Pag-uswag sa Gingharian sa Yuta sa mga Imperador
KON imong tan-awon ang mapa sa Sentral Uropa, imong makita nga nahimutang sa tiilan sa Alps ang gamayng nasod sa Austria, nga may luna nga 32,375 kuwadrado milya (83,850 sq km) lamang. Kini mao ang yutang-natawhan ni Johann Strauss, ang hari sa balse. Moanhi dinhi ang mga tawo sa pagtan-aw uban sa katingala sa pagsayaw sa kabayong Lippizaner. Ug dinhi, sa usa ka higayon, mao ang dapit sa dakong Austro-Hungarianong Imperyo, nga nagmando sa Bohemia ug Moravia, mga bahin sa Italya, Polandiya, Romania ug Yugoslavia.
Kanang imperyoha maoy sa panumdoman na lamang karon, apan naglungtad gihapon kini sa 1911 sa dihang si Charles Taze Russell, ang unang presidente sa Watch Tower Society, miduaw sa Vienna ug gihatagag dakong publisidad sa prensa ang iyang pakigpulong. Naglungtad gihapon kini sa tulo ka tuig sa ulahi sa gidala sa usa ka tawo ang maayong balita didto.
Usa ka Hudiyo si Max Froechl nga sa ulahi misagop sa ngalang Maxwell Friend. Siya misulat: ‘Sa dihang si J. F. Rutherford, nga nahimong ikaduhang presidente sa Watch Tower Society sa ulahi, miduaw kanamo, gipangutana niya ako kon mosugot ba akong ipadala sa Austria-Hungaria aron sa pagpakaylap sa maayong balita sa Mesiyanikong Gingharian sa daghang mga Hudiyo nga nagpuyo didto. Malipayon nakong gidawat ang imbitasyon ug miadto sa Prague sa sayo sa 1914. Tapos niana miadto ako sa Vienna. Didto upat lamang ang nagsuskriber sa Ang Bantayanang Torre sa Vienna. Kanunay nakong giduaw silang upat sa pagpukaw sa ilang interes sa Pulong sa Diyos.’
Apan, sa ulahi nianang tuiga, gipatay ang Austrianong prinsipeng sumusunod, ug miapil ang Uropa sa Gubat sa Kalibotan I. Ang Sentral nga mga Gahom, lakip sa Austria-Hungaria, napildi sa gubat, ug ang dakong Austro-Hungarianong Imperyo napukan. Gikan sa kagun-oban, ang gamayng Aleman ug sinultihang Republika sa Austria natawo.
Apan, sumala sa tagna sa Bibliya, laing “nasod” ang matawo niadtong panahona, ang espirituwal nga nasod nga may mga membro sa tibuok kalibotan. (Isaias 66:8) Samtang kining “nasora” misugod sa pagpakaylap sa maayong balita sa natukod na karong Gingharian sa Diyos taliwala sa tanang kanasoran, ang impluwensiya niini sa ulahi nabati sa Austria.
Si Joseph Ehm, ang magtutudlo sa musika sa Deutsch-Wagram, duol sa Vienna, nakadungog sa balita ug midawat sa tuno sa kamatuoran sa Bibliya. Wala magdugay nga siya misugod sa pakigbahin sa maayong balita sa uban. Sa pagkasunod tuig, sa 1921, laing interesado sa Austria, si Franz Ganster, nga tigtipig sa kuwenta sa Klagenfurt, nakadawat ug basahon gikan sa Switzerland. Sa samang panahon, ang mag-uuma sa Upper Austria, si Simon Riedler, nakahupot ug pulyeto nga gikan sa usa ka higala sa Linz. Busa, naporma ang gamayng sinugdan. Ang unang sangang opisina sa Watch Tower Bible and Tract Society sa Austria natukod sa 1923. Ang binhi sa kamatuoran nahulog sa tabunok nga yuta ug misugod sa pagtubo. Sa pagka 1937, dihay 549 ka mga magmumuo sa pagpakaylap sa maayong balita.
Ang Ikaduhang Dakong Krisis sa Kalibotan
Apan, niining yugtoa nakutaw ang ubang mga puwersa nga may malaglagong epekto nga nakahimo sa Austria nga dugokan sa mga hitabo sa kalibotan. Ang nasodnong kagubot ug kasungian sa politika nakaagak, sa 1938 sa natawo sa Austria nga kansilyer sa Alemanya, si Adolf Hitler, sa iyang lumad nga yuta ngadto bag-ong Reich, o imperyo sa Aleman. Giaprobahan kini sa nasyonal nga plebiseto ug gipaluyohan sa lokal nga kagamhanan sa Katoliko. Apan nakahatag kinig mga problema sa mga Saksi ni Jehova sa Austria.
Tungod sa ilang pagkahimong neyutral, daghang mga Saksi sa Austria gibanlod karon sa mga kampong konsentrasyon. Ang Die Geschichte des Konzentrationslagers Mauthausen (History of Mauthausen Concentration Camp) nga may pasiuna ni Franz Jonas, ang kanhing presidente sa Austrian Federal Republic, miingon: “Adunay pundok sa mga tawo sa Kampong Konsentrasyon sa Mauthausen nga gilutos tungod lamang sa relihiyosong mga katarongan: ang mga membro sa sekta sa ‘Matinuorong mga Estudyante sa Bibliya,’ o ‘mga Saksi ni Jehova’ . . . Ang ilang pagsalikway sa panumpa sa pagkamaunongon ngadto kang Hitler ug sa ilang pagdumili sa paghatag ug bisan unsang serbisyo militar—usa ka politikal nga resulta sa ilang pagtuo—mao ang hinungdan sa ilang paglutos.”
Bag-ong Pag-uswag
Ang “1,000 ka tuig” nga Reich ni Hitler milungtad lamang ug pipila ka tuig, ug sa napukan kini, nakabaton ug kagawasan kining matinumanong mga panon sa maunongong mga alagad sa Diyos. Ang otsentay-kuwatro anyos nga si Alois Moser, nga nakagugol ug daghang katuigan sa mga kampong konsentrasyon, nagsugilon bahin sa adlaw sa iyang kagawasan sa 1945: “Nahitabo kadto sa kakahoyan duol sa Schwerin, Mecklenburg, 230 ka Saksi nga gikan sa napulo ka nasod nagtigom. Among gipahayag ang kalipay sa among mapasalamatong kasingkasing diha sa usa ka resolusyon: ‘Kaming tanang mga Saksi ni Jehova nagpadala sa among kinasingkasing nga pangomosta ngadto sa matinumanong katawhan ni Jehova sa pakigsaad ug sa mga kaubanan niini sa tibuok kalibotan . . . Kami naghimog solemne nga panaad nga usa lamang ang among tinguha, human nga nakaagi sa taas nga talikala sa walay kataposang mga pamatuod sa katingalahang panalipod ug kaluwasan gikan sa libolibong mga kagubot ug kasakitan sa panahon sa among pagkabilanggo sa langob sa leon—nga mao ang pag-alagad kang Jehova ug sa iyang Hari si Jesu-Kristo gikan sa kinasingkasing nga pasalamat uban sa mainandamon ug malipayong kasingkasing ug sa walay kataposan.’”
Sa milabay ang usa ka tuig, 730 ka magdadayeg ni Jehova mitaho sa ilang kalihokan. Duha ka tuig tapos niana dihay 1,551, ug ang pag-uswag mipadayon nga walay paghunong sukad niadto. Ang buluhaton sa pagsangyaw tali sa libolibong langyawng mga mamumuo nakaani usab ug mga resulta. Ang Austria karon adunay mga pundok sa Kristohanong kongregasyon nga Hungariano, Ingles, Polako, Romaniano, Kinatsila, Turko, ug Arabiko, maingon man sa 229 ka Aleman ug sinultihan ug 6 ka Serbo-Croatiano nga pinulongan. Sa pagkakaron, ang gidaghanon sa mga Saksi ni Jehova adunay kapin sa 15,000, apan daghan pa ang nadani sa gahom sa maayong balita. Busa, 27,502 ang nagtigom sa 1985 sa tinuig nga pagsaulog sa kamatayon ni Jesus. Tinuod, ‘ang diyutay nahimong usa ka libo.’—Isaias 60:22.
Usa ka Pasundayag sa Internasyonal nga Panaghiusa
Tungod sa geograpiya sa Austria ang mga Saksi nga gikan sa Gresya, Yugoslavia, Polandiya, Hungaria, ug Turkey nakaanhi dinhi sa dili pa dugayng katuigan alang sa malipayong panag-uban. Sa 1981 makapukaw ang talan-awon sa dinha, diha sa “Maunongon sa Gingharian” Distritong Kombensiyon, dungang nanindog gikan sa ilang mga lingkoranan uban sa ilang mga igsoon gikan sa Yugoslavia, Polandiya, ug Hungaria sa pagtiklop sa kombensiyon uban sa malipayong pag-awit alang kang Jehova.
Sa 1982 ang mga Saksi sa Austria sa makausa pa nahimong tig-abiabi sa ilang mga igsoon gikan sa Hungaria diha sa kombensiyon sa Vienna. Ang taga Vienna nga magdudula kanhi miasoy diha sa nagkatigom nga mga Saksi bahin sa iyang pagbansay sa iyang mga dula niining mismong istadyom nga gihimoan sa asembliya, ug sa iyang pakigbahin sa kataposang sangka batok sa tem sa Hungaria. Sa ulahi, ang usa ka Saksi nga gikan sa Hungaria miadto sa opisina sa kombensiyon ug miasoy nga siya, usab, maoy usa ka magdudula kanhi. Ang iyang kataposang bangga sa dula maoy batok sa usa ka tem sa Austria. Karon kining duha ka Saksi wala mag-indigay sa usag usa. Sila dungang nagadalagan sa Kristohanong bangga alang sa kinabuhing walay kataposan.—Hebreohanon 12:1.
Nagpadayon ang Pag-uswag sa Gingharian
Ang mga tawo sa nagkalainlaing gigikanan, maingon man sa nagkalainlaing politikal ug relihiyosong mga hunahuna, nakadangat sa kahibalo nga walay pagmando pinaagig hari ni diktador ni demokrasya ang makapatunghag dumalayong kasulbaran sa problema sa katawhan. Ang kasayoran bahin niini miresulta ug nagapadayong pagtubo taliwala niadtong miila sa Gingharian sa Diyos ingong mao ang kamatuoran ug kinasingkasing nga nagpasakop niining Ginghariana ingong maunongong mga sakop. Ang mga Saksi ni Jehova sa Austria nagpadayong madasigon sa pagpaningkamot sa paghatod sa maayong balita sa Gingharian sa tanang matang sa tawo. Kasamtangan, niining yuta sa mga imperador, ilang ginauna kanang kagamhanana kansang makaayong pagmando modangat “gikan sa dagat ngadto sa laing dagat ug gikan sa Suba ngadto sa mga kinatumyan sa yuta.”—Salmo 72:8.
[Mapa sa panid 26]
(Alang sa bug-os nga pagkahan-ay sa teksto, tan-awa ang publikasyon)
KASADPANG ALEMANYA
CZHECHOSLOVAKIA
SWITZERLAND
AUSTRIA
HUNGARIA
ITALYA
YUGOSLAVIA
THE ALPS