Ang Hunahuna sa Bibliya

May Panahon Bang Makataronganon ang Pagsukol sa Balaod Sibil?

“KON imong makita nga ang imong kaugalingong katawhan lugoson ug pamatyon,” matud sa usa ka Katolikong misyonaryo sa 30 anyos, “kon imong makita nga ang tibuok nga kalungsoran langkaton sa mga sundalo, ug ang mga bata panguhaon gikan sa ilang mga balay, ug kon imong maamgohan nga 20 porsiento sa populasyon ang nagakontrolar sa tres-kuwarto sa katigayonan, ikaw dili makalubong sa imong ulo sa Bibliya ug magpasagad sa maong tinuod nga mga panghitabo.”—Italiko amoa.

Kon ikaw ang anaa sa dapit sa maong misyonaryo, unsay imong buhaton? Moapil sa usa ka malinawong demonstrasyon o welga? Unsa man kon kana dili mopatungha sa gikinahanglang kausaban? Sa maong panahon makataronganon ba ang kapintasan? Usa ka rebolusyon o pagpukan sa gobyerno? Unsay ginasugyot sa “espirituwal nga mga lider” karong adlawa? Matikdi kining mga tahoa:

◻ Usa ka klerigo sa Nicaragua miingon nga siya nagaalagad sa Diyos pinaagi sa pag-alagad sa katawhan ug sa rebolusyon.

◻ Sa Pilipinas ang usa ka ministro gipalagpot gikan sa nasod tungod sa paghulhog sa politikanhong kagubot ug paghulagway kang Jesus ingong rebelde.

◻ Ang mga pari ug mga madre nagadapig sa mga gerilya sa paningkamot nga pukanon ang usa ka gobyerno sa Sentral Amerika.

Ang ilang mga aksiyon nagapahayag sa kusog ug tin-awng mensahe: Ang pagsukol sa balaod sibil may pasikaranan o giisip pang Kristohanong katungdanan. Apan matuod ba kini, bisan kon ang mga motibo ug mga tumong maoy sinsero ug makitawhanon? Unsa ang hunahuna sa Bibliya?

‘Usa ka Pagsupak sa Diyos’?

Ang Diyos dunay tin-awng pagkabatbat nga polisa kon bahin sa tawhanong mga gobyerno o mga awtoridad. Ang Bibliya nagaingon: “Walay pagbulot-an gawas pinaagi sa Diyos; ang nagalungtad nga mga pagbulot-an nagabarog sa ilang relatibong mga dapit pinaagi sa Diyos.” Oo, si Jehova nga Diyos nagbaton sa gikinahanglang gahom aron sa pagbalda o pagtapos sa nagalungtad nga pagbulot-an sa bisan unsang panahon. Kon sila nagaobra man, kana tungod kay kini iyang gitugot.—Roma 13:1.

Human sa pagtino niining kamatuorana, ang kasulatan nagadugang: “Busa siya nga nagasupak sa pagbulot-an nagasupak sa kahikayan sa Diyos; kadtong nagasupak niini magadawat sa paghukom sa ilang kaugalingon.” (Roma 13:2) Tungod niining mga pulonga, ang Kristohanon matinud-anon bang makasulti nga siya ‘nagaalagad sa Diyos pinaagi sa pag-alagad sa usa ka rebolusyon’? Ang usa ba ‘nagasupak sa Diyos’ pinaagi sa pag-entra, o bisan paglaban sa mga kalihokang laktud nagahagit sa nagalungtad nga panggobyernong pagbulot-an?

Motan-aw kita sa kasaysayan sa Bibliya alang sa tubag. Sa pagkatapos sa ikapitong siglo W.K.P., gitugotan ni Jehova nga ang Babilonyanhong Imperyo magsakop sa Israel, nga naghimo kang Zedekias sa Jerusalem nga usa ka ulipon nga hari. Ugaling, tapos sa walo ka tuig nga pagpasakop si Zedekias mibating napugos sa pagsukol sa maong kahikayan. Siya nagpakitabang sa Ehipto. Dili na niya itugot nga ang laing nasod—nga usa pa ka pagano—ang magagahom sa katawhan sa Diyos. Daw mahinlo ang iyang mga motibo. Apan, unsay pag-isip sa Diyos niadto? Si Zedekias kaha mahimong inuyonan sa Diyos nga “mag-aaway alang sa kagawasan”? Dili! Kay sa pagsukol sa Babilonya, siya misukol usab sa Diyos. Tungod sa maong pagrebelde, gihukom ni Jehova nga si Zedekias mamatay ingon nga bihag sa Babilonya.—2 Hari 24:17-20; Ezekiel 17:15, 16.

Ang kaso ni Zedekias wala mag-inusara. Ang kasaysayan subsob nagpakita nga ang pagsukol sa balaod sibil, bisan kon maayog tuyo, dili makapatunghag malungtarong mga solusyon sa mga suliran sa tawo. Ang kamatuoran mao nga ang mga pag-alsa ug mga rebolusyon subsob lagmit makapadaotan pa sa kahimtang. Sa daghang kaso, tapos sa dayag nga kalamposan sa rebolusyon, ang “mga tigpahigawas” mismo sa kadugayan masad-an sa pagdiniktador ug pagpanglupig. Sa dili madugay, ang usa ka bag-ong kaliwatan sa gilupigang mga tawo magtinguha sa pag-alsa. Ang maong daotang tuyok sa hitabo mao ang nasinati sa daghang nasod. Pananglitan, usa ka nasod sa America del Sur karong bag-o nakasinati sa ika-189 nga pagpukan sa gobyerno sa 154 ka tuig!

Pagkapakyas sa Tawo—Ngano?

Nganong ang sinserong mga tawo dili makapahigawas sa katawhan gikan sa pagpanghimulos ug pagpanglupig? Sa yano tungod kay nakulangan sila sa duha ka butang—ang kaalam ug ang gahom. Dili katingad-ang ang Bibliya nagapasidaan kanato: “Ayaw ibutang ang imong pagsalig sa mga tawong hamili, ni sa anak sa yutan-ong tawo, nga wala kaniya ang kaluwasan.”—Salmo 146:3.

Sa pag-ilustrar, handurawa nga ikaw anaa sa usa ka ospital nga nagapaabot ug operasyon. Ikaw mohilak sa kasakit ug kaalingasa. Sa kalit, ang usa ka dyanitor nga molabay makadungog kanimo, mosakmit sa usa ka kutsilyo sa pag-opera, ug motanyag sa iyang tabang sa paghatag kanimo sa gikinahanglang kahupayan. Itugot ba nimong siya ang moopera? Siyempre dili! Ngano? Kay ang iyang gugma ug kaluoy lamang dili magpatakos niya alang nianang lisod nga buluhaton. Ang iyang mga lihok mopagrabe lamang sa imong pag-antos, nga magbutang pa nimo sa kapeligrohang mamatay. Ang maong kagawian maoy pagkamapangahason ug iresponsable kaayo ug wala magtagad sa kamatuorang may panahong gigahin nga ang usa ka siruhanong may-katakos maoy moopera. Labi pang maayo, sa maong panahon, nga pasaligan ka lang niya nga hapit na ang tabang.

Sa susama, ang matuod nga mga Kristohanon karon dili mohimo sa pagsukol sa balaod sibil. Sila nagahulat sa adlaw ug takna dihang moabot ang may-katakos nga pagbalda sa Diyos. Siya lamang ang nagbaton sa kaalam ug gahom sa pagpatunghag malungtarong mga solusyon alang sa katawhan. Pinaagi sa ilang buluhaton sa pagsangyaw, ang mga Saksi ni Jehova nagapasalig niadtong nagaantos sa mga inhustisya nga ang maong kahupayan duol nang moabot.—Isaias 9:6, 7; 11:3-5.

Kasamtangan, kita makagamit sa bisan unsang legal ug malinawong mga paagi nga anaa sa pagtukod ug pagpanalipod sa atong mga katungod ug pagpangitag kahupayan sa pagpanglupig. Kon ugaling kini mapakyas man sayop ang pagdangop sa pagsukol sa balaod sibil. Uyon niana, si apostol Pablo nagatambag: “Samtang kini nagaagad kaninyo, magmakigdaiton sa tanang tawo. Ayaw pagpanimalos, mga hinigugma, kondili hatagag luna ang kapungot; kay kini nahisulat: ‘Akoa ang panimalos; ako magabalos, nagaingon si Jehova.’” Ang tinuod ug masinugtanong mga Kristohanon nagabutang niining maalamong tambag sa kasingkasing.—Roma 12:18, 19.

[Tinubdan sa Letrato sa panid 23]

Reuters/Bettmann nga mga Letrato sa Balita