Ri chʼaʼoj najin nbʼanatäj chkiwäch Israel chqä Irán | ¿Achkë nuʼij le Biblia chrij riʼ?

Ye kʼïy winäq kixiʼin kiʼ rma ri chʼaʼoj najin nbʼanatäj chkiwäch Estados Unidos, Israel chqä Irán. ¿Xtuʼän komä ya reʼ chë xtchapatäj jun mamaʼ chʼaʼoj? ¿Xkekowin komä ri qʼatbʼäl taq tzij xtkiʼän chë ma xtbʼä ta más pa nüm re chʼaʼoj reʼ chqä chë xtkʼis ri chʼaʼoj chwäch jontir le Rwachʼlew?

Ri kitaman jbʼaʼ chkij ri profecías ye kʼo chpan le Biblia rkʼë jbʼaʼ nkiquʼ si ri chʼaʼoj najin nbʼanatäj pa oeste che rä Asia, ya riʼ rbʼanik xtchapatäj ri chʼaʼoj ri ntzjöx chpan Apocalipsis ri Armagedón rbʼiʼ.

¿Achkë nuʼij le Biblia chrij riʼ?

¿Xkekowin ri qʼatbʼäl taq tzij xtkiqʼät ri chʼaʼoj najin nbʼanatäj pa oeste che rä Asia?

Le Biblia nuʼij: «Ma tikʼuqbʼaʼ ta ikʼuʼx chkij ri qʼatöy taq tzij nixta chrij jun chik winäq, rma ryeʼ ma yekowin ta yixkiköl» (Salmo 146:3).

Ma qataman ta si ri qʼatbʼäl taq tzij xkekowin xtkiqʼät jbʼaʼ ri chʼaʼoj najin nbʼanatäj chkipan ri tinamït riʼ. Ye kʼa le Biblia nuʼij chë majun ta jun político, jun qʼatbʼäl tzij o jun molaj winäq ri xtkowin ta xtuʼän chë ma xtjeʼ ta chik chʼaʼoj. Xa xuʼ Dios nkowin «nuʼän chë nkʼis chʼaʼoj chwäch le Rwachʼlew» (Salmo 46:9).

• Rchë natamaj más, taskʼij rwäch ri wuj La Atalaya «Un mundo sin guerras es posible».

¿Najin nbʼetzʼaqät jun profecía chrij ri chʼaʼoj najin nbʼanatäj?

Le Biblia nuʼij: «Rïx xtikʼoxaj chë kʼo chʼaʼoj najin yebʼanatäj näj chqä naqaj. [...] Rma xtjeʼ chʼaʼoj chkiwäch ri tinamït chqä chkiwäch ri qʼatbʼäl taq tzij» (Mateo 24:6, 7).

Ri chʼaʼoj najin nbʼanatäj pa oeste che rä Asia xa jun retal chë yoj kʼo chik chpan jun tiempo ri nbʼix «rkʼisbʼäl taq qʼij» che rä (Mateo 24:3; 2 Timoteo 3:1). Re chʼaʼoj reʼ nkikʼüt chë xa jbʼaʼ chik apü Dios xtresaj ri chʼaʼoj chqä jontir ri kʼayewal ri nkiʼän chë nqatäj poqän.

• Si nawajoʼ natamaj más, taskʼij rwäch ri artículo «¿Cuál es la señal de ‘los últimos días’ o ‘los tiempos finales’?».

¿Xtchapatäj komä ri Armagedón pa oeste che rä Asia?

Le Biblia nuʼij: «Xekimöl ri qʼatöy taq tzij chpan ri ilew ri pa chʼaʼäl hebreo nbʼix Armagedón che rä» (Apocalipsis 16:16).

Ri Armagedón ma jun chʼaʼoj ta ri nchapatäj chkiwäch qʼatbʼäl taq tzij chlaʼ pa oeste che rä Asia. Ri Armagedón ya riʼ jun chʼaʼoj ri nuʼän Dios kikʼë jontir ri qʼatbʼäl taq tzij.

• Si nawajoʼ natamaj más, taskʼij rwäch ri artículo «¿Qué es el Armagedón?».

¿Achkë xtqtoʼö rchë ma kan ta kowan xtchʼpü qakʼuʼx?

Le Biblia nuʼij: «Ma tchʼpü ta ikʼuʼx rma xa bʼa achkë kʼayewal. Pa rkʼexel riʼ, xa bʼa achkë na najin niqʼaxaj, tikʼutuj che rä Dios ri nkʼatzin chiwä y ma kixtaneʼ ta chukʼutxik riʼ chqä kixtyoxin che rä» (Filipenses 4:6).

Jehováa nrajoʼ chë nqaʼän orar che rä. Rma Dios kan nchʼpü pä chqij, ryä nqrkʼoxaj taq nqchʼö rkʼë y nqrtoʼ rchë ma kan ta kowan nchʼpü qakʼuʼx (1 Pedro 5:7). Jun rbʼanik nuʼän riʼ, ya riʼ taq nuʼij chqë achkë rma kʼo chʼaʼoj, achkë rbʼanik xtresaj ri chʼaʼoj chqä jontir ri poqonal ri najin nqaqʼaxaj (Apocalipsis 21:3, 4).

• Tatzʼetaʼ achkë rbʼanik nqrtoʼ pä Dios chpan ri artículo «¿Puedo encontrar consuelo en la Biblia?».