Mga Tawong Nagatagad

ANG mga Saksi ni Jehova maoy usa ka internasyonal nga organisasyon sa kapin sa upat ka milyong mga estudyante sa Bibliya nga giorganisar ngadto sa kapin sa 69,000 ka kongregasyon sa tibuok-yuta. Dili lamang debotado ang mga Saksi sa pagtabang sa mga tawo aron dugang makakat-on mahitungod sa mga katuyoan sa Diyos kondili sila usab naghigugmaay sa usag usa sumala sa gisugo ni Jesu-Kristo. (Juan 13:34, 35) Kining maong gugma gipakita sa praktikal nga mga paagi.

Pananglitan, dili pa dugay halos 30 ka Saksi gikan sa Kongregasyon sa East San Marcos, California, nagtigom aron mamahaw sa alas sayis sa buntag sa Sabado. Sila may espesyal nga proyekto nga himoon​—pagtabang sa mga sakop sa kongregasyon nga nagkinahanglag tabang sa pag-atiman sa ilang mga balay.

Ang uban niadtong nanginahanglan mao ang nag-inusarang mga ginikanan, mga balo, ug tigulang nga mga magtiayon. Lakip sa ilang mga panginahanglan mao ang pag-ayo sa ilang mga atop sa balay, pagpalitada sa pribadong agianan sa balay, pagtaod ug mga suga alang sa seguridad, pagtaod sa pultahan sa garahe, pagpintal, pagpul-ong sa mga kahoy, ug ubang mga trabaho. Ang pagpangandam alang sa maong trabaho gisugdan sa kapig usa ka bulan nang miagi dihang natino ang mga panginahanglan ug nabatonan ang mga materyales.

Sa natakda nga Sabado, ang kataposang pagpangandam gihimo sa panahon sa pamahaw. Ang mga tem sa trabahante giorganisar, ug ang matag usa nakadawat ug espisipikong mga buluhaton. Ang mga babaye naghikay ug mga matimotimo, apil ang paniudto. Ang buluhaton sa tibuok adlaw adunay talagsaong epekto dili lamang sa mga tawong kansang balay giayo kondili usab diha sa tanan sa kongregasyon.