Usa ka Magsusulat Nagpabili sa Pagmata!

Ang mosunod nga rekomendasyon migawas sa High Country News sa Oktubre 13, 1997, nga gipatik sa Paonia, Colorado, T.B.A.

“Ang Greenpeace [usa ka internasyonal nga pangkalikopang organisasyon] basin dili na moadto sa balay ug balay, apan laing grupo ang magpadayon sa iyang dugay nang paghisgot, nga sagad nagapasiugdag mga isyu sa kalikopan. Kini nag-apod-apod ug minilyon [19 ka milyon sa matag gula] ka mga kopya sa materyal niini sa halos 60 [sa aktuwal 81] ka pinulongan, lakip ang Pidgin, Hiligaynon ug Zulu. Ang Hulyo 8 [1997] nga isyu misukna diha sa iyang hapin: ‘Kinsay Moluwas sa Atong Kahayopan?,’ nga may estorya sa sulod nga naghisgot mahitungod sa miusbaw nga katulin sa pagkapuo (tulo kada oras), ang ‘biolohikanhong kahimsog sa planeta,’ ug pagdaot sa ekolohiya . . . Ang Agos. 22, 1997, nga isyu naghisgot sa ‘Ang Krisis sa Tubig: Usa ka Tibuok-Yutang Problema,’ ug ang mga epekto sa pag-usbaw sa populasyon, polusyon ug internasyonal nga tensiyon bahin sa paggamit sa mga suba . . . Samtang ang impormasyon maoy gibase sa siyensiya ug malukpanon, ang konklusyon sa daghan niini nga mga artikulo dili sama sa kadaghanang nagpasiugdag pag-atiman sa kalikopan. Sila nag-ingon nga kon buot nimong moambit sa pagpasig-uli sa yuta, ‘Nan palihog kat-oni kon unsay gikinahanglan sa Diyos kanimo pinaagi sa pagtuon sa Bibliya.’

“Ang grupo mao ang mga Saksi ni Jehova, ug ang publikasyon maoy Pagmata! Kon dili sila moanha sa imong pultahan, kontaka ang Watchtower Bible and Tract Society of New York Inc., 25 Columbia Heights, Brooklyn, NY 11201-2483.”

Wala na kamiy ikasulti pa gawas sa pagdugang, “o pagsulat sa kinaduolang adres nga nalista sa panid 5 sa Pagmata!”