Panahon na Alang sa “Bag-ong Yuta”
SA MATAPOS ang panahon niining kalibotana, matapos ba ang panahon alang sa tanang tawo? Dili! Adunay mangaluwas. Apan ang yuta ba nga ilang panundon maoy usa ka radyoaktibo, napagba o mangiob, gayelong yuta nga walay pulos? Dili. Kini mahimong usa ka dapit nga malamboon sa tanom, hayop ug tawhanong kinabuhi! Katingalahang pamation? Kon mao, tan-awa pag-usab ang matagnaong pulong ni Jesus.
Susiha ang mao gihapong kapitulo sa Bibliya diin gilista ni Jesus ang daghang bahing ilhanan nga nagtimaan sa pagkaduol sa kataposan niining kalibotana. Imong makita nga iyang gipakasama ang atong panahon sa laing panahon. Siya miingon: “Sama sa adlaw ni Noe, maingon man usab unya ang adlaw sa Anak sa tawo. . . . Sila wala magpakabana hangtod nga miabot ang baha ug gianod silang tanan.” (Mateo 24:37-39) Sa mga adlaw ni Noe, natapos ang panahon. Alang kang kinsa o unsa? Alang lamang sa mga dili diyosnon.
Wala matapos ang panahon kang Noe ug sa iyang pamilya. Naluwas sila sa usa ka globo nga gihinloan sa tanang pagkadaotan ug sa pagtan-aw sa yutang magilawon sa kabag-o. Ngano? Tungod kay ilang gimahal ang pagkamatarong ug misunod sa Diyos.—Genesis 6:5-9, 22; 2 Pedro 2:5.
“Human nga gihatagag balaanong pasidaan” bahin sa kamatuorang may umaabot nga lunop sa tibuok yuta, nagpakita si Noe nga siya may praktikal nga kaalam. Dili sama sa ubang tawo, mipakita siyag pagtuo ug milihok uban sa panghunahuna sa pagluwas sa iyang panimalay. (Hebreohanon 11:7) Iyang gipamatud-an ang iyang kaugalingon nga tawong may diyosnong debosyon. Ikaw ba, ingon usab niana? Kon mao, malipay ka sa kamatuorang “mahibalo si Jehova sa pagluwas sa tawong may diyosnong debosyon gikan sa pagsulay, ug sa pagtipig sa mga tawong dili-matarong alang sa adlaw sa paghukom aron laglagon.”—2 Pedro 2:9.
Unsang Kahimtang ang Maglungtad?
Kabubot-on sa Diyos niining planetaha nga mahimong usa ka hingpit nga paraiso sa pakigdait alang sa “mga tawo nga may diyosnong debosyon,” dili usa ka walay kinabuhi, sunog nga kalibotan. Ang yuta maoy walay kataposang puloy-anan sa tawo. Sanglit gihuptan sa Maglalalang ang kinalabwang posisyon sa gahom, siya makagarantiya nga ang katalagman sa bug-os nga kalumpagan dili gayod modangat sa atong yuta. Ang iyang dinasig nga Pulong, sa Isaias 45:18, nagpasalig kanatong siya ‘wala maghimo niining usa ka kalumpagan kondili usa ka dapit nga pagapuy-an.’—Today’s English Version.
Apan dili lamang mahimo ang planeta nga usa ka matahom nga paraiso; ang tawhanong relasyon maoy sama usab katahom. Ang Diyos ang magpahinabo sa pagtapos sa panahon alang niining daotang sistema aron ang matinud-anon ug kasingkasing nga mga tawo makatagamtam sa kinabuhi sa bug-os diha sa usa ka matarong nga sistema. Mao kana ang usa sa katarongan kon nganong maglalang siya ug usa ka “bag-ong yuta”—usa ka bag-ong tawhanong katilingban—usa nga niini “magpuyo ang pagkamatarong.”—2 Pedro 3:13.
Sa unsang paagi ipatungha ang “bagong yuta”? Una, pinaagi sa usa ka aksiyon nga himoon sa “bag-ong mga langit”—usa ka bag-ong langitnong kagamhanan pinaagi kang Kristo ingong tinudlong Hari ni Jehova nga magmando sa yuta sa pagkamatarong. Ikaduha, pinaagi sa pagtudlo sa mga mahigugmaon sa kamatuoran sa matarong nga mga paagi sa Diyos. Busa, ang mangaluwas sa “bag-ong yuta” mao lamang kadto silang nakaugmad ug suod nga relasyon kang Jehova ug sa iyang harianong Anak. Gipamatud-an ba nimo ang imong kaugalingon nga ingon niini ka nga pagkatawo?—Isaias 9:7; Juan 17:3; 2 Pedro 3:13.
“Bag-ong Yuta”—Alang Kang Kinsa?
‘Apan dili ba nagtinguha ang tanan nga mabuhi sa usa ka matarong nga yuta?’ tingali mangutana ka. Dili, dili tanan sa mga tawo magtinguhag kinabuhi diha sa usa ka matarong nga palibot. Kon manapaw sila sa asawa sa ilang silingan, o buot sa kagawasan sa pagdiborsiyo sa ilang kaugalingong asawa kon maghunahuna sila nga panahon na sa pagkuhag bag-o, o dili magpanuko sa pagpangawat ug butang sa ilang isigkatawo, nan sila dili malipay nianang “bag-ong yuta.” Kon ang ilang ideya sa kalingawan mao ang pagyupyop ug aso sa ilang baga, paghingos ug droga o sa pagbubog alkohol sa ilang mga tutunlan hangtod nga mahabol ang ilang panabot, nan dili sila makagusto nianang “bag-ong yuta.” Walay mga pag-abusong sama niini ang maglungtad didto.
Apan, sa laing bahin, kon buot ka nga makabahin sa paggahom sa yuta, sa paghimo niining kaumahan nga nagahatag bunga ug sa mga parke nga nagpakitag katahom, o kon kalipayan nimo ang pagmando sa mahigugmaon sa mga hayop, nan gusto ka nianang “bag-ong yuta.” Kon ginahandom mo ang panahon diin ang tanang minyong mga kapikas magmaunongon sa ilang kaugalingong mga kapikas, sa panahon diin magpadako ka ug bata nga gawas sa kalisang sa pag-abuso, o sa panahon diin ang hustong pamatasan ginahimo sa tanan, nan pagakalipayan mo ang “bag-ong yuta.” Kon nangandoy ka sa panahon diin ang bomba dili makapabungkag sa kababayen-an ug kabataan, sa panahon diin ang malupigong pagmando mahanaw ug wala usay hakog nga pangomersiyo, o sa panahong magpuyo ang katawhan nga may pakigdait ilalom sa ilang kaugalingong parrasan ug kahoyng igira, nan maghinamhinam ka sa palaabutong “bag-ong yuta.”
Dugang pa, ang pag-ulan ni Jehova sa tugob nga mga panalangin magkahulogag kinabuhing luwas gikan sa mga kapakyasan, kasuko, pagkawalay pagsinabtanay ug kabalaka nga makita sa mga kinabuhi sa milyonmilyon karon. Ug lakip sa iyang mga panalangin mao ang maayong panglawas alang sa tanan. Kining maong kalipayan dili kay lumalabay lamang. Dili kini pagaputlon pinaagi sa kamatayon human sa 70 o 80 ka tuig sa kinabuhi. Kay ang Pulong sa Diyos nagpasalig nga wad-on ang kamatayon, nga nag-ingon: “Sa pagkatinuod iyang lamyon ang kamatayon sa walay kataposan, ug ang Soberano Ginoong Jehova magapahid sa mga luha sa tanang mga nawong.” Bisan ang mga patay nga anaa sa panumdoman sa Diyos banhawon ug hatagag higayon sa pagpamatuod sa ilang gugma alang sa pagkamatarong.—Isaias 25:8; Juan 5:28, 29.
Kon madanihon alang kanimo ang maong matarong “bag-ong yuta,” nan karon na ang panahon sa pagsugod sa pagkinabuhi alang niana.
Lihok nga Maalamon
Inigkatapos na sa panahon niining dili diyosnong kalibotan, dili kinahanglang matapos kini alang kanimo. Mosundog ka ba kang Noe ug mahimong mahigugmaon sa pagkamatarong usab? Kon mao, kinahanglang molihok ka na karon! Ngano? Palandonga kini: Diha sa emerhensiya, unsay sangpotan sa kinabuhi? Ang pagpamati ba lamang sa alarma, o ang aksiyon sa pagluwas sa kinabuhi nga mosunod? Dili ba ang aksiyon nga mosunod sa alarma?
Haduol na kaayo ang panahon karon alang sa pag-abot sa “bag-ong yuta” ni Jehova. Gipalanog ang alarma, nagtimaan sa nagsingabot nga kalaglagan niining daotan nga sistema sa mga butang pinaagi sa kamot sa Diyos. Ang higayon sa pagkuhag makahatag kinabuhi nga kahibalo gikan sa Pulong sa Diyos anaa gihapon sa imong atubangan, sama sa usa ka bukas nga pultahan sa arka nga gihimo ni Noe sa wala pa ang Lunop. Apan hapit na kining siradoan. Busa, karon na ang panahon sa pagpakita nga tinuod ka gayod nga nangitag kinabuhi. (Sofonias 2:2, 3) Gamita sa maalamon ang nanghibiling panahon aron inigkatapos sa panahon ning sistema malakip kang makabatog malipayong palaabutong maluwas.
[Letrato sa panid 11]
Ang mga tawo lamang nga mahigugmaon sa pagkamatarong ang maluwas sa “bag-ong yuta” sa Diyos