Mihôiṅ inrē min më tarik ngam Tēv, nö sā inlahen ngam ṙālö tö vënyu. Lohten ngam tö hěngtak Kristīön nö kēken ngam tökiröng fālen, unôichrit e anga-aṅ nö ngö lōn tö e nö töng rötten. Lohten anga-aṅ min nö ngöṙô “hö-ö chin akahngen ngih inlahenre.” Yē ò pöri nö chumkūöṙen nö ngëichkö minë inlahenre, ngaich lohten anga-aṅ nö akahaiṙen töre nö öt holtö mikah elmatre nö la-evṙen, lökten nö kēken ngam tökööl. Sā ò lohten nö hanôl yip tarik töt hangenlōn tö Yāvē. Hēk kē nup inṙamlōn tötkô nö kahë ngòh Kristīön. Hēk vīnyö kūö nup vepsāit tötkô nö maheūk ngòh Kristīön. Lohten inrē anga-aṅ nö akahaiṙen töre nö öt vë-ekūötēv, öt vë-ekūö mat ngam Paipöl, öt chuh el mīting hēk ṙāngenre inrē nö ahānga. Sā inlahen ngam ṙālö anga-aṅ tö vënyu nö im Inchōḵ-oṙô nö vaichö kahëken lökten nö teungten nö kēken tökiröng fālen. Asūp haköplö hī öi in e? Tö hī ötkô höng ṙūöhngöre tö ngam tökööl, pöi hòṅ ṙūöhngöre inrē tö minë la-en e. Unôichrit inlahen ṙô Sòlòmön nö vënyö inlahen ngam ṙālö hēk tö ngam tötlöök kikānö, ngaich mikahtö elnang hī anga-aṅ nö ngöṙô tī.—Mët. 5:29, 30. w24.07 pěch 16 përa 10-11

Asuh öng ngih töpōiṙai chehen? Ngam inhangkö ngam Pūlngö ngam Tēv. Yēḵ hī öi ahangkö ngih tölöök inhānga in yip tarik, ngaich mihôiṅ min cha-a tö nômöre. (2 Kòr. 4:1) Ngaich achīö Më tanīöyö? Yip tarik ngam Tēv ma-ahangkö ngam tölöök inhānga nö in yip tarik. Ik raneh senchurī yik tö ngatī inlahen nö havahkö chehen, nö in el minë tanīöyö nuk nyā-aṅkūö, vāin, rupīö hēk nup tahëng inrē chehen. Ngatī inlahen ang Yāvē nö kē-ěkūö hī tö ngam la-en el tanīöyö öi hateungngö ngam tölöök inhānga öi in më taṙòkhöre tarik. Ngaich öthō Yāvē nö öt hayööken hī öi kēken ngih tövai la-en. Lohten in ayī-ö ṙung hēṙu öi vöö tö më tarik yěn angëḵ nö in hī hēk sōten hī inrē öi ahānga. Asūp mihôiṅ inlahen meh? Töi chumkūöṙen öi ngëichkö inlahen më mahaköp, ik sā cha nö asökiröön nö ahangkö ngam tölöök inhānga ngaich sitih inlahen cha-a. Vë-ekūötēv cha-a ngaich havëkö inyööken re nö in Yāvē hòṅ cha nö öt pinhë-evkūö.” Ilöö hang ṙô cha ngaich ang Yāvē nö hayööken cha. (Inl. 4:18, 29, 31) Yēḵ meh öm pa-ekūö vë-ekūö yip tarik, ngaich vë-ekūötēv më-eṅ öm havëkö inyöökenre in Yāvē. Tölṙô ò nö ṙūöhlö ngam hanangenlōn meh tö yip tarik hòṅ ngam pinhë-ekūö meh nö ṙūöhngöre. w24.04 pěch 16 përa 8-9

Hangenlōn in tö Yāvē lökten öi hòṅ ha-ëtlö ngam minë-eny ò. Pōyen nun minë ṙô ngam Satān tö minyôny inlahen Yāvē hēk ötlēḵken ngam minë-eny ò inrē. Lōnu in töre öi kēngö ngam sinūöchkö fālen ò. (Ran. 3:1-5; Yōp 2:4; Yôh. 8:44) Höng löktö in ngam inhangkö tölöök inhānga in öi vë-eny nang yip tarik tö inlahen minë tinrīken ngam Tēv. Pöi lōnu tö cha nö akahakūö tö ngam Tēv nö tö hangenlōn hēk tö löngö tī inrē nö hayöng. Hòṅ vë-eny nang cha inrē ayī-ö tö Yāvē min nö löktö in ngam Pūlngöre tī nö kēngen minë töng sitih kanihngen ngaich kētö ngam tövai panam min nö in yip tarik, ngam tö aṅhav kūö min tö ngam lanāmö hēk ṙanamlōn inrē. (Sal. 37:10, 11, 29; 1 Yôh. 4:8) Yē hī vënyen në in yip tarik, ngaich kē la-are ayī-ö in Yāvē hēk ha-ëtlö ngam minë-eny ò inrē. Ṙamlōn in pöi köp öi asā ngam minë-enyre. w24.05 pěch 18 përa 12