Usa ka Makalilipay nga Sorpresa
Si Dana Folz maoy otso anyos sa dihang nasayran niya nga siya sinagop. Katuigan sa ulahi, siya misugod sa paghunahuna, ‘Kinsay akong inahan? Unsay iyang hitsura? Nganong iya akong gipasagop? Aduna ba akoy mga igsoong lalaki o babaye?’ Basaha ang asoy ni Dana kon sa unsang paagi iyang nakaplagan sa kataposan ang iyang tinuod nga inahan ug sa dramatikanhong sorpresa nga misunod.
AKO natawo sa Agosto 1, 1966, sa Ketchikan, Alaska, T.B.A. Ang akong igsoong babaye nga si Pam magulang kanako ug duha ka tuig. Ang among amahan maoy tig-alagad sa katilingban sa Buro sa Indianhong mga Kalihokan, ug kanunay siya nga gibalhin. Kanunay kaming nagbalhinbalhin sa Alaska. Human niana, kami mipuyo sa Iowa, Oklahoma, Arizona, ug sa Oregon.
Samtang miduaw kami sa mga paryente sa Wisconsin sa ting-init sa 1975, ang pipila sa akong mga ig-agaw mibugalbugal sa lain nakong ig-agaw. “Siya sinagop,” sila miingon, “ug busa dili gayod usa ka Folz.” Human sa among pagpauli sa balay, gisukna ko si Mama bahin niini ug natingala sa nakurat nga hitsura sa iyang nawong. Gipatin-aw niya kon unsa ang pagsagop. Nianang gabhiona, samtang nagtulo ang mga luha sa iyang mga mata, gisultihan niya ako nga ako sinagop ug ingon man ang akong igsoong babaye.
Ang pagkasinagop dili kaayo hinungdanon alang kanako niadto, ug sa kasamtangan wala ko kana hunahunaa. Ako may usa ka inahan ug usa ka amahan, ug daw normal man ang kinabuhi. Ang akong mga ginikanan mihukom nga dili na mobalhin ug tugotang ang pamilya makaestablisar. Sa dihang ako nagnuybe anyos, kami mipuyo sa Vancouver, Washington. Si Papa ug ako suod kaayo, samtang si Mama ug ako dili kaayo ingon ka suod. Ako independente ug rebelyoso usahay, ug ang kahigawad nga gipahinabo niini kang Mama tingali nagpatin-aw kon nganong nagdako ang ulang tali kanamo.
Paghigugmaay ug Kolehiyo
Sa naghayskul ako, nakaila ko si Trina, ug kami nahimong managhigala dihadiha. Human migraduwar gidawat ko ang pagkahimong eskolar sa akademiko sa Oregon State University, sa Corvallis, Oregon. Akong gigamit ang akong libreng panahon sa pagngadto-nganhi sa Vancouver aron mahiuban kang Trina, nga may usa na lang ka tuig sa hayskul. Wala kaayo ako magtuon ug nagtuo nga makaya lang nako ang kolehiyo. Ang akong unang report kard nakapatugaw—kadto ang labing ubos nga akong nakuha! Ako naulaw. Apan wala ako mohunong sa pagduawan kang Trina; gidala lang nako ang akong mga libro aron ako makatuon sa panahon sa akong mga pagduaw.
Unya, usa ka adlaw, samtang nagsakay sa akong motorsiklo balik sa tunghaan gikan sa Vancouver, nalangkit ako sa grabeng aksidente. Wala magdugay human niana labi pa akong naangol sa dihang ako nabanggaan sa kotse samtang mitabok diha sa dalan nga tabokanan. Misugod ako sa pagtrabaho ug nawad-ag tinguha nga mobalik sa kolehiyo.
Interes sa Relihiyon
Sa ngadtongadto, si Trina ug ako nagsugod sa pagpuyopuyo. Nagtuo kami sa Diyos ug buot makaila kaniya. Ugaling, gibati namo nga salingkapaw ang mga simbahan. Busa naningkamot kami sa pagbasa sa Bibliya sa among kaugalingon, apan dili namo kini masabtan.
Usa ka adlaw, sa akong trabaho sa Portland, Oregon, ang mga isigkatrabahante misugod sa pagbugalbugal sa usa ka tawo nga akong giisip nga usa sa kinamaayohang mga tawo nga akong nakaila. Kalmadong giantos ni Randy ang panghasi. Sa ulahi nianang adlawa ako nangutana kaniya: “Unsa kining akong nadungog nga ikaw usa ka ministro?”
“Tinuod kana, usa ako ka ministro,” matod niya.
“Sa unsang relihiyon?” ako nangutana.
“Ako usa sa mga Saksi ni Jehova.”
“Kinsa ang mga Saksi ni Jehova?”
“Seryoso ka ba gayod?” siya nangutana nga may katingala ang hitsura.
“Oo,” ako miingon. “Kinsa ang mga Saksi ni Jehova? Angay ba akong masayod?”
“Oo,” siya miingon nga mapahiyomon, “angay ka nga masayod. Unsay imong ginabuhat sa tingpaniudto?”
Mao kadto ang una sa daghang panaghisgot sa Bibliya sa tingpaniudto. Usa ka gabii gisultihan ko si Trina bahin kanila. “Ayaw pakigsulti sa mga Saksi ni Jehova!” siya miingon. “Sila katingad-an! Dili man gani sila mga Kristohanon. Dili sila mosaulog ug Pasko.” Ug siya nagpadayon sa pagsugilon kanako sa ubang mga butang nga iyang nadungog bahin sa mga Saksi ni Jehova.
“May nagsulti lang kanimo sa daghang butang nga dili tinuod,” ako miingon. Human sa dugaydugay nga panagkabildohay, nakombinsir ko siya nga wala niya madunggi ang katibuk-ang kamatuoran. Human niana, siya misugod sa pagpasukna kanako ug mga pangutana kang Randy, ug dalhan ko siyag balik sa daghang tin-aw Kasulatanhong mga tubag. Sa kataposan, si Trina miingon: “Wala gayod ako masayod nga kining tanan ania sa Bibliya, apan naghunahuna gihapon ako nga katingad-an sila. Kon buot kang mopadayon sa pagpakig-estorya kaniya bahin sa Bibliya, bahala ka; apan ayaw lang akog pugsa nga modawat sa ilang mga pagtulon-an.”
Usa ka Masulub-ong Panahon
Nagtuo ako sa akong nakat-onan sa Bibliya, apan gibati ko nga dili nako kini matuman. Si Trina ug ako mas subsob nga mag-away. Busa usa ka higala ug ako mihukom sa pagbiya sa among mga trato ug magsugod ug bag-ong kinabuhi sa Oklahoma. Gihikay nako nga mobakasyon sa trabaho. Wala magdugay, ang akong higala ug ako nagpuyo sa usa ka apartment sa gamayng lungsod nga duol sa utlanan sa Texas. Wala magdugay nga akong naamgohan nga ako gimingaw pag-ayo kang Trina, apan ako mihukom nga maglingawlingaw lang sa akong kaugalingon.
Akong nahibal-an nga ang legal nga edad nga gitugotan sa pag-inom sa Texas maoy 19, busa sa dihang mibiyahe ang akong higala, mitabok ako sa utlanan usa ka gabii niana aron malingaw ako sa iladong rock-’n’-roll bar. Nahubog ako pag-ayo, nagbangga sa akong kotse, ug gidala sa bilanggoan. Sa ulahi, nakontak ko ang akong amahan, ug siya nagpiyansa kanako aron makagawas. Lain pa, gidawat ako pagbalik ni Trina, nga niana ako mapasalamaton! Mibalik ako sa daan kong trabaho ug nagpadayon pag-usab sa mga panaghisgot sa Bibliya uban kang Randy.
Pagkontrolar sa Akong Kinabuhi
Duolan na sa duha ka tuig sukad nga una kong nadungog ang bahin sa mga Saksi ni Jehova, ug ako mihukom nga mohatag ug dakong pagtagad sa akong pagtuon sa Bibliya. Ako karon 20 anyos na, ug ang mga pangutana mahitungod sa pagsagop kanako nga akong gihisgotan sa sinugdan niining artikuloha misugod sa paghasol kanako. Busa misugod ako sa paghimog seryosong pagpangita sa akong tinuod nga inahan.
Mitawag ako sa ospital sa Alaska diin ako natawo ug nangutana kon unsaon nako pagpadayon. Human mahibalo kon unsay buhaton, mikuha akog kopya sa akong orihinal nga kalig-onan sa pagkatawo ug akong nadiskobrehan nga ang ngalan sa akong inahan maoy Sandra Lee Hirsch; apan walay rekord sa akong amahan. Si Sandra 19 lamang sa dihang ako natawo, busa gidahom ko nga siya usa ka nahadlok, dili-minyong babaye nga nagmabdos ug mihimog lisod kaayong desisyon. Wala kaayoy igong impormasyon sa akong kalig-onan sa pagkatawo aron mapangita nako ang akong inahan.
Kasamtangan, ingong resulta sa akong pagtuon sa Bibliya uban kang Randy, ako nakombinsir nga akong nakaplagan ang matuod nga relihiyon. Apan napakyas ako sa makadaghan sa paghunong sa makapahugaw nga paggamit sa tabako. (2 Corinto 7:1) Gibati ko nga si Jehova walay pagsalig kanako. Unya, usa ka Saksi sa Kingdom Hall may giingon nga nakatabang gayod kanako. Siya naghisgot nga si Satanas mao ang usa nga buot nga mapakyas kita ug ikasubo nga ang pipila nawad-an sa kinabuhing walay kataposan tungod sa pag-undang. “Kita kinahanglang magtugyan sa atong mga palas-anon kang Jehova,” siya miingon, “ug mosalig nga bug-os kaniya sa pagtabang kanato diha sa atong mga panahon sa kalisod.”—Salmo 55:22.
Kadto mao gayod ang akong gikinahanglang madungog! Misugod ako sa pagpadapat sa iyang giingon, nga nag-ampo kanunay sa tabang ni Jehova. Wala magdugay, miundang ako sa paggamit ug tabako, si Trina ug ako nagminyo, ug ako nahimong regular sa akong mga pagtuon sa Bibliya. Sa ulahi, si Trina nagsugod usab sa pagtuon. Ako nagpasimbolo sa akong pagpahinungod kang Jehova pinaagig pagpabawtismo sa tubig niadtong Hunyo 9, 1991. Wala abtig duha ka semana sa ulahi, ang among unang anak nga babaye, si Breanna Jean, natawo.
Akong Relasyon Kang Papa
Ang akong amahan ug ako suod kaayo. Siya maayo kaayong tawo nga andam kanunay sa pagdasig kon ako mahigawad. Bisan pa niana, siya malig-on kon ako nagkinahanglan ug disiplina. Busa, malisod kadto nga panahon sa unang bahin sa 1991 sa dihang akong nahibaloan nga si Papa may makamatayng kanser sa baga. Niadtong panahona si Mama ug Papa mibalhin sa Hamilton, Montana. Kanunay kami nga moadto didto aron makita siya ug maningkamot sa paghatag ug pagpaluyo kang Mama.
Gihatagan namo si Papa sa librong Mao ba Lamang Kini ang Kinabuhi? Siya misaad nga basahon kini ug miingon nga siya nabalaka sa kaayohan sa iyang pamilya. Sa akong kataposang pagduaw, gisultihan niya ako nga siya mapasigarbohon gayod nga nakabaton kanako ingong iyang anak ug nagmahal gayod kanako. Unya, samtang kalit nga miagay ang mga luha, siya milingiw sa bentana. Naghalogay kami sa makadaghan sa wala pa ako mobiya. Nabasa ni Papa ang ikatulo ka bahin sa libro sa wala pa siya mamatay, niadtong Nobyembre 21, 1991.
Human sa kamatayon ni Papa ug sa among sunod nga pagbalhin sa Moses Lake, sa Washington, misamot pa ang akong tinguha nga mahibalo sa akong kagahapon. Apan bisan pa sa tanang panahon nga akong gigugol sa pagpangita, wala namo pasagdi ang espirituwal nga mga interes. Si Trina nabawtismohan niadtong Hunyo 5, 1993, ug unom ka bulan sa ulahi siya nanganak sa among ikaduhang anak nga babaye, si Sierra Lynn.
Kon Giunsa Nako Pagkakaplag sa Akong Tinuod nga Inahan
Ako padayong nangayog impormasyon sa legal nga sistema sa Alaska, nga naghimog daghang sulat ngadto sa nagkalainlaing mga ahensiya ingon man sa paghimog akong kaugalingong mga pagdukiduki pinaagig kompiyuter. Kadto walay nahimo. Unya, sa naghinapos ang tuig 1995, ako may medikal nga pagsusi nga nagpadayag sa dili regular nga pagpitik sa kasingkasing. Ako 29 anyos lamang, ug ang akong doktor buot masayod sa akong medikal nga kasaysayan.
Ang doktor misulat ug bug-os, tukmang hangyo, nga nagpasiugda nga ang impormasyon sa mga payl sa pagsagop kanako hinungdanon kaayo sa akong pisikal nga kaayohan. Sa ulahi, nakadawat kami ug tubag. Kini naundan sa mando sa huwes nga nagdeklarar nga wala niya batia nga ang akong medikal nga panginahanglan seryoso kaayo aron buksan ang mga payl. Ako naguol pag-ayo. Apan pipila ka semana sa ulahi, usa ka sulat miabot gikan sa ikaduhang huwes. Ang usa ka mando sa korte nagtugot kanako nga makakuha sa mga payl sa pagsagop kanako!
Ang aktuwal nga mga payl sa pagsagop kanako miabot sayo sa Enero 1996. Kini nagpakita sa lungsod nga gipuy-an sa akong tinuod nga inahan ug kagikan sa pamilya. Dihadiha, mihimo akog pagdukiduki sa kompiyuter sa ngalan ni Sandra uban sa ngalan sa iyang gipuy-ang lungsod ug nakakaplag ug unom ka listahan sa mga numero sa telepono. Si Trina ug ako mihukom nga labing maayo nga si Trina ang motawag. Sa ikatulong pagtawag, usa ka babaye miingon nga si Sandra maoy iyang pag-umangkon ug naghatag sa iyang numero sa telepono.
Ang Pagtawag ug ang Sorpresa
Sa dihang gitawag ni Trina ang numero, ang babaye nga mitubag midumili sa pagpailaila sa iyang kaugalingon. Sa kataposan, si Trina prangkang miingon: “Ang akong bana natawo sa Ketchikan, Alaska, niadtong Agosto 1, 1966, ug buot kong masayod kon ikaw ang tawo nga akong gipangita.” Dihay taudtaod nga kahilom, ug unya, sa nagpangurog nga tingog, ang babaye naghangyo sa ngalan ni Trina ug numero sa telepono ug miingon nga siya motawag ug balik. Wala ako magtuo nga siya motawag pagbalik dihadiha, busa ako mihukom sa pagkuhag pipila ka mga butang nga among gikinahanglan sa tindahan.
Sa akong pagpauli, si Trina may gikaestorya sa telepono ug nagluhaluha ang mata. Iyang gihatag kanako ang telepono. Samtang si Mama ug ako nagkomostahay ug nag-estoryahay kadiyot, si Trina dalidaling mihunghong, “Siya buot gayod sa paghupot kanimo.” Naluoy ako sa akong Mama samtang siya misugod sa pagsugilon bahin sa iyang kaugalingon. “Buot kong pasalamatan ka sa kinabuhing imong gihatag kanako,” ako miingon. “Maayo ang akong kinabuhi ug nakabaton sa tanang butang nga akong gikinahanglan. Ako may maayong mga ginikanan ug gipangga pag-ayo ug karon ako may buotan kaayong asawa ug duha ka matahom nga mga anak nga babaye. Ako malipayon kaayo.”
Misugod siya paghilak. Samtang padayon kami nga nagsultihanay, gisultihan niya ako nga siya gilugos, nagmabdos, ug gipit-os nga ipasagop ako; dayon gisultihan niya ako nga human niadto siya nagminyo ug pipila ka panahong milabay, samtang siya didto sa ospital nga nagpaayo sa operasyon, ang iyang batang babaye ug iyang inahan namatay sa sunog. Siya miingon nga niadtong higayona gibati niya nga ang Diyos nagkuha niining mga minahal ingong silot alang sa anak nga lalaki nga iyang gipasagop. “Dili,” ako mitubag gilayon, “ang Diyos dili mobuhat niana!” Siya miingon nga siya nahibalo na niana karon, sanglit human niadto nga trahedya, siya misugod sa “pagtuki sa kamatuoran sa Bibliya” ug karon “usa na ka estudyante sa Bibliya.”
Ako naghunahuna, ‘Dili kini tinuod,’ samtang ako nangutana: “Kinsay nagtuon kanimo?” Dihay taudtaod nga kahilom. Dayon siya miingon: “Mga Saksi ni Jehova.” Ako natandog gayod nga ako dili makasulti. Nga naghilak, ako sa kataposan nanlimbasog sa pag-ingon, “Ako Saksi usab.” Sa dihang gisubli ko kini nga mas tin-aw, siya nalipay pag-ayo. Kadtong tanan talagsaon gayod!
Si Mama nahimong Saksi niadtong 1975, pipila ka panahon human mamatay ang iyang anak nga babaye. Sa dihang ang iyang bana misugod pag-uswag sa espirituwal, gisultihan niya siya bahin kanako. Siya naghupay kaniya ug miingon nga ila akong pangitaon. Apan wala magdugay human niadto, siya namatay sa aksidente sa sakyanan, nga nagbiya kaniya nga may tulo ka gagmayng bata nga padak-on. Nag-estoryahay kami sa daghang oras sa ubay-ubayng mga gabii human niadto. Sa kataposan, mihukom kami nga magkita sa Phoenix, Arizona, sa ikaduhang semana sa Pebrero 1996. Si Mama nagplano na sa pagduaw didto kauban sa laing Kristohanong igsoong babaye.
Usa ka Halandomong Panag-usa Pag-usab
Niining biyahea gibilin namo ni Trina ang mga bata sa balay. Samtang mikanaog ako sa ayroplano, nakita ko ang akong inahan ug sa kataposan nakahalog kaniya. Sa naghalog kami, siya miingon nga siya nagpaabot ug 29 ka tuig sa paghalog kanako, ug siya mihalog kanako ug dugay. Kami may maayo kaayong panagkita ug nag-ambitay ug mga letrato ug mga sugilanon. Ang labing hinungdanon, hinunoa, mao ang paglingkod tapad ni Mama sa Kingdom Hall sa Phoenix! Duyog kami nga namati sa tigom ug tapad nga nagtindog samtang miawit sa mga awit sa Gingharian. Kadto maoy maanindot kaayong pagbati nga akong mahinumdoman hangtod sa hangtod.
Sa Abril 1996, ang akong igsoon sa inahan nga si Laura miabot gikan sa iyang pinuy-anan sa Iowa sa pagduaw kanamo. Pagkatalagsaon ang pagtagamtam sa mainit Kristohanong asosasyon uban kaniya! Ako nakigsulti usab sa telepono sa akong duha ka bag-ong nakaplagang mga igsoong lalaki sa inahan. Ang mahiusa uban sa akong pamilya maoy talagsaon gayod, apan ang mahiusa diha sa gugma sulod sa organisasyon ni Jehova maoy gasa nga ang atong dakong Diyos lamang, si Jehova, ang makahatag.—Sumala sa giasoy ni Dana Folz.
[Hulagway sa panid 23]
Uban sa akong tinuod nga inahan