¿Xtchup komä rwäch le Rwachʼlew?
Ri nuʼij le Biblia
Manä, le Rwachʼlew majun bʼëy xtchup ta rwäch, ma xtkʼat ta y ma xtjalatäj ta. Le Biblia nuʼij chë Dios xuʼän le Rwachʼlew rchë ronojel mul yejeʼ winäq chwäch.
«Ri chöj kikʼaslemal xtyaʼöx qa le Rwachʼlew chkë, chqä majun bʼëy xkesäx ta äl chwäch» (Salmo 37:29).
«Ryä kan achiʼel ta ryaʼon qa le Rwachʼlew pa rwiʼ rxeʼel; majun bʼëy xtslöx ta pa rkʼojlibʼäl» (Salmo 104:5).
«Le Rwachʼlew majun bʼëy xtchup ta rwäch» (Eclesiastés 1:4).
«Ri xbʼanö le Rwachʼlew chqä ri xyaʼö qa pa rkʼojlibʼäl. Ryä ma xuʼän ta le Rwachʼlew rchë chë majun ta jun njeʼ chwäch, xa kan xuʼän rchë chë kʼo winäq yejeʼ chwäch» (Isaías 45:18).
¿Xkekowin komä ri winäq xtkichüp rwäch le Rwachʼlew?
Manä, Dios ma xtyaʼ ta qʼij che ri winäq xtkichüp rwäch le Rwachʼlew xa rma kitzʼilbʼisan rwäch, rma chʼaʼoj o xa bʼa achkë chik jun rma. Le Biblia nuʼij chë Dios xtchüp kiwäch «ri winäq ri najin nkitzʼlaʼ le Rwachʼlew» (Apocalipsis 11:18). ¿Achkë rbʼanik xtuʼän riʼ?
Dios xkeresaj äl ri qʼatbʼäl taq tzij ri xa kitzʼil·on le Rwachʼlew, y ryä xtyaʼ jun Rqʼatbʼäl Tzij (Daniel 2:44; Mateo 6:9, 10). Re Qʼatbʼäl Tzij reʼ kan Jesús, ri Rkʼajol Dios, xtqʼatö tzij chpan (Isaías 9:6, 7). Taq ryä xjeʼ chwäch le Rwachʼlew xkʼüt chë nkowin yerqʼät qʼeqäl taq jöbʼ chqä nmaʼq taq kaqʼiqʼ (Marcos 4:35-41). Jesús, ri qʼatöy tzij chpan Rqʼatbʼäl Tzij Dios, xtchojmij jontir le Rwachʼlew y ri ye kʼo chwäch. Xtuʼän chë le Rwachʼlew xttok chik jmul achiʼel wä ri jardín de Edén (Mateo 19:28; Lucas 23:43).
¿Ma nuʼij ta komä chpan le Biblia chë le Rwachʼlew nchup rwäch pa qaqʼ?
Manä. Kʼïy winäq nkiquʼ reʼ rma ma qʼaxnäq ta chkiwäch ri nuʼij 2 Pedro 3:7: «Le kaj chqä le Rwachʼlew ri ye kʼo komä xa yeyoʼen apü rchë xtchup kiwäch pa qʼaqʼ». Tqatzʼetaʼ kaʼiʼ naʼoj chë nqʼax re texto reʼ chqawäch:
Chpan le Biblia ri tzij kaj, Rwachʼlew y qʼaqʼ kʼïy yetel chë tzij. Tqatzʼetaʼ na peʼ nuʼij Génesis 11:1: «Jontir le Rwachʼlew xa jun chʼaʼäl yetzjon». Chpan re texto reʼ taq nksaj ri tzij «Rwachʼlew» ntzjon chkij winäq.
Ri nqawïl chpan 2 Pedro 3:5, 6 nukʼüt chqawäch achkë ntel chë tzij 2 Pedro 3:7 ri ntzjoj chrij «ri kaj», «le Rwachʼlew» y «ri qʼaqʼ». Chpan ri versículos riʼ ntzjon chrij ri qʼeqäl jöbʼ pa rtiempo Noé. Taq xbʼanatäj riʼ xa xuʼ ri winäq xchup kiwäch, ye kʼa le Rwachʼlew manä. Chpan qa ri qʼeqäl jöbʼ riʼ xchüp rwäch «le Rwachʼlew», ntel chë tzij ri winäq ri ma xenman ta tzij (Génesis 6:11). Chqä xchup rwäch «ri kaj», ri ntel chë tzij ri winäq xkiqʼät tzij chpan ri tiempo riʼ. Ri Rwachʼlew ma xchup ta rwäch, ye kʼa ri xchup kiwäch ya riʼ ri winäq ri itzel kinaʼoj. Chpan ri tiempo riʼ Noé chqä rfamilia ma xekäm ta, y rkʼë kijatzul ryeʼ xkinojsaj rwäch le Rwachʼlew taq xqʼax yän qa ri qʼeqäl jöbʼ (Génesis 8:15-18).
Achiʼel xbʼanatäj rkʼë ri qʼeqäl jöbʼ, «ri qʼaqʼ» ntzjoj chpan 2 Pedro 3:7 ntzjon chrij taq xchup kiwäch ri itzel taq winäq, y ma ye ta le Rwachʼlew. Dios rtzjun chqë jun «kʼakʼakʼ kaj chqä jun kʼakʼakʼ Rwachʼlew ri akuchï kan pa rbʼeyal xtbʼan che rä jontir» (2 Pedro 3:13). Ri «kʼakʼakʼ Rwachʼlew» o ri winäq xkejeʼ qa chwäch le Rwachʼlew xtjeʼ jun «kʼakʼakʼ kaj» pa kiwiʼ o jun kʼakʼakʼ qʼatbʼäl tzij, ya riʼ Rqʼatbʼäl Tzij Dios. Chpan re Qʼatbʼäl Tzij reʼ le Rwachʼlew kan jaʼäl xtuʼän (Apocalipsis 21:1-4).