Ang Pagtagamtam sa Pagtukod ug Paraiso

“llado ang mga Saksi ni Jehova sa pagtukod ug mga simbahan sulod sa 48 oras. Apan karong hinapos sa semana ilang gilabwan ang ilang kaugalingon Sa unang higayon, nakatukod ang mga Saksi ni Jehova ug duha ka simbahang mga Kingdom Hall nga adunay konektadong apartment sa 48 oras.”

ANG kawaning reporter si Annette Lopez-Munoz mihatag niini nga pangulohan sa iyang sugilanon diha sa South Dade News Leader sa Lunes, Pebrero 27. Nagpunting kini sa hinapos sa semana nga bag-o pang milabay, sa Pebrero 25 ug 26.

Ang mga kongregasyon sa mga Saksi ni Jehova sa Homestead, Florida, kusog kaayo ang pagtubo nga nahimong dinalian ang programa sa pag-apas. Sumala sa gipahayag ni Jim Crosley, nga usa ka magpapanawng magtatan-aw sa lugar sa South Florida, sa reporter: “Adunay dugang panginahanglan sa pagtukod niining mga Kingdom Hall sukad nga gipapahawa ang mga igsoon sa Cuba sa tighakot nga barkong Mariel. Nagkinahanglan usab ug dugang lima o unom ka tigomanan sa Miami.”

Ang kaluhang mga tigomanan nga gitukod sa dapit sa Homestead mag-alagad sa upat ka kongregasyon—duha ka Kinatsila ug duha sa Ingles.

Mikutlo ang The Miami News sa laing Saksi kinsa misaysay sa katarongan sa pagtukod ug “dihadiha” nga mga Kingdom Hall: “Ang among pilosopya mao ang pagtukod kanila sa labing madaling panahon kon mahimo aron makapadayon kami sa mas hinungdanon pang mga butang.”

Ang “mas hinungdanon pang mga butang” nagasentro sa mga buluhatong pag-ebanghelyo, pagsangyaw ug pagpanudlo sa katilingban mahitungod sa umaabot nga Gingharian, sa paghimog mga tinunan, sa pagbawtismo ug sa pagbansay kanila aron sila usab “makahatag balaang pag-alagad sa buhi nga Diyos.”—Hebreohanon 9:14; Mateo 24:14; 28:19, 20.

Nagkinahanglan kini ug edukasyonal nga mga sentro—edukasyonal nga mga sentro sa Bibliya, mga Kingdom Hall. Ang mga tigomanan, mipadayon ang The Miami News, praktikal. “Simple lang sila tungod kay gihunahuna namo sila samag tunghaan o mga sentro sa edukasyon. Sila maoy mga dapit sa pagsimba, apan ang mga serbisyo sa pagsimba maoy edukasyonal nga matang.” Ang matag tigomanan adunay 4,000 tiil-kuwadrado (370 sq m), usa ka awditoryom nga may lingkoranang 250, duha ka klasehanan, usa ka sala, usa ka lawak sa magasin ug duha ka kasilyas.

Duha ka Tigomanan sa 48 Oras?

Gitanyag sa Saksing si Beatrice Rogers ang lima ka akreng (2-ha) kaabokadohan diha sa usa ka lokasyon nga sentro sa upat ka kongregasyon. Gidesisyonan, human sa usa ka tuig nga pagtimbangtimbang ug pagplano, sa pagtukod ug duha ka magkatapad nga tigomanan.

Sa nanglabayng duha ka tuig ang mga Saksi ni Jehova sa Tinipong Bansa ug Canada nagapanukod ug aberids nga usa ka Kingdom Hall sa usa ka semana pinaagi sa “dihadiha” nga paagi sa pagtukod. Apan unsay ikasulti bahin sa duha diha sa usa ka lote? Nagpakita ba ang nangaging eksperyensiya nga mahimo kini? Aduna ba kahay igong boluntaryong tabang nga makuha? Kon usa ka hagit ang pagdumala sa 200 ngadto sa 400 ka mga mamumuo sa usa ka tigomanang proyekto, unsa kahay mahitabo kon 400 ngadto sa 600 ang malangkit? Uban niadtong mga tawhana ug uban nianang materyal sa pagtukod nga lihokon, dili ba kaha ang tibuok nga proyekto moresultag dakong kagubot?

Adunay dako kaayong pagtuki sa kasingkasing nga palandongon bahin sa pasidaan ni Jesus: “Kinsa ba kaninyo nga magatinguha sa pagtukod ug torre nga dili una molingkod sa pagkuwenta sa galastohan, kon aduna ba siyay igong ikapahuman niini? Tingali unya hinoon sa dihang ikabutang na niya ang pundasyon ug unya dili makahuman niini, ug ang tanang makakita mosugod sa pagbiaybiay kaniya, nga manag-ingon, ‘Kining tawhana igo rang misugod sa pagtukod apan wala makapahuman.’”—Lucas 14:28-30.

Apan human sa daghang bulan sa mainampoong diskusyon ug sa pagkuwenta sa galastohan ug sa pagtuon sa mga desinyo ug mga paagi, midangat ug desisyon ang mga Saksi ni Jehova sa Homestead: “Uban sa panalangin ni Jehova makahimo kita niana!”

Sa pagka Biernes sa gabii, Pebrero 24, si Nelson Crites, koordinetor sa Kingdom Hall nga mga proyekto sa South Florida, positibong mipasalig sa usa ka tigom nga kapin sa 700 ka madasigong mga boluntaryo diha sa South Dade High School nga awditoryom: “Kini maoy usa ka makasaysayanhong hitabo. Molampos kini pinaagi sa gahom ni Jehova.”

Gigrupo-grupo ang mga boluntaryo sa 11 ka pangunang mga departamento nga gidumala ilalom sa eksperyensiyadong mga kontraktor ug mga artesano, daghan kanila nakatrabaho na sa duha ka adlawng pagtukod ug tigomanan sa miagi. Niining higayona kinahanglang duha ka grupo ang motrabaho, usa sa matag tinukod—sa pagpamanday, sa pagtaod ug mga tubo, sa elektrikal, ug uban pa. Dugang pa, ang tanang komunikasyon hubaron sa Kinatsila ug sa Iningles. Gawas sa giabangang duha ka kreyn aron sa pagtaod sa mga sagbayan sa atop sa buntag sa Sabado, halos ang tanang trabaho ug mga serbisyo boluntaryo.

Gisugdan nga Nag-ulan

Gidalit ang pamahaw nga samag estilo sa tigtumbag-kahoy sa alas sais sa buntag. Dayon, atubangan sa mga trabahanteng mga lalaki, mga babaye ug mga bata gihikyad ang mga materyales nga balor ug bayentesingko mil doryares. Ang tanang mga materyales nga igtulokod gibutang sa eksaktong puwesto nga kini gikinahanglan diha sa tunga sa kongkretong mga pundasyon sa kaluhang gambalay. Ang matag gambalay, nga gilibotan sa puthawng paloros nga maoy balaod sa Dade County sa Florida nga agianag unos, may sukod nga 4,000 tiil-kuwadrado. Sa alas siyete sugdan ang trabaho sa paghimo niadtong tinapok ug nagbungdo nga mga materyales nga hilaw nga kaluhang mga Kingdom Hall.

Sa untop alas siyete gisugdan ang trabaho. Gisugdan kini nga nag-ulan. Walay hunong ang ulan sukad pa sa tungang gabii. Apan walay bisan usa ka trabaho ang nahunong. Gipatindog ang plastik nga mga tolda ug balaybalay aron kapasilongan sa mga elektrisyan ug sa ubang mga trabahante. Ang mga kontraktor ug mga artesano nagtrabaho diha sa ilang mga trak ug sa mga van. Ang libolibong mga karton sa pagkaon nga giandam sa balay gibutang sa taas nga mga lamesa nga gitabonag plastik sa ilalom sa kaabokadohan. Diha sa ilang kosena sa gawas, ilalom sa plastik nga atop, giareglar sa mga kosenero ang ilang mga takori, mga hurnohan ug mga kawa. Wala lamang tagda ang ulan.

Sa mikusog ang ulan, tulin usab nga mibarog ang mga parolos. Sa usa ug tunga ka oras napahimutang ang mga parolos sa duha ka tinukod. Ang mga palid sa tabla dungan nga mitindog sa mga parolos sa atop. Sa duha ka oras ang kataposang parolos nataod. Sa tanang palibot nanagpang-alsa ang daghang mga kamot sa mga palid sa tabla, sa milabay ang usa ka oras, halos nabungbongan na ang duha ka tinukod. Misugod pagkaporma ang tinukod taliwala sa mga palma nga gitanom pinaagig makina sa miaging usa o duha ka adlaw.

Sa misamot ka dagtom ang panganod, mitulin usab ang pagtrabaho. Imbes mamauli ang mga tawo, nanagpangabot hinoon sila. Sa gawas sa dalan, ang babayeng polis miingon nga ang labing maayo niyang mahimo mao ang pagpalayo. Ang boluntaryong mga direktor sa trapiko maoy nagtrapik sa mga bloke sa 288th Street, diha sa mga kinasang-an sa dalan ug sa atubangan usab sa tinukod. Bukas nga gitanyag sa usa ka silingan ang 15-akre (6-ha) nga luna nga atbang sa dalan aron kaparkingan, nga walay bayad.

Nakatabang ang ulan tungod kay nabasa niini ang mga yutang sinapawag balili sa tig-areglar sa tugkaran ug andam na nga ilatag. Ang mga masitas gikatanom na sa maayong pagkatubig nga yuta. Gigamit sa mga kantero ang ulan sa pagbasa sa ilang igpapalitada.

Nagpadayon nga gipatindog ang mga bungbong. Ingon ka tulin sa paghaklap sa mga palid sa tabla diha sa mga salagunting, tuling gisapawan usab ang bungbong ug piltro. Gatosgatos nga mga trabahante napormag mga aninong nahitabas sa abuhong panganod. Diha sa yuta, gipasaka sa kisame ang mga tubo alang sa sistema sa air conditioning nga naglubaglubag samag dagkong mga ulod. Nalansang na ang natapos nga paneling sa tanang sulod sa tinukod. Gipas-an ang mabug-at nga mga paldo sa sin ug gitaod sa atop. Kon tan-awon ang sid-inganan sa kamera, sama kinig mga akre sa mga sin ug akre sa mga trabahante.

Unsay nahitabo sa ulan? Mihunong kini nga wala matikdi. Sa mibalik kini, ang mga atop sa duha ka tinukod natapos na.

Padayong Nagpangabot ang mga Boluntaryo

Ang upat ka lawak nga apartment gitukod aron masumpay ang duha ka Kingdom Hall. Gikan sa ibabaw ang nasumpayng tinukod napormag dakong titik H.

Nagpabiling bukas ang Departamento sa Boluntaryong Pag-alagad diha sa toldang plastik, ulan ug init. Mas daghan ang trabahante kay sa trabaho. Mireport ang mga boluntaryo nga gikan pa sa halayong Texas, Ohio, Idaho, Inglaterra, Canada ug Jamaica, walay labot sa silingang mga lungsod ug sa tanang bahin sa Florida. Dihay pundo sa mga aplikasyon nga 810.

Si Dawn Brinklow, nga maoy nagdumala sa pag-areglar sa tugkaran, miingon nga wala mahibalo ang iyang mga boluntaryo sa mga ngalan sa mga tanom—bisan sa Philodendron seloum o sa Malpighia. “Busa kolor na lamay among timaan. Dayon magpasugo kami ug trabahante ngadto kanila—‘Pagdalag pula, o asul, o berde.’ Gawas pa nianang tanan, ang tanang pulong kinahanglang hubaron sa duha ka pinulongan. Walay grupo sa trabahante nga dili masagol sa mga itom, puti ug sa mga Hispano.”

Panaghiusa, Gugma ug Espiritu ni Jehova

Ang tawo nga maoy tag-iya sa yuta gihangyo sa pagduaw sa Sabado aron mabayran. Nakurat siya sa pagkakita ug duha ka 4,000 tiil-kuwadradong mga tinukod nga mitungha nianang kongkretong mga pundasyon sa miaging adlaw nga midalidali siya sa pagpauli sa pagkuha sa iyang asawa.

Giabiabi ug gikuyogan sa Departamento sa News Service ang mga reporter, mga potograper, mga tigdalag-kamera sa TV ug ang mga bisitang walay puas nga nagpangabot. Dihay mga kontraktor nga nagtinguha sa pagdiskobre kon sa unsang paagi makatukod sila sama sa mga Saksi ni Jehova. Dihay edukador sa simbahang Baptist nga nagpangandoy nga iyang mapadasig ang iyang mga membro sama sa mga Saksi ni Jehova—“Dili gani nako mapaayo ang tulo sa among simbahan nga dili magbayad ug tawo.”

Si Archie Francis sa Hialeah mipauli gikan sa pagtrabaho sa tibuok adlaw sa Sabado diha sa Departamento sa Paghinlo. Nianang gabhiona miabot ang iyang iyaan gikan sa Belize nga usa ka lungsod sa Sentral Amerika. Iyang giingnan ang iyang iyaan nga nakatabang siya sa pagtukod ug duha ka Kingdom Hall sa hinapos sa semana.

“Dili ko motuo niana,” miingon ang iyang iyaan.

“Pakitaan ko ikaw ug mga teyp sa video.”

“Dili ko.” Motuo lamang siya kon makita kini niya mismo.

Sa pagpamugos sa iyang iyaan mibiyahi silag 22 milya (35 km) ngadto sa lugar sa tinukod sa tungang gabii. Ang mga tigmasilya sa bungbong nga nagtrabaho sa tibuok gabii, gilingaw sa grupo sa mga igsoong babaye nga nangantag mga awit sa Gingharian sa Kinatsila. Miduyog ang iyaan ni Archie kanila. “Hayan mahimo akong usa sa mga Saksi ni Jehova,” miingon siya. “Mga Saksi ang katrabaho ko sa akong negosyo. Mga matinud-anon sila. Ug tigbasa ako sa ilang magasin.”

Laing paryente ang nakurat, nga nangutana: “Giunsa ninyo sa paghimo kadto?”

“Pinaagi sa panaghiusa. Sa gugma. Sa espiritu ni Jehova,” mitubag si Archie.

Ang asaynment sa South Dade nga polis nga si Warren Brundage mao ang peligroso kaayong lugar sa mga pagpatay, mga droga ug panag-away sa rasa. Iyang nakita ang lahi nga kahayag sa tawhanong kinaiyahan dinhi. “Alang nako tagsaon kaayo kini!” iyang gisultihan ang reporter. “Kining daghan kaayong mga tawo nga nagkahiusa sa pagtrabaho nga walay mga panag-away, walay sinuntokay . . . Anaay mga itom, mga puti, mga Latin . . . nagkalainlain ang ilang mga pangita apan silang tanan nagkahiusa sa pagtrabaho alang sa komun nga kawsa. Kagahapon dihay usa ka magbabangko nga nagtrabaho sa atop.” Nagpadayon gihapon siya human sa alas singko—saylo pa sa oras sa pagtrabaho sa bangko!

Sa Dominggo sa hapon, sumala sa gihangyo sa usa ka potograper, nga gianunsiyo sa Iningles ug sa Kinatsila mihunong makadiyot ang mga trabahante ug mga bisita aron sa pagtigom sa atubangan sa pagkuha kanila ug letrato nga nagwarawara sa ilang mga kamot ingong timaan sa kadaogan. Upat ka libong tawo ang misanong. Gibase kanang numeroha sa kamatuoran nga sa sayo pa niana, nakasilbig 4,000 ka kalan-on ang Departamento sa Food Service.

Usa ka Larawan sa Paraiso, Yutan-on

Ang nakahimo sa palibot nga usa gayod ka paraiso mao ang pag-areglar sa tugkaran. Duha ka tropikal nga tanaman, usa sa atubangan, usa sa likod, ang miporma diha sa buntorong luna sa mga palma, mga bato ug mga bulak. Usa ka Saksi miboluntaryo sa pagregalo sa mga palma. Ang tig-areglar sa tugkaran migawas sa pagpamilig mga kahoy ug nakakita sa pundok sa tulo ka Phoenix reclinata, nga tagsaong mga palmang datilis. Wala ngani masayod ang tag-iya nga nanubo kini didto. Giampingan pag-ayo sa operetor sa buldoser ang pagbalhin kanila, sa pagkahibalo nga usa ka libo ka dolyar (U.S.) ang bili sa matag usa ka kahoy!

Gitanom sulod sa duha ka adlaw, ang tanaman may sukod nga usa ka akre ug tunga (.6 ha). Unom ka trabahante ang gibanabanang makahuman sa trabaho sulod sa tulo ka semana sa komersiyal nga paagi, sa galastohang $25,000 ngadto sa $30,000 (U.S.). Gidonar kadtong tanan.

Usa ka Tagsaong Higayon, Usa ka Tagsaong Pakigbahin

Mibalik ang reporter nga si Lopez-Munoz sa Dominggo uban sa iyang inahan, nga Portuges lamang ang sinultihan. Namatikdan sa batan-ong magsusulat ang usa ka butang nga dili ikabatbat. “Unsa kini nga panukmod, kining motibo diha kaninyo?”

“Gikan kini sa Bibliya,” gitubag siya.

“Nabasa nako sa Bibliya bahin sa pagtukod sa mga tawo ug dakong torre sa gilibog sa Diyos ang ilang mga pinulongan ug gumikan niana wala nila kini matapos.”

“Tungod kana kay supak sa kabuboton sa Diyos ang ilang gihimo.”

“Apan karon gitabangan niya kamo sa pagdaog sa inyong kababagan sa pinulongan?”

“Tungod kana kay gihimo namo ang iyang kabubot-on.”

Gibutang sa hunahuna sa mga Saksi ni Jehova, gisultihan siya, nga “buhi ang pulong sa Diyos ug may gahom.” (Hebreohanon 4:12) Sanong niana ug buksa ang imong kaugalingon alang sa iyang espiritu nga molihok diha kanimo.

“Lakip sa imong namatikdan mao ang among kalipay gikan sa tagsaong mga panag-uban sama sa pagtukod ug Kingdom Hall,” mibatbat ang usa diha sa News Service. “Ang kabaskog sa mga Saksi ni Jehova nakuha gikan sa among pagkahimong usa ka ebanghelikal nga katilingban. Nahiusa kami sa pagsangyaw ug sa pagpanudlo bahin sa umaabot nga Gingharian sa Diyos. Maoy hinungdan nga nagkinahanglan kami ug mga Kingdom Hall ingong mga sentro sa pagsimba ug sa edukasyon sa Bibliya. Sa espesyal nga mga higayon sama niini makabaton kami ug panag-uban sa usa ka halapad nga sukod. Makabahin kami sa among linaing mga katakos ug mga kalaki ug mga abilidad. O ipakita lamang namo ang among pagkamainandamon sa pagbuhat ug bisan unsa kutob sa among maarangan sa pagtabang sa uban. Gihatag sa matag usa ang iyang labing maayo. Ug ang matag usa ginapabilhan alang niana. Apan bisan pa niini, ang among panag-uban ginatultolan sa mga prinsipyo sa Bibliya. Dinhi, pananglitan, mahunahunaon kami sa Galacia 5:26: ‘Dili nato tugotan nga mangahimo kitang matinguhaon sa dungog nga kawang, nga makahagit sa usa ug usa, nga magsinahay sa usa ug usa.’ Ug sa Proverbio 11:14: ‘Kon walay maalamong pagtultol, mangapukan ang mga tawo.’”

Usa ka Larawan sa Paraiso, sa Espirituwal

Ang ilang pagtuo maoy nakahimo sa mga Saksi ni Jehova, sa pagbuhat sa mga butang nga dili mahimo sa uban. Nagsugod sila pinaagi sa pagwala sa espiritu sa kalibotan. Kana naglakip, sa namatikdan sa usa ka polis nga si Brundage, sa pagwala sa espiritu sa kalibotan sa rasismo, pagdumot, pangabubho, sosyal nga pagpinig, mga droga, hingaping tinguha sa sekso ug sa susama niini. Diha siya sa usa ka lahi nga kalibotan, diin gisalikway ang tanang makidaotong kasakitan, kasuko, kasilag, siningkahay ug pagtampalas lakip sa tanang pagkadaotan, ug ang mga tawo sa pagkatinuod nagapaningkamot nga “magmapuanguron sa usag usa, nga may malumong kahangawa, nga magpinasayloay sa usag usa maingon nga kamo gipasaylo sa Diyos tungod kang Kristo.”—Efeso 4:31, 32.

Ang espiritu sa kalibotan, nga makita sa “mga buhat sa unod,” kaaway sa Diyos. Ang pagsalikway nianang espirituha makahatag dalan alang sa bunga sa espiritu sa Diyos, nga “gugma, kalipay, pakigdait, pailob, kalulot, pagkamaayo, pagtuo, kaaghop, pagpugong sa kaugalingon.”—Galacia 5:19-23; Roma 8:5-8.

Ang usa ka bisita, nga sakop sa Mormon nga Iglesya, nakakita sa mga anak sa Saksi—itom, kape ug puti—nga nanagdula. Siya mikomento: “May gisagop kaming itom nga bata. Gibaoran sa among iglesya ang ilang mga anak sa pakigdula sa among bata.”

Ang mga Saksi ni Jehova, pinaagi sa pagsunod sa pagtulon-an sa Bibliya, nakakaplag sa ilang kaugalingon nga nahiusa sa tanang kanasoran nga sobra pa kay sa kanasoran nga sakop sa Hiniusang Kanasoran.

Gihisgotan nga ang mibarog nga duha ka adlawng Kingdom Hall maoy “larawan sa pagtukod ug paraiso.” Nagpahayag kini sa lig-ong pagtuo sa katawhan ni Jehova nga sa dili madugay hinloan sa Maglalalang sa yuta ang tanang mga elemento nga nagadaot sa yuta ug sa tawhanong katilingban nga anaa niana, aron mohatag dalan alang sa pagtukod ug Paraiso sa tibuok globo nga sukod.—Pinadayag 11:17, 18; Isaias 65:17-25.

[Letrato sa panid 18]

Ang igbulongbong ug mga parolos sa atop dungan nga mitindog. Sa pagkaalas nuybe gialsa sa kreyn ang kataposang paroles sa luna niini

[Letrato sa panid 21]

Gidala sa operator sa backhoe ang tulo ka palma—nga bahin sa “dihadiha” nga pag-areglar sa tugkaran

[Blurb sa panid 22]

“Ang tagtatagsa ka tawo usab mokaon ug moinom, ug maglipay pag-ayo sa tanan niyang buhat. Kini maoy gasa sa Diyos. Ug nakita ko nga wala nay laing maayo kay niadtong tawo nga magakalipay sa iyang maayong buhat kay mao kana ang iyong bahin.”—Ecclesiastes 3:13, 22.