Ang Ipasabot sa mga Balita

Pagpalabay sa Sala Dili Kaligdong

Diha sa dili pa dugayng pakigpulong alang sa mga lider sa iglesya, ang kolumnista sa relihiyon si Michael J. McManus miingon nga ang mga iglesya nakaamot sa pagkabungkag sa pamilyang Amerikanhon. Matud pa sa taho sa The Fresno Bee, nga mantalaan sa California. Miingon si McManus nga adunay 1.2 ka milyong mga diborsiyo ug 750,000 ka nangatawong mga batang pinaangkan sa Tinipong Bansa sa tuig 1985 ug nga 2.2 ka milyong wala-makasal nga mga parisan nag-ipon sa pagpuyo.

Si McManus miingon nga, inay lig-ong labanan ang mga sukdanan sa Bibliya bahin sa moralidad, nga nag-awhag nga magmaunongon diha sa kaminyoon, ang iglesya mikuhag labi pang matugotong papel bahin niining mga isyuha sa paningkamot sa pagpadaghan sa tumatambong. Ingong pananglitan, iyang gikutlo ang dili pa dugayng plano “nga isibog sa Simbahang Episkopal ang pagbatok sa mga parisan nga nag-ipon sa pagpuyo nga walay kasal.”

Kining modernong hunahuna bahin sa sekso ug kaminyoon nagbarog nga sukwahi kaayo gikan sa Bibliya. Ang Kristohanong apostol Pablo miingon: “Himoa ninyong dungganon ang panagtiayon, ug himoa ninyo nga ang higdaanan sa panagtiayon dili mahugawan.” (Hebreohanon 13:4) Dihang gikomprontar sa mga Pariseo si Jesu-Kristo bahin sa diborsiyo, siya miingon nga “pagabiyaan sa lalaki ang iyang amahan ug ang iyang inahan ug makig-ipon siya sa iyang asawa, ug silang duha mahimong usa ka unod.” Siya midugang: “Bisan kinsa nga magbulag sa iyang asawa gawas kon ang hinungdan mao ang pakighilawas, ug unya mangasawa siya ug lain, nakapanaw.”​—Mateo 19:4, 5, 9.

Mireaksiyon sa giplanong pagpalabay sa iglesya bahin sa mga isyu sa moral, si McManus miingon: “Ang Simbahang Espikopal midangat sa punto diin kini nag-ingon nga ang kaligdong niana mao ang pagpalabay sa sala. Walay giingon si Jesus nga palabyon ang sala. Iyang gihukman ang sala.” Mouyon niini ang maayong pagkatudlong mga estudyante sa Bibliya.

Malig-ong Ebidensiya

“Tapos sa mga tuig sa magarbohon ug maduhaduhaong agnotisismo, nadaot ang buot sa mga siyentista sa ilang pagtan-aw pag-usab sa Diyos,” miingon ang kolumnistang si Pete McMartin sa The Vancouver Sun, mantalaan sa British Columbia, Canada. Bisan pa nga kasiglohan nang nagkasumpaki ang relihiyon ug siyensiya, “karon dili na kana tinuod,” miingon si Wasley Krogdahl, propesor niadto sa astronomiya ug physics sa University of Kentucky. Siya midugang: “Gipatin-aw sa pagtuon sa uniberso nga ang uniberso adunay sinugdanan, ug kana nagpasabot ug usa ka maglalalang.”​—The State Journal-Register, sa Springfield, Illinois.

Maayo kay ang ubang mga siyentista naghunahuna pag-usab sa sinugdanan sa uniberso. Ang katarongan? “Mas nasabtan na ang uniberso karon kay sa 50 ka tuig kanhi,” mibatbat ang astronomong si Krogdahl. Sa 25 ka tuig kanhi, ang kaugmaran sa sensitibo kaayong kasangkapan miresultag diskoberiya sa mga quasars, neutron stars, ug pulsars. Midawat si Krogdahl nga ang kahibalo sa uniberso miuswag, ug ingon man ang ebidensiya nga adunay Diyos. Kining ebidensiyaha, siya miingon, “sa yano nakatumba sa mga kalig-onan sa mga ateyista.”

Bisan pa, ang butang nga mikabat ug daghang mga katuigan sa pagdawat sa siyentipikanhog mga hunahuna tapos sa mausisaong pagtuki ug pagtuon, kasiglohan nang nahibaloan sa mga estudyante sa Bibliya. “Ang dili-makitang mga kinaiya [sa Maglalalang], pagaingnon pa ang iyang walay kataposang gahom ug pagkadiyos, nakita, sukad pa sa pagkatukod sa kalibotan, sa mata sa pagsabot, diha sa mga butang nga iyang nabuhat.” (Roma 1:20, The New English Bible) Sa yanong pagkasulti, ang malig-ong ebidensiya anaa kanunay didto.

[Hulagway sa panid 24]

Orion Nebula

[Tinubdan]

Letrato sa U S Naval Observatory