¿Kʼo komä jun qʼij ma xkejeʼ ta chik ri pobres?

Chkipan kʼïy tinamït, ri winäq najin yekatäj chkij ri qʼatbʼäl taq tzij rma nkinaʼ chë ma najin ta nyaʼöx chkë ri nkʼatzin chkë. Ri COVID-19 xa xuʼ xkʼäm pä más kʼayewal, y ya riʼ rbʼanon chë ri winäq más katajnäq kiyowal. Y rma xetzʼapïx ye kʼïy chkachoch, xkʼis achkë jun chqä ye kʼïy ma kan ta kʼo kirajil rchë yebʼä rkʼë doctor más nqʼalajin ye achkë ye bʼeyomaʼ y ye achkë ye pobres.

¿Xtbʼeqä na komä ri qʼij taq ma xkejeʼ ta chik ri pobres? Jaʼ. Le Biblia nuʼij achkë xtuʼän Dios rchë xtsöl ri kʼayewal riʼ.

Kʼayewal ri xkersöl Dios

Ri kʼayewal: Ri winäq ma kilon ta rbʼanik rchë majun ta chik jun ntok pobre.

Ri xtuʼän Dios: Ryä xkeresaj jontir ri qʼatbʼäl taq tzij y xtyaʼ qa ri rqʼatbʼäl tzij ryä, ri nbʼix chqä Rqʼatbʼäl Tzij Dios che rä. Re qʼatbʼäl tzij reʼ chkaj kʼo wä y xtqʼät pä tzij pa rwiʼ le Rwachʼlew (Daniel 2:44; Mateo 6:10).

Ri xtkʼäm pä pa qawiʼ: Rma Rqʼatbʼäl Tzij Dios xtqʼät tzij pa rwiʼ jontir le Rwachʼlew, xtuʼän chë kan pa rbʼeyal xtksäx jontir ri kʼo chwäch. Ya riʼ xtuʼän chë ri winäq ma xtkitäj ta chik poqän xa rma majun ta kʼo kikʼë chqä ma xtchʼpü ta chik kikʼuʼx xa rma ri päq (Salmo 9:7-9, 18). Pa rkʼexel riʼ, xtkitzʼët rwäch kisamaj, xtkïl ri nkʼatzin chkë chqä kiʼ kikʼuʼx xtkiʼän chpan kifamilia. Le Biblia nutzüj reʼ: «Ryeʼ xkekiyäk jay chqä xkejeʼ chpan; xkekitïk uva y xtkitäj rwäch. Ma xkekiyäk ta jay rchë chë nkʼaj chik yejeʼ chkipan; ma xketkonäj ta rchë chë nkʼaj chik yetjö rwäch» (Isaías 65:21, 22).

Ri kʼayewal: Ri winäq ma yekowin ta nkiʼän chë ma ta nbʼanatäj jojun ri nuʼän chë nkitäj poqän o chë ma nkïl ta ri nkʼatzin chkë.

Ri xtuʼän Dios: Ryä xtksaj Rqʼatbʼäl Tzij rchë xtchüp rwäch jontir ri nuʼän chë ri winäq nkixiʼij kiʼ.

Ri xtkʼäm pä pa qawiʼ: Dios xtuʼän chë ma xkebʼanatäj ta chik jontir ri nuʼän chë ri winäq chqä kifamilias ma nkïl ta ri nkʼatzin chkë, achiʼel ri chʼaʼoj, ri wayjal o ri yabʼil ri nkikraj kiʼ (Salmo 46:9; 72:16; Isaías 33:24). Dios nuʼij: «Ri ntinamit xtbʼejeʼ akuchï majun ta chʼaʼoj kʼo, akuchï majun nxiʼin ta y akuchï majun ta achkë xtnaqö rchë» (Isaías 32:18).

Ri kʼayewal: Kan ronojel bʼaʼ mul, ri winäq ri xa xuʼ ryeʼ nkiquʼ qa kiʼ chqä kowan yejakʼäkʼ yekitzʼlaʼ ri nkʼaj chik.

Ri xtuʼän Dios: Ri xkejeʼ chuxeʼ Rqʼatbʼäl Tzij Dios xtkitamaj nkiquʼ más kij ri nkʼaj chkij chwäch nkiquʼ qa kiʼ ryeʼ (Mateo 22:37-39).

Ri xtkʼäm pä pa qawiʼ: Taq Rqʼatbʼäl Tzij Dios xtqʼät tzij pa rwiʼ Rwachʼlew, jontir xkejowan achiʼel najowan Dios, ri «ma xa xuʼ ta ryä nuquʼ qa riʼ» (1 Corintios 13:4, 5). Le Biblia nuʼij: «Ryeʼ ma xtkitzʼlaʼ ta ri loqʼoläj njyuʼ, rma le Rwachʼlew kan xtnuj rkʼë rtamabʼal Jehová,a kan achiʼel ri yaʼ ri rnujsan ri mar» (Isaías 11:9).

Le Biblia nuʼij chë yoj kʼo chik chkipan rkʼisbʼäl taq qʼij y chë xa jbʼaʼ chik apü Dios xtuʼän chë jontir winäq xtjeʼ ri nkʼatzin chkë (Salmo 12:5).b Loman nbʼanatäj ya riʼ, ri naʼoj ye kʼo chpan le Biblia yojkitoʼ rchë nqqʼax chkiwäch ri kʼayewal yeqïl. Tatzʼetaʼ jojun chkë re artículos reʼ «Cómo vivir con menos» y «Una opinión realista del dinero».

Ri nbʼix chrij ri päq chqä chrij le Biblia ri ma tzij ta

Ri nkiʼij jojun: Ronojel mul xkejeʼ pobres, rma Jesús xuʼij: «Ri pobres ronojel mul ye kʼo iwkʼë» (Mateo 26:11).

Ri ntel chë tzij: Jesús xa xuʼ xuʼij chë loman kʼa xkejeʼ na winäq ri ma nkinmaj ta rtzij Dios, ronojel mul xkejeʼ pobres. Tapeʼ ke riʼ, Jesús xpë rchë xbʼertzjoj «ütz taq rtzjol chkë ri pobres», achiʼel chë xa jbʼaʼ chik apü, ri Rqʼatbʼäl Tzij Dios xtuʼän chë majun ta chik pobres xkejeʼ (Lucas 4:18, 43).

Ri nkiʼij jojun: Rchë Dios kiʼ rkʼuʼx nuʼän awkʼë, nkʼatzin yatok pobre, rma Jesús xuʼij: «Takʼayij jontir ri kʼo awkʼë y tayaʼ ri päq chkë ri pobres» (Mateo 19:21).

Ri ntel chë tzij: Jesús ma najin ta wä nuʼij chë ri xkeʼok rtzeqelbʼëy nkʼatzin yeʼok pobres. Ryä xa xuʼ wä najin nuyaʼ rnaʼoj jun kʼajol ri kowan wä rqʼij ri bʼeyomäl chwäch. Rma riʼ Jesús xuʼij che rä chë tkʼwaj jun kʼaslemal ri ma kan ta achkë rbʼanik chqä ttok rtzeqelbʼëy.

Ri nkiʼij jojun: Taq jun winäq nrïl rtzil Dios, nbʼeʼok bʼeyon, rma le Biblia nuʼij: «Ri rtzil Jehová ya riʼ ri nbʼanö chë jun winäq nbʼeyomär» (Proverbios 10:22).

Ri ntel chë tzij: Taq chpan le Biblia nksäx ri tzij «rtzil Jehová», ntzjon chrij jojun ri kan kowan kiqʼij, achiʼel chë nanaʼ chë kʼo rma yït kʼäs, chë jnan awäch rkʼë Dios chqä chë kʼo ütz ayoʼen apü (Salmo 25:14; Juan 17:3). Tapeʼ kʼo mul Dios xuʼän chë rsamajelaʼ xjeʼ kibʼeyomal, kan jontir bʼaʼ chkë ri xeʼok cristianos ma ye bʼeyomaʼ ta (Génesis 24:34, 35; Santiago 2:5). Nixta Jesucristo ma kan ta achkë xjeʼ rkʼë (Mateo 8:20).

Ri nkiʼij jojun: Le Biblia achiʼel ta ntzjon chrij comunismo, rma nuʼij chë ri cristianos pa naʼäy siglo «nkijäch wä chkiwäch jontir ri kʼo kikʼë y nkikʼayij wä ri kʼo kikʼë chqä ri kijyuʼ» (Hechos 2:44, 45).

Ri ntel chë tzij: Re versículos reʼ nkitzjoj rij ri xkiʼän ri cristianos rchë xekitoʼ ri winäq ri kʼa riʼ wä keʼok qa cristianos. Ri winäq riʼ xebʼä wä Jerusalén rchë xkiʼän ri nmaqʼij Pentecostés (Hechos 2:5). Ye kʼa taq xeʼok cristianos, xekanaj qa más tiempo Jerusalén rchë xkitamaj más chrij ri cristianismo. Rma riʼ ri nkʼaj chik cristianos rkʼë ronojel kan xkiyaʼ päq rchë xekitoʼ ri kʼakʼakʼ taq cristianos riʼ rkʼë kiway chqä kachoch (Hechos 2:41, 42, 46, 47).

a Le Biblia nuʼij chë rbʼiʼ Dios ya riʼ Jehová (Salmo 83:18).

b Si nawajoʼ natamaj achkë rma ütz nakʼuqbʼaʼ akʼuʼx chrij le Biblia, tatzʼetaʼ ri artículo «La Biblia tiene la verdad».