¿Achkë nuʼij le Biblia chrij ri yaspan?
Ri nuʼij le Biblia chrij reʼ
Le Biblia nuʼij chqë chë tqayaʼ rkʼë ronojel qan ri achkë kʼo qkʼë y ma rma ta chë nqchaqtiʼïx. Taq nqaʼän riʼ, ma xa xuʼ ta ri winäq ri nkʼül ri spanïk nrïl utzil, röj chqä nqawïl utzil (Proverbios 11:25; Lucas 6:38). Jesús xuʼij reʼ: «Más kiʼ akʼuʼx nanaʼ taq yaspan chwäch ri nakʼül jun spanïk» (Hechos 20:35).
¿Ajän riʼ taq ütz yaspan?
Taq nayaʼ ri kʼo awkʼë y majun ta jun yachaqti’in, kan kʼo utzil nukʼäm pä. Le Biblia nuʼij: «Chijujnal rïx kan tiyaʼ ri achkë naläx pan iwan, ma rkʼë ta kaʼiʼ ikʼuʼx nixta rma yixchaqtiʼïx, rma Dios kan nrajoʼ ri winäq ri kan kiʼ rkʼuʼx nuyaʼ ri achkë kʼo rkʼë» (2 Corintios 9:7).
Dios nrajoʼ chë ri yeyaʼö rqʼij yespan rkʼë ronojel kan (Santiago 1:27). We yeʼatoʼ ri nkʼatzin kitoʼik, Dios xtnaʼ achiʼel ta kʼo rkʼas awkʼë rma ri xaʼän (Proverbios 19:17). Le Biblia nuʼij chë Dios xtzolij rajäl rkʼexel chawä (Lucas 14:12-14).
¿Ajän riʼ taq ma ütz ta yaspan?
Taq xa kʼo rma naʼän:
Rchë yatkitzʼët ri nkʼaj chik (Mateo 6:2).
Xa rma kʼo nawajoʼ chkij nkʼaj chik (Lucas 14:12-14).
Xa rma nawajoʼ yakolotäj qa (Salmo 49:6, 7).
Taq natoʼ jun winäq ri kʼo yeruʼän ri ma nqä ta chwäch Dios. Taquʼ rij reʼ: ¿Ütz komä nayaʼ päq che rä jun winäq ri xa nksaj rchë nuʼän apostar, nutäj yaʼ che rä o nuʼän endrogar riʼ? (1 Corintios 6:9, 10; 2 Corintios 7:1). ¿Ütz komä nayaʼ päq che rä jun winäq ri nkowin nsamäj, ye k’a ma nrajoʼ ta nsamäj? (2 Tesalonicenses 3:10).
Taq xa rma riʼ ma naʼän ta chik ri nkʼutuj Dios chawä. Le Biblia nuʼij chë jun tataʼaj kʼo chë nyaʼ ri nkʼatzin chkë rfamilia (1 Timoteo 5:8). Ma ütz ta nuʼän riʼ we yertoʼ nkʼaj chik ye k’a ma nyaʼ che rä rfamilia achkë nkʼatzin chkë. Chqä Jesús ma xqä ta chwäch ri winäq ri ma nkiyaʼ ta ri nkʼatzin chkë kiteʼ kitataʼ ri ya ye riʼj chik. Rma ri winäq riʼ nkiʼij ya reʼ: «Jun spanïk ri nwesan qa chik rchë nyaʼ che rä Dios» (Marcos 7:9-13).