Pagtan-aw sa Bahamas—Pinaagi sa mga Mata sa Nagapanawng Ministro

ANG Bahamas. Dihay panahon dihang kadtong mga pulonga nakapukaw kanako diha sa mga damgo nga naghigda sa matahom mga baybayon ilalom sa naglubaylubayng mga palwa sa lubi o naglangoy sa matin-awng tubig nga asulon. Sa pagkatinuod, alang sa libolibo sa mga bakasyonista nga nagaduaw sa Bahamas matag bulan, ang maong mga panan-awon nahimong tinuod. Ug dili ikatingala, kay ang kasarangang temperatura maoy 70 grado Fahrenheit (21° C.) sa tingtugnaw ug 85 grado Fahrenheit (29° C.) sa ting-init!

Apan, karon, ang Bahamas labaw ug kahulogan kanako kay sa paghulom sa mainit nga tropikal nga adlaw ingong bakasyonista. Sila nahimong akong asaynment ingong nagapanawng ministro sa mga Saksi ni Jehova. Uban kanako ug tan-awa ang Bahamas pinaagi sa akong mga mata.

Ang Out Islands

Mga 20 lamang tali sa 700 ka isla ug kapuloan ang gipuy-an, ug ang kinabag-an sa mga taga Bahamas nagpuyo sa kapital nga siyudad sa Nassau sa isla sa New Providence. Nailhan ang Nassau ingong dunggoanang halapitan sa mga dagkong barko ug adunay daghang dagkong mga otel alang sa mga bakasyonista. Tingali nakaestar ka sa usa kanila. Apan nakalibot na ba kamo sa ubang mga isla?

Ang kadaghanan sa mga taga Bahamas nagpuyo sa Out Islands, nga gitawag usab nga Family Islands. Gilibotan niining mga islaha ang Nassau, ang labing layo nga isla maoy kapin sa 300 ka milya (480 km) ang gilay-on. Diha sa pipila niining Out Islands, imong mapahimuslan ang tanang modernong mga gamit sa Nassau, apan ang uban dili sama ka moderno. Pananglitan, ang pipila ka isla walay elektrisidad o tubo sa tubig. Diha sa uban, imong makita gihapon ang mga tawo nga nagaluto nga kahoy ang sugnod diha sa kosena sa ilang payag o nagaling ug mais sa galingan pinaagig kamot.

Ang Akong Paagi sa Pagbiyahe

Ang tanang Out Islands maabot gikan sa Nassau pinaagig barko kun ayroplano, apan ang ilang halayong lokasyon maoy hagit sa mga tawo nga sama kanakog propesyon. Sama sa paagi nga gisunod sa unang siglong mga Kristohanon, ang nagapanawng ministro, kun magtatan-aw sa sirkito, moduaw sa mga kongregasyon ug gagmayng mga grupo sa mga Saksi ni Jehova sa paglig-on ug pagdasig kanila sa espirituwal nga paagi.​—Buhat 15:36; 16:4, 5.

Nakahinumdom akog grupo sa tulo lamang ka Saksi nga akong giduaw sa usa sa Out Islands. Kining grupoha wala maduaw sa magtatan-aw sa sirkito kapin na sa tulo ka tuig. Akong gisulatan sila gikan sa Nassau, nga nagpahibalo kanila sa mga petsa sa akong pagduaw. Apan dihang miabot ako pinaagig barko, walay Saksi nga mitagbo kanako sa pantalan. Busa mihangyo ako kon may makatabang ba kanako sa pagpangitag usa sa mga Saksi. Gitudlo ako ngadto sa usa ka babaye, ug samtang gipailaila nako ang akong kaugalingon ingong magtatan-aw sa sirkito, nalipay kaayo siya nga mikaratil siya pagdagan sa pagsulti sa ubang mga Saksi mahitungod sa akong pag-abot. Gibiyaan niya akong nagbarog didto nga nagbitbit sa akong malita. Wala madawat niadtong maong mga Saksi ang akong sulat, ug nakurat sila ug nalipay sa akong pagduaw.

Mibalik ako sa Nassau nga misakay ug gamayng de-karga ug tighatod ug sulat nga lantsa. Mikabat ug 30 ka oras ang paglawig sa baloron nga dagat, apan dali lang nga mipanaw ang oras, alang nako. Akong gipahimuslan ang higayon pinaagi sa pagsangyaw sa ubang mga pasahero. Dayon sa ulahi, ang usa sa mga tripulante sa barko misugod sa pagtuon sa Bibliya ug karon tigtambongan na sa mga tigom sa usa sa mga kongregasyon sa Nassau.

Laing paagi nga maduaw ang Out Islands mao ang ayroplano. Apan, gagmayng ayroplano lamang ang makatugpa sa tugpahanan sa isla. Hinoon luwas kini sila, apan usahay adunay makuyaw nga mga eksperyensiya. Sa usa ka higayon, ginerbiyos kaayo ako dihang akong nakita nga napuno sa aso ang kabina sa ayroplano dihang mipataas kini. Mibalik dayon ang ayroplano sa tugpahanan. Ang hinungdan sa aso? Ang salag sa ilaga nga gihimo diha sa hungawanan sa hangin ug init duol sa makina!

Komusta ang mga Tawo?

Samtang nagabiyahe sa Out Islands, nakahibalag akog daghang mga tawo nga gustog mga basahon sa Bibliya. Apan alang sa pipila kanila, dili nila maabot bisan ang kubos nga bili sa basahon. Pananglitan, sa usa ka mainit kaayo nga adlaw, lima kaming nagsangyaw sa halayong isla dihang nahibalag ko ang usa ka babaye nga nagpakita ug dakong interes sa publikasyong Akong Basahon sa mga Estorya sa Bibliya. Wala siyay kuwarta nga ikaamot sa kantidad niini, apan diha sa iyang reprigeritor maoy among gikinahanglan​—lima ka lata sa mabugnawng ilimnon. Among gibaylo ang libro sa iyang mabugnawng ilimnon, nga nakalipay sa tanan.

Ang mga taga Bahamas adunay tinuod nga gugma sa Bibliya. Kini ang nakahatag kalipay sa paghatod kanila sa “maayong balita” sa Gingharian ni Jehova. (Mateo 24:14) Kasagaran dihang manuaw sa ilang balay, imong makita ang tagbalay nga nagabasag Bibliya. Diha sa usa ka balay nga akong gibisitahan, mapasigarbohong gipasaysay sa inahan ang iyang anak nga babaye sa 66 ka basahon sa Bibliya sa hustong pagkahan-ay.

Sa miaging lima ka tuig, nakapahimulos ang taga Out Islands sa mga presentasyon sa slide mahitungod sa mga ulohan sa Bibliya nga giandam sa Watch Tower Society. Diha sa usa ka isla, walay makuhang tigomanan, busa mihikay kami sa pagpasundayag sa mga slide sa gawas sa bag-ong gipintalag puti nga padir sa tapad sa gamayng tindahan sa pagkaon. Mga 60 ka tawo ang nagtigom​—ang uban nagtindog, ang uban naglingkod.

Sa laing higayon, 120 ka tawo ang nagtigom. Nalipay kaayo sila sa programa sa slide nga dihang gipasiga na ang suga, walay mipauli. Nakahinumdom ako nga nakadala ako ug laing mga slide sa laing ulohan sa Bibliya. Busa gipalong na usab ang suga, ug ang ikaduhang slide gipasundayag​—nalipay kaayo ang mga tawo.

Usahay may mga problemang motungha. Diha sa usa ka isla dihay grupo sa mga tawong nagtigom diha sa lokal nga eskuylahan sa pagtan-aw sa among programa sa slide. Dihang akong gipaandar ang projector, nasunog ang bombelya. Wala akoy dalang ekstrang bombilya sa projector, ug walay mabatonang bombelya niining lugara sa Out Island. Busa bisag dili na kinahanglang isulti pa, nabalo ang mga tawo. Apan, gidalidali nakong bungkag ang projector ug gihimo ang pipila ka pagpasibo, gigamitan nako kinig ordinaryong bombilya nga kapuli niadto, apan hinoon mas ngitngit kini. Apan wala magtagad ang tumatan-aw. Nalipay sila sa programa.

Mga Lawa nga Lad-an, mga Lamok, ug “Piniritong Iring”

Ang regular nga pagduaw sa Out Islands nagkinahanglan ug mga pagpaangay sa tropikal nga mga kahimtang. Nahinumdoman ko ang unang higayon sa akong pakakitag lawa nga lad-an. Nagkamang ang lawa sa salog ug daw sama sa akong kamot ang gidak-on niini! Wala ako makalihok​—nahadlok kaayo ako. Mapasalamaton ako nga miabot ang tagbalay sa pagluwas kanako. Sa usa lamang ka pagtigbas sa iyang sundang, napatay ang “kaaway.” Ang tagbalay maoy 82 anyos nga tigulang. Sa miagi, supak kaayo siya sa paningkamot sa iyang asawa sa pag-alagad kang Jehova. Apan sa ulahi misugod siya sa pagtambong sa mga tigom sa Kingdom Hall ug nagtuon sa Bibliya uban kaniya.

Tungod sa mainit nga klima, problema usab ang mga lamok. Usahay daghan kaayo sila, nga samtang magsulti ka pa, masudlan ug lamok ang imong baba. Siyempre, daghan pang buhing mga butang nga matahom kaayong tan-awon, sama sa maanindot nga rosas ug kolor nga mga flamingo nga nagpuyo sa taliwala sa ilang natural nga puloy-anan sa lanubong tropikal nga mga tanom ug mga punoan sa prutas.

Ang pagsinati sa lokal nga mga pagkaon maoy dakong pakurat. Diha sa usa ka isla, nakakita ako ug daw punoan sa kahil nga puno sa tubigong bunga. Mihangyo ako sa babaye sa balay kon makapupo ba ako ug usa o duha sa iyang mga kahil. Iya akong gipasidan-an. Dili kini kahil ug aslom nga prutas kini. Apan ako ray mag-igo, miingon siya. Buweno, nagtuo ako nga nahibalo ako kon unsay kahil. Busa mipupo ako ug dakong kahil ug miingkib. Pagkadako sa akong kakurat! Mikisdom ang akong baba. Aslom kaayo ang maong prutas, samag lemon. Mikatawa ang babaye, apan nakakat-on ako nga bisag ang bunga sa aslom nga punoan sa “kahil” samag kahil nga tan-awon, kadto dili gayod kahil ug lami!

Abi nako ug nakapaangay na ako sa kinabuhi sa isla hangtod nga mibiyahe ako sa usa sa mga isla dili pa dugay. Midayon ako sa usa ka tigulang nga biyudo dihang nag-alagad ako sa kongregasyon. Sa pagbangon sa unang buntag, gidapit niya ako sa pagpamuhaw uban kaniya. Nagtulo sa laway ang akong baba nga naghinamhinam​—hangtod nga iyang gihisgotan ang sud-an. “Piniritong mga iring”! Dihang misulod ako sa kosena ug balibaran na unta ang pagkaon, nakita nako siya nga naghimog pancakes. “Hain man ang ‘piniritong mga iring’?” Nangutana ako. Iyang gitudlo ang mga pancake. Nahuwasan ako, ug nangatawa kaming duha. Abi niyag nahibalo ako nga gitawag ug piniritong iring ang pancake didto niadtong islaha.

Mga Ganti sa Pagbiyahe

Tungod sa halayong lokasyon sa pipila ka isla, dunay dakong panginahanglan ug dugang mga ministro sa pagtabang sa pagpakaylap sa maayong balita sa Gingharian sa Diyos. Gikinahanglan kini dili lamang sa pag-abot sa mga tawong Iningles ug sinultihan sa Bahamas kondili sa pagkontak usab sa mga lalin nga gikan sa Haiti nga Pranses ug sinultihan.

Ang pagkahimong nagapanawng ministro sa Bahamas maoy makawiwiling hagit nga nagkinahanglan ug pipila ka mga pagpasibo sa paagi sa pagpuyo sa isla. Apan adunay dagkong mga ganti usab. Ang usa sa dili-hitupngang kalipay mao ang pagtan-aw sa pagsanong sa mga tawo sa balita sa Bibliya. Lain pa mao ang maayong pribilehiyo sa pagdasig sa espirituwal nga paagi sa nagkatag nga mga kongregasyon ug sa hilit nga mga grupo.

Kami sa Bahamas nalipay sa katahom sa mga baybayon sa nagapangidlapkidlap sa rosas ug puting mga balas ug sa matahom nga mga takot nga matahom kaayong gidayandayanan sa mga isda. Apan ilabinang nalipay kami sa nagakahitabo karon dinhi ug sa tibuok yuta. Ingong mga Saksi ni Jehova, atong nakita ang Salmo 97:1 nga natuman. Kini nag-ingon: “Si Jehova nahimong hari! Paglipay kalibotan. Pagmayaa ang kaislahan.”—Sumala sa giasoy ni Anthony Reed.

[Blurb sa panid 27]

Ginerbiyos ako dihang nakita ko ang aso sa kabina sa ayroplano dihang mipataas kini gikan sa yuta

[Blurb sa panid 28]

Ang taga Bahamas adunay tinuod nga gugma sa Bibliya. Kini ang nakahatag kalipay sa pagdala kanila sa “maayong balita” sa Gingharian ni Jehova

[Blurb sa panid 28]

Nahinumdoman ko ang unang higayon nga nakakita akog lawa nga lad-an. Nagkamang kini sa salog ug daw sama kadakoa sa akong kamot!

[Blurb sa panid 29]

Gipangutana nako siya, “Hain man ang ‘piniritong mga iring’?”

[Mapa/Letrato sa panid 26]

(Alang sa bug-os nga pagkahan-ay sa teksto, tan-awa ang publikasyon)

FLORIDA

BAHAMAS

DAGAT ATLANTIKO