Inihap na ba ang mga Adlaw sa Relihiyon?

“Ang yuta mapuno gayod sa kahibalo ni Jehova maingon sa mga tubig nga nagatabon sa dagat mismo.”

ISAIAS, IKA-8NG-SIGLO W.K.P. NGA ISRAELINHONG PROPETA.

ANG Hebreohanong propetang si Isaias sa ingon mitagna nga sa usa ka adlaw ang tanan sa yuta mahiusa sa pagsimba sa Diyos nga Labing Gamhanan. Ugaling, karong adlawa ang maong palaaboton mopatim-aw nga halayo gayod kaayo.

Pananglitan, sayosayo niining sigloha ang Komunistang mga rebolusyonaryo sa Rusya nagtuo nga ang paglaglag sa relihiyon maoy usa ka kinahanglanong tikang aron mapagawas ang matang nga mamumuo. Ang ateyismo, miangkon sila, ‘magpagawas sa mga masang obrero gikan sa palas-anon sa mga pagpihigpihig ug mga panghanduraw sa nangagi.’ Pagka-1939, gipamenosan ni Stalin ang gidaghanon sa mga simbahang Ortodokso nga bukas sa Unyon Sobyet ngadto sa 100, kon itandi sa kapig 40,000 sa wala pa ang 1917.

Giisip usab ni Hitler ang relihiyon ingong usa ka babag sa iyang dalan padulong sa absolutong gahom. “Ang usa kinahanglang usa ka Kristohanon o usa ka Aleman. Dili mahimo nga ikaw makaangkon nianang duruha,” kas-a siya nagpahayag. Siya may katuyoan nga sa hinayhinay puohon ang tanang matang sa pagsimba nga dili niya magamhan. Sa maong tumong, ang mga Nazi naggamag ilang kaugalingong samag-relihiyosong mga pag-ampo, mga pangilin, mga bawtismo, ug bisan mga serbisyo sa paglubong. Si Hitler mao ang ilang mesiyas, ug ang yutang-natawhan mao ang ilang diyos. Mahimong buhaton ang bisan unsang kapintasan kon kanay pagbuot ni Hitler.

Kataposang mga Adlaw sa Relihiyon?

Ni si Stalin o si Hitler milampos sa ilang kampanya nga pig-otan ang relihiyon. Apan karon, ang kawalay-pagtagad daw maoy mipuli sa papel sa pagdiniktador. Alang sa mga estudyante sa Bibliya ang maong mga panghitabo dili makapatingala. Si apostol Pablo nagsulti kang Timoteo nga sa “kataposang mga adlaw” ang katawhan mahimong “mga mahigugmaon sa mga kalingawan inay mga mahigugmaon sa Diyos.”​—2 Timoteo 3:1-4.

Ang Bibliya nagtudlo ba nga kining “kataposang mga adlaw,” nga gitiman-an ug relihiyosong kawalay-pagtagad, maoy mag-una sa kamatayon sa tanang relihiyon? Wala. Inay itagna ang kalaglagan sa tanang relihiyon, ang Bibliya nagsaysay nga ang bakak nga relihiyon​—nga gihatagan ug simbolikong ngalang Dakong Babilonya​—maoy malaglag.a Ang basahong Pinadayag nag-ingon: “Usa ka kusgang anghel mialsa ug usa ka bato nga samag usa ka dakong galingang-bato ug nagtambog niini ngadto sa dagat, nga nag-ingon: ‘Sa ingon, sa usa ka kusog nga paglabog ang dakong siyudad nga Babilonya igatambog, ug siya dili na gayod makaplagan pag-usab.’”​—Pinadayag 18:21.

Bisan pa niana, ang pagkawala sa bakak nga relihiyon dili mosangpot sa walay-diyos nga kalibotan. Sa kasukwahi, ang Salmo 22:27 nagtagna: “Ang tanang kinatumyan sa yuta mahinumdom ug mobalik kang Jehova. Ug ang tanang banay sa kanasoran moyukbo sa imong atubangan.” Hunahunaa ra god ang panahon sa dihang “ang tanang banay sa kanasoran” magkahiusa sa pagsimba sa usa ka matuod nga Diyos! Ubos sa pagmando sa Gingharian sa Diyos, ang maong talagsaong saad makakaplag ug mahimayaong katumanan. (Mateo 6:10) Sa pag-abot nianang panahona, ang relihiyon​—ang matuod nga relihiyon​—maoy hinungdanon kaayo. Apan komosta man karon?

Pagpuno sa Espirituwal nga Kahaw-ang

Ang espirituwal nga kahaw-ang nga kaylap kaayo sa Uropa karon maoy tumbas sa kahimtang sa Romanhong Empiryo sa unang siglo. Ang historyanong si Will Durant nagbatbat kon giunsa sa unang-siglong Kristiyanidad pagtagana nga malamposon ang espirituwal nga panginahanglan niadtong panahona: “Nganha sa moral nga kahaguka sa himalatyong paganismo, nganha sa kawalay-pagbati sa Stoicismo ug kadunotan sa Epicureanismo, nganha sa kalibotan nga nadaot sa kabangisan, kapintasan, pagpanglupig, ug seksuwal nga kagubot, nganha sa napakalmadong empiryo nga daw wala na magkinahanglan sa lakin-ong mga maayong hiyas o sa mga diyos sa gubat, kini nagdalag bag-ong moralidad nga may panag-igsoonay, kalulot, pagkadesente, ug kalinaw.”

Ang moral ug espirituwal nga kahaguka diha sa mga kinabuhi sa katawhan sa atong panahon matagbaw sa samang gamhanang mensahe nga gisangyaw sa tibuok Romanhong Empiryo sa unang mga Kristohanon. Ug adunay mga tawong nagapamati. Daghang Uropanhon, bisan pag sa gawasnon dili relihiyoso, mibati gihapon nga ang Diyos adunay hinungdanong papel diha sa ilang mga kinabuhi. Sila wala na tingaliy magtambong sa mga serbisyo sa tradisyonal nga simbahan, bisan pa niana gitagbaw sa pipila ang ilang espirituwal nga kahaw-ang sa laing dapit.

Si Juan José, usa ka batan-ong lalaki nga taga-Palma de Mallorca, Espanya, naedukar sa usa ka Katolikong eskuylahan ug nagsilbing usa ka akolito hangtod nga 13 anyos na siya. Siya tigtambong sa Misa kada Dominggo kauban sa iyang pamilya, apan mihunong siya sa pag-adto sa simbahan sa dihang nahimo na siyang tin-edyer. Ngano? “Sa usa ka butang, gipul-an ako sa pagpamati sa Misa,” misaysay si Juan José. “Sag-ulo na nako ang liturhiya. Ang tanan daw usa ka pagsubli sa ako nang nabatian. Dugang pa, ang among pari sa parokya isog kanamong mga akolito. Ug ako naghunahuna nga sayop nga ang kabos nga mga tawo kinahanglang magbayad sa pari aron himoon ang usa ka serbisyo sa paglubong.

“Nagtuo gihapon akog Diyos, apan sa akong hunahuna ako makaalagad kaniya sa akong kaugalingong paagi, nga gawas sa kahikayan sa simbahan. Kauban sa usa ka grupo sa mga higala, gisulayan nako nga kalipayan ang kinabuhi kutob sa akong mahimo. Makaingon ka nga ang kalingawan nahimong unang butang sa akong kinabuhi.

“Apan sa nag-18 anyos na ako, misugod ako pagtuon sa Bibliya uban sa mga Saksi ni Jehova. Unsa bay ilang ikatanyag kanako nga wala nako hikaplagi diha sa simbahan? Usa ka tino nga pagtuo nga gipasukad sa Bibliya inay sa tradisyon ug ‘mga misteryo’ nga wala gayod nako hisabti. Ang akong bag-ong mga tinuohan nagpasabot ug dagkong mga kausaban alang kanako, hinuon. Inay gugolon ang matag hinapos sa semana sa pag-organisar ug mga parti sa mga diskohan, ako misugod sa pagbalay-balay aron ipakig-ambit sa akong mga silingan ang akong bag-ong-kaplag nga pagtuo. Ang aktibong pagpakiglambigit sa pagtabang sa uban naghatag ug kahulogan sa akong kinabuhi. Sulod sa miaging pito ka tuig, ako maoy bug-os-panahong ministro sa mga Saksi ni Jehova.”

Dili lamang mga batan-on ang nagatinguha nga mapuno ang ilang relihiyosong kahaw-ang. Si Antonia, usa ka tigulang nga babaye nga taga-Extremadura, Espanya, migugol sa kinadak-an sa iyang kinabuhi sa “pagpangita sa Diyos,” sumala pa niya. Sa katuigan sa iyang pagkatin-edyer, siya tigpamati sa Misa kada adlaw ug sa ngadtongadto misulod sa usa ka Katolikong kombento, sanglit siya nagtuo “nga kon ang Diyos dili hikaplagan diha sa usa ka kombento, siya dili gayod hikaplagan sa bisan diin.” Apan tulo ka tuig sa ulahi siya mibiya sa kombento, nga mibating labi pang nawad-ag kasibot ug kahaw-ang sukad masukad.

Sa kataposan, sa dihang siya nag-50 anyos na, siya nahimong usa sa mga Saksi ni Jehova. “Nalipay kaayo ako sa dihang giduaw ako sa mga Saksi ug gitubag ang akong mga pangutana gikan sa akong kaugalingong Bibliya,” misaysay siya. “Sukad nga ako nahimong usa sa mga Saksi ni Jehova, ang akong kinabuhi aduna nay katuyoan. Ako adunay mga suliran, apan ako makasagubang niini nila tungod kay karon akong nakaplagan ang matuod nga Diyos.”

Kining duha ka kasinatian dili ingon nga talagsaon. Sa pagpukgo sa relihiyosong kiling, ang nagkadaghang tawo nagapakig-uban sa mga Saksi ni Jehova ug nakadiskobre nga ang pagkinabuhi nga nahiuyon sa ilang pagtuo ug pagsangyaw bahin niini sa uban magahatag kahulogan ug katuyoan sa ilang mga kinabuhi.

Ang Matuod nga Relihiyon Labaw nga Mahinungdanon Sukad Masukad

Bisan pag nagkinabuhi kita sa panahon sa dihang daghan ang nagasalikway sa relihiyon, dili maalamon nga hukman ang tanang relihiyon ingong dili na angayan. Tinuod, sa ika-20ng siglo, ang katawhan nagasalikway sa way-kahulogang rituwal ug hupas ug dili-kasulatanhong doktrina, ug sila nagtamay sa pag-adto sa simbahan nga aron ingnon lamang. Sa pagkamatuod, ang Bibliya nagsugyot nga molikay kita sa salingkapaw nga relihiyon. Si apostol Pablo mitagna nga sa “kataposang mga adlaw,” ang pila ka tawo ‘magbaton sa dagway sa diyosnong pagkamahinalaron, apan magpanghimakak sa gahom niini.’ Ang maong mga tawo naghupot ug relihiyosong dagway, apan ang ilang gawi nagpanghimakak niini. Kinahanglang unsay atong pagsanong sa maong relihiyosong pagkasalingkapaw? “Gikan niini nila magpahilayo ka,” mitambag si Pablo.​—2 Timoteo 3:1, 5.

Apan si Pablo usab miingon nga “ang relihiyon nagpatunghag dagkong mga balos.” (1 Timoteo 6:6, New English Bible) Si Pablo wala maghisgot bahin sa bisan unsa lamang nga matang sa relihiyon. Ang Gregong pulong nga gihubad dinhi nga “relihiyon” maoy eu·seʹbei·a, nga nagkahulogang “debosyon o pagtahod sa Diyos.” Ang matuod nga relihiyon, ang tinuod nga diyosnong debosyon, “naghupot ug saad sa kinabuhi karon ug nianang sa umaabot.”​—1 Timoteo 4:8.

Sumala sa gipasundayag sa gihisgotan-sa-itaas nga mga panig-ingnan, ang matuod nga relihiyon makahatag ug kahulogan sa atong mga kinabuhi ug mobulig kanato sa pag-atubang sa mga suliran uban ang kalig-on. Labaw pa niana, ang matuod nga relihiyon mogarantiya sa dumalayong kaugmaon. Ang maong matang sa pagsimba takos nga sundon, sanglit gipasaligan kita nga kini sa ngadtongadto ‘magpuno sa yuta.’b (Isaias 11:9; 1 Timoteo 6:11) Sa pagkamatuod, karon mao ang panahon sa dihang ang matuod nga relihiyon labaw nga mahinungdanon sukad masukad.

[Mga footnote]

[Kahon/Mga hulagway sa panid 10]

Sugilanon sa Duha ka Tinukod

Ang Espanya napunog relihiyosong mga tinukod, apan ang kasibot nga kaniadto nagpalig-on sa pagtukod ug mahalong mga katedral daw nahanaw na. Pananglitan, sa Mejorada del Campo, sa gawas sa Madrid, ang usa ka talagsaong Katolikong simbahan ginatukod. Si Justo Gallego Martínez, usa ka kanhi Benedictine nga monghe, misugod sa proyekto mga 20 ka tuig kanhi. Apan ang tinukod sa gihapon maoy kabhang pa. Si Martínez, ang nag-inusarang tigtukod, karon anaa sa pangedarong 60, mao nga lagmit nga dili na gayod mahuman ang simbahan. Bisan pa niana, mga 300 kilometros pahabagatan, ang usa ka laing sugilanon nadayag.

“Pagtuo Magbalhin sa mga Bukid” mao ang pagbatbat sa lokal nga mantalaan sa duha-ka-adlaw nga pagtukod sa usa ka Kingdom Hall sa mga Saksi ni Jehova sa Martos, Jaén, Espanya. “Giunsa kana paghimo,” nangutana ang lokal nga mantalaan, “nga niining kalibotana karon nga nagsukad sa kahakog, ang mga boluntaryo gikan sa lainlaing mga rehiyon [sa Espanya] sa kawalay-kahakog mibiyahe ngadto sa Martos aron tukoron ang usa ka tinukod nga milupig sa tanang rekord sa katulinon, kahingpitan, ug organisasyon?” Sa pagtubag niining pangutanaha, ang artikulo mikutlo sa mga pulong sa usa sa mga boluntaryo: “Ang hinungdan sa yano anaa sa kamatuoran nga kami maoy katawhan nga gitudloan ni Jehova.”

[Mga hulagway sa panid 10]

Mejorada del Campo

Kingdom Hall sa Martos