Nagapamatuod nga “Madasigon sa Maayong mga Binuhatan” Diha sa Kenya
“MAO kini ang akong gipangita sa tibuok nakong kinabuhi!” miingon ang usa ka tawong Hindu ug kagikan tapos nakatambong sa dili pa dugayng kombensiyon sa mga Saksi ni Jehova sa Kenya, Aprika. “Usa gayod kini ka tagsaong butang.”
Unsay nakatukmod kaniya sa pagsulti niadto? “Ang mga tawo sa nagkalainlaing mga kolor, mga kagikan, ug mga nasod—tanan libreng nagkaubanay nga nagpakitag pagbati sa usag usa,” siya miingon. Apan sa unsang paagi posible kini diha sa usa ka kalibotan nga puno sa kasamok ug pagpinig sa rasa? Unsay nagtultol sa panaghiusa ug espirituwal nga kalinaw sa Kenya?
Ang Unang mga Payunir ang Nagbukas sa Dalan
Balik sa 1931, si Frank ug Gray Smith milawig gikan sa Habagatang Aprika ngadto sa Mombasa nga may dalang 40 ka kahong mga libro. Gikan didto ilang gisugdan ang makakapoy ug peligrosong panaw ngadto sa Nairobi, diin didto ilang gipanagtag ang ilang tanang suplay sa basahon hapit usa ka bulan. Ang duha gitakboyan ug malaria, ug namatay si Frank—matinumanon hangtod sa kataposan. Sa ulahi niadtong tuiga, gisubay ni Robert Nisbet ug David Norman ang samang panaw, nanagtag ug 200 ka kahon sa mga publikasyon diha sa Sidlakang Aprika. Busa kadto ang unang mga mga binhi sa kamatuoran nga gipugas sa Kenya.
Dayon sa 1935, si Gray Smith ug ang iyang asawa, uban ni Robert Nisbet ug ang iyang igsoong si George, misugod sa pagbalik sa interes nga nakaplagan. Niining panahona gitipos si Robert. Ang uban gitakboyan ug malaria ug blackwater fever. Ang pagsupak ug ang sugo sa pagpalagpot kanila gawas sa nasod sa koloniyal nga kagamhanan nakadugang sa kalisod. Apan, bisan pa niining tanan, kining unang madasigong mga payunir nakapanagtag ug hilabihan ka daghang mga basahon, nga maoy nakatukod sa pundasyon alang sa pagtubo. Pananglitan, sa 30 ka sa tuig ulahi, usa ka Saksi nga nagtrabaho sa hilit nga teritoryo sa Kenya natingala sa pagkaplag ug usa ka tawo nga adunay kopya sa librong Reconciliation. Nakuha kini sa iyang igsoong lalaki sa 1935. Miuswag kining tawhana ug karon usa na sa mga Saksi ni Jehova.
Dugang Pag-uswag
Hangtod na lamang sa 1949 nga miabot ang unang Saksi, si Mary Whittington, sa pagpuyo sa Nairobi, ang kapital sa Kenya. Siya gibawtismohan sa Inglaterra nga usa pa lamang ka tuig. Wala siya masayod sa kahilit, sa mga kababagan, ug sa pagbatok nga iya unyang atubangon. Bisan pa, nakabaton siyag kalipay sa pagtan-aw sa ‘diyutay nga nahimong usa ka libo.’ (Isaias 60:22) Karon, sa panuigong 73, nag-alagad gihapon siya ingong regular payunir.
Si Bill ug Muriel Nisbet, nga unang mga graduwado sa Watchtower Bible School of Gilead ang giasayn sa Kenya, miabot sa 1956. Niadtong panahona, kaylap ang pagpinig sa rasa, ug ang koloniyal nga kagamhanan may mga balaod nga nagdili sa buluhatong pagsangyaw ug gilimitihan ang gidak-on sa mga tigom nga dili molabaw sa siyam ka tawo. Busa ang buluhaton sa mga Nisbet kinutohan diha lamang sa Uropanhong kanataran ug impormal ang mga paagi sa panaghisgot diha sa mga tawong Aprikano. Bisan pa, miabot ang pag-uswag.
Sa 1962 ang buluhaton sa mga Saksi ni Jehova giila sa legal nga paagi. Wala magdugay tapos niadto, sa 1963, natapos ang koloniyal nga pagmando, busa nakabukas sa pultahan sa dugang pagpalapad sa atong Kristohanong buluhaton. Karon mahimong ikaprinta na ang mga publikasyon sa Swahili nga pinulongan, ug ang mga ansiano sa mga Saksi ni Jehova gihatagag awtorisasyon sa kagamhanan nga makakasal. Sukad niadtong panahona, nahimong kasangkapan ang mga Saksi ni Jehova sa pagtabang hapit 2,000 ka magtiayon sa pagparehistro sa ilang kasal sa legal nga paagi.
Sa pagka 1972 ang bag-o maanindot nga patukoran sa sangang opisina, nga nahimutang sa Nairobi, gipahinungod. (Sukad niadto gipadak-an kini.) Ang Kenya karon labi pang nasangkapan sa pagdumala sa buluhaton sa Gingharian sa napulo ka mga nasod sa Sidlakang Aprika ug sa pagtagana sa panginahanglan ug mga publikasyon sa nagkalainlaing lumad nga mga pinulongan.
Maayong mga Pananglitan sa Kadasig
Ang mga magwawali sa maayong balita sa Kenya nagpakita sa samang ‘kadasig sa maayong mga binuhatan’ nga namatikdan taliwala sa unang-siglong mga Kristohanon. (Tito 2:14) Wala sila magpaulang sa kalisod sa pagtabang sa uban nga makabaton ug tukmang kahibalo sa Bibliya.
Diha sa usa ka higayon, nakadawat ang usa ka Saksi ug hangyo nga gikan sa sangang opisina gikan sa usa ka tawong buta nga interesado, nga nagpuyo 16 ka milya (26 km) ang kalay-on. Regular nga adtoon kini sa Saksi pinaagig bisikleta sa pagdumala ug pagtuon sa Bibliya uban kaniya. Bisag kining tawhana dugay nang may negatibo ug kaisipan ug naguol kaayo, usa na siya karon ka Saksi, nga madasigon sa pagsulti sa uban bahin sa saad sa Diyos sa Paraiso nga ipasig-uli dihang ang mga mata sa buta pagabuksan.—Isaias 35:5.
Diha sa ubang mga dapit, dakong mga paningkamot ang gihimo aron makatambong sa Kristohanong mga tigom. Ang 70-anyos nga babayeng tigulang regular nga tigbaktas hapit sayis ka milya (10 km) aron makaadto sa senemanang mga tigom. Sa pagpaingon ngadto, mamugsay siya latas sa usa sa labing dakong suba sa Kenya, bisan pag nagpanghipi ang mga buaya sa duol. Usahay sulog kaayo ang suba nga hapit siyang maagos niini. Apan, iyang giisip ang espirituwal nga kombira nga takos sa paningkamot. Unsa ka tagsaong pananglitan sa kadasig!
Laing maayong pananglitan sa kadasig ug pagpabili gipakita sa usa ka Saksi nga mibaktas ug siyam ka oras aron makatambong sa sirkitong asembliya. Nganong gihimo man niya kini, bisag may igo siyang kuwarta nga ikaplete sa sakyanan? Napalihok tungod sa gugma, iyang gihatag ang iyang kuwarta ngadto sa iyang estudyante sa Bibliya aron siya, usab, makapahimulos sa programa sa asembliya! Oo, ang gugma ug ‘kadasig sa maayong mga binuhatan,’ binase sa tukmang kahibalo, dayag nga nakita sa Kenya.
Espiritu sa Pagpayunir
Gipakita kining maong kadasig sa bug-os panahong payunir nga ministeryo sa tagsaong paagi. Daghan ang nakakaplag ug kalipay niining pag-alagara bisan pa sa malisod nga mga sirkumstansiya. Ang usa ka regular payunir nag-alagad diha sa mainit ug umogon nga dunggoanang siyudad sa Mombasa. Sa mga katuigang milabay giputol ang iyang duha ka tiil tungod sa aksidente sa sakyanan. Samtang diha sa ospital, nakahunahuna siya sa paghikog ug mihangyo sa nars nga hatagan siyag indiyeksiyon nga makamatay, nga niini midumili ang nars. Human nakagawas, nakahimamat siyag Saksi ug misugod sa pagtuon sa Bibliya uban kaniya. Mitultol kini sa iyang pagpabawtismo ug sa bag-ong kinabuhi diha sa bug-os panahong pag-alagad. Puno siya sa kadasig ug pasalamat.
Daghang mga inahan nga may mga kaakohan sa panimalay nahimo usab nga mga regular payunir. Taliwala kanila mao ang usa nga adunay tulo ka anak. Taas kaayo ang presyon sa iyang dugo ug nganga pa. Kinahanglang magtrabaho siya sa bug-os-panahon, ug dili Saksi ang iyang bana. Bisan pa, malipayon siya nga payunir. Siyempre, dili lamang mga inahan ang nakigbahin sa regular payunir nga pag-alagad; dili pa dugay, ang usa ka amahan nga adunay walo ka anak nga atimanon ug may trabaho nga relyibo-relyibo misulod usab niining pribilehiyoa sa pag-alagad.
Daghan niadtong dili makahimo sa pagsulod ingong mga regular payunir nagpakitag espiritu sa pagpayunir. Nangita silag mga higayon nga makabahin sa bug-os panahong ministeryo ingong mga auxiliary payunir, nga nagagugol ug 60 ka oras sa buluhatong pagsangyaw sa usa ka bulan.
Sa Abril 1984, ug sa 1985, kapin sa ikatulong bahin sa tanang mga magmamantala sa Kenya nakabahin sa usa ka porma sa bug-os panahong pag-alagad. Ang usa ka kongregasyon adunay 73 ka magmamantala nga nagpalista ingong auxiliary payunir niadtong bulana, nga nakigduyog sa lima ka regular payunir. Ang nahibiling 28 ka sakop sa kongregasyon may aberids nga 64.6 ka oras, ug kadaghanan kanila dili pa bawtismado. Ingong resulta, mitoltal ug 233 ka pagtuon sa Bibliya ang gidumalahan!
Wala nakaulang ang edad. Misulod ang 99-anyos nga apohang babaye sa auxiliary payunir nga ministeryo. Bisan pa sa iyang limitasyon sa panglawas, iyang gipasidlak ang iyang kahayag sa pagkamaisogon ngadto sa batan-on ug sa tigulang. (Mateo 5:16) Pinaagi sa iyang mga paningkamot, daghan ang natabangan sa pagkahimong mga magmamantala sa Gingharian, ug sila sa mainiton nakahinumdom sa debosyon ug espiritu sa pagpayunir niining maong lola. Oo, ang maong ‘kadasig sa maayong mga binuhatan’ mitultol sa daghan nga makaugmad ug espiritu sa pagpayunir.
Pagdayeg—Gikan sa mga Baba sa “mga Bata”
Ang mga batan-on usab, bisag wala pay bawtismo, malipayon ug maikagon sa pag-uban sa ilang mga ginikanan sa pagdala sa maayong balita gikan sa tinuod nga Diyos ngadto sa ubang mga tawo. (Mateo 21:16) Sa panahon sa espesyal nga kampaniya, ang usa ka batang babaye nga nagpanuigong kuwatro-ug-tunga miuban sa iyang mga ginikanan sa hilit nga teritoryo. Siya nakagugol ug 160 ka oras sa pag-alagad sa kanataran niadtong bulana, nakapahimutang ug 27 ka libro, 66 ka pulyeto, ug 47 ka magasin uban sa mga tawo nga may interes sa Bibliya!
Kining ‘kadasig sa maayong mga binuhatan’ nakita usab diha sa mga eskuylahan. Diha sa usa ka baryo gawas sa Nairobi, usa ka batang lalaki nga nagtungha sa primariya, kansang inahan nagtuon sa Bibliya uban sa mga Saksi ni Jehova, nakatabang sa iyang magtutudlo sa dalan sa kinabuhing dayon. Diha sa klase, dihang gihisgotan sa magtutudlo ang ulohan bahin sa kinabuhi luyo sa kamatayon, matinahurong gihisgotan niining bataa nga lahi ang gitudlo sa iyang inahan, binase sa Bibliya. Nakapukaw kini sa pagkamausisaon sa iyang magtutudlo. Iyang gikontak ang inahan sa bata, diin gitudlo siya ngadto sa mas eksperyensiyadong Saksi. Karon ang magtutudlo mismo nagapakaylap na sa kamatuoran ngadto sa uban, tungod sa kaisog niining bataa. Pagkamaayong pananglitan sa kadasig nga naglungtad sa taliwala sa Kristohanong mga kabataan karon!
Gilaoman ang Dugang Pag-uswag
Kapin sa katunga sa populasyon sa Kenya kinahanglang padunggon pa sa maayong balita sa Gingharian. Tungod sa gilay-on, ang ubang hilit nga mga teritoryo ginakobrehan lamang kas-a sa usa ka tuig. Sa pag-abot niining mga lugara, komun alang sa mga Saksi nga himamaton sa mga pulong: “Diin man kamo? Gimingaw kami kaninyo.” Dayon, tapos nakasangyaw didto sa pipila ka adlaw o mga semana ug panahon na sa pagpamauli, matandog kang makadungog ug mga ekspresyon sama sa: “Biyaan na ba usab kami ninyo? Sa unsang paagi mouswag kami?” Makalipay, may kahikayang gihimo sa pagduaw ug balik sa kadaghanan niining mga tawhana nga gigutom sa espirituwal nga paagi.
Karon, adunay 3,686 ka ministro sa Gingharian sa Kenya. Sa 1986 nga Memoryal sa paghandom sa kamatayon ni Kristo, 13,067 ang mitambong. Hapit kana upat ka pilo sa gidaghanon sa mga Saksi! Ang mga alkoholiko niadto, mga butangero, mga lider sa gang, mga mangingilad, mga espiritista, ug uban pa mihimog dagkong mga kausaban sa ilang mga kinabuhi ug karon nagalakaw sa mga dalan sa kamatuoran. Unsay nagapakita niini kanato maylabot sa umaabot?
Sa dayag, dugang pag-uswag ang malaoman. Oo, ang mga tawo sa Kenya maayo ug pagsanong sa “maayong balita sa gingharian.” (Mateo 24:14) Daghan ang miduyog sa mga ranggo sa mga Saksi ni Jehova—usa ka katawhan nga “madasigon sa maayong mga binuhatan.” Tungod niining mga buluhatona, nagbarog sila nga tagsaong katawhan, libre gikan sa rasanhong mga kababagan ug ubang butang nga nakaulang sa tinuod nga panaghiusa. Sa tinuod, “usa kini ka tagsaong butang.”
[Mapa sa panid 22]
(Alang sa bug-os nga pagkahan-ay sa teksto, tan-awa ang publikasyon)
KENYA
Nairobi
Mombasa
[Hulagway sa panid 23]
Libolibo sa Swahili ug sinultihang mga delegado mitambong sa “Maghuhupot sa Integridad” nga Kombensiyon sa Disyembre 1985
[Hulagway sa panid 24]
Ang mga drama sa Bibliya nga gipasundayag sa Swahili ug sa Iningles nakalig-on sa tumatambong
[Hulagway sa panid 25]
Ang bawtismo atubangan sa katilingban maoy ebidensiya sa panalangin ni Jehova