Ang Ipasabot sa mga Balita
Kinsa ang mga Erehes?
“Diha sa Bibliya atong mabasa nga Trinidad ang Diyos,” misulat si Propesor Johan Heynes, espirituwal nga lider sa Dutch Reformed Church sa South Africa, sa Nobyembre 15, 1986, edisyon sa pamantalaan sa South Africa nga Naweek-Volksblad. Mahitungod sa mga tawong mangatarongan nga dili mahimo nga ang Diyos tulo ug sa gihapon usa, ang propesor mipadayon, “ang Kristohanong Iglesya moingon nga ginawali niining mga tawhana ang bakak nga doktrina, ug busa gisaway usab sila sa iglesya nga mga erehes.”
Apan hain makita diha sa Bibliya ang pulong Trinidad? Walay gipahayag si Propesor Heynes. Dili kini ikatingala tungod kay, ang The New Encyclopædia Britannica mibatbat, “ang pulong Trinidad ni ang espisipikong doktrina makita diha sa Bag-ong Testamento, ni may katuyoan si Jesus ug ang iyang mga sumusunod sa pagsupak sa Shema [Hudiyohanong kompesyon sa pagtuo] diha sa Daang Testamento: “Magpatalinghog ka, Oh Israel: Ang Ginoo nga atong Diyos, maoy usa lamang ka Ginoo.’ (Deut. 6:4).” Kon wala itudlo ni Jesus ug sa iyang mga apostoles ug wala sa espisipiko gipahayag diha sa Bibliya, nganong nahimong popular ang doktrinang Trinidad? Bisan pag miangkon ang Britannica nga ang binhi sa doktrina anaa sa “Bag-ong Testamento,” kini miadmiter nga “ang doktrina anam-anam nga mitungha sa milabay ang mga siglo ug sa daghang mga kontrobersiya” ug nga sa kataposan sa ikaupat nga siglo “gikuha sa doktrina sa Trinidad ang porma nga gihuptan niini sukad niadto.”
Kon mga erehes kadtong dili modawat sa pagtuo nga ang Diyos maoy tulo sa usa, nan unsay ikasulti bahin kang Jesu-Kristo? Iyang gikutlo ang ibabaw nga mga pulong sa Deuteronomio 6:4: “Ang Ginoo nga atong Diyos maoy usa lamang ka Ginoo.” (Marcos 12:29, King James Version) Si Jesus miingon usab: “Ang akong amahan mas labaw pa kay kanako.” (Juan 14:28) Busa kinsa ang mga erehes? Kadtong nagapabilin sa gitudlo ni Jesus o kadtong nagapabilin sa doktrina nga mitungha sa daghang mga siglo tapos sa iyang kamatayon?—Itandi ang 1 Corinto 4:6 sa 2 Juan 9.
“Kutaan” nga Siyudad
“Ang Sydney karon maoy siyudad nga gilikosan,” matud pa sa editoryal sa The Sun-Herald, usa ka pamantalaan sa Sydney, Australia. “Ang mga residensiyal nga mga lugar niini pinarilan, dobleg mga kandado ug kuta nga guwardiyadog mga aparatong elektroniko. Ang mga tren niini sa gabii ginadaot, ginasulatan ug walay sulod. Ang mga karsada niini sa gabii nagadugang nga peligroso.”
Bisan pag ang ibabaw maoy makapabalakang larawan sa daghang dagkong mga siyudad sa tibuok yuta, nakahatag kinig dakong kabalaka sa mga Australiano. Apan, ang mga estudyante sa Bibliya dili mahibulong sa pagtan-aw nga nagakadaghan ang pagkadaotan. Ngano? Tungod kay ilang nahinumdoman ang matagnaong mga pulong ni Jesus bahin sa kahimtang sa atong adlaw. Si Jesus miingon nga “kay mosanay man ang kadaotan mobugnaw ang gugma sa kadaghanan.” (Mateo 24:12) Ug bisag ang editoryal sa The Sun-Herald nagbakho sa landong sa kahadlok nga nakaapekto nianang gitawag nga labing suwertehong siyudad sa Suwerte nga Siyudad, ang “suwerte” dili makawala sa pagkadaotan. Si Jehova lamang, pinaagi sa iyang langitnong kagamhanan, ang makawala sa daotan. Ang Salmo 5:4 nagpasalig kanato nga si Jehova “dili mao ang Diyos nga may kalipay sa kadaotan; ang daotan dili magapuyo uban kanimo.”
Makamatayng Kabalit-aran
Ang Bibliya nagsugo sa mga Kristohanon sa ‘pagpalayo gikan sa dugo.’ (Buhat 15:29) Ang mga Saksi ni Jehova nagtuo nga kining Kasulatanhong sugo aplikado usab sa pagkaon ug dugo ug sa pagdugang ug dugo. Ang AIDS, usa ka makamatayng sakit nga nagaatake sa sistema sa lawas sa pagsagang sa sakit, makuha gikan sa mga pagdugang ug dugo. Diha sa makasubo nga kabalit-aran, dihay natawong bata nga may tagsaon ug makamatayng sakit nga immune-deficiency nga gitawag reticular dysgenesis ug gihimoan ug bone-marrow transplant sa edad nga unom ka bulan. Kining operasyona nagkinahanglan ug mga pagdugang ug dugo. Daw malamposon ang transplant hangtod nga nadiskobrehan sa mga doktor nga ang gidugang nga dugo nakahatag sa masuso ug laing makamatayng sakit. “Sa 2 1/2 maayog lakat ang pasyente gawas sa usa ka butang,” mitaho ang Physician’s Weekly. “Ang bata gihatagan ug posttransplant platelets sa wala pa mahimong sugo ang pagsusi una sa (virus sa AIDS) ug siya karon duna nay AIDS.”