Makapalipay nga Purongpurong sa 80 ka Tuig nga Pagtigom
INDIA! Usa ka yuta nga daghag kalainan—sa kultura, sa relihiyon ug kustombre, ug klima. Kini maoy lahi nga nasod ug misteryoso sa kadaghanan, apan, madanihon alang sa tanang moduaw sa iyang matahom nga kabaybayonan.
Niining tibuok nga sub-kontinente, nga nag-alinupong sa 775 ka milyon ka tawo, ang mga mahigugmaon ni Jehova nga Diyos nagpanumdom sa espesyal nga okasyon sa gamayng lungsod sa Lonavla, sa hataas nga Western Ghats sa Maharashtra State. Domingo kadto, Enero 20, 1985.
Ngano, nianang partikular nga adlaw, nahimong dugokan sa daghang hunahuna kining matahom nga bungtod nga 70 ka milya (110 km) gikan sa nagdasok nga siyudad sa Bombay? Ang tubag mao ang 80 ka tuig nga pagtigom sa bililhong mga butang ni Jehova—ang iyang katawhan—sa India. Malipayon kadto nga panahon dili lang alang sa kapin sa 7,000 ka mga Saksi ni Jehova dinhi kondili sa tibuok nga pag-ubanay sa mga igsoon sa kalibotan.—1 Pedro 5:9.
Apan aron mas masabtan pa ang kahulogan niining espesyal nga okasyon, atong lakbit nga susihon kon sa unsang paagi ang mga pundasyon sa kamatuoran gilig-on sa nangaging walo ka dekada.
Ang Kahayag sa Kamatuoran Miabot sa India
Sa 1905 ang usa ka taga India nga estudyante sa siyensiya, si S. P. Davey, miduaw sa Tinipong Bansa sa Amerika. Samtang didto, mitambong siya ug pakigpulong sa Bibliya ni C. T. Russell, nga maoy presidente niadto sa Watch Tower Bible and Tract Society. Naikag kaayo si Davey sa kamatuoran, ug mipauli siya sa iyang lugar sa Madras sa sidlakang kabaybayonan sa India, ug sa ulahi nakatukod ug 40 ka grupo ka pagtuon sa Bibliya.
Niining panahona, usa ka batan-ong taga India nangita sa mga tubag sa mga pangutana bahin sa doktrina sa Trinidad ug sa bawtismo sa masuso. Si A. J. Joseph nga niadto membro sa Church of England, nakadawat sa buson ug kopya sa libro ni Russel nga At-One Ment Between God and Men. Pinaagi niining publikasyona nakakita si Joseph sa kamatuoran bahin sa pagkahalangdon ni Jehova. Si Joseph, ang iyang amahan, ug ig-agaw sa ulahi nagpakaylap sa kamatuoran sa Bibliya latas sa mga balangay nga nagpananom ug humay ug sa mga plantasyon sa lubi nga karon estado na sa Kerala. Human nga nakaduaw sa India si Igsoong Russell sa 1912, nahimong bug-os panahon nga magmamantala sa Gingharian si Joseph. Sa 1924 nag-inusarang gisugdan niya ang 3,600-milya (5,800-km) nga panaw sa pagpakigpulong sa ubang bahin sa India, nga maoy nakahimo sa daghang tawo sa pagkabati sa kamatuoran. Madasigong mamumuo si Igsoong Joseph hangtod sa iyang kamatayon sa 1964.
Ang ikaduhang presidente sa Watch Tower Society, si J. F. Rutherford, miduaw sa Inglaterra sa 1926. Samtang didto, iyang gipangutana si Edwin Skinner, usa ka colporteur (bug-os panahong magmamantala): “Gusto ka bang moadto sa India?” Sa walay pag-ukon-ukon, si Igsoong Skinner mitubag: “Kanus-a mo ako paadtoon?” Sulod sa tulo ka semana siya ug ang iyang kauban mipadulong sa India!
Sulod sa 50 ka tuig, si Edwin Skinner nag-alagad ingong alagad sa sanga, nga sa sinugdan maoy nagdumala sa India, Ceylon, Persia, Afghanistan, ug Burma. Nakabiyahe siya sa daghang bahin sa India pinaagig tren, pulipuli sila sa iyang kauban gikan sa mga responsabilidad sa opisina ug sa pagbiyahe ug sa buluhaton sa pagsangyaw. Sa ulahi nakabaton sila ug “house car” ug gipasangkad ang ilang pagmantala sa mga dapit nga dili maabot sa tren. Sa panuigong 91, si Igsoong Skinner madasigon gihapong mamumuo sa sangang opisina sa India ug usa ka tagsaong magwawali sa maayong balita.
Ang mga graduwado sa Watch Tower Bible School of Gilead misugod sa pag-abot sa 1947. Ang natawo sa Inglaterra nga si Richard Cotterill maoy usa kanila, ug siya aktibo gihapon human sa 38 ka tuig. Sa daghan nang katuigan karon, nagdili ang polisa sa kagamhanan sa pagpasulod ug bag-ong langyawng mga misyonero. Apan 17 ka igsoong lalaki ug igsoong babaye, nga may aberids nga 30 ka tuig matag usa ingong mga misyonero, matinumanong nag-alagad sa nasod.
Ang mga igsoong Indian nakahimog dakong espirituwal nga pag-uswag, ug daghan karon ang kuwalipikado ingong mga espesyal payoner ug mga magpapanawng magtatan-aw. Sa 1983 duha ka napulo ka semanang mga klase sa Watchtower Bible School gihimo sa sangang opisina. Ang nalistang 46 ka espesyal nga payoner gidasig ug mas nabansay sa pag-atubang sa dakong mga panginahanglan sa buluhaton sa pagpanigom diha sa India. Sila nahimong kasangkapan sa pagpakaylap sa buluhaton ngadto sa bag-ong mga lugar.
Bunga Bisan pa sa mga Kababagan
Bisan pa sa nagkalainlaing mga hagit sa halapad nga teritoryo sa India—dako ug nagdasok nga mga siyudad, bug-os nga komunidad sa katawhan naglisodlisod sa pangabuhi, dulot nga mga tradisyon sa relihiyon naghari sa adlaw-adlawng kalihokan gikan sa pagkatawo ngadto sa kamatayon—nagpadayon ang pagtigom. Diha sa nag-alingapong nga milyonmilyon sa India, ang uban nagapangita sa kasulbaran sa mga problema sa katawhan ug nagatinguha ug lalom nga pagsabot bahin sa Diyos.
Ang usa niining tawhana mao si Dadu. Sa bata pa, naglibog si Dadu sa kamatuoran nga ang dili-maisip nga gidaghanon sa mga tawo nagsimbag daghan kaayong mga diyos. Misugod siya sa pagbasa sa Bibliya, apan wala niya masabti ang kadaghanan niini. Dayon midangop siya sa mga templo sa Hindu ug misugod sa pagbasag mga libro nianang relihiyona.
“Gisultihan ako nga kontrolado ni Ginoong Krishna ang tanang mga relihiyon ug nga matag relihiyon gihulagwayan sa lugas sa kuwentas nga iyang gisul-ob sa iyang liog,” nanumdom si Dadu. “Kon mao kana matud ko, nan nganong adunay pagdumot tali sa nagkalainlaing mga relihiyon nga sagad moresultag pag-ulag dugo?” Dayon sa pagsusi sa relihiyong Muslim napatuo si Dadu nga nakaestorya niya ang kadaghanan sa iyang namatayng mga kagikan. Apan sa pagtuon sa Bibliya uban sa mga Saksi ni Jehova, nakat-onan ni Dadu ug sa iyang asawa ang sinugdan sa daghang relihiyon sa kalibotan ug ang gitawag nga mga maayong espiritu nga ilang nakasulti maoy mga mini, mga demonyo. “Mapasalamaton kami kang Jehova nga Diyos sa kahibalo nga nakalibre kanamo gikan sa ilang impluwensiya,” miingon si Dadu. Karon siya ug ang iyang asawa maoy bug-os panahong mga ministro.
Sa miaging pito ka tuig, nakabaton ug Bibliya ang usa ka inahan ug literatura sa Bibliya gikan sa mga Saksi ni Jehova. Bisan ug mibalhin siya ug ang iyang pamilya ngadto sa dapit diin walay mga Saksi ni Jehova, siya nagpadayon sa pagtuon sa iyang kaugalingon. Nakontak siya pag-usab sa mga Saksi ni Jehova dili pa dugay, ug siya miasoy: “Sa milabayng mga katuigan, dili gayod nako makalimtan ang kamatuoran nga akong nakat-onan gikan sa Bibliya. Imposible gayod alang kanako sa pagbalik sa akong nangaging mga paagi sa pagsimba.”
Basahon Diha sa Daghang Pinulongan
Napulog lima ka pinulongan ang sinultihan sa tibuok India, ug siyam ka lahi nga karakter sa sinulatan ang gigamit. Usa ka hagit ang pagtaganag espirituwal nga pagkaon sa tanan niining mga pinulongana. Bisan sa sayo sa 1912, si Igsoong Russell mihimog mga pulyeto sa Bibliya nga gihubad sa Hindustani, Gujarati, Malayalam, Marathi, Telugu, ug Tamil. Ang ubang mga sinultihan sa ulahi gilakip, diin ang kadaghanan niining mga basahona gipatik sa gawas sa nasod ug gipasulod. Dayon sa sayo sa katuigang 1960 nagdili ang balaod sa kagamhanan sa pagpasulod sa nasod ug mga publikasyon sa sinultihan sa India.
Sanglit dili man makaarang ang sanga sa pagprinta sa iyang kaugalingon, nakigkontrata ang Sosyedad sa komersiyal nga mga tigprinta. Gitudloan ang piniling mga payoner sa pag-atiman sa publikasyon sa ilang lugar. Karon adunay 11 ka nagkalainlaing lokasyon sa imprintahanan, uban sa paggamag literatura sa Bibliya sa 16 ka pinulongan lakip sa 9 ka edisyon sa magasing Ang Bantayanang Torre. Sa ulahi, nainstalar ang MEPS (Multilanguage Electronic Phototypesetting Systems sa Sosyedad), ang pagkomposo ug paghan-ay sa mga publikasyon ginahimo sa sangang opisina, nga nagpalibre sa daghang payoner sa paggugol ug dugang panahon sa buluhaton sa pagpanigom.
Bunga sa 80 ka Tuig
Ingong nasod nga ikaduhang pinakadaghang populasyon sa yuta, usa ka dako kaayong buluhaton ang kinahanglan pang himoon sa India. Duolan lamang sa 6.6 porsiento sa populasyon sa karon ang naabot sa maayong balita. Kon itandi sa kadaghanang nasod, ang pagtubo sa katawhan ni Jehova sa India mahinay. Mikabat ug 53 ka tuig aron lamang maabot ang gidaghanong 1,000 ka magmamantala. Apan ang mga misyonero ug ang lokal nga mga igsoon makanunayon ug mapailobon sa pagbuhat sa kabubut-on sa ilang Amahan. (Isaias 60:22) Karon kami nalipay sa pagtan-aw sa 10-porsiento nga pagtubo kay sa miaging tuig, ug karon naabot ang bag-ong kinatas-ang 7,410 ka magmamantala sa 340 ka kongregasyon sa nasod ug sa nahilaing mga grupo.
Kining anam-anam nga pagtubo nagtimaan sa panginahanglan sa mas dakong puloy-anan sa sanga. Apan, ang pagpadako sa sanga sa Bombay imposible. Ang yuta nianang siyudara nihit ug mahal. Ang kalidad sa hangin sa Bombay, usab, makakunhod sa gitas-on sa kinabuhi nga napulo ka tuig. Busa sa 1978 usa ka lugar ang nakuha sa bungtod sa Lonavla, ang unang lugar sa habagatang siyudad sa Bombay diin ang dalan ug reles sa tren nagtagbo. Nahimutang sa gitas-ong 2,000 ka tiil (610 m), wala kaayoy polusyon ang maong lungsod.
Unom ka Tuig nga Buluhaton
Kinahanglang unahong ipatindog ang pader sa tinukod, nga miabot sa gitas-ong 15 ka tiil (4.6 m), aron maampingan ang yuta ug dili makankan ang yuta sa kanait nga mga propidad sa mga bakilid. Kinahanglag abunohag yuta ang dagkong mga lungag ug ang yuta gihinloan sa bagnot nga puno sa ihalas nga mga bitin, sama sa kobra ug bahion. Daghang balay ug ubang mga tinukod kinahanglang ayohon aron kapuy-an ug mahimong temporaryong opisina.
Komersiyal nga tigtukod ang gipatrabaho, apan ang kuwalipikadong mga igsoon ang nagdumala sa matag ang-ang sa pagtukod, ug daghan ang mitabang sa ilang maarangan. Ang usa ka kontraktor, nga gibayran sa pagpagraba sa dalan sulod sa propidad miingon nga ipaabot ug unom ka bulan ang trabaho, sanglit dili man maatubang ang pagpabasa sa batoong dalan. Pagkanindot nga tan-awon sa dihang ang tanang membro sa pamilya nanghakot ug binaldeng tubig nga ibasa sa dalan kada gabii aron ang trabaho matapos sumala sa iskedyol!
Dili gayod madunggan ang tingog sa mga buldoser, sanglit ang kadaghanang trabaho sa India ginahimo sa kamot. Busa ang trabaho mahapsayng nagpadayon hangtod nga natapos ang unang andana sa pangunang tinukod. Niining panahona, dihay kakulangan sa semento. Apan, makapalipay, ang sanga sa Korea sa Watch Tower Society mihikay sa pagpadalag 10,000 ka bag, nga maoy nakahimo sa tanang pagpanukod nga natapos sumala sa giplano. Busa sa 1984 ang matahom bag-ong sangang tinukod nagbarog nga natapos—sa kadayegan ni Jehova.
Ang Kataposang mga Resulta
Walo ka tinukod ang nagbarog sulod sa 4.6 ka akre (1.9 ha) nga lugar sa Sosyedad, nga gitamnan ug saging, mangga, igos, ug kapayas, lakip sa daghang mga tanom nga nagapamulak.
Dos andanas ang pangunang tinukod sa sanga ug may silong, diin dinhi nahimutang ang garahe ug labhanan. Diha sa pabrika sa unang andana nahimutang ang tulo ka gamayng makina sa pagprinta, maingon man sa makina sa pagputol, pagpilo, ug pagtahi. Dinhi ning andanaha usab mao ang lawak sa MEPS nga kompiyoter ug shipping, diin ang literatura nga ginama dinhi ipadala sa 56 ka nasod. Ang mga opisina, librarya, ug lawak-puloy-anan nahimutang sa ikaduhang andana.
Ang bag-ong Kingdom Hall nahimutang sa entrada sa kilid sa propidad. Ang kilid sa entablado, nga gibungbungan ug kinulit sa kamot nga teakwood, nag-atubang sa awditoryom nga makapalingkod ug 250 ka tawo. Sa duol, ang giayong mga tinukod nahimong puloy-anan, kosena, ug komedor alang sa pamilya sa sanga nga 31 ka tawo. Aduna pay bakanteng loti kon may panginahanglan sa pagpadako.
Usa ka Espesyal nga Okasyon
Busa mao kadto, tapos sa 80 ka tuig nga pagtigom sa bililhong mga butang ni Jehova, nga gisentro ang pagtagad nianang matahom nga adlaw sa Enero sa pagpahinungod sa bag-ong pasilidad sa sanga sa India.
Kining 80 ka tuig sa pagsangyaw gisubay sa panahon sa programa sa pagpahinungod. Ang dagkong mga hitabo sa panahon sa pagtukod ang giasoy. Ang magtatan-aw sa sona si Günter Künz, nga gikan sa sanga sa Alemanya, miingon sa iyang pakigpulong sa dedikasyon nga adunay 30 porsientong pag-uswag sa katawhan ni Jehova sa tibuok yuta sa nangaging lima ka tuig. Apan nalipay siya sa pagtaho nga ang India nakalabaw niana uban sa 34 porsientong pag-uswag, ug iyang gipahinumdoman ang mga mamiminaw nga uban sa kuging pagtrabaho ang India magpadayon sa pag-uswag.
Ang tanang mitambong nalipay niining ebidensiya sa panalangin ni Jehova. Ang mga igsoon sa India determino sa kuging pagtrabaho aron daghan pa ang matabangan sa pagsanong sa maayong balita sa Gingharian.
[Hulagway sa panid 23]
Si Edwin Skinner (ikaduha gikan sa tuo) uban ang “house car”
[Hulagway sa panid 24]
Bag-ong sangang hedkuwarter sa habagatan sa Bombay