Ang Ipasabot sa mga Balita

Ang Katungod sa Paghimog Desisyon

Ang mga katungod ba sa pamilya nagayatak sa relihiyosong mga pagtuo? Dili, miingon ang distritong hukmanan sa Oita, Japan. Dili “supak sa balaod [sa usa ka tawong hamtong] ang pagdumili sa pag-abuno sa dugo sa pagsunod sa iyang pagtuo,” mihukom ang hukmanan.

Ang tawong nalangkit niining sumbong sa korte adunay sarcoma​—usa ka makamatayng tumor​—diha sa bukog sa iyang wala nga paa, ug ang tibuok batiis kinahanglang putlon. Misugot siya sa operasyon, basta walay pag-abuno sa dugo nga ihatag. Mibalibad ang ospital sa pag-opera niining kondisyona. Nahadlok nga mawad-ag sustenso sa anak sa ilang pagkatigulang, ang ginikanan niining 34-anyos nga Saksi ni Jehova mipasakag mando sa korte, nangayo sa ilang katungod ingong mga ginikanan. Samtang giila sa hukmanan ang ilang katungod “sa pagkinabuhing malipayon uban sa pamilya ug sa pagpaabot ug sustento gikan sa ilang anak sa umaabot,” gipakanaog ang mando nga ang “‘mga katungod sa pamilya’ dili makayatak sa relihiyosong pagtuo” sa indibiduwal. (Milampos ang operasyon nga walay paggamit sa dugo.)

Kinahanglang atimanon gayod sa Kristohanon ang iyang mga ginikanan ug ‘magbansay sa diyosnong debosyon sa iyang kaugalingong panimalay,’ apan kinahanglang buhaton kini sibo sa ubang Kasulatanhong mga sugo. (1 Timoteo 5:4, 8) Maingon nga daotan ang pagpangawat aron makatagana alang sa kaugalingong pamilya, sa ingon daotan sa mga mata sa Diyos ang pag-atiman sa kaugalingong pamilya baylo sa pagsalikway sa Iyang kasugoan bahin sa pagkabalaan sa dugo. Ang Kasulatan nagtambag kanato nga “dumilian . . . ang dugo.” (Buhat 15:20, 28, 29; itandi sa Levitico 17:10-12.) Bahin niining mga butanga ang mahadlokon sa Diyos nga mga tawo “magasunod sa Diyos ingong magmamando inay ang mga tawo.”​—Buhat 5:29.

Dili Maayong Kapilian

Ang makakurat nga pagdaghan sa mga pagsabak sa dili minyong mga tin-edyer nakapukaw sa mga awtoridad sa Tinipong Bansa sa dugang pagsusi sa suliran. Pananglitan, ang usa ka estado nga kagamhanan mipasa ug balaod nga ang mga ginikanan maoy “mangabaga sa gasto” kon ang ilang dili minyong anak nga lalaki o babaye ubos sa panuigong 18 mahimong ginikanan. Ilang gilaoman nga kining paagiha, makapadasig sa mga ginikanan sa mga tin-edyer nga mas malangkit pa sa pagsumpo sa pagsabak sa sinugdan. Apan, ang ubang mga awtoridad, nagtuo nga kining balaora makapadasig lamang hinoon sa mga tin-edyer sa pagpahulog sa bata. Sila mihatag ingong kapilian ug edukasyon sa sekso nga ang estado ang nagasuportar maingon man sa mga kontraseptibo o igpamugong sa pagpanganak alang sa aktibo sa seksong mga tin-edyer.

Kining mga solusyona maoy dili maayong mga kapilian. Ngano? Tungod kay wala kini magwala sa hinungdan, nga mao, ang pakigsekso una maminyo. Ang usa ka eksperto sa pagsabak sa tin-edyer miingon: “Sa mga mata sa ilang isigkaingon, hinungdanon alang sa kabataan nga mahimong aktibo sa sekso. Walay usa ang gustong magpabiling ulay.” (magasing Time) Ang pag-us-os sa paggamit sa Bibliya mao ang pangunang katarongan niining “libre sa tanan nga tinamdan,” miingon si Emory Davis diha sa pakigpulong sa Rutgers University.

Nan, unsa, ang solusyon? Ang Kasulatan matin-aw: Ang pakigsekso sa mga dili minyo gidili sa Pulong sa Diyos. Ang mga makihilawason “dili makapanunod sa gingharian sa Diyos,” miingon ang 1 Corinto 6:9. Kinahanglang ipasilsil sa mga ginikanan ang balaod sa Diyos bahin niining mga butanga diha sa kasingkasing sa ilang mga anak. (Deuteronomio 6:6, 7) Ngano? Sumala sa gipamulong sa maalamong Haring Solomon: “Bansaya ang bata diha sa dalan nga iyang pagalaktan; ug bisan kon siya matigulang na dili na siya mobiya gikan niana.”​—Proverbio 22:6.

Pagkaginsakpan sa Anglicano

“Pagkamakapadaot!” miingon si Robert Runcie, ang pangulo sa Iglesya sa Inglaterra, bahin sa mga nakaplagan sa sakop sa iglesya sa dili pa dugayng taho sa Rural Anglicanism. Ngano? Tungod kay ang larawan sa talaan sa mga sakop sa diyosesis sa lalawigan mius-os gikan sa 17.5 porsiento sa populasyon sa 1950 ngadto sa 7.4 porsiento sa 1980. Ang pagtuki naghatag ug “larawan sa dili maalibyohang pagkawalay paglaom,” miingon ang The Times sa London, ug nagpakita lamang sa dugay nang kahimtang sa diyosesis sa siyudad.

Ang usa sa katarongan nga gihatag sa pag-us-os sa pagpaluyo diha sa Anglicano mao ang pagpalain sa mga batan-on gikan sa iglesya. Ang sosyal nga mga programa sa iglesya nga gidesinyo alang sa mga bata, sumala sa taho, hayan makabali sa kiling. Apan, gipasiugda ni apostol Pablo ang espirituwal nga bahin sa kinabuhi sa tawo. Iyang gitambagan ang batan-ong si Timoteo sa “pagbansay sa pagkamatarong, sa pagtuo,” ug “diyosnong debosyon” ingong iyang mga tumong.​—2 Timoteo 2:22; 1 Timoteo 4:7, 8.