Nalipay ang Panama sa Iyang Buluhaton sa Pagtukod

ANG mga proyekto sa pagtukod dili usa ka bag-ong butang sa Panama. Sa sinugdanan niini nga siglo, gisugdan ang trabaho diha sa dakong kanal nga nagtadlas niining hikting yuta, nga nagsumpay sa mga dagat sa Atlantiko ug sa Pasipiko. Kining dako kaayong proyekto sa trabaho nakaani sa gamayng Panama sa ngalang “kinasang-ang dalan sa kalibotan.”

Sa Enero 18, 1986, natapos ang laing trabaho sa laing matang. Niadtong adlawa mihimo ang mga Saksi ni Jehova ug programa sa dedikasyon alang sa ilang bag-ong natukod nga mga pasilidad sa sangang opisina. Sanglit 211 lang ang makahimo sa pagtambong sa programa sa dedikasyon, libolibo ang namati pinaagi sa linya sa telepono. Ang bag-ong tinukod puy-an sa mga trabahante sa hedkuwarter, mga misyonero, ug imprintahan.

Apan, ang pagtukod ning mga pasilidara, maoy bahin lamang sa espirituwal nga programa sa pagtukod nga ginahimo sa Panama sukad sa kataposan sa ika-19ng siglo. Niadtong panahona ang mga binhi sa kamatuoran sa Gingharian gipugas dinhi. Sa tuig 1957, dihay kapin sa usa ka libo ka magmamantala sa “maayong balita” sa Panama. (Mateo 24:14) Ang gamayng sangang opisina ug balay sa misyonero nga gitukod niadtong tuiga igo na. Apan sulod sa 20 ka tuig miuswag sa tulo ka pilo ang gidaghanon sa mga Saksi! Busa sa Septiyembre 1982 giaprobahan sa Nagamandong Lawas sa mga Saksi ni Jehova ang pagtukod ug bag-ong sangang opisina.

Ang lokasyon? Duolan sa 12 ka milya (19 km) gawas sa Panama City diha sa matahom nga lugar nga nagabantaaw sa linaw.

Ang Hagit sa Pagtukod

Apan kinsay mohimog desinyo sa tinukod? Unsaon kini sa pagtukod ug pinaagi ni kinsa? Nakahinumdom sa mga pulong sa Salmo 127:1, mipadayon ang mga igsoon, nahibalo nga tabangan sila ni Jehova sa pagbuntog niining daw dili-mabangbang nga mga kababagan.

Gihimo ang dibuho sa temporaryong plano, nagpakita sa gikinahanglang luna alang sa opisina, librariya, ug bodega sa literatura, usa ka gamayng imprintahan, ug puloy-anan alang sa mga trabahante. Gilakip ang luag nga Kingdom Hall. Ang sakop sa tigplanog mga balay sa hedkuwarter sa Watch Tower Society sa Brooklyn, New York, mitabang pinaagi sa pagdesinyo ug tinukod nga motagana niining mga panginahanglana.

Sunod miabot ang tinuod nga hagit sa aktuwal nga pagtukod. Gatos-gatos ka lokal nga mga Saksi miboluntaryo. Ang mga igsoon sa Tinipong Bansa mitabang usab sa pagtanyag sa ilang mga kaantigohan ug mga serbisyo. Sulod lamang sa unom ka semana, ang total nga 230 ka tumatabang miabot, lakip sa pipila nga gikan sa ubang mga nasod sa Sentral Amerika.

Nalipay ang lokal nga mga igsoon sa pagbukas sa ilang mga balay. Temporaryong mibalhin gani diha sa tolda ang usa ka pamilya aron makasaka ang 11 ka boluntaryo. Ang uban nga tag-iyag gamayng mga bus sa tunghaan mitaganag transportasyon alang niining mga trabahante. Ang uban nakigbahin sa pagtaganag 30,000 ka libreng pagkaon nga gidalit diha mismo sa lugar nga gitukoran. Ang makapapreskong mga ilimnon nga hinimo gikan sa pinya, sa ukban, kapayas, ug mga mangga, ug tubig sa butong, gidalit kanunay aron sa pagtagbaw sa kauhaw niadtong nanagtrabaho ubos sa tropikal nga adlaw.

Dili Torre sa Babel

Kusog kaayo ang pagtrabaho. Sulod sa duha ka semana ang tanang bungbong nataod na hangtod sa ikaduhang andana, nataod na ang puthawng mga sablayan, ug ang salog sa Kingdom Hall sa ikaduhang andana gibubo. Ang trabaho sa pagtaod sa mga tubo ug sa elektrikal gidungan sa pagmuntura sa mga bloke sa semento, gihakapan, ug gitaod ang mga bentana ug mga pultahan. Wala pay usa ka bulan nataod na ang atop, nga igo ra gayod sa panahon sa paghatag salipod gikan sa kusog kaayong ulan​—nga tagsaon niining panahona sa tuig.

Dihay mga problema. Usahay, moabot ug 800 ang mga boluntaryo, ug dakong organisasyon ang gikinahanglan aron may trabaho silang tanan. Dugang pa, ang kadaghanan sa miduawng mga igsoon dili makahibalog Kinatsila. Imbes makapahunong kini sa buluhaton sa pagtukod, sama sa iladong Torre sa Babel, gipakita sa mga igsoon ang bunga sa espiritu​—ug nakadawat ug tabang pinaagi sa mga maghuhubad.​—Galacia 5:22, 23.

Sa tibuok nga proyekto, gipasiugda ang espirituwal nga mga butang. Gihimo ang regular nga mga tigom sa kongregasyon diha sa dapit nga gitukoran, ug may gigahing panahon sa pakigbahin sa pag-alagad sa kanataran. May mga panahon usab sa lulinghayaw, pagpasiyo sa talan-awong lugar, ug sosyal nga mga salosalo. Apan ang mga igsoon atua didto aron sa pagtrabaho, ug sa ulahi natapos ang mga tinukod!

Diha sa iyang pakigpulong sa pagtukod, maayo kaayong pagkapahayag ni John Booth sa Nagamandong Lawas kining butanga, nga nagaingon: “Unsay mahitabo niining tanang tinukod nga atong gihimo? Aw, kita nagtukod alang sa walay kataposang umaabot. Dili buot ingnon nga magpabilin sa walay kataposan ang tinukod, kondili ang bunga niining pagtukod ug ang buluhaton sa mga igsoon sa tibuok nasod ug sa tibuok kalibotan mao ang mga tawo nga mabuhi sa walay kataposan.” Dili ikatingala nga ang mga Saksi sa Panama nalipay sa ilang nagakadakong buluhaton sa pagtukod!

[Mapa sa panid 22]

(Alang sa bug-os nga pagkahan-ay sa teksto, tam-awa ang publikasyon)

Panama

Panama City