Ang Ipasabot sa mga Balita

Nagapangitag mga Saksi ang mga Ospital

Ang mga taho sa prensa mao nga ang pipila ka ospital sa California karon aktibong nagapangitag mga pasyenteng mga Saksi ni Jehova. Nagpanuko ang ubang mga ospital sa pag-opera sa mga Saksi tungod kay dili sila magpaabunog dugo tungod sa relihiyosong mga katarongan. Nganong may kausaban sa tinamdan? Sanglit nagkaproblema ang ekonomiya sa medikal nga industriya, ang mga administrador nagpangitag dugang kita alang sa bayranan sa buhis. Apan laing katarongan ang gihatag. “Ang bag-ong kauswagan sa medisina nga nagpahimo sa walay-dugo nga operasyon—ang terminong gigamit sa pagbatbat sa mga operasyon diin ang mga pag-abuno sa dugo o mga bahin sa dugo dili ihatag—nga dili kaayo peligroso nakahimo usab sa mga ospital ug mga doktor nga nalangkit nga mas andam sa pag-opera sa mga Saksi,” mitaho ang Daily News sa Van Nuys, California. “Mahimo ang kadaghanang porma sa operasyon nga walay paggamit ug dugo kon mainampingon ka kaayo ug mapailobon sa pasyente,” miadmiter ang siruhano heneral si Dr. Sheldon N. Lipshutz.

Bisag modawat ang mga Saksi ug dili-dugong mga kapilian, sama sa saline solutions, sila modumili sa ‘pagsalikway sa ilang pagtuo ug sa mahinlong konsensiya’ sa medikal nga praktis nga dili kasulatanhon. (1 Timoteo 1:19; Buhat 15:20) Ilang nakita nga ang pagsunod sa balaod sa Diyos makataronganon usab sa medikal nga paagi. “Napulog-lima o 20 ka tuig kanhi, dili ko gustong adunay (mga Saksi) ang akong ospital,” miingon ang usa ka administrador ngadto sa Daily News. “Daghan kaayo karong mga sakit nga AIDS ug ang hepatitis nagakaylap pinaagi sa mga pag-abuno sa dugo busa angay kuwestiyonon ang naandang pag-abuno sa dugo. Ang punto de bista sa mga Saksi ni Jehova nakitang makataronganon.”

Pagtuon sa Paghimog Maayo

Nganong gipameligro sa pipila sa Nazi Alemanya ang ilang kinabuhi aron sa pagluwas o sa pagtabang sa mga tawo nga gihulga sa paglutos o kamatayon samtang ang uban nga makatabang unta lahi man ug gihimo? Si Dr. Samuel Oliner, sosyologo sa Humboldt State University sa Arcata, California, lakip sa iyang mga kauban, naningkamot sa pagtuki. Mitaho ang The New York Times, ang ilang mga nadiskobrehan “nasentro sa maugmarong mga kasinatian nga naagian sa mga tawo sa pagkabata, nga daw nagpahimo kanila, sa daghang katuigan sa ulahi, nga mas mapahiangayon kay sa uban sa pagtabang niadtong nahiagom sa kadaot.”

Miuyon si Ervin Staub, usa ka sikolohista sa University of Massachusetts. “Ang mga ginikanan nga nakatudlog pagkamatabangon sa labing epektibo,” miingon si Dr. Staub, “adunay malig-ong pagkontrolar sa ilang mga anak. Bisan ug maayo silang modisiplina, dili sila matugoton. Mogamit sila ug kombinasyon sa pagkamalig-on, mahigugmaon ug makataronganon. Ilang itudlo sa mga bata ang dangatan sa uban tungod sa dili maayong batasan—ug sa maayong batasan. Ug aktibo sila sa pag-agak sa bata sa pagbuhat ug maayo, sa pagkamahinatagon, ug pagkamatinabangon.”

Nan, dili ikatingala nga gisugo ang mga ginikanan sa pag-agak sa ilang mga anak “sa pagbansay ug pagpahamatngon gikan kang Jehova” tungod kay “siya nga nagabuhat ug maayo iya sa Diyos.”—Efeso 6:4; 3 Juan 11.