Taga Uganda Nagpakitag Apresasyon sa “Tinuod nga Kinabuhi”

ANG pagsilang sa adlaw ibabaw sa Kampala, nga kaulohan sa Uganda, may tagsaong katahom. Bisan hain sa iyang pito ka bukid, makahanggap ka ug preskong hangin sa buntag. Ang lunhawng alpombrang gilandongan sa kahoy sa daghang porma nga gitugbangan sa daghag kolor nga mga bulak sa gumamela, ponsiana ug boginbilya. Ang mga tamsi, kalaw ug mga tibalas naglupadlupad sa mga sanga, ug madungog ang tiyabaw sa tulabong gikan sa itaas. Pagkakatingalahan sa kinabuhi!

Nagpalandong sa talan-awon ning matahom nga nasod, malisod nga dili mobating mapasalamaton sa kinabuhi ug sa katingalahang higayon nga gihatag sa Maghahatag sa kinabuhi sa pagkinabuhi sa usa ka yutan-ong paraiso sa walay kataposan.

Apan daghang tawo dili moisip ug ingon niana. Alang kanila ang Uganda dili mao “ang Perlas sa Aprika.” Sa ilang hunahuna ang Uganda mopukaw ug handumanan sa kagubot. Daghang tawo sa Uganda nabalaka sa kalisang sa krimen, ug naguol sila sa implasyon. Wala gani makaabot ug napulo ka tuig misaka ang mga prisyo sa tinapay gikan sa 1/20 shilling ngadto sa 200 shilling. Ang kadaghanan sa pamilya nawad-ag mga paryente ug mga higala sa mapintas nga kamatayon, nga mitultol sa konklusyon sa kinatibuk-an nga “barato ang kinabuhi karong mga adlawa.” Apan ang Magmumugna sa kinabuhi, si Jehova nga Diyos, naghatag ug dakong bili sa kinabuhi, sumala sa gipadayag sa iyang Pulong. Hapit katunga sa 15 milyones ka tawo sa Uganda ang mituo nga Pulong sa Diyos ang Bibliya, ug daghan ang mosanong kon kuhaon ang ilang pagtagad sa katin-awan sa Bibliya bahin sa hinungdan sa pag-antos ug sa katuyoan sa Diyos nga matagamtam sa malipayong mga tawo ang “tinuod nga kinabuhi” diha sa paraisong yuta.—1 Timoteo 6:19.

Kap-atan ka Tuig sa Unang mga Paningkamot

Ang maayong balita sa Gingharian sa Diyos ug sa “tinuod nga kinabuhi” unang miabot sa Uganda sa 1931. Ang bug-os panahong payoner nga mga magwawali sa mga Saksi ni Jehova nga gikan sa Amihanang Aprika milawig ngadto sa Mombasa, mibayahi latas nianang Kenya karon, ug miabot sa tabunok nga Uganda. Kadto maoy nasod sa walay hunong nga ting-init nga adunay timbang nga ulan—usa ka yuta nga daghag gapas, kape, gabi, kamoteng kahoy, ug ubang mga abot sa uma. Nakita sa mga bisita ang panagsagol sa kapin sa 30 ka tribo, ang pipila kanila mapasigarbohon sa kasaysayan nga naglakip sa nangaging mga gingharian. Sanglit mahibalog Iningles ang kadaghanang mga tawo ingong ikaduhang pinulongan, ang dakong kaikag bahin sa Gingharian sa Diyos dali nga mapalgan. May gihimong pagbiyahi nga ingon niini sa 1935, apan kinahanglang mobiya ang mga payoner, ug milabay ang mga katuigan nga walay buluhatong pagsangyaw sa kanataran sa Uganda.

Sa 1952 ang Kampala adunay gamayng kongregasyon sa upat ka magmamantala. Sa tulo ka tuig sa ulahi, si N. H. Knorr, nga presidente kaniadto sa Watch Tower Society, ug si M. G. Henschel, nga membro gihapon sa Nagamandong Lawas sa mga Saksi ni Jehova, miduaw sa Kampala, ang unang pagbawtismo gihimo sa Lake Victoria. Dayon mibalhin ang ubang mga magmamantala ug ang ubang mga kababagan nahitabo. Busa sa 1958 usa lamang ka magmamantala sa makahatag kinabuhi nga maayong balita ang nabilin.

Sa 1962 mihunong ang Uganda sa pagkahimong koloniya. Niining panahona ang unang grupo sa langyawng mga Saksi misulod, nga gikan sa Britanya ug Canada, sa pagtabang sa lugar nga dako ang panginahanglan sa pagpahibalo sa katuyoan sa Diyos. Sa wala madugay ang unang mga graduwado sa Watchtower Bible School of Gilead miabot, ug naabot ang ubang mga lungsod sa balita sa Gingharian. Anam-anam nga misugod ang pag-uswag, nga miresultag 110 ka magmamantala sa 1971.

Panahon sa Kagubot ug Pagsulay

Nahitabo ang dramatikanhong kausaban sa politika, ug nabandilyo kini sa tibuok kalibotan. Ang pagkawalay kalig-on ug kahadlok miresultag paglalin sa mga dumoluong ug sa mga taga Uganda. Ang mga misyonero sa mga Saksi ni Jehova napugos sa pagbiya sa 1973. Gipiotan ang relihiyosong kagawasan pinaagi sa mga pagbando. Naglungtad ang klima sa kalisang. Ang inadlaw-adlawng kinahanglanon nangahanaw sa mga tindahan. Daghan ang mga tawong nangawala nga walay mga paghusay sa korte. Sa adlaw-adlaw, ang mga tawo nagkinabuhi sa landong sa kamatayon. Sa kataposan, sa 1979, miulbo ang gubat, nga miresulta ug sunodsunod nga kausaban sa kagamhanan.

Samtang nawad-ag paglaom ang ubang mga taga Uganda ning panahona, gigutom ang uban ug paglipay. Nasayod ang mga Saksi ni Jehova nga lumalabay lamang kining mga butanga ug nga mohatag ang Diyos dili lamang praktikal nga giya ning malisod nga panahon kondili solusyon usab sa tanang problema sa katawhan. Pinaagi sa suod nga pakig-uban sa mga tigom ug sa regular nga pagkaon sa espirituwal nga kalan-on, nagpabilin silang malipayon. Makita sa mga tigpaniid nga nakabaton sila ug espesyal nga butang nga wala mabatoni sa ubang mga relihiyon. Makaikag nga mga eksperyensiya ang ikasugid bahin niining magubot nga panahon.

Naeksperyensiyahan sa usa ka tawong may pamilya ang kanunayng panalipod ni Jehova. Sakop siya sa usa ka tribo kansang mga sakop gisalikway ug gipangita aron patyon. Sa usa ka higayon giatake ang iyang balay sa mga granada ug mga bala sulod sa usa ka oras. Samtang nahitabo kini iyang gipahinumdoman ang iyang asawa ug iyang mga anak sa paghinumdom sa mga pulong ni Jehova kang Josue: “Magmaisogon ug magmalig-on,” ug sila nagdungan sa pag-ampo. (Josue 1:6) Katingalahan, walay bala ang milusot sa balay ug ang mga granada miuntol sa bungbong sa gawas, mibuto kini sa halayo. Dayon migula ang igsoon ug nakigsulti sa mga tig-atake. Midepensa usab kaniya ang iyang mga silingan. Sa pagrekisa sa balay nakita sa mga tig-atake ang mga giya sa pagtuon sa Bibliya, busa wala na siya hilabti ug gitagad nga tawong relihiyoso. Dayon sa milabay ang duha ka adlaw gisumbong na usab siya ug nakasugat siyag duha ka hitabo nga mapagan unta ang iyang kinabuhi, apan pinaagi sa tabang ni Jehova naluwas siya.

Usa ka opisyal kanhi nga dakog katungdanan nga malig-ong mibarog sa tinuod nga Kristiyanidad gidakop sa makadaghang higayon. Ang duha sa iyang mga anak nga lalaki nawala ug wala na gayod igkita pag-usab. Apan wala kini makapusgay sa iyang pagsalig sa Maghahatag sa kinabuhi, ni nakapadulom kini sa iyang katingalahang paglaom sa pagkabanhaw ug sa “tinuod nga kinabuhi” sa unahan. Madasigon siyang nagwali sa iyang kaubang mga binilanggo ug nakasugod ug daghang pagtuon sa Bibliya. Usa ka sundalo kanhi ilabinang nagpakitag dakong apresasyon ug mihimog dakong kauswagan. Sa milabay ang mga bulan, misugod ang tawo sa pakigbahin sa buluhaton sa pagsangyaw sulod sa bilanggoan. Busa, sa gibuhian ang Saksi, unom ka pagtuon sa Bibliya ang gihatag ngadto kaniya aron maatiman niining sundalo kanhi. Pagkadako sa katingala sa dakog katungdanang opisyal kanhi ug sa sundalo kanhi, sa milabay ang mga tuig, nagkita sila sa klase sa Tunghaan sa Pag-alagad sa Payoner nga gihikay sa mga Saksi ni Jehova alang sa bug-os panahong mga magwawali. Oo, ang sundalo kanhi nahimo usab nga payoner! Ang igsoon nga nagtudlo kaniya sa kamatuoran nakaingon, “nawad-an akog unodnong mga anak, apan karon nakabaton ako ug espirituwal nga anak.”

Laing inahan sa pito ka anak nga nahimong Saksi kapin na sa 13 ka tuig diin ang iyang pagkamalahutayon nasulayan sa makadaghan. Sa sinugdan misupak ang iyang bana sa iyang bag-ong pagtuo. Dayon tungod sa magubot nga hitabo mikalagiw ang iyang bana sa Kenya, iyang gibiyaan ang iyang asawa ug ang tanan niyang mga anak sulod sa duha ka tuig. Sa mibalik siya gidakop siya, ug sa iyang pagkapriso gilungkab sa kawatan ang ilang balay, gikawat halos ang tanang mga butang sa pamilya. Ang pagkaaktibo sa igsoong babaye sa kamatuoran ug sa pagpahilayo sa kalibotanong panag-uban maoy nakatabang ning igsoong babaye sa pagkaplag ug paglipay ug sa pag-antos. Nakadayeg ang iyang bana sa iyang kalig-on ug kalipay, kinsa sa paggawas sa iyang bana mipakitag kaikag sa Bibliya sa wala pa siya agpasa sa kamatayon sa sayo nga panuigon. Apan gipalig-on sa kongregasyon kining matinumanong babaye. Gitabangan siya sa usa ka kaubang Saksi sa pagsugod ug gamayng negosyo aron aduna siyay ikasustento sa iyang mga anak. Iyang gitudloan ang iyang mga anak ug ang uban sa katingalahang paglaom sa kinabuhing walay kataposan sa yuta nga walay mga suliran, ug nagdumala siya ug unom ka pagtuon sa Bibliya.

Ang mga tigulang sa kinatibuk-an tinahod sa Uganda, ug si Anna, nga kapin na sa iyang panuigong 60, migamit sa iyang higayon sa pagkahimong payoner nga magmamantala. Imbes makig-uban sa iyang mga silingan sa paghisgot sa ilang mga kalisod, nakigsulti siya kanila bahin sa maayong balita ning magubot nga panahon. Nalipay siya nga nakatambong sa linain nga tunghaan alang sa payoner nga mga ministro nga gihimo sa kanait nga yuta sa Kenya. Samtang didto, nakadawat siyag sulat gikan sa mga paryente nga nag-awhag kaniya sa dili pagbalik sa Uganda, sanglit peligroso ug malisod kaayo ang kinabuhi. Ang usa ka paryente nga nagpuyo sa Kenya mitanyag sa pagpaipon ug sa pag-atiman kaniya, apan iyang gisultihan sila nga siya adunay balita sa paglipay ug paglaom sa mas maayong kinabuhi nga maoy gikinahanglan sa mga tawo sa Uganda. Busa mibalik siya sa Uganda.

Apresasyon sa mga Asembliya

Duyog sa mga kausaban sa gobyerno human sa gubat sa 1979, gipasig-uli ang kagawasan sa pagsimba, nga nakahatag kalipay sa tanang mga Saksi ni Jehova. Makahimo na usab sila ug mga asembliya, ug ang daghang pidido sa literatura sa Bibliya nagpakita nga daghang mga tawo ang nangandoy sa maayong balita sa mas maayong kinabuhi. Gihikay ang distritong mga kombensiyon, ug sa miaging Disyembre 1983 ang drama sa Bibliya gipasundayag sa unang higayon. Mihatag kini ug dulot nga apresasyon diha sa mga tumatambong, kay kini naghisgot sa panimalaynong kinabuhi. Sa pagkasunod adlaw 572, makaduha piloa sa gidaghanon sa tanang aktibong mga Saksi sa Uganda, miadto sa Sports Hall sa Lugogo Stadium sa Kampala ug nakatagamtam ug panaghiusa sa Gingharian uban sa mga tawo nga tinuod nga nagpabili sa kinabuhi.

Daghan ang mihimog mga pagsakripisyo aron makatambong didto. May mga higayon nga ang pletehan sa tren sa magtiayon mas taas kay sa suweldo sa usa ka bulan sa magtutudlo. Alang sa kadaghanang mga pamilya ang gastos sa pag-adto sa kombensiyon mokabat ug upat ka bulang suweldo! Ang kadaghanan sa mitambong mipakitag dakong pagpabili sa espirituwal nga mga butang.

Mga Eksperyensiya sa mga Misyonero

Sa ulahi sa 1982 upat ka langyawng mga misyonero miabot sa pag-alagad sa Kampala. Sama sila sa bag-ong kaliwat sa mga misyonero human sa kabaldahan sa daghang katuigan. Ang unang tawo nga ilang gisangyawan sa maayong balita maoy usa ka batan-on nga dugay nang naghulat sa balita sa paglaom. Gisugdan dayon ang pagtuon sa Bibliya ug gihimo kini makaduha sa usa ka semana. Sa unang adlaw miuban ang batan-on sa laing mga Saksi sa pag-alagad sa kanataran, ang duha giatubang sa armadong kriminal. Bisag walay kasinatian, misalig siya kang Jehova ug misugod sa pagsangyaw kanila. Sa daghang makuyaw nga minuto nagdebate ang mga tulisan kon patyon nila sila o dili. Dayon ang usa sa nagdalag armas misulti sa iyang kauban sa pagbuhi sa duha. Unsay gihimo sa batan-on human niining makuyaw nga kasinatian? Sa walay pag-ukon-ukon siya ug ang iyang kauban mipadayon sa pagsangyaw sa sunod nga balay! Bawtismado na karon siya ug ang iyang mga mata iyang gitutok diha sa bahandi sa payoner nga pag-alagad.

Nakakita ang usa sa mga misyonero ug tawo nga nagtrabaho sa Mozambique. Miingon siya nga taas ang iyang pagtamod sa mga Saksi ni Jehova, kay iyang nakita ang ilang mahinlo ug mahusayng mga kampo sa Mosambique.a Natandog kaayo kining tawhana sa dihang usa ka adlaw iyang nakita ang pobre kaayong pamilya sa mga Saksi nga miabot sa kampo. Mainiton kaayo silang giabiabi sa espirituwal nga mga igsoon gikan sa nagkalainlaing mga tribo. Dayon ang ilang materyal nga panginahanglan giatiman, lakip sa balay, uma, mga gamit, ug mga besti. Karon kining tawhana nakatilaw sa samang gugma ug panag-igsoonay samtang siya nagpahimulos sa pagtuon sa Bibliya sa regular ug nakigbahin sa Kristohanong mga tigom uban sa mga Saksi ni Jehova.

Makita sumala niining mga eksperyensiya nga ang mga misyonero, uban sa ilang mga igsoong babaye ug lalaki sa Uganda, adunay katarongan sa pagkalipay. Sila kanunayng nakaagi sa kakulang sa pagkaon, tubig, ug elektrisidad, ug sila kanunayng makadungog sa tingog sa mga posil ug mga pagbuto, apan mapasalamaton sila sa anam-anam nga kauswagan. Natagbaw sila sa pagtabang sa mga tawo sa pagtan-aw sa bili sa “tinuod nga kinabuhi.” Ang 250 ka magmamantala sa Gingharian sa Diyos dinhi nakagugol ug aberids nga kapin sa 14 ka oras kada bulan diha sa kalihokang pagsangyaw. Adunay daghang interes ug daghan ang mikuha sa buluhaton sa bug-os panahong pagsangyaw. Sa karon kapin sa 500 ka pagtuon sa Bibliya ang gidumala niining matahom nga bahin sa yuta nga, sa pipila ka bahin, naghatag ug panan-awon-daan sa usa ka yutan-ong paraiso. Daghang mga taga Uganda ang nakakat-on sa pagliso sa ilang panan-awon sa “tinuod nga kinabuhi” sa walay kataposan nga maoy katuyoan sa Magtatagana sa kinabuhi, si Jehova, sa haduol nga umaabot.

[Footnote]

[Blurb sa panid 28]

Pinaagi sa suod nga pakig-uban sa mga tigom ug sa regular nga pagkaon sa espirituwal nga kalan-on, sila nagpabiling malipayon

[Mapa/Letrato sa panid 27]

(Alang sa bug-os nga pagkahan-ay sa teksto, tan-awa ang publikasyon)

UGANDA

Kampala

ZAIRE

SUDAN

KENYA

Lake Victoria

[Hulagway sa panid 29]

Ang kabungtoran sa habagatang-kasadpan sa Uganda

[Hulagway sa panid 30]

Grupo sa bag-ong gibawtismohang mga Saksi