang Norway nga maabiabihon. Sa dihang makaasoy kamig diyutay sa among tuyo, sagad nga palingkoron kami sa kusina ug dalitag kape. Dayon among ipailaila ang among kaugalingon, diin kami gikan, ang among trabaho, ang ngalan ug gidak-on sa among lantsa, kon nakakuha kamig isda, ug kon asa pa kami paingon. Tapos lamang niana nga makapahayag kami sa tinuod nga tuyo sa pagduaw​—ang maayong balita sa Gingharian sa Diyos.

Mainit nga Pagsanong Diha sa Kamig nga Arctic

Madani ba sa balita kining mga tawhanan diha sa usa ka isla nga 300 ka milya (480 km) sa amihanan sa Arctic Circle? Unsa man gayoy ilang gikabalak-an? Sa tukma ang gikabalak-an sa mga tawo sa tanang dapit mao: sosyal nga inhustisya, pagkawalay-trabaho, kuwarta, pamilya ug personal nga mga problema. Nabalaka usab sila sa dili-maayong kahimtang sa kalibotan​—amihanan-habagatang mga relasyon ug ang sidlakan-kasadpang panag-away.

Masayon alang kanamo ang pagpunting sa solusyon sa Bibliya​—ang Gingharian sa Diyos. Ug pagkamagantihong tan-awong matunaw ang mangiob nga panan-aw sa umaabot ug ang pagduhaduha nga mapulihag kalipay ug paglaom! Daghang mga tawo niining halayong mga dapit nag-ampo sa Gingharian sukad sa bata pa, apan wala gayod sila makasabot sa kahulogan sa maong pag-ampo. (Mateo 6:9-13) Nakabilin kamig daghang basahon sa Bibliya diha sa mga taga-isla ug mihikay sa pagsulat kanila aron mapadayon ang ilang kaikag.

Bisag ting-init kadto, ang temperatura anaa lamang sa tunga sa 30 (2° C) sa Rolvsøy, ug mihuros ang makusog nga hangin. Nagkurog ug nabugkos sa iyang suwiter, giduol sa igsoong lalaki ang tawo nga nagbarog sa baybayon.

“Gitugnaw ka ba?” nangutana ang tawo.

“Eh . . . ” nagpanuko ang igsoon.

“Dali uban nako ug mamainit kita!”

Sa sulod sa balay, gidala ang igsoon sa kusina, diin didto puliki ang asawa sa tawo.

“May mainit ka bang kape nga ikadalit alang ning akong higala?” nangutana ang tawo.

Gidalit ang mainit nga kape ug tinapay, hinimo sa balay nga cloudberry jam, ug salmon. Tapos sa maayong kolokabildo, milakaw ang igsoon ug nakabilin ug mga basahon sa Bibliya ug mipadayon sa pagduaw, nainitan ug nadasig. Ingon niini ang mga eksperyensiya sa pagsangyaw sa mahigalaon ug maabiabihong mga tawo niining halayo, hilit nga mga lugar.

Usa ka Makapabaskog nga Eksperyensiya

Samtang migilisgilis ang Skagstein sa mga balod gikan sa usa ka isla ngadto sa laing isla, nagkasuod ang tripulante sa daghang paagi. Walo ka tawo nga suod nga nagpuyo sa daghang mga adlaw ug mga semana diha sa 38-piye (12 m) nga lantsa sa ulahi nakaila sa tagsatagsa nga mga kinaiya. Nakakat-on kami sa pagsinabtanay sa usag usa ug mahunahunaon. Nahusay ang mga kasungian, ug nahapsay ang among Kristohanong personalidad. (Colosas 3:9, 10) Busa napamatud-an nga labing magantihon kadto nga eksperyensiya.

Sa tingob, among hisgotan ang teksto sa Bibliya kada adlaw ug mag-asoyay sa mga hitabo sa adlaw. Among balikon ang nasulti ug nabuhat ug unsa untay angay isulti ug buhaton. Kini ang nakapadasig kanamo sa paghatag dugang paningkamot nga mahimong epektibo sa pakigsulti sa mga tawo. Ang mga batan-on ug ang mga bag-ohan nakadawat ug maayong tambag ug pagdasig sa pagpalambo sa ilang ministeryo.

“Dugay na akong naghunahuna sa bug-os panahong ministeryo sukad nga gibawtismohan ako,” miingon ang 27 anyos nga si Bjørn. “Sa panahon sa among pagpanaw, ang tinguha ug kaisog sa ‘pagsulay kang Jehova’ anam-anam nga mitubo kanako. Nasinati ko ang dakong pagsalig nga atong mabatonan diha kang Jehova. Kining maong panaw mas nakapasayon kanako sa pagsulod sa buluhatong payunir.”​—Malaquias 3:10.

Nakatabang usab kanamo ang panaw sa pagkakita sa mas tin-aw pa sa pagkadinalian sa panahon. Ang kadaghanang mga komunidad nga among giduaw anam-anam nga nagakamatay. Ang mga negosyo sa isda nanghunog. Ang mga post office ug mga tindahan nanira. Nabalaka ang mga tawo dihang ilang makita ang mga batan-on nga mangitag mga kahigayonan sa halayong mga lungsod ug mga siyudad, gibiyaan ang matahom nga mga balay ug ang tradisyonal nga paagi sa kinabuhi. Sa tibuok kalibotan, milyonmilyon ang mga walay balay ug gigutom. Dinhi imong makita ang walay tawong mga balay ug abundang kalan-on sa dagat. Apan, diyutay lamang ang gusto niana. Kining tanan maoy hilom nga pamatuod sa usa ka dili-timbang nga kalibotan.

Mipadayon sa Pagpanaw

Milawig kami sa amihanan sa Sørøya ngadto sa Kvænangen. Diha sa ubang mga paghapit, manakay kamig baroto aron makaabot sa baybay. Apan sa ubang lugar, makadunggo sa pantalan ang Skagstein. Daghang lokal nga mga tawo magpundok sa pagtan-aw kon kinsa kining mga tawhana tungod kay dili man kami mangingisdang dagway alang kanila. Sa dihang ilang nahibaloan nga mga Saksi ni Jehova kami nga miabot nga may dalang maayong balita gikan sa Bibliya, sundan gilayon kini ug bibo nga pagsultihanay.

Tapos nakobrehan ang lugar, mipaingon kami sa Tromsø, diin ang uban kanamo motambong sa “Balaang Kalinaw” Distritong Kombensiyon. Kining bahina sa panaw mao ang nangibabaw nga kasinatian. Gabii kadto, apan ang adlaw sa tungang-gabii hayag kaayong misidlak sa kapunawpunawan. Sa tuo, ang mangitngit nga mga isla ug mga pulo nagbarog. Sa wala, ang naputos sa niyebe nga bukid nagpangidlap sa kahayag sa adlaw. Mabugnaw ang panahon, ug ang dagat matugaw lamang sa mahinayng pagkisaw sa mga balod. Kalma ug mahilom ang tanan, gawas sa ritmo sa pag-andar sa makina ug sa mananoyng musika gikan sa among radyo. Pagkamaanindot nga palibot!

Tapos sa kombensiyon sa Tromsø, dihay gamayng kausaban sa tripulante. Unya mipadayon ang panaw, nagpamaybay sa Senja ug miagi sa grupo sa mga isla sa Vesterålen ngadto sa Bodø ug dayon ngadto sa Brønnøysund, ang among kataposang destinasyon. Diha sa daghang mga lugar nga among gihapitan, sama sa Rødøy, nakahimamat kamig mga tawo nga wala pa makasulti sa mga Saksi ni Jehova. Mga katuigan na kanhi nga dihay gihimong mga pagsangyaw, ug karon bag-ong kaliwatan na ang nanagko.

Usa ka Dili-Makalimtang Biyahe

Sa dihang miabot kami sa Brønnøysund, kataposan kadto sa Agosto. Sa nagpanumdom kami sa mga semana nga gigugol sa Shagstein, among gibati nga usa kadto ka dili-makalimtang biyahe. Niini nga panaw nakagugol kamig total nga 880 ka oras sa pagsangyaw sa maayong balita ug nakapahimutang ug 126 ka libro ug 1,026 ka magasin, ug nakabaton usab ug 12 ka suskrisyon sa Ang Bantayanang Torre ug Pagmata! Usa ka dagayang binhi sa Gingharian ang napugas niining diyutay rag tawong mga lugar.

“Kadto ang labing maayong bakasyon nga akong napalabay sukad!” matud pa sa usa ka batan-ong magmamantala nga miuban sa panaw. Kami nga nakapribilehiyong nakauban niining panaw kinasingkasing nga miuyon. Among gibati nga dili lamang kadto usa ka maayong bakasyon kondili usa kadto sa labing mapuslanon ug magantihon sa espirituwal nga paagi nga among nahimo sukad.