Naghukom Ka ba Sumala sa mga Panagway?

HUKMAN ba nimo ang usa ka libro pinaagi sa iyang hapin? Ikaw hayan malimbongan. Aron malikayan kana, susihon una nimo ang mga kaundan niini. Kini giilustrar sa kaso sa usa ka iladong bida gikan sa Turkong sugilanon, si Nasreddin Hoja. (Ang Turkong pulong nga hoja nagkahulogang “magtutudlo.”) Siya “parehong malansison ug inosente, maalamon ug hungog . . . Debotado siya, apan adunay tawhanong mga kahuyangan.” Siya ang “dili mabuntog nga biktima sa mga kabaliskaran sa kinabuhi.”​—Tales of the Hoja, ni John Noonan, Aramco World, Septiyembre-Oktubre 1997.

Usa ka estorya ang giasoy bahin sa usa ka panaw nga iyang gihimo aron duawon ang usa ka opisyal nga Ottoman ug manihapon kauban niya. “Nga bakikaw, [si Nasreddin] mikawas sa asno ug mituktok sa dakong pultahan sa atubangan. Sa dihang kini giablihan, iyang nakita nga ang kombira nagasugod na. Apan sa wala pa siya makapailaila sa iyang kaugalingon, ang iyang tig-abiabi, nga nagtan-aw sa iyang nagkahugaw nga mga sapot sa pagbiyahe, walay tahod nga miingon kaniya nga dili pasudlon ang mga makililimos.”

Milakaw si Nasreddin, miadto sa nahimutangan sa iyang baluyot, ug “gisul-ob ang iyang kinanindotang sinina: usa ka hamiling kupo nga seda nga gidayandayanan ug balhibo sa hayop, ug usa ka dako kaayong turbante nga seda. Sa ingon niana nga panapot, siya mibalik sa atubangang pultahan ug mituktok pag-usab.

“Niining higayona, ang iyang tig-abiabi miabiabi kaniya nga mainiton . . . Gidalit kaniya sa mga sulugoon ang lamiang mga pagkaon. Gibubo ni Nasreddin Hoja ang usa ka panaksang sabaw ngadto sa usa ka bulsa sa iyang kupo. Sa kahibulong sa ubang mga dinapit, iyang gipanuksok ang sinugbang karne diha sa mga pilo sa iyang turbante. Dayon, atubangan sa kurat niyang tig-abiabi, iyang giduot ang balhiboong bahin sa iyang kupo ngadto sa usa ka platong pilav, nga nagbagutbot ‘Kaon, balhibo, kaon!’

“‘Unsay buot ipasabot niini?’ mireklamo ang tig-abiabi.

“‘Mahal kong ginoo,’ mitubag ang Hoja, ‘akong gipakaon ang akong mga sapot. Sa paghukom sumala sa imong pagtagad kanako sa milabayng tunga sa oras, tataw nga ang akong mga sapot, ug dili ang akong kaugalingon, ang gitumong sa imong pagkamaabiabihon!’”

Unsa ka subsob nga kita mohukom nga negatibo o positibo pinaagi lamang sa panagway! Sa dihang ang propetang si Samuel naghunahuna nga ang igsoon ni David nga si Eliab mao ang pinili ni Jehova alang sa sunod nga hari sa Israel, si Jehova miingon kaniya: “Ayaw tan-awa ang iyang panagway ug ang gitas-on sa iyang barog, tungod kay ako siyang gisalikway. Kay ang Diyos nagatan-aw dili ingon sa makita sa tawo, kay ang tawo nagatan-aw kon unsa ang makita sa mga mata; apan alang kang Jehova, siya nagatan-aw kon unsa ang anaa sa kasingkasing.” (1 Samuel 16:7) Oo, si Jehova maghukom sumala sa kahimtang sa kasingkasing, dili sumala sa mga panagway. Sa unsang paagi ikaw maghukom?

[Hulagway sa panid 31]

Gipasidan-an ni Jehova si Samuel nga dili magpalimbong sa mga panagway