Ma xtjeʼ ta chik chʼaʼoj chwäch Rwachʼlew

Jontir nqajoʼ nqjeʼ chwäch jun Rwachʼlew akuchï majun ta chʼaʼoj. Kan ojer chik, ri kʼamöl taq bʼey pa política kitjon pä kiqʼij rchë ma njeʼ ta chik chʼaʼoj, y kʼo mul kan ye kowinäq chrij, ye kʼa xa jbʼaʼ tiempo, rma riʼ ronojel mul kʼo chʼaʼoj. ¿Kʼo komä jun qʼij ma xtjeʼ ta chik chʼaʼoj chwäch Rwachʼlew? ¡Jaʼ, kʼo! Tatzʼetaʼ achkë xkʼüt qa Jesús.

Ri xtuʼän Jesús chqawäch apü

Le Biblia nukʼüt chë, xa jbʼaʼ chik apü, Jesús xtresaj ri chʼaʼoj chwäch Rwachʼlew.

• Jesús xtbʼix che rä «Qʼatöy Tzij ri nesan chʼaʼoj. Ri rqʼatbʼäl tzij xtnmär y ri uxlanen xtkraj riʼ» (Isaías 9:6, 7). Rma Jesús ya riʼ ri Qʼatöy Tzij chpan Rqʼatbʼäl Tzij Dios, ryä xtuʼän chë majun bʼëy chik xtjeʼ ta chʼaʼoj chwäch Rwachʼlew.

• «Ryä xtköl ri winäq ri kan rkʼë oqʼej nukʼutuj rtoʼik [...] chqä xa bʼa achkë winäq ri majun ta jun nyaʼö rtoʼik» (Salmo 72:12-14). Jesús xtuʼän chë kan pa rbʼeyal xtbʼan che rä jontir, rma riʼ ri winäq ma xtkiʼän ta chik chʼaʼoj, ma xkeleqʼan ta chik nixta xkekamsan. Chqä majun ta chik jun xtbʼanö chqë chë xtqatäj poqän.

• «Ri winäq ma xtkiʼän ta chik chʼaʼoj chkiwäch nixta xtkitamaj chik xtkiʼän chʼaʼoj» (Isaías 2:4). Taq Jesús xtqʼät tzij pa rwiʼ Rwachʼlew, majun ta chik jun winäq xttamaj nuʼän chʼaʼoj. Pa rkʼexel riʼ, jontir ri winäq kan ütz xtkikʼwaj kiʼ.

Rchë natamaj achkë xtuʼän Jesús rchë ma xtjeʼ ta chik chʼaʼoj chwäch Rwachʼlew y achkë nkʼatzin naʼän rït rchë xkakowin xtatzʼët taq xtbʼeqä ri qʼij riʼ, tatzʼetaʼ ri video: ¿Achkë riʼ ri Ruqʼatbʼäl Tzij Dios?

Ri xkʼüt qa Jesús

Ri naʼoj xerkʼüt xkʼüt qa Jesús, kan pa millón winäq najin yertoʼ rchë ütz nkikʼwaj kiʼ. Chpan ri Sermón del Monte (ri nbʼix chqä Sermón de la Montaña che rä), Jesús xerkʼüt jojun naʼoj ri yojkitoʼ ronojel qʼij rchë ma njeʼ ta chʼaʼoj chqawäch kikʼë nkʼaj chik. Tqatzʼetaʼ jojun chkë riʼ.

• «Kiʼ kikʼuʼx ri yetoʼon rchë ma njeʼ ta chʼaʼoj chkikojöl ri winäq» (Mateo 5:9). Jesús xuʼij chkë rdiscípulos chë nkʼatzin yetoʼon rchë ma njeʼ ta chʼaʼoj chkiwäch nkʼaj chik, y ma xuʼ ta nkʼatzin nkiqʼät kiʼ rchë ma nkiʼän ta chʼaʼoj.

• «Naʼäy tabʼesoloʼ ri kʼayewal rkʼë awachʼalal, chrij riʼ kʼa riʼ katzolin rchë nabʼeyaʼ ri aspanik» (Mateo 5:23, 24). Jesús xuʼij chkë ri winäq ri xekʼoxan rchë, chë nkʼatzin nkisöl yän ri chʼaʼoj kʼo chkiwäch kikʼë nkʼaj chik. Ryä xkʼüt qa chë, rchë nq·ok ramigos Dios, nkʼatzin chë kan ütz nqakʼwaj qiʼ kikʼë jontir.

• «Ma kixtzjon ta itzel chkij ri nkʼaj chik, rchë ke riʼ ma xketzjon ta itzel chiwij rïx» (Mateo 7:1). Jesús xkʼüt qa chë ma ütz ta nqtzjon itzel chkij nkʼaj chik chqä kaʼiʼ qapaläj nqaʼän, rma ya riʼ xa xtuʼän chë xtjeʼ chʼaʼoj chqawäch. Ryä xkʼüt qa chkiwäch rdiscípulos chë, pa rkʼexel yetzjon itzel chkij nkʼaj chik, nkʼatzin nkiküy kimak (Lucas 6:37).

Chwäch jontir Rwachʼlew, kan ye kʼïy winäq najin nkiʼän ri xkʼüt qa Jesús. Yajün chkipan tinamït akuchï kowan chʼaʼoj y ri winäq ma nkajoʼ ta kiʼ, re winäq reʼ najin nkitamaj nkisöl ri kʼayewal kʼo chkiwäch kikʼë nkʼaj chik, ye kʼa ma rkʼë ta chʼaʼoj nkiʼän wä. Chqä najin nkitamaj yekyun chqä yekajoʼ nkʼaj chik tapeʼ nkʼaj chik itzel kinaʼoj nkiʼän kikʼë.

Rchë natzʼët achkë rbʼanik ri xkʼüt qa Jesús yertoʼon jojun winäq rchë ütz nkikʼwaj kiʼ, tatzʼetaʼ ri artículo «Cómo sentir paz a pesar de las guerras y los conflictos armados».