Ang Hunahuna sa Bibliya

Angay ba Natong Basolon si Satanas sa Atong mga Sala?

GIBASOL si Satanas sa unang sala sa tawo. “Ang bitin​—kini naglimbong kanako busa ako mikaon,” matod ni Eva. (Genesis 3:13) Sukad niadto, ang “orihinal nga halas, ang usa nga gitawag Yawa ug Satanas” nagpadayon sa pag-atake sa katawhan, ‘nga nagabuta sa mga hunahuna’ sa mga tawo ug “nagapahisalaag sa tibuok gipuy-ang yuta.” (Pinadayag 12:9; 2 Corinto 4:4) Walay tawo nga makaikyas sa iyang pagpit-os, apan nagpasabot ba kini nga dili kita makasukol sa iyang impluwensiya? Ug kon kita makasala, kanunay bang siya ang pasanginlan?

Ang Bibliya nagpatin-aw nga sa pagkatinuod, gilimbongan ni Satanas si Eva. (1 Timoteo 2:14) Nalimbongan siya sa paghunahuna nga pinaagi sa paglapas sa sugo sa Diyos, makabaton siya ug samag-diyos nga kaalam ug independensiya. (Genesis 3:4, 5) Tungod sa paghunahuna niana, siya nakasala. Sa gihapon, may tulubagon siya sa Diyos ug gihukman siyang mamatay. Ngano man? Tungod kay bisan tuod namakak si Satanas, bug-os siyang nahibalo sa sugo sa Diyos. Wala gayod siya pugsa sa pagsupak; hinunoa, siya gihapon maoy nagkontrolar sa iyang mga lihok, nga bug-os nga makaarang sa pagsukol sa impluwensiya ni Satanas.

Sukli ang Yawa

Posible alang kanatong mga tawo nga mosukol sa Yawa. Sa Efeso 6:12, kita giingnan nga “kita adunay pakigdumog” batok sa “tuman-kadaotang mga puwersa nga espirituhanon diha sa langitnong mga dapit.” Nan, dayag nga gidahom sa Diyos nga kita makigbugno sa impluwensiya ni Satanas. Apan sa unsang paagi ang usa ka tawo makapakigsangka sa labaw-tawhanong gahom ni Satanas ug sa iyang mga demonyo? Gikinahanglan ba kanato nga makigbugno sa dili-timbang nga gubat, usa nga seguradong mapildi kita? Wala, tungod kay wala kita ingna sa Diyos nga makigsangka sa Yawa sa atong kaugalingong kusog. Gihatagan kita ni Jehova ug nagkalainlaing mga paagi nga niana makasukol kita sa mga panghaylo sa Yawa ug mogula nga madaogon. Ang Bibliya nagtug-an kanato kon kinsa ang Yawa, kon sa unsang paagi siya nagalihok, ug kon unsaon nato pagpanalipod ang atong kaugalingon.​—Juan 8:44; 2 Corinto 2:11; 11:14.

Kon Unsaon ‘Pagsukol sa Yawa’

Ang Kasulatan nagsugyot ug duha-ka-lakang nga paagi sa pagsukol sa Yawa. Kita gitambagan: “Busa, magpasakop kamo sa Diyos; apan sukli ang Yawa, ug siya mokalagiw gikan kaninyo.” (Santiago 4:7) Ang unang lakang sa atong pagpasakop sa Diyos naglangkit ug pagkamasinugtanon sa iyang mga sugo. Ang atong kanunayng pagkaamgo sa paglungtad sa Diyos, sa iyang kaayo, sa iyang makalilisang nga gahom ug awtoridad, ug sa iyang hamiling mga prinsipyo maghatag kanato ug kusog sa pagsukol kang Satanas. Ang mapinadayonong pag-ampo sa Diyos hinungdanon usab.​—Efeso 6:18.

Tagda ang okasyon sa dihang gitental si Jesus sa Yawa. Ang paghinumdom ug pagkutlo sa lainlaing mga sugo gikan sa Diyos tinong nakatabang kang Jesus sa pagsukol. Napakyas sa paghaylo kang Jesus sa pagpakasala, gibiyaan siya ni Satanas. Human sa maong pagsulay, si Jehova, pinaagi sa iyang mga manulonda, nagpalig-on pa kang Jesus. (Mateo 4:1-11) Busa, si Jesus masaligong makadasig sa iyang mga tinun-an sa paghangyo sa Diyos nga ‘luwason sila gikan sa tuman-kadaotang usa.’​—Mateo 6:13.

Ang pagluwas sa Diyos kanato wala magpasabot nga magbutang siya ug nagapanalipod nga taming palibot kanato. Hinunoa, giingnan niya kita sa pagtinguha sa diyosnong mga hiyas, sama sa kamatuoran, pagkamatarong, pakigdait, ug pagtuo. Kining mga hiyasa magsilbing “armadora,” nga makapaarang kanato nga “makabarog nga malig-on batok sa mga malipatlipatong kaugdahan sa Yawa.” (Efeso 6:11, 13-18) Busa uban sa tabang sa Diyos posible ang pagbuntog sa mga tentasyon sa Yawa.

Ang ikaduhang lakang nga gisugyot sa Santiago 4:7 mao ang ‘pagsukol sa Yawa.’ Naglangkit kini ug mahukmanong aksiyon, nga mokalagiw gikan sa iyang makadaot nga impluwensiya. Ang usa kinahanglang maglikay nga maladlad sa iyang malimbongong gahom ug magsalikway sa materyalistiko ug imoral nga mga pilosopiya nga kaylap kaayo sa kalibotan karon. Ang maong pagsukol sa Yawa duyog sa kinabuhi nga gipahinungod sa pagpahimuot sa Diyos bililhon kaayo sa atong pagpakig-away batok kang Satanas. Apan ang tanan bang mga sala maoy laktod nga resulta sa impluwensiya sa Yawa?

Ang Atong Pagpakigbugno sa Sulod Nato

Ang magsusulat sa Bibliya nga si Santiago misaysay: “Ang matag usa ginasulayan pinaagig pagkaganoy ug pagkahaylo sa iyang kaugalingong tinguha. Unya ang tinguha, dihang kini makapanamkon na, magpahimugso ug sala.” (Santiago 1:14, 15) Ikasubo, dili nato mabuntog sa bug-os ang kinaiyanhong kahuyangan ug pagkadili-hingpit. (Roma 5:12) “Walay tawo nga matarong sa ibabaw sa yuta nga padayong nagabuhat ug maayo ug wala magpakasala,” matod sa Bibliya.​—Ecclesiastes 7:20.

Wala kini magpasabot nga ang tanang sala bug-os nga dili nato makontrolar. Sa pipila ka kahimtang, pinaagi sa atong sayop nga mga pagpili, gipahinabo nato ang tentasyon sa atong kaugalingon. Busa bisan tuod ang sayop nga tinguha maoy gumikan tingali sa atong kaugalingong pagkadili-hingpit o sa impluwensiya ni Satanas, anaa ra gayod kanato kon ato kanang palamboon o kaha isalikway. Haom nga misulat si apostol Pablo: “Bisan unsay ginapugas sa usa ka tawo, kini usab iyang anihon.”​—Galacia 6:7.

Dawata ang Tulubagon

Kasagaran malisod alang sa mga tawo ang pag-angkon sa ilang kaugalingong kahuyangan, kapakyasan, kasaypanan​—oo, kasal-anan. (Salmo 36:2) Usa ka butang nga motabang kanato sa pagdawat ug tulubagon sa atong mga sala mao ang kahibalo nga ang Diyos wala magkinahanglan karon nga kita magmahingpit. “Wala niya buhata kanato ang angay sa atong mga sala; ni magabalos siya kanato sa angay sa atong mga kasal-anan,” miingon ang salmistang si David. (Salmo 103:10) Bisan tuod mapinasayloon ang Diyos, gidahom gihapon niya nga kita kusganong makigbugno, sa pagdisiplina sa atong kaugalingon, batok sa mga panghaylo sa Yawa ug sa atong kaugalingong mga hilig sa sala.​—1 Corinto 9:27.

Kinahanglang sabton nato nga bisan tuod ang Diyos nag-ila nga ang Yawa makaimpluwensiya sa atong mga lihok ug dunay dakong tulubagon sa makasasalang kahimtang sa tawo, wala kini magpahigawas kanato sa atong personal nga pagkamay-tulubagon. Busa, ang Roma 14:12 nag-ingon: “Ang matag usa kanato manubag alang sa iyang kaugalingon ngadto sa Diyos.”

Bisan pa niana, kon atong ‘kasilagan kon unsa ang tuman-kadaotan,’ ug ‘hawiran kon unsa ang maayo,’ kita magmadaogon batok sa daotan. (Roma 12:9, 21) Ang unang babaye, si Eva, napakyas sa pagbuhat niana ug gisilotan tungod sa iyang pagsupak; makasukol unta siya ug makasugot sa Diyos. (Genesis 3:16) Apan, giila sa Diyos ang papel nga gidula sa Yawa sa paglimbong kaniya. Ang Yawa gitunglo ug gihukman nga malaglag ngadtongadto. (Genesis 3:14, 15; Roma 16:20; Hebreohanon 2:14) Sa dili madugay dili na kita kinahanglang makigbisog sa iyang daotang impluwensiya.​—Pinadayag 20:1-3, 10.

[Picture Credit Line sa panid 26]

Erich Lessing/Art Resource, NY