Hustong Panglantaw sa Dugo—Ilalom sa Kristohanong Kahikayan

ANG nagamandong lawas sa unang-siglong Kristohanong kongregasyon, ilalom sa direksiyon sa balaang espiritu, nagbaod may kalabotan sa dugo. Ang ilang sugo nag-ingon: “Kay ang balaang espiritu ug kami mismo mipabor nga dili magpuno ug dugang pang kabug-at diha kaninyo, gawas niining mga kinahanglanong butang, nga padayong magaayad sa mga butang nga gihalad ngadto sa mga idolo ug gikan sa dugo ug gikan sa mga butang nga naluok ug gikan sa pakighilawas. Kon kamo maampingong magpahilayo sa inyong kaugalingon gikan niining mga butanga, kamo mouswag. Maayong panglawas kaninyo!” (Buhat 15:22, 28, 29) Ang pagdili naglakip sa unod uban sa dugo diha niini (“mga butang nga naluok”).

Sa sukaranan, kining maong sugo nahasandig sa sugo sa Diyos nga dili mokaon ug dugo, ingon sa gihatag ngadto kang Noe ug sa iyang mga anak ug, sa ingon, ngadto sa tanang tawo. May kalabotan niini, ang mosunod makaplagan diha sa The Chronology of Antient Kingdoms Amended, ni Sir Isaac Newton (Dublin, 1728, p. 184): “Kining balaora [nga magaayad sa dugo] mas karaan pa kay sa mga adlaw ni Moises, sanglit gihatag kini ngadto kang Noe ug sa iyang mga anak, dugay na sa wala pa ang mga adlaw ni Abraham: ug busa sa dihang ang mga Apostol ug mga Ansiyano sa Konseho sa Jerusalem miingon nga ang mga Hentil wala obligaha nga magpatuli ug mosunod sa balaod ni Moises, wala nila ilakip kining balaod nga magaayad sa dugo, ug gikan sa mga butang nga naluok, sanglit mas una kini nga balaod sa Diyos, nga gipatuman dili sa mga anak ni Abraham lamang, kondili sa tanang nasod, samtang nagtipon sila pagpuyo sa Shinar ilalom sa pagmando ni Noe: ug maingon man usab ang balaod nga magaayad sa mga karne nga gihalad ngadto sa mga Idolo o bakak nga mga Diyos, ug gikan sa pakighilawas.”—Italiko iyaha.

Integridad Nalangkit

Sukad sa panahon nga ang bag-ong pakigtugon gisugdan pinaagi sa dugo ni Jesu-Kristo, ang mga Kristohanon miila sa nagahatag-kinabuhi nga bili niining maong dugo pinaagi sa kahikayan ni Jehova ug pinaagi kang Jesus ingong dakong Hataas nga Saserdote kinsa “misulod, dili, dili pinaagig dugo sa mga kanding ug sa toreyong mga baka, apan pinaagi sa iyang kaugalingong dugo, makausa alang sa tanang panahon ngadto sa balaang dapit ug nagbaton ug walay-kataposang kapahigawasan alang kanato.” Pinaagi sa pagtuo diha sa dugo ni Kristo, nahinloan ang mga tanlag sa mga Kristohanon gikan sa patay nga mga binuhatan aron sila maghatag ug balaang pag-alagad ngadto sa buhing Diyos. Sila maikagon sa ilang pisikal nga kahimsog, apan sila sa panguna ug labaw pang sinsero nga maikagon sa ilang espirituwal nga kahimsog ug sa ilang baroganan atubangan sa Maglalalang. Buot nilang huptan ang ilang integridad ngadto sa buhing Diyos, nga dili maglimod sa halad ni Jesus, nga dili mag-isip niana nga walay bili, ug dili magyatak niana. Kay sila nagtinguha, dili sa kinabuhi nga lumalabay, kondili sa walay-kataposang kinabuhi.—Hebreohanon 9:12, 14, 15; 10:28, 29.