Dugang Pang Pagtuki sa Pulong sa Diyos
‘Kon sama sa tinipigang bahandi magapadayon ka sa pagpangita niini, makaplagan mo ang kahibalo sa Diyos.’—PROVERBIO 2:4, 5.
1. Unsa ang tinuod nga tuboran sa kalipay, ug ngano?
“MALIPAYON ang tawo nga makakaplag sa kaalam, ug ang tawo nga makakab-ot sa pagsabot, kay ang pagpakabaton niini labi pang maayo kay sa pagmanggad sa salapi ug ang kaayohan niini labaw pa kay sa bulawan. Kini mas bililhon kay sa mga korales, ug walay mausa sa mga butang nga imong ginatinguha nga ikatanding niana. Ang hataas nga mga adlaw anaa sa iyang kamot nga tuo . . . Kini maoy kahoy sa kinabuhi niadtong magahawid niini, ug malipayon kadtong hugot nga magahawid niini.”—Proverbio 3:13-18.
2. Nganong malipayon ang mga Saksi ni Jehova, apan unsay tambag ang ihatag kanila sa panahon sa ilang bawtismo?
2 Sa pagkamatuod, malipayon ang mga Kristohanon nga nakakaplag sa kaalam. Kana nagkahulogan sa katakos sa paggamit sa ilang kahibalo sa Pulong sa Diyos diha sa ilang aktibong pagsimba, sa pagsulbad sa ilang adlaw-adlawng mga problema, ug sa paghimog mga desisyon may kalabotan sa ilang mga tumong sa kinabuhi. Sa dili pa dawaton sa bawtismo sa tubig sa mga Saksi ni Jehova, susihon ang sukaranang kahibalo sa tagsatagsa ka kandidato pinaagi sa malukpanong mga serye sa maidlot nga mga pangutana. Ang usa sa panapos nga mga pangutana mao: “Human sa imong bawtismo sa tubig, nganong hinungdanon alang kanimo ang paghupot ug maayong iskedyol sa personal nga pagtuon ug sa regular nga pakigbahin sa ministeryo?” Kini makapatisok sa hunahuna nianang kandidato sa bawtismo nga kinahanglang magpadayon sa pagtuon saylo pa sa nahaunang mga butang ug aron “mouswag sa pagkahamtong.” (Hebreohanon 6:1) Apan gisunod ba sa tanan kining tambaga?
3, 4. (a) Unsay gipamulong ni Pablo bahin sa pipila ka Kristohanon sa Corinto ug sa Judea? (b) Unsay nagakahitabo sa pipila ka Kristohanon karon?
3 Diha sa iyang unang sulat ngadto sa mga Kristohanon sa Corinto, mireklamo si apostol Pablo nga dili siya makasulti kanila, “ingong mga tawong espirituhanon,” apan kinahanglang makigsulti siya kanila “ingong mga masuso pa diha kang Kristo.” (1 Corinto 3:1) Maingon man, siya misulat sa mga Kristohanon nga nagpuyo sa Judea: “Mahitungod kaniya daghan pa kamig igsusulti nga malisod ikapasabot kaninyo, tungod kay nangabungol man kamo. Kay, sa pagkamatuod, dugay na unta kamong nahimong mga magtutudlo, apan nagakinahanglan pa man diay hinoon kamo nga aduna pay magasubli sa pagtudlo kaninyo sa nahaunang mga butang sa balaang mga kapahayagan sa Diyos; ug nagakinahanglan pa diay kamog gatas, dili sa kalan-on nga magahi. Kay ang matag usa nga gibuhi pa ug gatas walay kasinatian sa pulong sa pagkamatarong, kay masuso pa man siya.”—Hebreohanon 5:11-13.
4 Karon, usab, daw nagpakita nga ang uban, sa nabatonan nila ang igong kahibalo aron makapahinungod sa ilang kaugalingon kang Jehova, sa paglaom nga mabuhi sa walay kataposan sa Paraiso nga yuta, wala maghimog seryoso, padayong mga batasan sa pagtuon. Tingali bation nila nga may igo na silang kahibalo nga “ikasugakod,” sa espirituwal nga pagkasulti. Wala sila mosaylo sa “gatas” nga kahimtang. Prangkang mipahayag si Pablo nga kini sila nagpabiling “walay kasinatian sa pulong sa pagkamatarong,” pagaingnon pa, wala sila maanad sa paggamit sa “pulong sa pagkamatarong” sa pagsusi sa mga butang. Si Pablo midugang: “Apan ang magahing mga kalan-on maoy alang sa mga hamtong, nga pinaagi sa paggamit nagbansay sa ilang salabotan sa pag-ila sa maayo gikan sa daotan.”—Hebreohanon 5:14.
“Magahing mga Kalan-on” Gikinahanglan sa Pagtubo
5, 6. (a) Unsay nagakahitabo sa uban nga dugay na sa kamatuoran, ug nganong dili kini normal? (b) Unsay gipamulong ni Pablo bahin kanila, ug busa unsay kinahanglan nilang buhaton?
5 Pila na ka tuig nga ikaw nahimong dedikadong alagad ni Jehova? Handurawa ang imong espirituwal nga kausgawan sa nanglabay nga katuigan. Ang sukaranang mga kamatuoran sa Bibliya ba lamang ang imong mapatin-aw, “ang nahaunang mga butang sa balaang kapahayagan sa Diyos”? Ang pipila nga nakasulod na sa Kristohanong dalan sulod sa 10 o 20 ka tuig anaa gihapon sa “gatas” nga kahimtang. Unsay hunahunaon sa tawo sa usa ka 10 anyos nga bata, o sa batan-ong lalaki o babaye nga nagpanuigong 20, nga nagatutoy gihapon sa bibiron? Di ba dili kini normal? Dili ba ang pagkaon ug gatas lamang makasumpo sa pagtubo sa tawo? Ang indibiduwal mahimo nga mabuhi, apan dili siya motubo nga mahimong mahimsog ug mabaskog nga hamtong. Tinuod usab kana sa espirituwalidad.
6 Nganong ang pipila nga dugay nang nahimong mga Kristohanon dili gihapon mahimsog sa espirituwalidad sa aktibong pakigbahin sa pagtabang sa normal nga “mga masuso,” nga bag-o pang mibarog alang kang Jehova? Kini silang wala mouswag sa dugay nang katuigan nakadawat sa panahon ug pagtagad sa Kristohanong mga ansiano ug sa ubang mga hamtong. Apan, sumala sa gipamulong ni Pablo, sila mismo “dugay na untang nahimong mga magtutudlo.” Aron mahimong mga magtutudlo, kinahanglang moundang na sila sa pagkaon sa “gatas” ug anaron ang ilang kaugalingon sa pagkaon sa “magahing mga kalan-on.” Unsaon nila kini sa paghimo?—Hebreohanon 5:12.
7. Sumala sa Hebreohanon 5:14, alang kang kinsa ang “magahing mga kalan-on,” ug sa unsang paagi mahimong sama niini ang usa ka Kristohanon?
7 Si Pablo miingon nga ang “magahing mga kalan-on maoy alang sa mga hamtong,” nga nagbatbat kanila nga “pinaagi sa paggamit nagbansay sa ilang salabotan sa pag-ila sa maayo gikan sa daotan.” Sa ato pa, kadtong naanad sa paggamit sa tanang kahibalo sa Pulong sa Diyos nga ilang nakat-onan sa pag-ila sa maayo gikan sa daotan sa ulahi makabansay sa ilang salabotan ug makadangat sa Kristohanong pagkahamtong. Maanad sila sa paggamit sa “pulong sa pagkamatarong” sa pagsusi sa mga butang ug busa makaila kon unsay maayo ug makadaot sa moral, espirituwal, ug sa pisikal. Pinaagi sa pagpadapat sa ilang nakat-onan, sila dili na ingon nga “walay kasinatian sa pulong sa pagkamatarong.” Sila mahimong “mga hamtong,” nga “angay sa magahing mga kalan-on.”—Hebreohanon 5:13, 14.
Pag-ugmad ug Maayong mga Batasan sa “Pagkaon”
8. Sa unsang paagi makutohan sa Kristohanon ang iyang kaugalingon sa “gatas” nga kalan-on, apan sa unsang paagi iyang mausab ang iyang espirituwal nga batasan sa “pagkaon”?
8 Kinahanglang anaron pag-usab sa mga masakiton nga gatas lamay ginakaon sa taas nga panahon ang magahing kalan-on. Maingon man, kadtong “magtimitimi” sa espirituwal nga kalan-on nga idalit sa “matinumanon ug maalamong ulipon,” magbilin sa ilang plato, sa ato pa, ug lamiang kalan-on nga nagakinahanglag dugang nga “pag-usap” (pagpalandong ug pagtuki), nagakinahanglag pagkugi sa paghimog maayong espirituwal nga mga batasan sa “pagkaon.” Kinahanglang ilang ‘pukawon ang ilang lunsay nga paghunahuna’ ug ‘magapaningkamot.’—Mateo 24:45; 2 Pedro 3:1, 2; Lucas 13:24.
9. Unsay makatabang sa usa nga nawad-ag gana sa pagkaon?
9 Tulo ka butang ang makatabang sa masakiton aron maulian sa iyang gana sa magahi, masustansiyang kalan-on: (1) tukmang panukmod, nga mao, ang tinguha nga mamaayo ug mahimsog pag-usab, (2) makaganang kalan-on nga idalit sa regular, ug (3) igong preskong hangin ug ehersisyo. Sa unsang paagi kining mga puntoha makatabang sa usa nga nawad-an sa iyang gana sa laglom nga mga butang sa Pulong sa Diyos?
10. Unsang tukmang panukmod ang makapalihok kanato sa pagpauswag sa atong kahibalo sa Pulong sa Diyos?
10 Ang si bisan kinsa nga nagapahinungod sa iyang kinabuhi kang Jehova kinahanglang adunay malig-ong panukmod sa pagpalambo sa iyang kahibalo sa Pulong sa Diyos. Ang atong gugma kang Jehova makapalihok kanato nga mas masinati pa sa iyang katingalahang mga hiyas, iyang kabubut-on, ug sa iyang mga katuyoan. Nagkinahanglan kinig tinuod nga pagtuon ug pagpalandong. (Salmo 1:1, 2; 119:97) Dugang pa, ang atong paglaom sa pagpuyo sa walay kataposan sa Paraiso nga yuta sa Diyos nagadepende sa atong pagpadayon sa ‘pagkuhag kahibalo sa bugtong tinuod nga Diyos ug sa iyang Anak, si Jesu-Kristo.’ (Juan 17:3) Apan ang atong tinguha nga mabuhi sa walay kataposan kinahanglang dili mao ang atong pangunang motibo sa pagtuon sa Kasulatan. Mao kanay sayop nga nahimo sa ubang walay pagtuo nga mga Hudiyo. Ang atong “pagsusi sa Kasulatan” kinahanglang himoon tungod sa atong gugma sa Diyos ug sa tinguha sa pagbuhat sa iyang kabubut-on.—Juan 5:39-42; Salmo 143:10.
11. Sa unsang paagi ginadalitan kitag makapaganang pagkaon sa regular?
11 Ang dagayang makaganang kalan-ong espirituwal ginadalit sa regular ug “sa tukmang panahon” sa “matinumanon ug maalamong ulipon” angay makapalihok kanatong tanan sa pagpakita sa atong pagpabili pinaagi sa bug-os nga pagpahimulos sa maayong mga butang nga gitagana. (Mateo 24:45) Kinahanglang ugmaron nato ang maayong espirituwal nga mga batasan sa “pagkaon” pinaagi sa paggahin ug igong panahon sa pagbasa ug sa pagtuon sa tanang maayong materyal nga gipatik diha sa mga libro ug mga magasin sa Watch Tower Society. Ginadalit ang espirituwal nga kalan-on sa regular diha sa lima ka senemanang mga tigom nga giorganisar sa mga kongregasyon sa mga Saksi ni Jehova sa tibuok yuta. Ginatambongan mo ba kining tanang mga tigom ug andam sa paghilis sa pagkaon nga ginadalit?
12. (a) Unsay laing paagi diin ang usa ka Kristohanon mabalikan sa iyang espirituwal nga gana? (b) Busa, unsang mga pangutana ang mahimo natong ibangon sa atong kaugalingon?
12 Ang gugma alang sa Diyos ug ang gugma sa silingan mopalihok kanato sa pagtuon sa Iyang Pulong. (Lucas 10:27) Ang tawong mawad-an sa iyang pisikal nga gana makabenepisyo sa preskong hangin ug ehersisyo. Maingon, man, ang Kristohanon nga nagatinguha nga mabalikan sa gana sa “magahing mga kalan-on” matabangan pinaagi sa paggawas sa buluhaton sa pagsangyaw ug gamiton ang iyang kahibalo sa pagpakaylap “niining maayong balita sa gingharian” ug sa “paghimog mga tinun-an sa tanang kanasoran.” (Mateo 24:14; 28:19, 20) Hinumdomi, gisultihan ni Pablo kadtong “nagakinahanglan sa gatas,” o espirituwal nga mga masuso, nga sila “dugay na untang nahimong mga magtutudlo.” (Hebreohanon 5:12) Hain ka nagbarog, kon bahin sa panahon nga nahimo kang tinuod nga Kristohanon? Kon usa ikaw ka igsoong lalaki, miuswag ka ba sa kahimtang diin mapuslanon ka ingong “magtutudlo” sa kanataran, o kaha usa na ka ansiano sa kongregasyon? Kon usa ikaw ka Kristohanong igsoong babaye, makahimo ka ba sa pagdumalag mga pagtuon sa Bibliya sa mga balay sa mga tawong nagapakitag kaikag sa kamatuoran sa Diyos o tingali sa pagtabang sa imong Kristohanong igsoong babaye sa buluhatong pagsangyaw?
Himoa ang Pagtuon nga Makawiwili
13. Unsay kalainan sa pagbasa ug sa pagtuon?
13 Dugay nang ginaingon nga kalipay ang pagbasa samtang ang pagtuon buluhaton. Matuod kana. Daghang makapalig-ong pagbasa ang mahimo sa makawiwili nga kalingawan. Unsa pay mas makalilipay kay sa usa o duha ka oras nga igugol sa haruhayng posisyon sa pagbasa sa taho gikan sa Yearbook of Jehovah’s Witnesses o sa gula sa magasing Pagmata!? Apan, ang pagtuon, nagkahulogang trabaho. Ang usa ka diksiyonaryo nag-ingon: “Ang pagtuon nagpasabot ug mapinadayonon matumonganong pagpalandong uban sa mainampingong pagtagad sa mga detalye nga sa ingon mapadayag ang mga posibilidad, mga aplikasyon, mga panagkalainlain, o mga kalangkitan sa mga butang nga ginatun-an.” Oo, nagkinahanglan ug paghago ang pagtuon. Apan sama nga makatagbaw ug mapuslanon ang bisan unsang trabaho nga maayong pagkahimo, ang pagtuon mahimong makalilipay ug magantihon sa espirituwal. Anaa kini sa atong interes sa paghimo niini. Sa unsang paagi?
14. Unsay imong gikinahanglan aron sa paghimo sa imong personal nga pagtuon nga mas makawiwili ug mapuslanon?
14 Aron mahimong makalingaw ug tinuod nga mapuslanon ang pagtuon, nagakinahanglan gayod ang paggugol ug igong panahon alang niana. Sanglit ang “pagtuon nagpasabot ug mapinadayonon matumonganong pagpalandong” ug “mainampingong pagtagad sa mga detalye,” unsa ka sunson nga matinuoron kang makaingon nga nakatuon sa imong Bantayanang Torre o sa publikasyong gamiton sa imong Pagtuon sa Libro sa Kongregasyon? Dili ba mas tukma ang pag-ingon nga kanunayng pahapyaw lang ang imong pagbasa sa materyal ug dalidaling badlisan ang mga tubag sa mga pangutana, nga walay pagsusi sa mga detalye ug sa mga katarongan sa pagpatin-aw nga gihatag? Kon mao kini ang imong ginahimo, tingali ang unang lakang nga imong buhaton aron mapauswag ang imong batasan sa espirituwal nga “pagkaon” mao ang ‘pagpahimulos sa kahigayonan’ sa pagtuon. (Efeso 5:15-17) Nagkinahanglan kini ug kalit nga pagbag-o sa panahon gikan sa ubang dili hinungdanong mga kalihokan. Hayan makurat ka kon unsa ka makawiwili ang pagtuon kon may panahon ka sa pagbasag maayo sa materyal imbes magdalidali niini.
15. Unsa pay gikinahanglan aron ang pagtuon makalilipay ug mapuslanon sa espirituwal?
15 May kalabotan sa panahon mao ang pag-ampo. Hinungdanon ang panalangin ni Jehova sa pagtuon aron mapuslanon sa espirituwal. Nagkinahanglan kita sa pag-ampo kaniya, sa ngalan ni Jesus, mangayo kaniya sa pagbukas sa atong mga hunahuna ug kasingkasing ug sa paghimo niini nga mahinangponon sa mga kamatuoran nga pagatun-an. Unsa ka sunson ikaw molingkod nga magdalidali sa pagpangandam alang sa mga tigom, ug makaamgo sa ulahi nga nakalimot ka sa pagpangayo kang Jehova sa iyang panalangin ug kaalam sa pagpadapat diha sa imong adlaw-adlawng kinabuhi sa mga butang nga natun-an? Nganong hikawan nimo ang imong kaugalingon sa tabang ni Jehova samtang mabatonan man kini kon pangayoon lang?—Santiago 1:5-7.
Dugang Pang Pagtuki
16. Kaharmoniya sa tema nga teksto niini nga pagtuon, unsay kinahanglan natong buhaton aron makaplagan ang kahibalo, pagtugkad, ug pagsabot?
16 Ang Proverbio 2:4, 5 nag-ingon: ‘Kon sama sa tinipigang bahandi magapadayon ka sa pagpangita niini, makaplagan mo ang kahibalo sa Diyos.’ Ang konteksto niining mga pulonga naghisgot sa panginahanglan sa pagpangita sa “mga pulong,” “mga sugo” “kaalam,” “pagtugkad,” ug “pagsabot” ni Jehova. Ang pagpangitag bahandi nagkinahanglag paningkamot ug pagkamalahutayon. Nagkinahanglan kinig dugang pang pagtuki. Walay kalainan kini kon magapangitag “kahibalo mismo sa Diyos,” alang sa “pagtugkad,” ug “pagsabot.” Nagkinahanglan usab kini ug dugang pang pagtuki, o pagtugkad pa gayod sa ilalom. Ayaw batiang igo na ang pahapyaw sa ibabaw nga Pulong sa Diyos.
17. Unsay gipamulong sa Kasulatan bahin sa mga hunahuna ni Jehova, busa alang sa unsa nga kita magmapasalamaton?
17 Ang salmista miingon: “Pagkakatingalahan gayod sa imong mga buhat, Oh Jehova! Pagkahalalom sa imong mga hunahuna.” (Salmo 92:5) Misulat si apostol Pablo nga madalayegon: “Oh ang kahilabihan gayod sa kadagaya ug sa kaalam ug sa kahibalo nga iya sa Diyos!” (Roma 11:33) Diha sa laing sulat, siya mihisgot sa “laglom nga mga butang sa Diyos.” (1 Corinto 2:10) Tinuod, sumala sa gipatin-aw ni Pablo, ipadayag sa Diyos kining laglom nga mga butang “pinaagi sa iyang espiritu,” diin ang aktibong gahom sa Diyos nagalihok nga gamhanon diha sa dinihogang mga Kristohanon nga gitudlo ni Kristo Jesus sa pagtaganag espirituwal nga pagkaon. Angay nga magmapasalamaton kita sa espirituwal nga pagpanuki nga gihimo sa “ulipon” nga matang aron mahimong mas matin-aw pa alang kanato ang “tinagong mga kahiladman sa mga katuyoan sa Diyos.”—1 Corinto 2:10, Today’s English Version.
18. Sa unsang paagi ang matag Kristohanon dugang makatuki sa Pulong sa Diyos, ug unsang linain nga kagamitan sa pagtuki ang gikinahanglan?
18 Apan wala kana makakuha sa responsabilidad sa matag indibiduwal nga mga Kristohanon sa dugang pang pagtuki sa Pulong sa Diyos, sa katuyoan nga matugkad ang bug-os nga kahulogan sa mga hunahuna. Nagkinahanglan kini sa pagtan-aw sa mga teksto nga gikutlo. Nagkahulogan kini sa pagbasa sa mga potnot sa mga artikulo sa Bantayanang Torre, diin ang pipila magpunting sa magbabasa sa ubang daang publikasyon nga naghatag dugang katin-awan sa pipila ka teksto o tagna. Nagkinahanglan kinig dugang pang pagtuki, magkugi sa pagpangita nianang daang publikasyon ug dayon tun-an ang mga panid nga gitudlo. Nagkinahanglan kini sa bug-os nga pagpahimulos sa linain nga mga giya sa pagtuon sa Bibliya nga gitagana sa “ulipon” nga matang sa dugay nang katuigan, sama sa mga indese, ug mga konkordansiya, Aid to Bible Understanding, ug “All Scripture Is Inspired of God and Beneficial.” Oo, gitagan-an ang mga Kristohanon ug ekselenteng mga kagamitan sa pagtuki, ang labing bag-o niini mao ang Iningles nga Reference Bible, nga, sa ulahi, mabatonan sa uban sa daghang mga pinulongan. Gamiton nato kining maong mga kagamitan sa maayong pagtuki.
Pagtuon nga May Katuyoan
19. Unsang pulong sa pag-amping ang hinungdanon bahin sa kahibalo?
19 Ang katuyoan sa atong dugang nga pagtuki sa Pulong sa Diyos dili aron mobati kita nga mas labaw kay sa atong mga igsoon o sa pagpagarbo sa atong kahibalo. Sagad mao kini ang ginahimo sa kalibotanong mga tawo. Sumala sa prinsipyo, tinuod ang gisulat ni apostol Pablo dinhi: “Ang kahibalo magamapahitas-on, apan ang gugma magapalig-on.” (1 Corinto 8:1) Ang gugma mopalihok kanato nga mapaubsanon sa paggamit sa atong kahibalo sa pagsangyaw ug sa buluhaton sa paghimog mga tinun-an ug sa pag-amot nga maalamon sa espirituwal nga mga balor sa Kristohanong mga tigom.
20. Unsang mga tambag ang gihatag ni Pablo niining bahina?
20 Hinaot nga kita “dili na magpabiling bata pa,” kondili “magatubo sa tanang mga butang ngadto kaniya nga mao ang ulo, si Kristo.” (Efeso 4:13-15) “Manag-uswag kita ngadto sa pagkahamtong.” (Hebreohanon 6:1) Magpakahamtong na kita, nga makahimo sa paghilis sa “magahing mga kalan-on” nga makapahimsog kanato sa espirituwal ug mapuslanon sulod sa Kristohanong kongregasyon. Apan, nagkinahanglan kinig labaw pa kay sa pagkuhag kahibalo pinaagi sa pagtuon. Nagkinahanglan kinig pagkaon sa mga pulong ni Jehova o sa gipatik nga mga kapahayagan sa apresasyon, nga atong tagdon sa sunod nga artikulo.—Salmo 110:1; Isaias 56:8; 66:2.
Agig Pahinumdom
◻ Nganong ang pipila nagpabiling espirituwal nga “mga masuso” gihapon?
◻ Unsay makatabang sa usa aron mahimong hamtong
◻ Sa unsang paagi maugmad nato ang maayong espirituwal nga batasan sa “pagkaon”?
◻ Unsay makahimo sa atong personal nga pagtuon nga mas makawiwili?
◻ Nganong hinungdanon ang dugang pang pagtuki sa Pulong sa Diyos?
[Kahon sa panid 11]
Mga butang nga makatabang sa tawo nga makabaton ug espirituwal nga kahimsog
1. Tukmang panukmod: Ugmara ang kusganong tinguha nga mas masinati pa kang Jehova
2. Regular nga pagkaon: Pahimusli ang espirituwal nga pagkaon nga regular nga ginadalit sa “matinumanon ug maalamong ulipon”
3. Ehersisyo: Gamita ang kahibalo sa pagtabang sa uban, sama sa paggawas sa buluhatong pagsangyaw