Ikaw Makalabang-buhi!
ANG paglabang-buhi nagalabi diha sa mga hunahuna sa katawhan sa tibuok kalibotan. Bisan pag ginapadayag sa Bibliya nga ang ginaatubang sa katawhan labi pang makalilisang kay sa palaabotong gipanan-aw sa pila ka siyentipiko, kini nagapadayag usab nga dunay kasaligang mga kalaoman sa paglabang-buhi. Busa, labing angay nga sa unang adlaw sa usa ka bag-ong internasyonal nga serye sa mga kombensiyon nga gihimo sa mga Saksi ni Jehova, giluwatan sa Watch Tower Society aron kaylap ipanagtag ang usa ka librong nag-ulohang Survival Into a New Earth. Unsay unod niini?
Ang libro nagatanyag ug realistikong paghisgot sa mga sulirang atong ginaatubang sa katuigang 1980. Adunay hinungdanong mga butang nga wala tagda sa katawhan sa katibuk-an, ug ingong resulta daghan ang wala makakitag lutsanan sa nagauswag nga krisis sa kalibotan. Kining hinungdanong mga butang tin-awng gihisgotan sa unang kapitulo, “Unsay Mahitabo sa Planetang Yuta?” Ang pipila ka tawo tim-os nagalaom nga ang pagpilig bag-ong opisyales o pagliso ngadto sa mga protesta sa masa o bisan ang mapintasong rebolusyon mohatag kanilag kahupayan. Apan gipakita sa mga kamatuoran nga yanong ilang giilisan ang usa ka hugpong sa mga suliran sa laing hugpong. Ang libro nagaanalisar sa nagpahiping hinungdan niini ug nagapaila sa hinungdanon gayong mga isyu nga magatino sa atong kaugmaon.
Nga ang Pulong sa Diyos ang awtoridad, kining bag-ong libro nagatubag sa pangutanang “Hangtod Kanus-a Magalungtad Kining Presenteng Sistema?” Ug, tapos sa pagpakitang ang katawhang buhi karon dunay kalaomang makalabang-buhi sa kalaglagan niining kalibotana, ang libro nagahatag sa tin-aw ug maayog-pasukaranang hulagway sa “Ang Matang sa Kinabuhi nga Nagapaabot sa mga Makalabang-buhi.” Kini ang matang sa kalaomang mohimo kang bisan kinsang mahigugmaon sa pagkamatarong sa pagtinguhang mahiapil sa mga makalabang-buhi. Ang gipahayag niining libroha pihong mahimong tinubdan sa dakong kadasig sa minilyong mabuot-ug-kasingkasing nga katawhan.
Makapaukyab nga Matagnaong mga Dula sa Bibliya
Panahon sa pagluwat sa librong Survival Into a New Earth, ang mga mamumulong sa nagkalainlaing kombensiyon misaysay nga kini nagahatag ug linaing pagtagad sa daghang makapaukyab nga mga dula sa Bibliya ug sa ubang tagnang maykalabotan ilabina niadtong makalabang-buhi sa umaabot nga “dakong kasakitan” ug magpuyo sa walay kataposan sa paraisong yuta. (Mateo 24:21; Pinadayag 7:14) Ang maong mga dula sa Bibliya nagataganag matuod-sa-kinabuhing mga panig-ingnan nga nagpasundayag sa unsang paagi pagadumalahon ni Jehova ang katawhang buhi karon. Kana nagapakita kon unsay gikinahanglan aron maangkon ang iyang pag-uyon. Ugaling, inay sa yanong pagsulti kanato kon unsay atong pagabuhaton aron maangkon ang pag-uyon sa Diyos, kining mga asoya nagapabuhi nianang balaang mga kinahanglanon alang kanato. Kana nagapukaw sa atong mga emosyon ug nagalig-on sa atong tinguha sa pagbuhat kon unsay matarong.
“Sa Jonas kapitulo 3, pananglitan,” misaysay ang mga mamumulong sa kombensiyon, “anaa ang usa ka dula nga nagapasiugda sa panginahanglan sa dinaliang lihok aron makalikay sa katalagman. Gisugo ni Jehova si Jonas nga moadto sa Nineve, ngadto sa katawhang wala moangkong nagsimba sa Diyos ni Abraham, sa pagmantala nga ang ilang dakong siyudad pagalaglagon sa 40 na lang ka adlaw. Unsay ilang pagsanong? Inay sa pagbiaybiay, ‘ang mga tawo sa Nineve misugod sa pagtuo sa Diyos.’ Ilang gimantala ang usa ka pagpuasa ug gisul-ob ang sako. Ingong pagsanong sa awhag sa ilang hari, sila tim-os misangpit sa Diyos ug mitalikod sa ilang daotang mga dalan. Tungod sa ilang tiunay nga paghinulsol, wala sila laglaga ni Jehova. Sa kaulahian gipakita ni Jesus nga ang mga hitabong gitala ni Jonas dili lamang patay nga kasaysayan. (Mateo 12:39-41) Ang ila bang matagnaong kahulogan nakaabot bisan sa atong adlaw?
“Aduna bay katawhan karong adlawa nga nahisama niadtong karaang mga taga-Nineve?” nangutana ang mga mamumulong. “Oo. Sa dihang ang mga Saksi ni Jehova magapahayag sa balaang pasidaan nga ang daotang kalibotan duol nang pagalaglagon, daghang nagapanimati maoy mga tawong wala mag-angkong nag-alagad sa Diyos sa Bibliya, mga katawhang wala gayod masayod sa kalainan tali sa ilang tuo nga kamot o sa ilang wala, sa relihiyosong pagkasulti. [Jonas 4:11] Apan karon sila nagtuo na kang Jehova, nagahinulsol sa ilang kanhing mga dalan, ug nahimong bahin sa ‘dakong panon,’ uban ang kalaomang makalabang-buhi sa ‘dakong kasakitan.’”—Pinadayag 7:9, 14.
Tanantanan, ang libro nagahisgot sa 21 ka nagkalainlaing pundok o mga indibiduwal nga gihisgotan sa Bibliya ug kinsa naglandong sa katawhan nga karon buhi nga magapanunod sa yutan-ong dominyo sa Gingharian sa Diyos nga dili na mamatay. Kini nagahisgot usab sa 26 ka laing matagnaong kabatbatan niining pinaborang pundok nga nakabaton sa makalipayng kalaoman sa hingpit tawhanong kinabuhi.
Patukoranan sa Bag-ong Yuta
Kadtong pagaluwason ni Jehova nga Diyos sa umaabot nga “dakong kasakitan” mamahimong patukoranan sa gitagnang bag-ong yuta, kay mao ang unang mga membro sa usa ka bag-ong katilingban, nga mopakaylap sa pagsimba sa matuod nga Diyos sa tibuok yuta. (2 Pedro 3:13) Mabatonan nila ang kalipay nga makaambit sa pag-edukar sa binilyon nga sa kaulahian pagabanhawon gikan sa mga patay. Busa, sumala sa gipunting sa mga mamumulong sa kombensiyon, hinungdanon nga ang patukoranan sa bag-ong yuta maoy maayo.
Sa pagkakaron ang umaabot nga mga sakop nianang bag-ong yuta ginatudloan sa mga dalan ni Jehova. Sila ginatabangan nga makabatog kinasingkasing nga pagpabili kon sa unsang paagi ang isyu sa unibersohanong pagkasoberano magaapektar sa atong matag-adlaw nga kinabuhi. Sila nagatuon kon unsa ka bililhon ang ‘pagsalig kang Jehova sa bug-os nilang kasingkasing ug dili pagsalig sa ilang kaugalingong salabotan.’ (Proverbio 3:5, 6) Sila ginahatagag kahigayonan sa pagpamatuod nga sila madasigon ug maunongong mga tigpaluyo sa Gingharian sa Diyos. Sila nakabatog kasinatian ingong bahin sa tibuok-yutang katilingban nga niana ang katawhan gikan sa tanang nasod, mga pinulongan, ug mga rasa nagabuhat nga tingob diha sa mahigugmaong panag-igsoonay. Aktibo ka bang bahin nianang pundoka?
Inay sa paghisgot lamang sa ulohan sa paglabang-buhi, ang bag-ong librong giluwatan sa bag-ong serye sa mga kombensiyong gihimo sa mga Saksi ni Jehova gitumong ngadto sa magbabasa, nga magatabang kaniya sa pagsusi sa iyang kaugalingong kinabuhi sa kahayag sa mga kinahanglanon sa Pulong sa Diyos. Kon kaha bag-o kang estudyante sa Bibliya o nagbasa na niini sa daghang katuigan, makabaton kag kaayohan pinaagi sa pagtugot nga palihokon ang imong panghunahuna sa librong Survival Into a New Earth. Kon wala ka pa makabasa niini, ginaawhag ka namo sa pagbasa niana karon. Unya ipakig-ambit kana sa uban aron sila, usab, makasagop sa kahibulongang kalaoman nga ginapahayag niini.