Ipakitang Ikaw Nagtagad
Sinulat sa koresponsal sa Pagmata! sa Canada
Ang giluom nga kaguol taliwala sa daghang tigulang sa Canada nagtukmod nila sa paghikog sa makapabalakang gikusgon. Usa ka taho sa mantalaang Vancouver Sun nag-ingon nga samtang 1 sa 200 ka mga pagsulay sa paghikog sa mga batan-on motultol sa kamatayon, ang proporsiyon maoy 1 sa 4 alang niadtong lampas sa 65. Ug gituohan nga gani “kulang ang gitahong paghikog taliwala sa mga tigulang, tungod kay lisod ilhon ang paghikog gikan sa natural nga mga hinungdan sa mga tigulang nga may grabeng mga sakit.”
Nganong daghan sa mga tigulang ang nawad-ag ganang mabuhi? Ang sikyatristang si Oluwafemi Agbayewa sa University of British Columbia, usa ka eksperto bahin sa isyu sa paghikog sa mga tigulang, nagpunting sa depresyon, pagkanahilain sa katilingban, ug kamingaw ingong maoy nakatampong mga hinungdan. Si Gerry Harrington, direktor sa Suicide Information and Education Centre sa Calgary, Alberta, nag-ingon nga samtang magkatigulang ang mga tawo, sila “mawad-an sa ilang pagtamod, ilang gahom, ilang awtoridad. . . . Kalit lang, wala nay mangayo sa ilang mga opinyon. Daghan kaayong tawo ang nagpuyo na lang sa mga nursing home nga walay laing gibuhat gawas sa paglingkod ug pagbaraha ug pagtan-awg TV.” Nagpasamot niining pagbatia mao ang kamatuoran nga ang katilingban nagpabili pag-ayo sa mga batan-on maingon man sa independensiya, pagkamabungahon, ug kaabtik—ang mismong mga kinaiya nga mahanaw inigkatigulang sa usa.
Ugaling, sa mga mata ni Jehova nga Diyos, ang mga tigulang gipabilhan pag-ayo. Ang pamatuod nga iya gayong nasabtan ang ilang emosyonal nga mga panginahanglan makita diha sa iyang sugo ngadto sa mga tawo sa karaang Israel: “Atubangan sa buhok nga ubanon motindog ka, ug magpakita ka ug konsiderasyon sa tawong tigulang, ug kahadlokan mo gayod ang imong Diyos.”—Levitico 19:32.
Nan, sa unsang paagi kita ‘magpakitag konsiderasyon’ sa mga tigulang? Bisag ang mga pulong sa kaalam tingali dili kanunay mogawas sa ilang mga ngabil ug ang ilang mga di-kahingpitan mapadako gumikan sa ilang katigulangon, sila takos sa atong pagtahod. Ipakitang ikaw nagtagad. Hatagi silag dignidad, pasidungog, ug pag-ila pinaagig pagkat-on sa ilang panabot ug kaalam, ilabina kon ang ilang kinabuhi gigiyahan sa espiritu sa Diyos ug tukmang pagsabot sa iyang Pulong.
Daghan pa ang ginatudlo sa Pulong sa Diyos bahin sa pag-atiman ug pagpasidungog sa tigulang. Alang sa dugang impormasyon, palihog pagsulat sa mga magpapatik niining basahona ug hangyoa ang librong Ang Sekreto sa Kalipay sa Pamilya.