Mga Magmamantala sa Gingharian Nagtaho
Pagkamaminatud-on Mopatunghag Pagdayeg Kang Jehova
GIBAOD ni Jehova nga ang iyang mga alagad magmaminatud-on, may-hustisya, ug kasaligan. Pananglitan, si Moises gitambagan sa pagpili ingong mga magtatan-aw niadtong “mga lalaking may katakos, mahadlokon sa Diyos, mga lalaking kasaligan, nagadumot sa ganansiya nga dili matarong.” (Exodo 18:21) Sama niadtong mga piniling lalaki, ang mga Saksi ni Jehova sa tibuok kalibotan nailhang kasaligan, sumala sa ginapakita sa mosunod nga kasinatian.
◻ Ang usa ka Saksi nga nagatrabaho sa sangang buhatan sa Watch Tower Society sa Ghana nasaypan sa pagbayad sa sobrang $3,630 sa cashier sa usa ka bangko. Ang sayop wala himatikdi sa cashier o sa igsoon niadtong panahona. Apan, sa pag-abot sa balay, nakita sa igsoon nga siya nabayran nga sobra ug mibalik dayon sa bangko nga dala ang kuwarta. Ang cashier, sa pagkakita sa igsoon, mipatugbaw: “Ania ra siya! Siya tinuod mibalik! David, ang imong tawo nagdala sa kuwarta!” Ang kuwarta giuli ngadto sa cashier. Si David, nga usa sa mga Saksi ni Jehova nga nagatrabaho sa samang bangko, nagpasalig sa cashier ug sa ubang nahibalo sa sayop nga ibalik ra ang kuwarta inigkadiskobre sa igsoon sa sayop.
“Samtang nagpadayon ang drama,” ang taho nag-ingon, “ang tanang mata” didto sa duha ka igsoon. Ang usang nag-uli sa kuwarta mipatin-aw: “Aw, ako dili makatago niining kuwartaha uban ang maayong konsensiya sa atubangan sa akong Diyos, si Jehova.” Kining kasoha nakadugang sa pagtahod nga nabatonan sa opisyales sa bangko alang sa Watch Tower Society.
◻ Ang pagkamaminatud-on mopatunghag pagtahod, ilabina sa kalibotan nga malimbongon kaayo. Kining igsoona nasayod nga siya manubag sa usang labaw kay sa tawo, si Jehova nga Diyos. Ang maong pagkamaminatud-on mopatunghag pagdayeg kang Jehova, kay siya “usa ka Diyos nga matinumanon, nga kaniya walay inhustisya.”—Deuteronomio 32:4.
◻ Ang pagkamaminatud-on ug paghupot ug maayong konsensiya ngadto sa Diyos gipahayag usab sa usa ka kasinatian sa usa ka batan-ong lalaki sa Thailand. Siya misuskribir sa Bantayanang Torre ug Pagmata! ug nagsugod na sa pagpadapat sa tambag sa Bibliya nga iyang nasayran sa maong mga magasin. Siya ang pangulong accountant sa kompaniyang iyang gitrabahoan, ug ang iyang konsensiya misugod sa pagtulisok kaniya, sanglit naandan sa daghang negosyo ang paghupot ug duha ka libro sa kuwenta aron sa paglikay sa mga buhis. Sa iyang giduol ang manedyer bahin niana, gikataw-an ra siya sa manedyer. Unya sa usa sa mga magasin diha ang usa ka artikulo nga nagpasiugda sa panginahanglan sa pagkamaminatud-on. Tungod sa nasamok nga konsensiya, ang accountant miampo kang Jehova sa pagtabang kaniya sa pagtul-id sa maong suliran sa buhis uban sa iyang manedyer. Nalangkit ang dakong kantidad sa salapi. Sa sunod buntag iyang gipangayo ang permiso sa manedyer nga bayran ang buhis nga utang, ug sa iyang katingala, ang manedyer misugot nga walay dugang argumento.
Karon kining tawhana malipayon samtang siya nagakinabuhing maminatud-on atubangan sa Diyos ug sa tawo. Ang maong maalamong panggawi nagalipay, usab, kang Jehova, kay sumala sa ginapahayag sa Proverbio 27:11: “Magmaalamon ka, anak ko, ug lipaya ang akong kasingkasing, aron akong matubag ang nagabiaybiay kanako.”
[Hulagway sa panid 21]
“Ako dili makatago niining kuwartaha uban ang maayong konsensiya”