Awe wa yi thumisa ningo yoneyo mbimo yi u mahako sisungo. Txisungo txa hombe atxi mmwani ni mmwani wathu a nga txi mahako ngu tiningetela ka Jehovha ni ku mthumela kumweko ni vanathu. Jehovha a navela ti to votshe ve maha toneto. Ngu kutxani? Jehovha a lava ti to hi va vangana vakwe ni ku hi hanya ngu ha ku si gumiko. (Dhewut. 30:19, 20; Vag. 6:7, 8) Kambe Jehovha kha sinzisi m’thu kasiku e mthumela. Ene a tumelela ti to mmwani ni mmwani e sawula ati a no ti maha. Se ngaku mkristu awu a nga bhabhatiswa atxi leka kuengisa milayo ya Jehovha e maha txionho txa hombe? Ngaku a si ti soli a fanete kuthaviswa dibanzani. (1 Vak. 5:13) Hambiketo, Jehovha a emela ti to muonhi e tisola e tshumelela kwakwe. Ngu ditshuri, txivangelo txa lisima txo va Jehovha a di hi ningile mterulo, ngu maha ti to sionho sa va va ti solako si divalelwa. Jehovha Txizimu txa lirando ni ku wa ti lava ngutu ti to vaonhi ve ti sola.—Zak. 1:3; Var. 2:4; Jak. 4:8. w24.08 14 ¶1-2

Mbimo yi Johani a nga bhala dipasi dakwe da wuraru, vathu vamwani va txi hangalasa tigondo ta makuho ni kumaha mazunga dibanzani. Kambe txo tsakisa, vamwani va txi simama va txi “hanya mu ka ditshuri.” Vona va txi engisa Jehovha ni kusimama ‘ve veketa sirumo sakwe.’ (2 Joh. 4, 6) Makristu oneyo o thembeka ma tsakile ngutu, i si nga mbilu ya Johani dwe, kambe ni ya Jehovha. (Mav. 27:11) Ngu tihi ati hi ti gondako? Kuthembeka ti tisa litsako. (1 Joh. 5:3) Athu ha tsaka ngutu ngu kuziva ti to hi tsakisa mbilu ya Jehovha. Jehovha wa tsaka ngutu ngaku a txi hi wona hi txi si kota kuvayilela siduko sa mafu yawa ni kuengisa milayo yakwe. Tingilozi nzumani ni tona ta tsaka ngutu ngu mhaka ya toneto. (Luka 15:10) Ni ku athu ha tsaka ngutu ngako hi txi wona vanathu va txi simama va di thembekile. (2 Vat. 1:4) Mbimo yi mafu awa a Sathani ma no loviswa, athu hi nava ni litsako ngu kuziva ti to hi tikoti kusimama hi di thembekile ka Jehovha kala magwito. w24.11 12 ¶17-18

Se u fanete kuheta mbimo muni u txi xolisisa m’thu na u si se m’gela to wa mtsakela? U txo kuluveta u m’gela u nga woneka nga u m’thu wa magwava. (Mav. 29:20) Ngu didhawa dimwani, ngako u txi swelisela ngutu, ti nga woneka nga khu txi zivi txi u txi lavako, ngutu-ngutu ngako m’thu eneyo a di ti tumbute ti to wa mlava. (Ekl. 11:4) U nga divale tiya: Kha ti lavi ti to u vitiswa ti to mi na txhadha, na mi si se angulana. Kambe awe ti lava u tsaniseka ti to u lungekile kutxhadha, ni ku m’thu eneyo u mtsakelako ti nga maha a di nato ati u ti lavako. Se ngako u txo tumbula ti to m’thu wo kari wa kutsakela ko? Ngako u si tilavi ti veke hakubasani ngu simaho sako. Ti nga va wubihi, kumaha ti to m’thu mmwani e pimisa ti to wuho mkhanjo wo mi pfana kasi awe khu nga ka tona eto.—Vaef. 4:25. w24.05 22-23 ¶9-10