Kasayoran Bahin sa Labing Ulahing Balita ug mga Hitabo sa Atong Panahon

Ang sangang buhatan sa mga Saksi ni Jehova sa Alemanya nakadawat ug sulat gikan sa usa ka 77-anyos nga Katolikong monghe. Siya miingon:

“Sukad natapos ang akong pag-alagad sa monasteryo duolan sa 25 ka tuig kanhi, ako nagpuyo sa balay sa mga tigulang. Wala ako mouyon sa tanan ninyong mga pagtulon-an, apan ang akong nabasa karon diha sa Ang Bantayanang Torre nagpaadmiter kanako nga kamo nahibalo sa labing ulahing balita ug sa mga hitabo sa atong panahon. Tinuod gayod kamo nga usa ka bantayanang torre, nagtuman sa gisaad diha sa panid dos, ‘nagabantay sa mga hitabo sa kalibotan samtang ginatuman nila ang tagna sa Bibliya.’

“Inyong gipatin-aw sa maisogon ug sa katukma ang mga pulong ni Pablo diha sa 1 Tesalonica 5:3: ‘Sa dihang sila magaingon: “Kalinaw ug kasegurohan!” unya ang kalit nga kalaglagan moabot diha kanila.’ Wala gayoy gipatin-aw ang among iglesya bahin niana. Ang tawo dili makalalis sa paglihok sa balaang espiritu diha sa mga Saksi ni Jehova. . . . Malipay ako sa pagbasa sa regular sa inyong mga magasin.”

Pinaagi sa pagsunod sa panig-ingnan niining Katolikong monghe, ikaw usab makakat-on pa ug dugang mahitungod sa kon sa unsang paagi ang mga hitabo sa kalibotan nagatuman sa tagna sa Bibliya ug sa unsang paagi pagalaglagon sa Gingharian sa Diyos sa dili madugay ang pagkadaotan ug maghimog tibuok-yuta nga paraiso.

Kon buot mo ang dugang impormasyon o usa ka libre nga pagtuon sa Bibliya diha sa balay uban sa usa sa mga Saksi ni Jehova, palihog pagsulat sa Watch Tower, P.O. Box 2044, 1099 Manila, o ngadto sa nahiangay nga direksiyon nga gilista sa panid 5.