“Nanghinaot Kaming ang Tanan sa Yuta Makabasa Niini!”
KANA ang gisulat sa usa ka tawong misulat sa pagpahayag sa iyang apresasyon sa librong Life—How Did It Get Here? By Evolution or by Creation? Ang iyang sulat banaag sa mga pagbati sa minilyong tawo nga nakadiskobre nga kining 256-panid ilustradong libro bililhon kaayo sa pagtubag sa mga pangutana mahitungod sa sinugdanan ug katuyoan sa kinabuhi sa yuta.
Giluwatan sa miaging tuig panahon sa mga kombensiyon sa mga Saksi ni Jehova sa nagkalainlaing nasod, ang libro napanagtag sa minilyong kopya ug sa daghang pinulongan. Kini nakatabang sa mga tawo sa pagsabot gikan sa siyentipikanhon ug Biblikanhong ebidensiya nga aduna gayoy Maglalalang nga nagbuhat kanato ug siya adunay kahibulongang katuyoan alang sa katawhan.
“Yanong Sabton”
Ang libro gisulat sa paaging sayong sabton. Sumala sa giingon sausa ka sulat: “Sultihan ko kamo nga nakadayeg kaayo ako sa inyong basahon. Kinsa, nga may makataronganong hunahuna, ang makasupak sa inyong tin-awng lohiko? Nahimo ninyong yanong sabton kining lalom kaayo ug talagsaong ulohan—dakong kahimoan sa pagtagad sa batid kaayong panukiduki nga nahilangkit sa maong basahon.”
Sa susama, ang usa ka kanhi ebolusyonista nga may kahibalong siyentipikanhon miingon: “Ako nahibulong sa katin-aw ug gahom niining bag-ong basahon. Sa akong hunahuna kini ang labing maayong libro sa siyensiya nga sukad akong nabasa aron sa pag-ugmad ug apresasyon sa kinabuhi. Kini sa siyentipikanhong paagi matugkaron, apan sa lebel nga mapabilhan ni bisan kinsa.”
Ang lain nagpahayag: “Ang tibuok nga basahon usa ka obra maestra. Ang unod nga dibuho ug pinatik nga pulong giipon sa makadaning paagi nga bisan kadtong molikay sa maong matang sa materyal makadayeg sa yano ug pinamubo nga estilo. Ang halangdon ug dili-insultong paagi sa pagpadayag sa kamatuoran motaganag daghan kaayong ebidensiya sa pagtubag nga walay sipyat sa pangutana diha sa titulo sa basahon.”
Mga Ilustrasyon Motabang sa Pagtandog sa Kasingkasing
Mahitungod sa maanindot nga mga hulagway, usa ka tawo misulat: “Unsaon kaha namo pagpasalamat kaninyo tungod niining labing matahom nga basahon? Ang mga ilustrasyon maoy matahom kaayong mga gasa sa arte.”
Apan ang ginatos nga ilustrasyon, apil ang mga letrato, labaw pa sa matahom nga arte. Sila nagatudlo, nagalig-on sa mga punto diha sa teksto. Sumala sa gisulat sa usa ka pamilya: “Ang mga ilustrasyon ug kayano sa basahon dakong tabang alang niadtong malisdan sa pagsabot sa natad sa siyensiya.” Ang laing sulat mikomento: “Ang mga ilustrasyon ug mga kinutlo sa panaplin makatabang kaayo sa pagsabot sa punto ug paghinumdom.”
Ang mga emosyon natandog ilabina sa kapitulo 19, “Usa ka Yutang Paraiso nga Duol Nang Moabot.” Mahitungod sa usa ka ilustrasyon nianang kapituloha, ang usa ka pamilya sa Australia misulat: “Kana dulot makatandog sa katawhan. Tinong ang Paraiso ug pag-alagad kang Jehova sa walay kataposan takos sa paningkamot. Nakahilak kami sa mga ilustrasyon.”
Ang lain misulat: “Kini ang labing matahom nga basahon nga sukad akong nakitang gipatik sa mga Saksi ni Jehova. Sa pagkaabot ko sa panid 243 ug nakita ang hulagway sa gamayng batang babaye ug ang mga tigre, ako nakahilak.” Ang lain pa miingon: “Ako nakahilak sa dihang akong gipaklipakli kana. Ako nakahilak sa kalipay.” Ug ang lain pa gayod, gikan sa Canada, misugid: “Ang akong kasingkasing natandog nga walay ingon sukad masukad ug ang akong mga mata napuno sa mga luha sa kalipay.”
Pihong may nailhan kang mga tawo nga makabenepisyo sa pagbatog kopya sa basahong Creation. Nganong dili magpadalag usa ka kopya ingong gasa? Tan-awa ang impormasyon sa sunod panid alang sa mga detalye.