¿Kantzij komä chë ri mundial nkowin nuʼän chë ri winäq junan nuʼän kiwäch? | ¿Achkë nuʼij le Biblia chrij riʼ?

Nbʼix chë jun 5,000 millones winäq xtkitzʼët ri copa mundial ri nuʼän ri FIFA, ri xtchapatäj ri 20 de noviembre y xtkʼis ri 18 de diciembre, 2022. Ye kʼïy nkiquʼ chë atzʼanen achiʼel reʼ ma xa xuʼ ta yerutoʼ ri winäq rchë junan nuʼän kiwäch taq najin nkitzuʼ ri atzʼanen, xa kan kʼo más utzil nukʼäm pä.

• «Ri atzʼanen nkowin yerutoʼ ri winäq; nkowin yerutoʼ rchë junan nuʼän kiwäch, y ma xa bʼa achkë ta nkowin nbʼanö riʼ» (Nelson Mandela, ri rubʼanon qa presidente rchë Sudáfrica).

• «Ri atzʼanen pelota [...] yerutoʼ ri winäq rchë nkinaʼ chë kʼo ütz nkïl pa kikʼaslemal, nuʼän chkë chë kiʼ kikʼuʼx nkinaʼ, nkajowalaʼ kiʼ chqä junan nuʼän kiwäch» (Gianni Infantino, presidente rchë ri FIFA).a

¿Nkowin komä nuʼän riʼ ri mundial o xa bʼa achkë chik jun atzʼanen? ¿Kʼo komä jun rubʼanik ri nqkowin junan nuʼän qawäch jontir?

¿Nkowin komä nuʼän chë ri winäq junan nuʼän kiwäch?

Ri mundial rchë re junaʼ reʼ ma xa xuʼ ta jun atzʼanen. Re atzʼanen reʼ rubʼanon chë ye kʼïy winäq kibʼin ri nkiquʼ chrij ri ki-derechos ri winäq, ri kijatzul chqä chrij ri kirajil ri tinamït.

Tapeʼ ke riʼ, ye kʼïy winäq nkiquʼ chë ri jalajöj atzʼanen yebʼan chpan jalajöj tinamït, achiʼel ri mundial, nkiʼän chë ri winäq kiʼ kikʼuʼx nkiʼän. Ye kʼa tapeʼ ya riʼ nkirayij ri winäq, re atzʼanen reʼ ma nkiʼän ta chë ronojel mul junan nuʼän kiwäch. Pa rukʼexel riʼ, xa nkiʼän chë ri winäq kʼo nkiʼij o kʼo nkiʼän ri xa nutïk chʼaʼoj chkikojöl. Le Biblia kan rubʼin pä chik achkë kinaʼoj xtkiʼän ri winäq chpan ri tiempo ri nbʼix «rukʼisbʼäl taq qʼij» che rä (2 Timoteo 3:1-5).

¿Achkë xtbʼanö chë junan xtuʼän kiwäch ri winäq?

Le Biblia nuʼij chë ri winäq yekowin junan nuʼän kiwäch jontir. Ya riʼ xtbʼanatäj taq jontir xkejeʼ chuxeʼ «Ruqʼatbʼäl Tzij Dios», jun qʼatbʼäl tzij ri chlaʼ chkaj kʼo wä (Lucas 4:43; Mateo 6:10).

Jesucristo, ri qʼatöy tzij chpan ri qʼatbʼäl tzij riʼ, xkerutoʼ ri winäq rchë junan xtuʼän kiwäch. Le Biblia nuʼij:

• «Ri jïk kikʼaslemal kan xkekʼiyär, y ma xtjeʼ ta chik chʼaʼoj» (Salmo 72:7).

• «Ryä xtköl ri winäq ri kan rkʼë oqʼej nukʼutuj rutoʼik rma kʼo pa mebʼaʼïl [...]. Xkeruköl chwäch ri kʼayewal yaʼon pa kiwiʼ chqä chwäch ri itzelal» (Salmo 72:12, 14).

Yajün pa qaqʼij komä, ri xkʼüt qa Jesús kan pa millón winäq yerutoʼon chpan más 239 tinamït. Chqä, yerutoʼon rchë nkajowalaʼ kiʼ chkiwäch. Rchë natamaj más chrij reʼ, taskʼij kiwäch ri naʼoj ri ye kʼo chpan ri peraj «Rompamos el ciclo del odio».