Kapitulo 7—Pagkaluwas Ngadto sa Usa ka Bag-ong Yuta
Lihok nga Maalamon Atubangan sa Katalagman
1. Nganong nangamatay ang mga tawo sa way hinungdan (a) dihang nalunod ang Titanic? (b) dihang mibuto ang Bukid Pelée?
Kon pasidan-an sa kasaligang tinubdan nga taliabot ang katalagman, ang mga tawong maalamon molihok sa pagpanalipod sa ilang kinabuhi. (Proverbio 22:3) Apan nangamatay nga way hinungdan ang libolibo tungod kay wala sa hustong dapit ang ilang pagsalig. Bisan pa sa mga pasidaang mosakay sa mga bote, ginatos ka pasahero ang nalunod duyog sa barkong Titanic sa 1912 tungod kay sila nagtuo sa pangangkong kadto dili gayod malunod. Dihang ang Bukid Pelée sa Martinique misugod sa pagbugag abo ug bato sa bolkan sa 1902, ang molupyo sa nait nga Saint-Pierre nahadlok, apan sanglit nameligro ang mahakogong intereses sa iladong mga membro sa komunidad, ang lokal nga mga politiko ug ang editor sa lokal nga peryodiko naningkamot sa paghupay sa kahadlok sa mga tawo, nga miawhag kanila nga dili mopahawa. Sa kalit ang bukid mibuto, ug 30,000 ka tawo ang nangamatay.
2. (a) Unsang dinaliang pasidaan ang gipalanog sa atong adlaw? (b) Nganong ang kahimtang seryoso?
2 Sa atong adlaw gipalanog ang labi pang dinaliang pasidaan—dili mahitungod sa lokal nga katalagman kondili mahitungod sa pagkaduol sa unibersohanong gubat sa Diyos sa Armageddon. (Isaias 34:1, 2; Jeremias 25:32, 33) Balikbalik nga nagaduaw ang mga Saksi ni Jehova sa kabalayan sa katawhan sa tibuok kalibotan, nga nagaawhag kanila sa paglihok nga maalamon, uban ang tumong sa pagluwas sa ilang mga kinabuhi. Gihigugma mo ba ang kinabuhi aron buhaton ang gikinahanglang lihok, ug buhaton kana dayon, nga walay paglangan?
“Ang Kalibotan Lumalabay”
3. Nganong ang atong tinamdan bahin sa kalibotan moapektar sa atong paglaom nga maluwas?
3 Ang usa ka hinungdanong bahin sa imong paglaom sa kaluwasan mao ang imong tinamdan bahin sa kalibotan. Samtang ikaw buhi ingong usa ka tawo ikaw anaa sa kalibotan. Apan dili kinahanglang makig-ambit ka sa daotang mga tinguha niini ug sundogon ang dili-diyosnong mga buhat niini. Dili kinahanglang magpaila ka uban niini pinaagi sa pagbutang sa imong pagsalig diha sa mga tawo ug sa ilang mga laraw inay kay diha sa Diyos ug sa iyang katuyoan. Apan kinahanglang magpili ka; dili mahimong ikaw anaa sa duha ka kiliran. “Si bisan kinsa . . . nga buot mahimong higala sa kalibotan nagahimo sa iyang kaugalingon nga kaaway sa Diyos.” Ngano? Kay, sumala sa ginasulti kanato sa Pulong sa Diyos, “ang tibuok kalibotan nahiluna sa gahom sa usang daotan.”—Santiago 4:4; 1 Juan 5:19; Salmo 146:3-5.
4. (a) Pinaagi sa paggamit sa imong Bibliya, isaysay kon unsang mga buhat ug mga tinamdan ang magapugong sa mga tawo gikan sa kinabuhi ilalom sa Gingharian sa Diyos. (b) Nganong si bisan kinsa nga nagabuhat nianang mga butanga magabiya dayon niana nila?
4 Hisabtan, si Jehova dili moluwas ngadto sa iyang matarong Bag-ong Kahikayan sa mga tawo kansang pagkinabuhi nagapamatuod nga sila nagasunod sa ginatunglo sa Diyos. Unsa ang pipila niining mga butanga? Ang daghan mao ang mga kalihokan ug mga tinamdan nga gipakawalay-bili sa kalibotan. Apan kon buot natong maluwas sa kalaglagan niining daotang kalibotan, nan, bisan kon unsay buhaton ug hunahunaon sa ubang tawo, atong pamatian ang pasidaan sa Bibliya nga ang mga makihilawason, mga mananapaw, mga homoseksuwal ug kadtong nagabuhat sa imoral nga kahugawan ug malaw-ay nga kagawian dili mahiapil sa mga maluwas. Bisan pag ka pila ang uban moliso ngadto sa mga bakak o pangawat, atong isalikway kanang pagkinabuhia. Bisan pa sa kabantog sa mga buhat sa okultismo, atong likayan kana. Bisan pag ang uban tingali masina, nga mohaling sa kabingkilan, masuko, o mosulay sa pag-ikyas sa mga pagbati sa kapakyasan pinaagig mga droga o hinobrang pag-inom sa alkoholikong mga ilimnon, dili nato sila sundogon. Ug kon kita nakabuhat niining mga butanga, atubangon nato ang panginahanglan sa pagbag-o. Bisan pag ang pipila niana daw “normal” alang kanato sa nangagi, kana atong biyaan. Ngano? Kay tinuod natong gihigugma ang Diyos, gihigugma nato ang kinabuhi, ug ang Pulong sa Diyos nagapasidaang “kadtong nagabuhat nianang mga butanga dili magapanunod sa gingharian sa Diyos.”—Galacia 5:19-21; Efeso 5:3-7; 1 Corinto 6:9, 10; 2 Corinto 7:1; Pinadayag 22:15.
5. (a) Kon bililhon ang kinabuhi alang kanato, unsay kinahanglang matun-an nato sa pagbuhat? (b) Unsang maayong mga hiyas ang gihisgotan sa mga kasulatan sa kataposan niining parapoha? Unsa kana ka hinungdanon? Sa unsang paagi atong maugmad kana sila?
5 Kon bililhon alang kanato ang higayong mabuhi sa walay kataposan sa kalipay, kinahanglang atong tun-an kon unsaon pagpahimuot ang Maghahatag sa kinabuhi, si Jehova nga Diyos. (Buhat 17:24-28; Pinadayag 4:11) Sa mauswagon kinahanglang atong ipadapat ang iyang Pulong sa tanang bahin sa atong mga kinabuhi. Samtang atong buhaton kana, sa dili madugay atong susihon nga seryoso ang atong tinamdan bahin sa atong kaugalingon ug sa ubang tawo, bahin sa personal nga mga kabtangan ug mga nalampos, ug palandongon sa unsang paagi moapektar kini sa atong pagbarog atubangan sa Diyos. Ang mga tawo alirong kanato tingali dunay hataas nga hunahuna sa ilang kaugalingon, sa ilang tribo o rasa o nasod, apan atong palandongon nga seryoso ang kasulatan nga nagaingon: “Ang Diyos supak sa mga mapahitas-on, apan siya nagahatag sa dili-takos nga kalulot ngadto sa mga mapaubsanon.”—Santiago 4:6; Sofonias 2:2, 3; Salmo 149:4.
6, 7. Nganong pagasusihon nato ang atong mga kinabuhi sa kahayag sa 1 Juan 2:15-17?
6 Bisan pag itugot sa uban nga sila maulipon sa mga tinguhang gidasig sa materyalistikanhong katilingban o gitukmod sa tinguha sa pagkainila, atong susihon ang atong kinabuhi mismo sa kahayag sa 1 Juan 2:15-17, nga nagaingon: “Ayaw ninyo higugmaa ang kalibotan o ang mga butang sa kalibotan. Kon may nahigugma sa kalibotan, ang gugma sa Amahan wala diha kaniya; tungod kay ang tanan sa kalibotan—ang tinguha sa unod ug ang tinguha sa mga mata ug ang mapagawalong pasundayag sa pangabuhian sa usa—wala magagikan sa Amahan, kondili nagagikan sa kalibotan. Dugang pa, ang kalibotan lumalabay ug mao usab ang iyang mga tinguha, apan siya nga nagabuhat sa kabubut-on sa Diyos nagapabilin sa walay kataposan.” Kon kinahanglang himoon nato ang mga kausaban, karon mao na ang panahon sa pagbuhat niana.
7 Kining kalibotana ug ang paagi sa kinabuhi niini dili mopadayon sa walay kataposan. Kini dili kay “dili gayod malunod.” Ang kalibotanong mga tawo tingali mosulay sa paghupot sa ilang mga sumusunod, pinaagi sa pagpabati kanila nga ang ilang mga paningkamot makapaarang-arang sa kalibotan. Apan ang bugtong paaging maluwas sa umaabot nga katalagman mao ang pagpamati sa mensahe sa pasidaan sa Diyos. Niini ang mga taga-Nineve sa mga adlaw sa manalagnang si Jonas mihatag ug panig-ingnan nga maayong atong ibutang sa kasingkasing.
“Sila Naghinulsol Tungod sa Giwali ni Jonas”
8. Sa unsang paagi gipakita sa mga taga-Nineve ang kaalam dihang gipahayag ni Jonas ang pasidaan sa Diyos ngadto kanila, ug unsay sangpotanan?
8 Sa ikasiyam nga siglo W.K.P., gisugo ni Jehova si Jonas sa pag-adto ngadto sa katawhan sa Nineve, ang kaulohan sa Asirya, sa pagmantala nga, tungod sa ilang pagkadaotan, ang Nineve pagalaglagon. Dihang mipasidaan si Jonas nga sa 40 ka adlaw na lamang sila mangamatay, unsay ilang sanong? Inay sa pagbiaybiay, sila “misugod sa pagtuo sa Diyos, ug sila mimantala sa usa ka pagpuasa ug nagsul-ob sa sako.” Ang hari mismo miduyog kanila ug miawhag sa tanang tawo sa pagsangpit sa tim-os sa Diyos ug pagtalikod gikan sa ilang daotang dalan ug gikan sa ilang kapintasan. Siya nangatarongan: “Kinsay nasayod kon kaha ang matuod nga Diyos . . . motalikod sa iyang nagdilaab nga kasuko, mao nga kita dili mangamatay?” Tungod kay ilang gibiyaan ang ilang daotang dalan, gipakita kanila ni Jehova ang kaluoy. Naluwas ang ilang mga kinabuhi.—Jonas 3:2-10.
9, 10. (a) Sa unsang bahin si Jesus miingong ang mga taga-Nineve maoy usa ka panig-ingnan nga pagasundogon? (b) Kinsa karong adlawa ang sama sa mga taga-Nineve?
9 Ingong pagbadlong sa walay-pagtuong mga Hudiyo sa unang siglo K.P., giawhag ni Jesus ang pagtagad ngadto nianang hitabo sa kasaysayan, nga miingon: “Ang mga tawo sa Nineve motindog sa paghukom uban niini nga kaliwatan ug mohukom niini sa silot; tungod kay sila naghinulsol tungod sa giwali ni Jonas, apan, ania karon! ania dinhi karon ang labaw pa kay kang Jonas.”—Mateo 12:41.
10 Komosta ang atong adlaw? May nagapakita ba sa ingon nga paghinulsol? Oo; adunay linibo sa tibuok kalibotan si kinsa, sama sa mga taga-Nineve, mahimong wala gayod moangkong nagasimba sa Diyos sa Bibliya apan si kinsa karon nagapamati sa mensahe sa pasidaan ni Jehova. Dihang ilang nahibaloan kon nganong umaabot ang kalaglagan niining kalibotana, sila matinguhaon sa kaluoy sa Diyos. Sila tinuod nga may pagbag-o sa hunahuna ug kasingkasing mahitungod sa ilang pagkinabuhi sa nangagi ug karon nagakugi sa pagbuhat sa “mga buhat nga angay sa paghinulsol.” (Buhat 26:20; tan-awa usab ang Roma 2:4.) Imo bang tinguha nga mahiapil kanila? Kon mao, ayaw paglangan.
Hangyo Dayon Alang sa Pakigdait
11. (a) Unsa ang kagikan sa mga Gabaonhon? (b) Nganong sila mihangyo alang sa pakigdait uban sa Israel?
11 Ang mga Gabaonhon sa mga adlaw ni Josue milihok usab nga maalamon aron maluwas ang ilang kinabuhi. Sila mga taga-Canaan kansang pagkinabuhi imoral ug materyalistikanhon, tigsimbag diyosdiyos ug demonyohanon. Gihukom ni Jehova ang ilang kalaglagan. Sila nasayod nga giluwas ni Jehova ang Israel gikan sa Ehipto 40 ka tuig nga miagi ug ang gamhanang Amorehanong mga hari sa silangan sa Subang Jordan wala makabarog sa ilang atubangan. Ang tanan nasayod nga, bisan wala gamita ang mga igdudumbol, ang dagko kaayong mga paril sa Jerico napukan sa ilang atubangan ug ang siyudad sa Ai nahimo na lang bungtod sa kalumpagan. (Josue 9:3, 9, 10) Ang mga molupyo sa siyudad sa Gabaon buot mabuhi, apan ilang naamgohang dili gayod sila makadaog sa gubat batok sa Diyos sa Israel. Kinahanglang may buhaton dayon. Unsa man? Sila dili makapugos nga makigsabot sa Israel, apan sila naghunahunang labing menos angay silang mosulay sa pagbaton niana. Sa unsang paagi?
12. (a) Bisan pa sa paaging ilang gigamit, nganong giluwas ang mga Gabaonhon? (b) Unsang kausaban ang ilang gibuhat, ug unsang buluhaton ang gihatag kanila nga ipabuhat?
12 Sila milihok nga maalamon, nga nagpasugo ngadto kang Josue ug mga tawo kansang panagway nagpailang sila mipanaw gikan sa halayo. Sa pagduol kang Josue, sila miingong sila gikan sa layong yuta, nga sila nakadungog sa dagkong mga butang nabuhat ni Jehova ug, ingong mga hawas sa ilang katawhan, sila nanganha sa pagtanyag sa ilang kaugalingon ingong mga alagad ug paghangyo nga himoon ang usa ka pakigtugon uban kanila. Miuyon si Josue ug ang mga pangulo sa Israel. Sa ulahi, sa nahibaloan ang panglimbong, ang mga Gabaonhon mapaubsanong misugid nga sila nahadlok tungod sa ilang mga kinabuhi ug ilang gipakita ang kaandam sa pagbuhat sa bisan unsang ipabuhat kanila. (Josue 9:4-25) Napanid-an ni Jehova ang tibuok hitabo. Siya wala hilimbongi. Iyang nakita nga wala sila magtinguha sa pagdaot sa iyang katawhan, sama sa gibuhat sa nangagi sa mga Moabihanon, ug iyang naila ang ilang mainitong tinguha nga mabuhi. Busa iyang gitugotan sila nga itudlo sa pagbuhat ilalom sa mga Levihanon sa balaang tabernakulo, nga tigpangahoy ug tigkalos sa tubig, sa ingon magapaluyo sa pagsimba ni Jehova. Siyempre, aron mahimong dinawat alang sa maong pag-alagad, kinahanglang biyaan nila ang ilang hugaw nga mga buhat sa nangagi.—Josue 9:27; Levitico 18:26-30.
13. (a) Sa unsang paagi kita makapahimulos gikan sa matagnaong drama maylabot sa mga Gabaonhon? (b) Aron luwason sa Labaw nga Josue, unsay gikinahanglan gikan sa katawhan karong adlawa?
13 Tungod sa kamatuorang kita nagapuyo nga duol sa kataposan sa “kataposang mga adlaw,” hinungdanong ang tanang tawo nga buot maluwas molihok nga walay paglangan, ug uban ang bug-os nga katim-os. Si Jesu-Kristo, kinsa mao ang manlalaglag ni Jehova karong adlawa, dili malimbongan sama kang Josue. Ang bugtong paagi nga ang maong mga tawo makahimo sa pakigsabot nga sila maluwas sa pagkalaglag mao nga ilang ipahayag nga dayag ang ilang pagtuo kang Jehova ingong matuod nga Diyos. (Itandi ang Buhat 2:17-21.) Kinahanglang dawaton usab nila si Jesu-Kristo diha sa mga papel nga gitudlo sa Diyos kaniya ug magkinabuhi human niini ingong mga tawong dili mahigugmaon sa paagi sa kinabuhi niining hinukman sa kalaglagan nga kalibotan. Unya kinahanglang sila mahimong mapaubsanong mga alagad sa Diyos, nga magahatag ug balaang pag-alagad kaniya sa pagpakig-uban sa kongregasyon sa iyang katawhan.—Juan 17:16; Pinadayag 7:14, 15.
14. Nganong ang pagluwas ni Jehova sa mga Gabaonhon gikan sa mga kaaway makahuloganon alang kanato?
14 Wala madugay tapos mobarog ang mga Gabaonhon dapig sa katawhan ni Jehova, sila nakasinatig dakong kalisdanan. Lima ka hari sa mga Amorehanon misulong sa Gabaon sa pagpugos sa mga molupyo sa pagdapig kanila, nga mosupak sa Israel. Ang mga Gabaonhon nagpasugo aron mohangyo sa dinaliang tabang ni Josue, ug ang kaluwasang ilang naagoman mao ang usa sa labing talagsaon sa tibuok kasaysayan. Gilibog ni Jehova ang kaaway, gipaulanan silag mga bato gikan sa langit, ug gipalugwayan ang kahayag sa adlaw sa milagrosong paagi hangtod nga bug-os naparot sa Israel ang kaaway. (Josue 10:1-14) Ang maong pagluwas sa mga Gabaonhon maoy matagnaon sa labi pang kahibulongang kaluwasan sa dakong panon sa mga magsisimba sa matuod nga Diyos panahon sa unibersohanong gubat sa Armageddon. Ang higayong magpahimulos sa maong kaluwasan bukas sa katawhan sa tanang nasod kon sila molihok nga maalamon karon. Pahimuslan ba nimo ang maong higayon?—Pinadayag 7:9, 10.