¿Achkë riʼ ri mak?
Ri nukʼüt le Biblia
Ri mak ya riʼ xa bʼa achkë ri nqaʼän, nqanaʼ o nqaquʼ ri ma rkʼwan ta riʼ rkʼë ri nrajoʼ Dios (1 Juan 3:4; 5:17). Le Biblia nuʼij chë jun winäq nmakun taq nuʼän ri ma ütz ta chwäch Dios, o taq ma nuʼän ta jun ri kʼo ta chë nuʼän (Santiago 4:17).
Chkipan ri chʼaʼäl hebreo chqä griego, ri tzij «mak» ya reʼ ntel chë tzij: taq jun winäq kʼo jun nukʼäq, ma nujïk ta akuchï nrajoʼ nukʼäq wä, achiʼel taq jun winäq ri nukʼäq jun flecha ma nujïk ta akuchï nrajoʼ nukʼäq wä ri flecha. Rma riʼ, taq le Biblia nutzjoj rij jun molaj soldados aj Israel ri kan yekowin wä nkikʼäq abʼäj rkʼë ri honda chqä «kan ma nsach ta kiqʼaʼ», nuʼij ta chë ri achiʼaʼ riʼ «ma yemakun ta» xa ta kan literal nqʼaxäx pa qachʼaʼäl (Jueces 20:16). Achiʼel nqatzʼët, jun winäq nmakun taq nsach chwäch Dios rkʼë ri nuʼän.
Rma yë Dios xqbʼanö, pa rqʼaʼ ryä kʼo wä nuʼij achkë ütz y achkë ma ütz ta nqaʼän (Apocalipsis 4:11). Y röj nkʼatzin achiʼel ta nqatöj jontir ri yeqaʼän chwäch Dios (Romanos 14:12).
¿Kʼo komä jun winäq ri ma nmakun ta?
Majun ta, le Biblia nuʼij chë «jontir xa kʼo qa mak chkij, rma riʼ ma yekowin ta kan tzʼaqät rbʼanik nkikʼüt rnaʼoj Dios» (Romanos 3:23; 1 Reyes 8:46; Eclesiastés 7:20; 1 Juan 1:8). ¿Achkë rma nbʼanatäj riʼ?
Pa naʼäy, Adán y Eva majun ta wä mak chkij, rma Dios «kan achiʼel rbʼanik ryä» kan ke riʼ xuʼän qa chkë (Génesis 1:27). Ye kʼa, taq ma xkinmaj ta rtzij Dios, xeʼok ajmakiʼ (Génesis 3:5, 6, 17-19). Taq xejeʼ kalkʼwal, ryeʼ chqä xkejqalej qa ri mak kan achiʼel ta jun yabʼil ri xa nspan (Romanos 5:12). Ya riʼ xuʼij ri qʼatöy tzij David taq xuʼij: «Kan pa mak xinaläx wä» (Salmo 51:5).
¿Kʼo komä mak más nmaʼq chkiwäch nkʼaj chik?
Jaʼ kʼo. Tqaquʼ rij reʼ: le Biblia nuʼij chë ri winäq aj Sodoma «kan itzel wä kinaʼoj chqä kan yekibʼanalaʼ wä mamaʼ taq mak» (Génesis 13:13; 18:20). Tqatzʼetaʼ achkë oxiʼ nbʼanö chë jun mak nbʼeʼok jun mamaʼ mak chwäch Dios.
¿Achkë mak xqaʼän? Le Biblia nutzjoj kij jojun mamaʼ taq mak ri ma ütz ta yeqaʼän, achiʼel ri tzʼil taq bʼanobʼäl, ri nayaʼ kiqʼij tyox, ri yaleqʼan, ri yaqʼabʼär, ri yeʼaxiʼij winäq rchë nawesaj päq chkë, ri yakamsan chqä ri yabʼä kikʼë ajqʼijaʼ (1 Corintios 6:9-11; Apocalipsis 21:8). Le Biblia nuʼij chë re mak reʼ kan ye itzel chqä ma ye jnan ta kikʼë ri mak ri ma nqanaʼ ta yeqaʼän, achiʼel taq kʼo jun nqaʼij o kʼo jun nqaʼän ri xa nusök ran jun chik (Proverbios 12:18; Efesios 4:31, 32). Tapeʼ ke riʼ, le Biblia nuʼij chë nkʼatzin nqachajij qiʼ chwäch xa bʼa achkë mak, rma tapeʼ jun mak ma kan ta nüm, ya riʼ rkʼë jbʼaʼ nuʼän chë nqaʼän jun mamaʼ mak (Mateo 5:27, 28).
¿Achkë rma xqaʼän? Kʼo mul yeqaʼän jojun mak rma ma qataman ta achkë nrajoʼ Dios, ye kʼa reʼ ma ntel ta chë tzij chë ma najin ta nqmakun (Hechos 17:30; 1 Timoteo 1:13). Tapeʼ ke riʼ, le Biblia nuʼij chë más nüm rmak ri winäq ri kan rtaman chë xa najin nuqʼäj rtzij Dios (Números 15:30, 31). Le Biblia nuʼij chë ri winäq ri kan chubʼanik nmakun chwäch Dios kan itzel rnaʼoj (Jeremías 16:12).
¿Jaruʼ mul xqaʼän? Le Biblia nuʼij chë ri mak ri xa jmul naʼän ma jnan ta rkʼë taq chaq taqïl yaqä chpan jun mak (1 Juan 3:4-8). Dios itzel yertzʼët ri winäq ri ma nkajoʼ ta nkiyaʼ qa rbʼanik jun mak, tapeʼ kitaman chik chë ma ütz ta ri najin nkiʼän (Hebreos 10:26, 27).
Ri winäq ri kibʼanon mamaʼ taq mak rkʼë jbʼaʼ kowan ntiʼon kan rma ri xkiʼän. Jun chkë riʼ ya riʼ ri qʼatöy tzij David ri xuʼij: «Rïn ntaman chë kʼo nmak nbʼanon; kan achiʼel jun al ejqaʼn kibʼanon chwij, jun al ejqaʼn ri ma yikowin ta nkʼwaj» (Salmo 38:4). Ye kʼa le Biblia nuʼij chqä reʼ: «Ri itzel winäq tyaʼ qa ri bʼey rkʼwan chqä tresaj pa rjolon ri ma ütz ta yerchʼöbʼ; ttzolin rkʼë Jehová, ri kan xtpoqonaj rwäch, ttzolin rkʼë ri qaDios, rma ryä kan ma xtkʼewaj ta xtküy rmak» (Isaías 55:7).