Guadeloupe—“Ang Isla sa Matahom nga mga Tubig”

ANG Guadeloupe, nga nahimutang hapit 300 ka milya (480 km) sa habagatang sidlakan sa Puerto Rico, maoy grupo sa mga isla nga duol sa kinatung-an sa mga isla sa Lesser Antilles. Diha sa mapa, ang duha ka dagkong mga isla morag kabakabang mibukad ang mga pako. Ang bukirong Basse-Terre, nga adunay dili-aktibong bolkang Soufrière, anaa sa kasadpan, ug ang bakilirong Grande Terre anaa sa sidlakan. Ang duha ka isla nabulag sa hiktin nga suba sa Rivière Salée. Lima pa ka gagmayng isla ug pila ka pinong mga isla naglangkob niining langyawng département, kun administratibong distrito sa Pransiya.

Sa wala pa madiskobrehi ni Christopher Columbus kini sa 1493 ug mihatag sa ngalan niini karong Guadeloupe, ang netibong mga taga Caribeano nagtawag niining Karukera​—Isla sa Matahom nga mga Tubig. Sa walay duhaduha, anaa sa ilang hunahuna ang abundang ulan ug lanubong tropikal mga tanom diha sa mga isla. Karon, kanang ngalana mas tukma tungod sa abundang tubig sa kamatuoran nga nagaagos sa 328,000 ka molupyo. Bisag daghang Katoliko, ang kadaghanan niining manggitahuron ug maabiabihong mga tawo maikagong nagapanginom sa maputling mga tubig sa kamatuoran gikan sa Pulong sa Diyos, ang Bibliya.

Mga Tubig sa Kamatuoran Misugod sa Pag-agos

Ang unang tulo sa mga tubig sa kamatuoran misugod sa pag-agos sa Guadeloupe sa 1938, sa wala pa mibuto ang Gubat sa Kalibotan II. Si Cyril Winston ug ang iyang pamilya gikan sa kanait nga isla sa Dominica ug misugod sa pagwali sa maayong balita sa mga taga isla. Wala magdugay 5 ka tawo ang misugod sa regular nga tigom, ug sa pagka Hunyo 1940 ang unang kongregasyon naorganisar, uban sa mga 15 ka tawo nga nagtambong sa senemanang Pagtuon sa Bantayanang Torre sa Pranses.

Apan, mihatag ug dakong kapit-osan ang Gubat sa Kalibotan II gikan sa gimandoan sa Alemang kagamhanan sa Pransiya. Niadtong panahona ang tanang literatura nga gipadala sa barko gikan sa Brooklyn gisunog diha sa pantalan sa pag-abot niini, ug naputol ang komunikasyon sa mga hedkuwarter sa Brooklyn. Nagkasakit ug grabe si Igsoong Winston ug napugos siya sa pagbalik sa Dominica, diin didto namatay siya sa tulo ka bulan sa ulahi. Diyutay kaayo ang agos sa mga tubig sa kamatuoran; malisod kadto nga panahon sa gamayng grupo sa mga Kristohanon.

Pagkahuman sa gubat, mibalik ang mga igsoon sa ilang buluhaton kutob sa ilang maarangan. Aron maabot ang mas daghang tawo, misulay sila sa paghatag ug mga pakigpulong sa Bibliya diha sa publikong mga dapit magabii. Ang mamumulong mihatag sa iyang pakigpulong diha sa hataas nga tungtonganan, ang mga tawo nag-alirong sa iyang palibot. Laing igsoon ang magkapot sa hinimo sa balay nga sulo aron may hayag. Sa mabugnaw, tropikal nga gabii, ang mga lumalabay ug mga silingan nakatagamtam sa pagpaminaw sa Pulong sa Diyos nga gihisgotan diha sa nataran.

Apan sa panahon sa usa sa mga pakigpulong usa ka grupo sa Katolikong mga boy-scout kalit nga mitungha. Gilibotan ang mamumulong, misugod sila sa pagpabulhot sa ilang mga trompeta ug gibagting ilang dagkong mga kaldero, aron dili madunggan ang tingog sa mamumulong. Nakamatikod sa nahitabo, ang mamumulong kalmadong mipadayon sa iyang pakigpulong apan pinaagi lamang sa pagkumpas ug sa paglihok sa iyang mga ngabil. Dayon, ang mga scout, nga nahutdan ug ginhawa, misurender ug mitalikod. Ug ang igsoon mipadayon sa iyang pakigpulong sumala sa giandam.

Ang Agos Mikusog

Sa nangaging katuigan ubay-ubayng mga misyonero ang gipadala sa Guadeloupe aron sa pagtabang sa gamayng grupo sa madasigong lokal nga mga magmamantala. Sa sinugdan, limitado lamang ang ilang mahimo tungod sa babag sa pinulongan. Apan, sa tungatunga sa katuigang 1950, ang Pranses ug sinultihang mga misyonero miabot, ug ang buluhaton miuswag.

Apan, tungod sa kusganong pagsupak sa relihiyon, daghan sa midawat sa kamatuoran sa Bibliya kinahanglang magmalig-on sa ilang baroganan uban sa tagsaong determinasyon. Mao kini ang nahitabo sa usa ka babaye nga kinahanglang bawtismohan sa dagat sa tabon sa kangitngit sa alas singko sa buntag. Kining babayeha ug ang iyang bana dungan nga misugod sa pagtuon sa Bibliya. Apan sa misugod ang mga silingan sa pag-ipit kanila, miundang ang bana sa pagtuon tungod sa kahadlok nga mawad-an ug mga kustomer sa iyang gamayng tindahan sa groseriya. Mipadayon ang babaye ug mihimog maayong pag-uswag. Apan, sa ulahi, misamot ang pag-ipit nga gihulga siya sa iyang bana nga patyon.

Usa ka gabii, iyang nakita ang usa ka kutsilyo nga gitago ilalom sa unlan sa iyang bana, ug ang tinamdan sa bana, iyang gibati, nagpaduhaduha kaniya sa mga intensiyon sa iyang bana. Nakamatikod nga nameligro ang iyang kinabuhi, midangop siya ngadto sa balay sa usa ka pamilyang Saksi, nga mibaktas ug mga napulo ka milya (16 km) latas sa tropikal nga lasang ug sa mga plantasyon sa saging. Samtang nagtagotago gikan sa iyang bana, mihangyo siya nga magpabawtismo, nga nag-ingon: “Kon gikinahanglan kong atubangon ang kamatayon tungod sa akong pagtuo, buot akong maisip nga usa sa katawhan ni Jehova!” Sa ulahi kining matinumanong igsoong babaye misulod sa bug-os panahong pag-alagad ug nahimong espesyal payonir sa nangaging 24 ka tuig. Bisan ug nawad-an siya sa iyang unodnong pamilya tungod sa iyang pagtuo, siya nakabaton ug dakong espirituwal nga pamilya, sumala sa gisaad ni Jesus diha sa Mateo 19:29. Siya nakatabang ug mga 35 ka tawo sa pagpahinungod ug bawtismo.

Ang mga tubig sa kamatuoran miabot sa dili madahom nga mga paagi. Duha ka Katolikong tawo sa halayong balangay sa amihanan nakabaton ug Bibliya. Misugod sila sa pagbasa niini kada adlaw ug nangitag tawo nga makatabang kanila sa pagsabot niana. Gisultihan sila sa silingan nga makahimo sila sa pagkontak sa iyang ig-agaw, nga membro sa “Jehova,” nga malipay sa pagtabang kanila. Kadto mao ang unang higayon nga ilang nadunggan ang ngalan sa Diyos.

Gipadad-sila sa ig-agaw ug mga kopya sa Pagmata! nga magasin, diin dili lamang nawili sila sa pagbasa niini kondili giapod-apod usab ang uban diha sa balangay. Sa ilang nahibaloan nga dunay asembliyang himoon duol sa Pointe-à-Pitre, miadto sila niana ug gisultihan ang magtatan-aw sa sirkito: “Mianhi kami ning asembliyaha, ug buot kaming magpabawtismo.” Siyempre, mainiton silang giabiabi apan gitabangan usab aron makasabot nga adunay pipila ka lakang ug mga kausaban ang kinahanglan himoon sa dili pa mahimong kuwalipikado sa bawtismo. Busa gihimo ang mga kahikayan aron matabangan sila, ug sila gibawtismohan sa pagkasunod nga asembliya.

Ang mga eksperyensiya nga sama niini nakahatag dakong kalipay ug pagdasig sa mga igsoon. Ang mga tubig sa kamatuoran nagpadayon sa pag-agos, ug sa 1960, dihay total nga 251 ka magmamantala sa Gingharian sa Guadeloupe.

Gidawat ang Hagit

Ang dakong suliran ning gamayng isla mao ang pagpangitag mga pasilidad nga may igong gidak-on alang sa mga asembliya. Sa dugay nang panahon, duha lamang ka lugar ang magamit. Ang mga igsoon may dakong tinguha sa paghimog mga asembliya sa tibuok isla aron ang mga tubig sa kamatuoran maabot sa mas daghang tawo.

Sa kataposan, ang mga igsoon midesider sa pagtukod ug ilang kaugalingong pasilidad. Sila midesinyo, ug miamot ug igong salapi alang sa, mabalhinbalhing tinukod nga hinimo sa mga tubong asiro ug sin, nga may igong gidak-on nga makapasulod ug 700 ka tawo. Sa ilang gigamit ang ilang kaugalingong “assembly hall” sa unang higayon sa Basse-Terre sa Enero 1966, ang maikagong 907 miabot. Ang “hall” gamay na kaayo sa pagsugod pa!

Uban niining bag-ong nga tagana, nahimong posible ang paghimog mga asembliya bisan diha sa halayong mga isla. Kini nakahatag ug dakong kauswagan sa pagpaambit sa mga tubig sa kamatuoran sa daghang dapit. Handurawa ang reaksiyon sa lokal nga mga tawo sa Grand Bourg, usa ka gamayng lungsod nga may mga 6,000 ka tawo sa isla sa Marie Galante, sa ‘gisulong’ sila sa tulo ka barko nga nagdalag duolan sa usa ka libong mga kombensiyonista dala ang ilang mga karga ug mga gamit. Usa kadto ka talan-awon nga wala pa makita sukad​—usa ka hataas nga linya sa mga tawo nga nagmartsa gikan sa pantalan paingon sa lungsod ngadto sa lugar nga asembliyahanan. Nakahatag kinig maayong pamatuod sa lokal nga mga tawo, ug karon adunay tulo ka madasigong kongregasyon ning islaha.

Sa nangaging katuigan, ang “hall” napadak-an sa tulo ka beses. Sa ulahi, kini nahimong 30-tonilada nga tinukod, nga nagkobreg mga 32,000 ka kuwadrado piye (3,000 sq m), nga makapalingkod ug 5,000. Sa matin-aw, dakong buluhaton ang pagkarga, pagtukod, ug pagbungkag sa tanang kasangkapan matag panahong may asembliyang himoon. Dugang pa may mga problema, mas lisod na ang pagpangitag maayong mga lokasyon nga tukoran sa madaladalang “hall” tungod kay ang bakanteng lote kusog nga gipangtukoran ug mga proyekto. Nakita nga ang solusyon lamang mao ang pagpangitag permanenteng lugar alang sa “hall.”

Sa makausa pa, mitagana si Jehova sa mga panginahanglan sa mga igsoon. Ang nahimutang sa sentro nga yuta nga kapin sa katunga ka milyong kuwadrado piye (50,000 sq m) nakit-an. Tungod sa dakong mga amot gikan sa tanang mga kongregasyon sa isla, napalit ang lugar sa 1979. Nahimo kining permanenteng sentro sa tinuod nga pagsimba sa Guadeloupe.

Nagapadayong Pag-agos sa mga Tubig sa Kamatuoran

Balik sa 1954 sa unang gitukod ang sanga sa Guadeloupe, dihay 128 ka magmamantala sa Gingharian. Karon kanang numeroha mitubo ngadto sa kapin sa 4,500. Kana nagpasabot nga hapit usa sa kada 72 ka tawo sa Guadeloupe maoy saksi ni Jehova. Ug diha sa Pointe-à-Pitre, ang prinsipal nga siyudad, ang numero maoy usa sa matag 29​—sa walay duhaduha usa sa labing maayong proporsiyon sa kalibotan!

Kining mga matinumanon okupado sa pagpaambit sa mga tubig sa kamatuoran, nagadumala ug kapin sa 7,300 ka pagtuon sa Bibliya sa balay uban sa mga interesado sa tibuok teritoryo. Ang ilang mga paningkamot gipanalanginan dihang 12,553 ang nagtigom sa 1986 sa pagsaulog sa kamatayon ni Ginoong Jesu-Kristo. Tinuod, gibati sa mga igsoon sa Guadeloupe nga ‘giuyog’ ni Jehova nga Diyos ang ilang mga isla aron dungang matigom ang “tilinguhaong mga butang.”​—Haggeo 2:7.

Ang “isla sa matahom nga mga tubig” nahimong mas matahom sukad masukad sa espirituwal nga paagi. Daghan ang misanong sa tawag: “Umari kamo!” ug nanginom sa “tubig sa kinabuhi nga walay bayad.”—Pinadayag 22:7.

[Mga Mapa sa panid 27]

(Alang sa bug-os nga pagkahan-ay sa teksto, tan-awa ang publikasyon)

GUADELOUPE

GRANDE TERRE

Pointe-à-Pitre

Soufrière

Rivière Salée

BASSE-TERRE

MARIE GALANTE

Grand Bourg