Ang mga Kausaban sa Tibuok Kong Kinabuhi Alang Kang Jehova
Sumala sa giasoy ni Smith Bell
“APAN ang alagianan sa matarong ingon sa banagbanag sa kahayag nga nagakasanag sa kahayag ngadto sa pagkahingpit sa adlaw.”—Proverbio 4:18.
Nagpakita kining tekstoha sa kausaban ug sa kauswagan, sa magpalandong ako sa usa ka gatos ka tuig sa akong kinabuhi, akong nakita kon sa unang paagi si Jehova sa tinuod nagpadayon sa pagdan-ag sa dalan sa kamatuoran. Kini nagkinahanglag pagkamainandamon sa pagdawat sa maong kausaban ug kauswagan sa bahin niadtong naningkamot sa pag-alagad kaniya.
Gibando ang Tabang sa Pagtuon sa Bibliya
Ang unang dakong kausaban sa dalan sa akong kinabuhi miabot sa panahon sa Gubat sa Kalibotan I. Akong makita gihapon ang mga pulong nga gipatik sa lokal nga mga pamantalaan sa banika sa Saskatchewan, Canada, sa 1918: “BANNED: THE FINISHED MYSTERY, BY C. T. RUSSELL.” Tingali dili kaayo ko maikag gawas sa kamatuoran nga kini mao gihapon ang awtor kansang mga sermon sa Bibliya sa naandan maoy ginabasa sa akong amahan sa nagdako ako duol sa White Water, Manitoba. Ilabina nakong mahinumdoman ang iyang pag-uyon sa mga sermon ni Gn. Russell nga nagkutlo gikan sa Bibliya nga walay impiyernong kalayo.
Karon daw mao kining libroha ang gipakigsultihan sa tanan, ug napukaw ang akong pagkamasusihon. Nganong ang komentaryo bahin sa Bibliya, sa tanan pa, idumili sa kinatibok-ang publiko? Sa laing bahin, dili ba ang artikulo ginaingon nga kini naundan ug mahulhugong pakig-away batok sa kagamahanan ug batok sa gubat nga mga pahayag? Bisan pa niana, nagtinguha ako nga makabaton nianang libroha. Bisan pa sa akong paningkamot, wala akoy nakita. Hinunoa, gihatagan ako ug lain sa samang mga serye nga nag-ulohang The Divine Plan of the Ages. Sa dihang natapos nako kini sa pagbasa ug sa pagtandi niini uban sa akong Bibliya, malipayon kaayo ako. Mao kini ang kamatuoran!
Sa wala pa kining higayona, dili kaayo ako interesado ako sa relihiyon, hinuon nakahigayon ako sa pagbasa sa Bibliya kas-a. Sa pagkatinuod gisuksok kini sa akong inahan diha sa akong butang sa dihang migikan sa Manitoba sa pag-adto sa kasadpan sa Saskatchewan aron sugdan ang pagpanguma sa akong kaugalingong umahan sa panuigong 22. Sa 1905 sa hapit nang matapos ang akong materyal nga ginabasa nianang unang tingtugnaw, misugod ako sa pagpalandong sa Bibliya ug sa kamatuoran nga makita niana. Ang akong hukom mao nga walay butang sa kalibotan nga makapauswag hangtod nga gapuson si Satanas ug ihulog sumala sa Pinadayag 20:1-3.
Nasayod Ako nga Kinahanglang Mosangyaw Ako
Milabay lamang sa kalit ang mga katuigan ug naminyo ako ug misugod pag-atiman ug pamilya. Apan karon, human nga nabasa ang Divine Plan, akong nakita nga dili lamang angay maglingkod ako ug maghulat niining butanga nga mahitabo ug maglaom sa pag-ani sa tanang mga kaayohan alang sa akong kaugalingon. Kinahanglang akong isugilon sa uban ang mahitungod sa katingalahang mga butang nga gisaad ni Jehova.
Ang maayong pagasugdan mao ang akong silingan, matud ko, ug sila sa pagkamatuod malipay sama kanako sa pagpamati sa maayong balita. Misugod ako sa paghikay ug pagtuon sa Bibliya diha sa akong balay ug gidapit ang akong mga higala gikan sa kasilinganang mga kaumahan sa pakig-uban kanako. Apan, imbes makadawat ug pagsanong, sa dayag nagtuo sila nga nabuang ako! Ilang gisugyot nga mas makaalagad ako sa komunidad kon dawaton nako ang posisyon sa pagkahimong superintendente sa lokal nga Sunday School sa nagkalainlaing relihiyon. Miuyon ako sa pag-adto sa pagkasunod Dominggo ug dayon mihimo sa akong desisyon.
Sa akong paghiabot gipahibalo ako nga ang hisgotan nianang adlawa mao ang ulohan “Kinsa ang Mas Relihiyoso—Mga Kalalakin-an o Kababayen-an?” Wala maghulat sa sermon, migawas ako sa pultahan, ug wala na gayod mobalik. Unsaon nako sa pagkatagbaw niining binuang sanglit nabuksan na man ang akong mata sa tinuod hinungdanon makahuluganong mga kamatuoran nga nakapagawas kanako sa kalisang sa walay kataposang pagsakit ug sa natin-awan sa samag-karnerong kahimtang sa patay, bisan dili na hisgotan pa ang dakong paglaom sa kinabuhing walay kataposan? Ang pagtulon-an sa Bibliya sa pagkabanhaw maoy dakong paglipay sa akong asawa ug kanako, sanglit namatay ang among duha ka gagmayng anak nga babaye. Nawala ang among kasakit sa dihang among nahibaloan nga wala sila dalha sa Diyos aron sa pagpuyo sa langit uban sa daghang mga manulonda.—Ecclesiastes 9:5, 10; Isaias 25:8; Juan 5:29; Pinadayag 21:3-5.
Niining higayona, akong nakontak ang ubang interesado nga mga Estudyante sa Bibliya sa lugar sa Wilkie, nga maoy kinaduolang lungsod, ug kapin sa usa ka dosena ang napormang kongregasyon. Dayon giasayn ako sa pagdumala sa among sinemanang diskusyon sa Ang Bantayanang Torre sa matag Dominggo. Gihatag kining kaakohana kanako sa wala pa ngani ako bawtismohi!
Kausaban sa Akong Panghunahuna
Sa 1922 gibawtismohan ako. Gisundan kini sa bawtismo sa akong asawa sa ulahi ug laing kausaban ang nahitabo. Miritero ako sa konseho munisipal. Akong nakita nga ang akong pagkamaunungon dili mahimong mabahin. Dili ako makaadto sa mga tawo sa kasikbit nga mga dapit ug makigsulti kon sa unsang paagi wad-on diha kanato sa Gingharian sa Diyos ang mga inhustisya sa kalibotan samtang sa samang panahon magpadayon sa pagtabang sa tawhanong mga paningkamot. Ilabina nga tin-awng gipahayag sa Bibliya nga sila gihukman nga mapakyas.—Pinadayag 19:11-18.
Sanglit mas hinay man ang transportasyon niadtong panahona, lahi ang among kalihokan sa pagsangyaw kay sa karon. Magpili kami ug usa ka distrito ug moduaw sa mga balay sa tanan nga sakop niana. Among ipalabay ang adlaw sa pagdapit kanila sa pag-adto sa eskuylahan sa Dominggo sa pagpamati ug pakigpulong sa Bibliya. Mahinumdoman ko pa ang usa ka Dominggo sa dihang usa ka igsoon ug ako miadto sa nagkalainlaing kaumahan nga nanagdapit sa mga tawo ngadto sa eskuylahan nianang gabhiona ug nagtanyag usab kanila ug unom ka tabang sa Bibliya sa bayad nga $3. Gituktok namo ang usa ka pultahan ug miatubang ang babaye ug miprangka sa pagsulti nga dili gayod siya mobasa niadtong mga libroha. Mitubag ang igsoon, “Ginang, dili lamang kinahanglang imong basahon kining mga libroha kondili kinahanglang tun-an usab nimo ang tanang butang diha kanila kon buot kang mabuhi!” Kita karon adunay mas mataktikanhong paagi sa pag-atubang sa mga tawo, apan ang among pagkasinsero tin-awng makita diha sa among walay pagtakobang panagway.
Sa milabay ang pipila ka tuig daghan sa among kongregasyon nabalaka mahitungod sa among tukmang dapit sa kahikayan ni Jehova. Unsa ka malipayon kami sa diha, sa 1935, misamot sa pagkadan-ag ang kahayag aron ipakita kanamo kon kinsa ang lakip sa dakong panon nga gihisgotan sa Pinadayag 7:9-17. Sila dili maoy ikaduhang langitnong matang ug busa dili makigbahin sa simbolikong bino ug walay lebadurang tinapay sa tinuig na Memoryal sa kamatayon ni Kristo. Dako kaayo kadto nga kahupayan nga makahimo sa paglantaw sa unahan nga masaligon sa pagkinabuhi diha sa usa ka paraiso nga yuta sa walay kataposan, ingong bahin sa mga “maaghop” nga maoy giingon ni Jesus nga makapanunod sa yuta, ang iyang “ubang karnero.”—Mateo 5:5, King James Version; Juan 10:16; Isaias 65:17-25.
Gibando na Usab ang Literatura sa Bibliya!
Sa 1940, sa panahon sa Gubat sa Kalibotan II, ang relihiyosong mga kaaway nga nagpalakaw pinaagi sa politikal nga paagi, nakakita na usab ug laing higayon aron mabando ang atong mga kalihokan. Gihimo kini nga walay pasidaan. Sa nahitabo kini, ang akong pamilya ug ako miduaw sa Manitoba. Sa dihang nahiuli kami ug nagpakaon sa mga kabayo miawas ang daghan kaayong mga abina gikan sa kamalig! Daw nakapanahon ang mga igsoon sa pagkuha sa mga literatura sa kongregasyon gikan sa among tigomanan ug gitago kini diha sa among kamalig nga kan-anan sa mga kahayopan aron dili kini maimbargo. Gisira sa mga awtoridad ang maong patukoran ug gikuha ang among pundo sa banko. Busa kinahanglang maghimo kami ug sekretong mga kahikayan sa paghimog mga tigom diha sa nagkalainlaing balay matag semana.
Sa 1941 ang akong asawa, ang akong anak nga babaye ug ako miadto sa British Columbia, gibilin ang among anak nga lalaki sa uma. Nagplano kami sa pagpalabay sa tingtugnaw sa kabaybayonan. Sanglit kay ang atong buluhaton gibando pa man gihapon, mainampingon namong gikamada ang daghan kaayong literatura diha sa among pickup nga trak. Sa miabot kami sa White Rock, nakakita dayon akog trabaho ingong karpentero ug, sanglit wala may kongregasyon, misugod ako sa pagsusi sa uban nga adunay sama nakog pagtuo nianang dapita. Sugdan nako ug sama niini ang mga kulokabildo: Moingon ako, “Unsay imong hunahuna bahin niining pagbando sa mga Saksi ni Jehova?” Ang ilang tubag mahimong, “Wala akoy kasayoran mahitungod kanila, apan sa akong pagtuo kana siya nga nagpuyo didto may simpatiya kanila.” Dayon akong adtoon kanang tawhana ug sa ulahi usa ka grupo sa unom o pito kanamo misugod sa paghimog sinemanang Pagtuon sa Ang Bantayanang Torre.
Sanglit nahimutang man ang White Rock sa utlanan sa Amerika ug sanglit wala may apil ang Tinipong Bansa sa maong pagbando lainlain ang motabok sa utlanan ug mobalik nga adunay dalang bag-ong mga kopya sa Ang Bantayanang Torre. Walay posibilidad nga marikisa nga walay sakyanan ug busa nakahimo kami sa pagpasignunot sa labing bag-ong espirituwal nga pagkaon. Samtang ang atong mga kalihokan ug literatura gibando, kadto silang tinuod nga responsabli, nga mao ang klero, dili usab makabando sa Bibliya. Busa moadto kami sa mga balay sa mga tawo ginamit lamang ang Pulong sa Diyos.
Nagplano kami sa usa ka higayon ug kampanya diha sa White Rock, usa ka lungsod nga adunay mga 1,500 ka tawo nianang higayona. Among gitigom ang tanan namong mga pulyeto nga gitagoan sa mga igsoon ug gilubong ug nadugangan kini sa akong dala gikan sa Saskatchewan. Magputos kamig mga tulo sa silopin ug bugkosag lastiko ug sa paglabay sa tungang gabii among ibutang kini sa mga pultahan sa mga tawo.
Sa pagkasunod buntag mitrabaho kami sumala sa naandan, ug nahimong dugokan sa mga kulokabildo ang among kalihokan sa miaging gabii. Daw kombinsido ang tanan nga adunay daghan niadtong “mga Saksi” sa palibot sanglit silang tanan nakadawat man sa pulyeto bisag asa man silang bahin sa lungsod nagpuyo.
Relihiyosong Garbo ug Pagpihig
Human gilayon nga gikuha ang pagbando sa 1943 opisyal nga natukod ang usa ka kongregasyon sa White Rock ug ang akong pamilya ug ako mihukom sa pagpabilin didto. Miabang kami ug balay aron magamit ingong tigomanan, apan magsabasaba sa hilabihan ang mga magsusupak nga imposible gayod ang pagpaminaw. Among madunggan ang mga tambol, mga lata ug mga bosina sa kotse gikan sa mga dalan, maingon man usab sa paglamba sa pultahan sa silingan. Tungod niini mibati kami nga wala kahinangpi.
Mibalhin kami sa laing giabangang balay gawas sa lungsod diin adunay kahilom, ug niining higayona ang among kongregasyon mitubo sa mga 50 ka magmamantala. Sa ulahi niana nakatukod kami ug bag-ong Kingdom Hall diha sa lungsod, apan sa milabay ang mga laing pito ka tuig nakita nga nagkinahanglan kami ug dakodakong lawak. Makalipay, among nabaligya ang tigomanan sa makataronganong bili ug pinaagi niini nakapalit kami ug laing lugar sa sentro sa lungsod. Busa among gitukod ang among bag-ong Kingdom Hall nga wala kami manghulam ug kuwarta.
Dagkong Personal nga Kausaban
Laing dakong kausaban ang mitungha sa katuigang 1950 sa akong kinabuhi nga, pinaagi sa tabang ni Jehova, sa kataposan milampos ako. Mao kini ang akong pag-undang sa batasan sa tabako. Sulod sa daghang katuigan usa ako ka “part-time” nga tigpanabako, wala gayod kini makabalda sa akong pag-alagad kang Jehova apan wala gayod sa bug-os mohunong niana. Natugaw ang akong konsensiya niini sa matag karon ug unya, apan sanglit mataktikahong paagi gipahayag sa nangaging impormasyon ang pagkaseryoso niining dili- makapahimsog nga batasan, wala ako mohunong.
Hangtod nga mipahayag ang mga publikasyon sa Watchtower nga ‘walay bisan usa ang tugotan nga magpahayag sa plataporma kon siya tigpanabako,’ nga akong gibalikbalik pagbasa ang kasulatan diha sa 2 Corinto 7:1, Roma 12:1, 2 ug Proverbio 3:5. Nasayod ako nga kinahanglang talikdan ko ang akong batasan sa pagtabako. Sa kataposan sa dihang akong giduol si Jehova sa pag-ampo uban sa tukmang tinamdan, siya mitaganag “tabang sa hustong panahon,” ug milampos ako sa paghunong sa bug-os. Dugang pa, ang akong pangibog ug laing sigarilyo wala na gayod mobalik.—Hebreohanon 4:16.
Nagpadayon si Jehova sa pagpanalangin sa mga paningkamot sa among grupo sa paghimog mga tinun-an. Ug sa pagka 1967 ang among kongregasyon sa White Rock miuswag sa mga usa ka gatos ka magmamantala. Niining higayona nahimong tin-aw nga ang akong panan-aw dili na motugot kanako sa pagmaneho sa among sakyanan busa ang among anak nga babaye, umagad ug mga apo nagdasig kanamo sa pagbalhin sa Whidbey Island, Washington, aron maduol kanila. Among nakita nga makapasubo ang pagbiya sa tanan namong mga higala, apan gipabati kami sa tanan diha sa among bag-ong kongregasyon nga dinawat ug nakakita dayon kamig daghang mga higala. Ang akong asawa namatay na sukad sa 1973; among gitagamtam ang katingalahang kaminyoon hapit 67 ka tuig, ug ako nagpaabot sa adlaw sa dihang siya banhawon sa tugob sa kinabuhi ug sa maayong panglawas.
Kasamtangan, daghan kaayo akong pasalamatan kang Jehova, ang bahin niini mao ang pribilehiyo nga iyang gihatag kanako sa pagkakita sa ‘usa nga diyutay nga nahimong usa ka libo ug ang usa nga gamay nahimong usa ka kusganon nga nasod.’ Lain pa, bisan pa sa akong katigulangon nakakaplag akog dakong kalipay sa pag-alagad sa akong mga igsoon ingong ansiano diha sa lokal nga kongregasyon. Ug nakigbahin gihapon ako sa akong pamilya sa pagsangyaw sa pultahan ug pultahan sa pagpangitag dugang mga tawo nga interesado sa pagpangitag mas maayong butang kay sa ginatanyag niining masakitong sistema sa mga butang. Sa pagkatinuod si Jehova nagapadali sa iyang buluhaton “sa iyang kaugalingong panahon,” sumala sa iyang gisaad, ug siya sa pagkatinuod nagapanalangin kanako sa pagsunod sa iyang mahigugmaong pagdumala.—Isaias 60:22.