Ako Nakakaplag ug ‘Usa sa Usa ka Milyon’
ANG Woodstock Music Festival sa New York sa 1969 mao ang labing kulbahinam nga yugto sa akong karera sa musika. Ang lawod sa katawhan lapad kaayo kutob sa makita sa mata. Makalilisang kaayo kadto!
Ako ang gitarista sa baho ug mag-aawit uban kang Sly and Family Stone, ang usa sa labing iladong mga grupo sa mag-aawit sa niadtong panahona. Nagdaguhob ang mga singgit sa tunga sa milyong mga tawo nga nangayog pakaping awit sa among pasundayag.
Tinuod nga kulbahinam kaayo kadtong yugtoa, apan dili na kini mao ang labing halandomong hitabo sa akong kinabuhi. Ako nakakaplag ug tagsaong bahandi, bahandi nga ‘usa sa usa ka milyon.’ Apan, sa dili ko pa kini isaysay. tugoti ako sa pag-asoy sa mga butang nga nakaumol sa akong kinabuhi.
Pagkahimong Musikero
Natawo ako sa 1946 sa usa ka mahiligon ug musika nga pamilya sa Beaumont, Texas, ako bugtong anak nga lalaki. Ang akong inahan pianista sa koro sa simbahan, ug ang akong amahan gitarista sa jazz. Sa wala madugay mibalhin ang akong pamilya sa Oakland, California, diin didto singko anyos pa ang akong edad nga ako nakakat-on ug tap dance. Sa milabay ang duha ka tuig, nakakat-on ako sa pagpatokar ug piano ubos sa pagtudlo sa akong apohang babaye, nga maoy nag-atiman nako niadtong sayo nga katuigan.
Sa dihang nag-edad akog 11, gihatag sa akong amahan nako ang iyang sista ug amplipayer, ug naghinamhinam akong misugod sa pagtuon niining bag-ong instrumento. Sa ulahi, nakakat-on ako sa pagtugtog sa mga tambol, sa klarinet, ug sa saxophone. Sa nag-13 anyos ako, duna na akoy kaugalingong pundok sa rock ’n’ roll nga gitawag The Five Riffs. Sa nag-edad akog 15, misugod ako sa pagtugtog diha sa mga nightclub ingong membro sa Dell Graham Trio, lakip sa akong inahan diha sa piano, ako sa lead guitar, ug usa ka dramer o tigtambol.
Sa ulahi ako ug ang akong inahan nagparis sa pagpasundayag. Aron kahulipan ang pagkakulang ug dramer, akong gipakgang ug gikablit ang bahong kuldas sa akong sista aron sa pagpalutaw sa ritmo. Busa nakaugmad akog kaugalingon kong paagi sa pagpakgang ug pagkablit sa baho nga sista. Usa ka regular nga tigpaminaw namo nakadayeg kaayo nga tungod niana iyang giteleponohan ang disc jockey, si Sly Stone, ug gihangyo siya sa pagpamati kanako. Ang resulta mao nga, sa 1966, gitanyagan ako nga maoy modala sa baho nga sista diha sa pito ka tawong pundok nga nailhang Sly and the Family Stone.
Ang among plaka “Dance to the Music” gibantog sa tibuok kalibotan, ug kami nahimong labing popular nga itom nga grupo niadtong panahona. Ang ubang popular nga kanta misunod, apil ang “Hot Fun in the Summertime,” “Everyday People,” ug “Thank You for Letting Me Be Myself Again.” Dayon miabot ang Woodstock Music Festival, diin nanugtog kami uban sa ilado sa tibuok kalibotang mga mag-aawit. Dayon, nanugtog kami atubangan sa 300,000 ka tawo sa Isle of Wight sa Britanya ug sa 350,000 diha sa piyesta sa musika sa West Germany.
Niadtong 1971 gihulga akong patyon. Gisultihan ako nga sa panahon sa pasundayag sa Los Angeles Coliseum, posilon ako duyog sa tingog sa musika ug dihang moabot ang kasaba sa mga tawo sa kinatayoktokan. Nahadlok kaayo ako. Apan, ang elektronikong gamit naguba, ug ang promotor sa konsiyerto migula ug gikanselar ang pasundayag. Akong gibati nga nangilabot ang Diyos aron maluwas ang akong kinabuhi. Nagdagan akong natarantar gikan sa istadyom balik sa akong lawak sa otel, diin didto nagdalidali ako sa paghipos ug mibiya sa siyudad.
Kining makalilisang nga eksperyensiya mao kanunay ang anaa sa akong hunahuna, bisan sa dihang nagporma ako ug akong kaugalingong musikal nga grupo nga gitawag Graham Central Station. Ang akong ikaduhang album uban ning grupoha may hapin niini nga naprinta ang mga pulong “Produced by God.” Wala akoy tuyo nga magmapasipad-on, apan ang mga pulong nagpabanaag sa akong pagbati nga ako giluwas sa Diyos.
Lisoanang Punto sa Akong Kinabuhi
Niadtong 1973 akong nahibalag si Tina, usa ka internasyonal nga airline stewardess. Samtang iyang gisalapid ang akong buhok sa pagpangandam sa mga pasundayag, naghisgot ako kaniya bahin sa akong pagtuo sa Diyos. Niadtong panahona, ang inahan ni Tina nagsugod sa pagtuon sa Bibliya uban sa mga Saksi ni Jehova.
Sa usa ka adlaw niana nakit-an ni Tina ang iyang inahan nga naghilak. Naghilak siya tungod kay walay usa sa iyang mga anak ang makatambong sa iyang bawtismo diha sa distritong kombensiyon sa mga Saksi ni Jehova sa Oakland Coliseum. Si Tina misaad nga kon dako kaayo kinig kahulogan alang niya nga dunay makatambong sa iyang pamilya, motambong siya sa bawtismo sa Biyernes.
Naikag kaayo si Tina sa iyang nakita ug nadungog niadtong adlawa sa Hulyo 1974 nga human niana giteleponohan niya ako ug midani kanako sa pagtambong sa sesyon sa Sabado. Apan gikapoy kaayo ako gikan sa pagrekord ug plaka sa miaging gabii. Sa Dominggo, giteleponohan na usab ako ni Tina ug gidasig ako sa pagtambong. Gusto kong masayod kon unsay nakaikag kang Tina, busa miadto ako.
Usa ka polis miingon nga kay wala man akoy tiket sa kombensiyon aron makaparking, dili ako mahimong moparking didto. Siya midugang: “Ug dili ka man sab maikag sa pagpamati niana!” Temporaryong nawad-an akog gana ug mipalayo. Apan sa ulahi gipalandong ko pag-ayo kini, miliko, ug mibalik. Sa dihang miabot ako sa Coliseum, pila na lang ka minuto ang nahibilin alang sa kataposang pakigpulong.
Sanglit tigpasundayag ako halos sa tibuok nakong kinabuhi, may pagbati ako sa panon sa mga tawo. Nakasulod na ako sa Oakland Coliseum sa daghang higayon alang sa ubang mga pasundayag, apan lahi kini sa akong nakita sukad—60,000 ka tawo nga nagkalainlaig mga rasa ug sosyal nga mga kagikan diin ang tanan nagsandurotay nga malinawon. Bisan ang “pagbati” sa mga tawo nakadani nako nga usa kini ka hinungdanong butang, sa pagkatinuod, ‘usa diha sa usa ka milyon’ nga nakaplagan!
Sa mibiya ako sa Coliseum, ang usa ka tin-edyer nga batang babaye, kinsa tungod sa akong panagway wala maglisod sa pag-ila nako nga dili ako Saksi, miduol ug gitunolan akog kopya sa librong Mao ba Lamang Kini ang Kinabuhi? sa akong kamot. Mao gayod kadto ang akong gikinahanglan! Sa nakasakay na ako sa akong awto, gibuksan nako ang panid 24 ug nakakitag ilustrasyon sa usa ka sisne, bao, ug kahoy, ug pila ka tawo. Nakakita nga ang sisne mabuhi ug 80 ka tuig, ang bao sa 150 ka tuig, ug ang kahoy sa usa ka libo ka tuig, ang libro nangutana: “Angay ba ang mubong kinabuhi sa tawo?” Ang mensahe ning ilustrasyona dihadiha nga miepekto kanako.
Sa ulahi, daghang pangutanang akong gibangon kang Tina, apan siya walay kahibalo bahin sa Bibliya sama nako. Busa midesider kami sa pagduaw sa babaye nga nagtuon sa inahan ni Tina. Sa dihang migula kami sa iyang balay, milingi ako kang Tina ug miingon: “Nagpakaaron-ingnon lang kadtong babayehana! Walay tawong sama niya kabuotan! Tan-awa, sa sunod semana lahi na kadto siya!” Apan sa sunodsunod nga semana, siya nagpabiling mao gihapon, gitubag ang tanan namong mga pangutana pinaagi sa makalmahong pagdangop sa Bibliya.
Ako ug si Tina misugod sa regular nga pagtuon sa Bibliya diha sa librong Ang Kamatuoran nga Motultol sa Kinabuhing Dayon. Apan, wala magdugay, miabot na ang akong panahon sa pagpanaw uban sa akong grupo. Giawhag ako sa pagtelepono sa lokal nga mga kongregasyon diha sa tanang mga siyudad nga akong adtoan tabok sa Tinipong Bansa ug manghangyo nga may motuon nako sa sunodsunod nga mga kapitulo sa Kamatuoran.
Nakaduaw ako sa mga kongregasyon gikan sa kasadpang dapit duol sa dagat ngadto sa sidlakang dapit ug gikan sa amihanan ug sa tunga sa kasadpan ngadto sa Texas ug sa habagatang mga estado. Ang nagdumala sa mga pagtuon nako gikan sa nagkalainlaing mga rasa ug sa nagkalainlaing hut-ong sa katilingban. Apan bisag asa ako moadto, ang mensahe mao ra gihapon. Ilabinang napasilsil diha nako nga akong nakaplagan dili lang lokal nga katingad-anan diha sa Oakland Bay kondili sa tibuok-yutang organisasyon nga tinuod nga nagkahiusa sa espirituwal nga bahin.
Bug-os nga Kausaban sa Kinabuhi
Sa dihang gilibot nako ang Uropa human sa among paglibot sa T.B., nagpadayon ako sa akong mga pagtuon sa mga Saksi ni Jehova didto. Sa pag-abot sa Paris, akong giteleponohan si Tina ug misakna sa kaminyoon. Sa milabay ang pila ka semana, sa Pebrero 1975, nagpakasal kami sa Nevada. Human sa lima lang ka adlaw sa kasal, gisugdan ko ang laing panaw sa Tinipong Bansa, apan miuban si Tina nako ning higayona.
Didto sa Brooklyn, New York, miduaw kami sa internasyonal nga hedkuwarter sa mga Saksi ni Jehova. Sobra ra kaayo ang among pamiste, nagsul-ob ug itom nga mga besti nga girebitihan ug nagsinawsinawng pula ug platang mga dragon diha sa karsones ug sa likod sa among mga diyaket, nga ikaulaw gihapon nako dihang makahinumdom niadto. Apan malulotong gitagad kami, ug walay misultig batok bahin sa among besti.
Ako ug si Tina gibawtismohan sa distritong kombensiyon sa Oakland sa Hulyo 1975, eksaktong usa ka tuig sa dihang mitambong kami sa among unang kombensiyon diha sa samang lugar. Ang labi pang nakahatag kalipay sa maong okasyon mao ang kamatuoran nga ang duha ka igsoong babaye ni Tina, si Denise ug Shelia, ug ang akong kaugalingong inahan, diin ang tanan misugod sa pagtuon human nga nagsugod kami, gibawtismohan sa samang panahon. Sa pila ka tuig sa ulahi, ang akong apohang babaye, sa gulang nang edad 82, gibawtismohan usab.
Ang mga butang nga akong nakat-onan makita gikan sa mga hapin sa plaka sa pila sa mga album nga nagama sa akong grupo. Ang 1976 nga album nga nag-ulohang Mirror nagpakita diha sa hapin ug akong mga letrato ug sa ubang mga membro sa banda. Sa usa ka kiliran nakita kami nga tag-as ug buhok, nag-antiparag de-kolor, ug sunod sa uso nga mga besti, samtang sa pikas maoy larawan sa salamin nga naghulagway namo ingong mahinlo, mubog buhok, ug maligdong nga mga estilo sa sapot.
Lakip sa mga awit mao ang usa nga nag-ulohang “Forever.” Kadto gipahinungod sa akong paglaom sa pagkakita sa akong amahan diha sa pagkabanhaw sa dihang ang kinabuhing walay kataposan anaa sa atong atubangan. Ang mga pulong sa usa sa awit nagpabanaag sa akong mga pagbati ingong bag-ong bawtismadong Saksi.
Nagtabang sa Uban
Kami dunay daghang higayon sa pagpakig-ambit sa among pagtuo. Ang usa ka organista ug usa ka dramer misanong ug nagpahinungod sa ilang mga kinabuhi kang Jehova. Kadtong maong dramer karon usa na ka ansiano ug regular payunir sa West Hollywood Congregation.
Sa panahon sa panaw sa 1975, akong giuban ang among organista sa pagsangyaw alang sa iyang unang higayon diha sa sapian, pulos-puti nga dapit sa Atlanta, Georgia. Samtang nagpaingon kami gikan sa balay ug balay, kalit nga mipadaplin ang mga kotse sa polis, ug migawas ang mga polis nga nangutana kon unsay among gibuhat didto. Sa samang panahon, mitungha ang helikopter sa polis sa ibabaw ug nagpalupad sa pila lang ka piye sa among ibabaw. Dayag nga nakadawat ang mga polis ug mga report nga may “katahapang mga tawo” diha sa kasilinganan, apan sa dihang gisaysay namo ang among buluhaton ingong mga saksi ni Jehova, gipasagdan kami sa polis. Unsa nga pagsugod sa buluhatong pagsangyaw alang sa among organista!
Niini nga panaw, human sa among bawtismo, mihimo kamig dakong audiovisual display nga dunay 4.6 ka metrong iskren. Mao kini ang pangunang bahin sa pasundayag. Kini nagkinahanglan sa paggamit ug duha ka dakong mga trak nga semitrailer ug duha ka bus. Ang audiovisual nga pasundayag nagpakita sa mga kalisang sa mga kahimtang sa kalibotan ug dayon nagpunting sa solusyon pinaagi sa Gingharian sa Diyos. Lakip sa mga slide mao ang mga hulagway sa kombensiyon sa Oakland Coliseum ug sa among kaugalingong bawtismo. Kini gihimoag musika, ug naghatag akog komentaryo sa matag awit.
Sa panahon sa usa ka panaw, migawas ako sa pag-alagad sa kanataran sa Hollywood, Florida, ug giasayn kami sa pagsangyaw sa pultahan ug pultahan sa usa nga nagdumala sa grupo. Sa kalit, nakadungog akog usa sa akong mga plaka nga gipatokar sa balay sa duol. Nanuktok ako sa pultahan, ug tulo ka batan-ong lalaki didto nga nahubog sa droga wala-makatingog nga kalit nga nakakita nga nagbarog sa ilang pultahan ang mag-aawit sa awit nga ilang gipamatian! Nahibaloan ko nga duha niining mga tawhana nangahimong mga Saksi.
Niadtong 1979 mibalhin kami sa Los Angeles ngadto sa usa ka dakong balay nga dunay swimming pool ug inareglar nga tanaman nga nagbantaaw sa siyudad. Nagtukod ako ug akong kaugalingong 24-tract nga istudyo sa pagrekord tapad niana. Ang unang plaka nga akong gihimo didto nag-ulohang “One in a Million You,” nga nahalinag kapin sa usa ka milyong mga kopya. Wala magdugay human niadto nakapribilehiyo ako sa pag-alagad ingong ministeryal nga alagad, ug sa 1982, usa lang ka semana una pa natawo ang among anak nga babaye si Latia, natudlo akong ansiano.
Sa usa ka Dominggo samtang nagdumala ako sa Pagtuon sa Bantayanang Torre misulod ang usa ka batan-ong lalaki nga taga Hawaii sa Kingdom Hall ug mitutok nako sa katingala. Nakakita siya nako sa Hawaii sa 1975 sa taas pa akog buhok nga mag-aawit ug popular nga musika, busa karon nakurat siya nga nakakita nako nga maligdong nag pamiste ug nagdumala sa Pagtuon sa Bantayanang Torre. Bisan pa nga mibalhin siya sa Los Angeles sa tinguha nga molampos sa natad sa musika, misugot siya sa pagtuon uban nako. Siya karon nag-alagad na sa among kongregasyon ingong regular payunir.
Gipayano ang Among Paagi sa Kinabuhi
Si Tina ug ako sa pagkatinuod makaingon nga malipayon kaayo kami sukad nga misulod sa bug-os panahong ministeryo ingong mga payunir sa 1982. Ang dugang paglunsay sa among espirituwal nga kauswagan mao ang pagpayano sa among paagi sa kinabuhi. Among gigugol ang 90 porsiento sa among panahon diha sa duha lamang ka lawak sa among dakong balay nga nagkinahanglag serbisyo sa mga hardenero ug mga sulogoon aron epektibong makalihok. Dili namo magamit kanunay ang Lincoln Town Car, ang 1955 nga Thunderbird, ang Cord, Mercedes-Benz, ang 7.6 ka metrong motor nga balay, usa ka van, ug daghang motorsiklo. Busa human sa distritong kombensiyon sa 1985, among gibaligya ang among balay ug ang kadaghanan sa mga sakyanan.
Karon kami nagpuyo sa kasarangang balay, nga nakita ni Tina nga mas masayon sa paghinlo samtang nagapayunir. Bisan pa nga naghimo gihapon akog pila ka trabaho ingong musikero, ang akong tinuod nga kalipay karon nagagikan sa pag-alagad ingong payunir ug sa pagtan-aw sa among gamayng anak nga babaye nga nagauswag sa espirituwalidad. Siya may lig-ong mga tumong bisan pa sa iyang linghod nga edad ug kanunay naghisgot bahin sa panahon sa dihang siya makasimbolo sa iyang pagpahinungod kang Jehova.
Laing panalangin nga akong gipangandoy mao ang pagkakita sa akong inahan pag-usab diha sa pagkabanhaw ug sa pagsulti kaniya bahin sa mga hitabo nga nahitabo sukad nga namatay siyang matinumanon ingong regular payunir sa Abril 1987. Oo, inay malipay pinaagi sa paglingaw sa ginatos ka libong mga magdadayeg sa musika, akong nabatonan karon ang tinuod nga katagbawan pinaagi sa paghimo sa akong labing maarangan sa pagsunod sa mga pulong sa salmista: “Dayega ninyo si Jah, kamo nga katawhan! Panag-awit kamo kang Jehova ug bag-ong alawiton, ang iyang pagdayeg diha sa kongregasyon sa mga maunongon.” (Salmo 149:1)—Sumala sa giasoy ni Larry Graham.
[Hulagway sa panid 13]
Dinhi sa Woodstock nga piyesta sa musika, nagtugtog ako atubangan sa tunga sa milyong tawo
[Tinubdan]
John Dominis, LIFE MAGAZINE © Time Inc.
[Hulagway sa panid 15]
Akong asawa ug anak