¿Achkë rma ri testigos de Jehová ma nkiyaʼ ta ruqʼij jun tinamït?

Röj, ri testigos de Jehová, ma nqaqasaj ta kiqʼij ri qʼatbʼäl taq tzij nixta ri nkiksaj ryeʼ rchë nkiyaʼ ruqʼij kitinamit. Chqä ma nqaqʼät ta chkiwäch ri nkʼaj chik we nkajoʼ nkiʼän ri saludo chqä ri jura a la bandera o nkibʼixaj ri himno nacional.

Tapeʼ ke riʼ, röj, ri testigos de Jehová, ma nqaʼän ta ronojel ri nkiʼän ri winäq rchë nkiyaʼ ruqʼij kitinamit rma nqanmaj chë xa nuqʼäj ri nuʼij le Biblia. Y kan nqatyoxij taq ri nkʼaj chik ma nkiqasaj ta ruqʼij ri nqanmaj, achiʼel röj ma nqaqasaj ta ruqʼij ri nkinmaj ryeʼ.

Chpan re artículo reʼ, xkeqaqʼalajsaj re kʼutunïk reʼ:

• ¿Achkë nuʼij le Biblia chrij ri nayaʼ ruqʼij jun tinamït?

• ¿Achkë nqaʼän we jun qʼatbʼäl tzij nqrchaqtiʼij rchë nqayaʼ ruqʼij ri tinamït?

• ¿Nqtoʼon röj, ri testigos de Jehová, kikʼë ri winäq ri yekatäj chkij ri qʼatbʼäl taq tzij?

¿Achkë nuʼij le Biblia chrij ri nayaʼ ruqʼij jun tinamït?

Tatzʼetaʼ kaʼiʼ naʼoj ri kʼo chpan le Biblia ri nukʼüt achkë rma röj ya riʼ nqachaʼ nqaʼän:

• Xa xuʼ Dios taqäl chrij nqayaʼ ruqʼij. Le Biblia nuʼij: «Tayaʼ ruqʼij Jehová ri aDios y xa xuʼ ryä tanmaj rutzij» (Lucas 4:8). Chpan ri jura a la bandera chqä ri himno nacional ye kʼo tzij ri akuchï naʼij chë yë ri atinamit xtayaʼ naʼäy chwäch xa bʼa achkë chik jun. Rma riʼ, ri qaconciencia röj, ri testigos de Jehová, ma nuyaʼ ta qʼij chqë nqaʼän riʼ.

  Chqawäch röj, ri testigos de Jehová, ri naʼän ri saludo a la bandera xa junan rkʼë ri nayaʼ ruqʼij jun tyox. Le Biblia nuʼij chë ri naʼän riʼ kan ma ütz ta (1 Corintios 10:14). Jojun historiadores nkiʼij chë ri banderas xa ye junan rkʼë ri nkiksaj ri winäq chkipan ri religiones rchë nkiyaʼ ruqʼij kidioses. Ri historiador Carlton Hayes xtzʼibʼaj reʼ: «Chkiwäch ri winäq, majun ta chik jun ri kʼo más ruqʼij chwäch ri bandera, rma riʼ kan nkiyaʼ ruqʼij».a Taq najin wä ntzjon chkij ri naʼäy taq cristianos, ri escritor Daniel Mannix xuʼij reʼ: «Ri cristianos [...] ma xkikʼät ta pon pa rubʼiʼ ri qʼatöy tzij [rchë Roma]; reʼ xa junan rkʼë ma naʼän ta ri saludo a la bandera».b

  Tapeʼ röj, ri testigos de Jehová, ma nqaʼän ta ri saludo a la bandera, ma nqakʼät ta ri bandera nixta nqaʼän jun ri xa nuqasaj ruqʼij; röj ma nqaʼän ta ya riʼ rkʼë ri bandera nixta rkʼë jun ri nkiksaj ri winäq rchë nkiyaʼ ruqʼij kitinamit.

• Chwäch Dios, jontir winäq xa ye junan (Hechos 10:34, 35). Le Biblia nuʼij chë «ryä xuʼän chë xa rkʼë jun achï xeʼel wä pä jontir winäq» (Hechos 17:26). Rma riʼ, röj, ri testigos de Jehová, qayaʼon chwäch qan chë ma ütz ta yeqachaʼ ri winäq xa rma kitinamit o kijatzul. Xa bʼa akuchï yepë wä, jontir junan yeqatzʼët (1 Pedro 2:17).

¿Achkë nqaʼän taq ri qʼatbʼäl tzij nqrchaqtiʼij rchë nqayaʼ ruqʼij ri tinamït?

Röj, ri testigos de Jehová, ma itzel ta yeqatzʼët ri qʼatbʼäl taq tzij, rma qataman chë yë Dios yayon qʼij chkë rchë nkiqʼät tzij (Romanos 13:1-7). Chqä qataman chë röj, ri cristianos, nkʼatzin nqanmaj kitzij (Lucas 20:25).

Ye kʼa, ¿achkë nqaʼän taq ri qʼatbʼäl tzij nuʼij chë tqabʼanaʼ jun ri ma nqä ta chwäch Dios? Kʼo mul, nqaʼän äl jun solicitud ri akuchï nqaʼij äl che rä ri qʼatbʼäl tzij chë kerujalaʼ jojun leyes.c Ye kʼa taq ma nkajoʼ ta nkiʼän riʼ, röj ma nqaqasaj ta kiqʼij. Tapeʼ ke riʼ, röj qayaʼon chqawäch «nqanmaj rutzij Dios, ri nqʼatö tzij pa qawiʼ, pa rukʼexel nqanmaj kitzij ri winäq» (Hechos 5:29).

¿Nqtoʼon röj, ri testigos de Jehová, kikʼë ri winäq ri yekatäj chkij ri qʼatbʼäl taq tzij?

Manä. Röj, ri testigos de Jehová, ma nqanïm ta qiʼ kikʼë ri winäq riʼ nixta pa política. Röj ma nqaʼän ta ri saludo nixta ri jura a la bandera chqä ma nqabʼixaj ta ri himno nacional. Ye kʼa röj nqaʼän riʼ rma nqajoʼ nqasmajij ri nuʼij le Biblia, y ma rma ta nqajoʼ nqkatäj chkij ri qʼatbʼäl taq tzij.