Naʼoj rchë nbʼan ri moloj Qakʼaslemal chqä Qasamaj röj ri Cristianos

Ri petenäq chpan re wuj reʼ

1. Re wuj reʼ rkʼamon pä jojun naʼoj ri nkʼatzin nkismajij ri kʼo kasignaciones chpan ri moloj Qakʼaslemal chqä Qasamaj röj ri Cristianos. Taq ryeʼ nkitjoj kiʼ chrij ri peraj xtkiqʼaxaj, nkʼatzin chqä nkitzʼët ri naʼoj kʼo chpan ri Wuj rchë qamoloj Qakʼaslemal chqä Qasamaj röj ri Cristianos. Ütz nbʼix chkë jontir ri publicadores chë ütz nkiqʼaxaj kasignaciones chpan re moloj reʼ. Ri winäq ri nkimöl kiʼ qkʼë ütz chqä nkiqʼaxaj jun kasignación si nkinmaj ri nukʼüt le Biblia chqä nkismajij ri naʼoj ye kʼo chpan. Si kʼo jun nrajoʼ nuqʼaxaj jun rasignación tapeʼ majanä ttok publicador, ri qachʼalal ri nyaʼö kisamaj jontir chpan qamoloj Qakʼaslemal chqä Qasamaj, xttzjon rkʼë chkij ri naʼoj ri nkʼatzin yersmajij, y chrij riʼ xtuʼij che rä si ütz nuqʼaxaj jun rasignación o manä. Taq ri qachʼalal riʼ xttzjon rkʼë, kʼo chë njeʼ chqä ri najin ntjon rchë chrij le Biblia (o jun chkë rteʼ rtat ri Testigo). Ri naʼoj xttzʼet rkʼë, ya riʼ chqä ntzʼet rkʼë jun winäq ri nrajoʼ ntok publicador (od-S cap. 8 peraj 8).

NAʼÄY TAQ TZIJ

2. Jun minuto. Taq xqbʼixan yän chqä xbʼan yän orar, ri qachʼalal ri nukʼwan bʼey chpan qamoloj xtuʼij achkë xttzʼet chpan ri moloj. Ryä xtyaʼ rejqalen ri naʼoj ri más nkʼatzin che rä ri congregación.

RI BʼEYOMÄL YEQÏL CHPAN LE BIBLIA

3. Tzijonem (10 minutos). Chpan ri Wuj rchë qamoloj kʼo rbʼiʼ ri tzijonem chqä kaʼiʼ u oxiʼ naʼoj ri nkʼatzin yekʼut. Re tzijonem reʼ yë jun ukʼwäy bʼey o jun siervo ministerial xtqʼaxan rchë. Taq xtchap rskʼixik jun chik libro chpan le Biblia, xttzʼet jun video ri ntzjon chrij ri libro riʼ. Ri qachʼalal ütz nuʼij achkë rbʼanik kikʼwan kiʼ jojun naʼoj ri ye kʼo chpan ri video rkʼë ri tzijonem, ye kʼa kʼo chë nukʼüt ri naʼoj ye kʼo chpan ri Wuj rchë qamoloj. Chqä nkʼatzin yerksaj ri achbʼäl —y nutzʼët na ajän ütz yerkʼüt— rchë nukʼüt ri naʼoj ri kʼo más kiqʼij. Ri qachʼalal ütz chqä yerkʼüt nkʼaj chik naʼoj ri ma ye petenäq ta chpan qawuj, xa xuʼ we kikʼwan kiʼ rkʼë ri tzijonem.

4. Keqakanuj bʼeyomäl chpan le Biblia (10 minutos). Re peraj reʼ xtbʼan kikʼë kʼutunïk chqä yë jun ukʼwäy bʼey o jun siervo ministerial xtqʼaxan rchë. Ryä ma nkʼatzin ta kʼo nuʼij taq nuchäp re peraj reʼ o taq nukʼïs, chqä kʼo chë yeruʼän ri kaʼiʼ kʼutunïk. Ryä xttzʼetö si xkeskʼïx ri textos o manä. Ri kicomentarios ri qachʼalal kʼo chë nyalöj 30 segundos o menos.

5. Rskʼixik rwäch wuj (4 minutos). Re asignación reʼ jun qachʼalal achï xtqʼaxan rchë. Ryä xa xuʼ xtskʼij ri peraj kʼo chpan qawuj y ma nkʼatzin ta kʼo nuʼij taq nuchäp o taq nukʼïs. Ri nukʼwan bʼey chpan qamoloj xkertoʼ ri yeqʼaxan re peraj reʼ rchë kan ütz rbʼanik nkiskʼij rwäch wuj, rchë kan achiʼel kʼo pä chwäch ri wuj kan ke riʼ nkiskʼij, rchë ma yeqʼateʼ ta taq nkiʼän leer, rchë nkitamaj nkijtobʼaʼ chqä nkiqasaj rchqʼaʼ kichʼaʼäl, rchë nkitamaj akuchï nkʼatzin nkiʼän pausas chqä rchë nkitzʼët achkë naʼoj nkʼatzin nkiyaʼ más rchqʼaʼ. Rma kʼo mul más kʼïy peraj nkʼatzin yeskʼïx, ri qachʼalal ri nyaʼö kisamaj jontir chpan qamoloj Qakʼaslemal chqä Qasamaj xttzʼët na achoq che rä xtyaʼ wä ri asignación riʼ.

KAN PA RBʼEYAL KEQATJOJ RI WINÄQ

6. Quince minutos. Re peraj reʼ bʼanon pä rchë yetoʼöx jontir qachʼalal rchë nkitjoj apü kiʼ rchë nkitzjoj le Biblia, chqä rchë más ütz rbʼanik yetzjon kikʼë ri winäq, rchë nkikʼüt Rchʼaʼäl Dios chqä rchë yekitjoj ri winäq. Si nkʼatzin, ri ukʼwäy taq bʼey ütz chqä nyaʼöx jun kasignación chpan re peraj reʼ. Ri xtyaʼöx jun kasignación, nkʼatzin nkismajij ri naʼoj kʼo chpan ri folleto Tijonelaʼ o ri naʼoj kʼo chpan ri folleto Keʼawajoʼ ri winäq. Ri naʼoj ri nkʼatzin nkismajij petenäq chpan paréntesis chpan ri Wuj rchë qamoloj. Jojun semanas, kʼo jojun peraj xkeqʼaxäx ri xtbʼan kikʼë kʼutunïk; ya reʼ jun ukʼwäy bʼey o jun siervo ministerial xtqʼaxan rchë (Tatzʼetaʼ ri peraj 15 rchë natzʼët achkë rbʼanik nakʼwaj bʼey chpan jun peraj ri nbʼan rkʼë kʼutunïk).

7. Tachapaʼ tzij. Re peraj reʼ jun qachʼalal achï o jun qachʼalal ixöq xtqʼaxan rchë. Si jun qachʼalal achï xtqʼaxan rchë, yë jun qachʼalal achï xttoʼö rchë o jun rchʼalal. Ke riʼ chqä rkʼë jun qachʼalal ixöq, yë jun qachʼalal ixöq xttoʼö rchë o jun rchʼalal. Ryeʼ ütz yepaʼeʼ o yetzʼyeʼ. (Rchë natamaj achkë xtatzjoj che rä ri winäq o achkë rbʼanik xtaʼän che rä, tatzʼetaʼ ri peraj 12 chqä 13).

8. Katzolin. Re peraj reʼ jun qachʼalal achï o jun qachʼalal ixöq xtqʼaxan rchë. Si jun qachʼalal achï xtqʼaxan rchë, yë jun qachʼalal achï xttoʼö rchë. Ke riʼ chqä rkʼë jun qachʼalal ixöq, yë jun qachʼalal ixöq xttoʼö rchë (km-S 5/97 rxaq 2). Che kaʼiʼ ütz yepaʼeʼ o yetzʼyeʼ. Ri xtqʼaxan re peraj reʼ nkʼatzin nukʼüt achkë ütz nqaʼij che rä jun winäq taq nqtzolin rkʼë. (Rchë natamaj achkë xtatzjoj che rä ri winäq o achkë rbʼanik xtaʼän che rä, tatzʼetaʼ ri peraj 12 chqä 13).

9. Keʼatjoj chrij le Biblia. Re peraj reʼ jun qachʼalal achï o jun qachʼalal ixöq xtqʼaxan rchë. Si jun qachʼalal achï xtqʼaxan rchë, yë jun qachʼalal achï xttoʼö rchë. Ke riʼ chqä rkʼë jun qachʼalal ixöq, yë jun qachʼalal ixöq xttoʼö rchë (km-S 5/97 rxaq 2). Che kaʼiʼ ütz yepaʼeʼ o yetzʼyeʼ. Taq chpan re asignación reʼ xtqʼaxäx jun peraj rchë jun tjonïk chrij le Biblia ri ya tkirsan chik, ri qachʼalal ma nkʼatzin ta kʼo nuʼij taq nuchäp o taq nukʼïs, xa xuʼ si chrij ri naʼoj riʼ najin nsamäj wä. Chqä, ma nkʼatzin ta nkiskʼij jontir ri peraj ri najin nkitjoj kiʼ chrij. Tapeʼ ke riʼ, majun ta rbʼanon si nkajoʼ nkiʼän riʼ.

10. Taqʼalajsaj ri nanmaj. Si chpan re peraj reʼ jun tzijonem xtyaʼöx, yë jun qachʼalal achï xtyaʼö rchë. Si jun demostración, jun qachʼalal achï o jun qachʼalal ixöq xtqʼaxan. Si jun qachʼalal achï xtqʼaxan rchë, yë jun qachʼalal achï xttoʼö rchë o jun rchʼalal. Ke riʼ chqä rkʼë jun qachʼalal ixöq, yë jun qachʼalal ixöq xttoʼö rchë o jun rchʼalal. Ri xtqʼaxan re peraj reʼ nkʼatzin nutzʼët na achkë yeruʼij rchë nuqʼalajsaj ri pregunta chqä nkʼatzin kan chöj nuʼän che rä. Rchë nuʼän riʼ, nkʼatzin nuksaj ri referencia ri kʼo chpan qawuj. Chqä, si ryä nrajoʼ, ütz nuʼij rbʼiʼ ri publicación rchë ri referencia riʼ.

11. Tzijonem. Re peraj reʼ jun qachʼalal achï xtyaʼö rchë. Taq xtkʼatzin xttzjoj ri naʼoj ye kʼo chpan ri naʼoj A rchë ri folleto Keʼawajoʼ ri winäq ryä kʼo chë nukʼüt achkë rbʼanik yeksäx ri textos chutzjoxik le Biblia. Jun ejemplo. Ütz nukʼüt achkë ntel chë tzij jun texto, ajän ütz nksäx o achkë rbʼanik nksäx rchë jun winäq nqʼax chwäch ri najin nkʼut chwäch. Taq xtkʼatzin xttzjoj jun chkë ri nkʼaj chik peraj ri ye kʼo chpan ri folleto, ryä nkʼatzin nukʼüt achkë rbʼanik nqakʼüt ri naʼoj riʼ taq nqtzjon kikʼë ri winäq. Si ryä ütz nutzʼët, ütz nuksaj ri ejemplo ri kʼo chpan ri peraj 1 rchë ri naʼoj o jojun chkë ri textos ri ye kʼo pä chriʼ.

12. Ri kʼo chë nbʼan. Ri naʼoj ye kʼo chpan re peraj reʼ chqä chpan ri jun chik, nkʼatzin yesmajïx chpan ri asignaciones «Tachapaʼ tzij» chqä «Katzolin». Si ri qachʼalal ri xtqʼaxan jun chkë re asignaciones reʼ majun ta chik jun naʼoj nkʼatzin nusmajij, ri nkʼatzin nuʼän ryä ya riʼ nukʼüt jun naʼoj chpan le Biblia ri ma kwest ta nqʼax chqä nutoʼ ri nkʼoxan rchë. Chqä nkʼatzin nukanuj rbʼanik rchë xtkowin xttzjon chik jmul rkʼë ri winäq. Chqä, nkʼatzin ntzjon chrij jun naʼoj ri nkʼatzin che rä ri winäq o chrij jun naʼoj ri nrajoʼ nutamaj. Yë ryä ntzʼetö si xttzüj jun chkë qapublicaciones o xtkʼüt jun video. Pa rkʼexel xa xuʼ nutzjoj jun naʼoj ri xuʼän ensayar, ryä nkʼatzin nutamaj ntzjon kikʼë ri winäq, y rchë nuʼän riʼ nkʼatzin ntzjon kan achiʼel rkʼulun che rä chqä nukʼüt chkiwäch ri winäq chë kantzij nrajoʼ yertoʼ.

13. Ri rbʼanik nbʼan che rä. Ri xkeqʼaxan kasignaciones nkʼatzin nkitzʼët achkë rbʼanik nkismajij pa kitinamit ri naʼoj nyaʼöx chkë rchë nkiʼän kidemostración. Jojun ejemplos:

(1) Chuchiʼ taq jay. Ya reʼ ntel chë tzij nqatzjoj le Biblia chkachoch ri winäq (rkʼë jbʼaʼ taq nqapon chkachoch o taq nqatäq äl cartas chkë o yeqaskʼij äl pa teléfono) o nqtzjon chik jmul kikʼë ri winäq ri ke reʼ rbʼanik xqatzjoj le Biblia chkë.
(2) Xa bʼa akuchï yït kʼo wä. Ya reʼ nqaʼän taq nqakanuj rbʼanik rchë nqatzjoj le Biblia chkë ri winäq tapeʼ xa bʼa akuchï yoj kʼo wä o xa bʼa achkë na najin nqaʼän, achiʼel taq nqaskʼij jun texto chwäch jun qachiʼil pa samaj, pan escuela, chwäch jun qavecino o chwäch jun winäq ri jnan yoj bʼenäq rkʼë pa chʼichʼ.
(3) Akuchï ye kʼo ye kʼïy winäq. Ya reʼ nqaʼän taq nqatzjoj le Biblia chrij exhibidor, pa taq kʼayij, pa taq bʼey, pa parque, akuchï yepaʼeʼ wä chʼichʼ o xa bʼa akuchï ye kʼo winäq.

14. Kiksaxik videos chqä publicaciones. Yë ri qachʼalal ri xtqʼaxan rasignación xttzʼetö si ütz nuʼän chwäch nukʼüt jun video o nutzüj jun chkë qapublicaciones. Si chpan rasignación kʼo jun video y ryä nrajoʼ nukʼüt, ütz nuʼän riʼ, ye kʼa kʼo chë ma nutzäj ta. Chqä kʼo chë ntzjon rkʼë ri winäq chrij ri video riʼ.

RI QAKʼASLEMAL RÖJ RI CRISTIANOS

15. Re peraj reʼ xtchapatäj rkʼë jun bʼix. Chpan ri naʼäy 15 minutos xtqʼaxäx jun o kaʼiʼ asignaciones ri xkertoʼ qachʼalal rchë xtkismajij ri naʼoj ye kʼo chpan Rchʼaʼäl Dios. Re peraj reʼ jun ukʼwäy bʼey o jun siervo ministerial xtqʼaxan rchë. Ye kʼa ri peraj ri nkʼatzin pa qacongregación, xa xuʼ jun ukʼwäy bʼey xtqʼaxan. Taq ri asignación xtbʼan rkʼë kʼutunïk, ri qachʼalal ütz yeruʼän nkʼaj chik kʼutunïk y ma xa xuʼ ta ri ye petenäq chwäch qawuj. Chqä nkʼatzin chë ma kan ta kowan ntzjon taq nuchäp rasignación, rchë ke riʼ xtjeʼ kʼïy tiempo rchë xketzʼet ri naʼoj ri kʼo más kiqʼij chqä rchë qachʼalal xtkiʼän comentar. Si nkʼatzin nbʼan entrevistar jun qachʼalal —si ütz nuʼän—, más ütz che ri qachʼalal riʼ nqʼax pa plataforma pa rkʼexel ntzjon äl pa rtzʼibʼäl.

16. Tjonïk chrij le Biblia pa congregación (30 minutos). Re peraj reʼ jun ukʼwäy bʼey xtqʼaxan rchë. (Chpan ri congregaciones akuchï ma ye kʼïy ta ukʼwäy taq bʼey ye kʼo, ütz yeksäx siervos ministeriales). Yë ri ukʼwäy taq bʼey pa congregación yetzʼetö achkë ütz yeqʼaxan re peraj reʼ. Ri qachʼalal riʼ kʼo chë yekowin nkikʼïs re peraj reʼ chpan ri tiempo yaʼon chkë, nkiyaʼ kejqalen ri textos ri nkiyaʼ rchqʼaʼ ri tjonïk chqä yekitoʼ qachʼalal rchë nkitzʼët achkë naʼoj nkʼatzin nkismajij. Rchë yekowin nkiʼän riʼ, ütz nkitzʼët ri naʼoj yeyaʼon pä chrij rbʼanik nakʼwaj bʼey chpan jun asignación ri nbʼan rkʼë kʼutunïk (w23.04 rxaq 24, recuadro). Ri qachʼalal ri nqʼaxan re peraj reʼ ma nkʼatzin ta nuksaj ri 30 minutos si xkʼüt yän jontir ri naʼoj ri nkʼatzin ntzʼet. Si ütz nuʼän, ütz chë ronojel semanas jalajöj qachʼalal yeqʼaxan re peraj reʼ chqä jalajöj qachʼalal yebʼanö leer. Taq ri qachʼalal ri nukʼwan bʼey chpan ri moloj nuʼij che rä ri nqʼaxan re peraj reʼ chë tqasaj jbʼaʼ ri tiempo rchë ri tjonïk, ri nqʼaxan ri tjonïk xttzʼët achkë rbʼanik xtuʼän che rä. Jun ri ütz nbʼan ya riʼ ma yeskʼïx ta jojun peraj.

TZIJ RCHË NKʼIS QAMOLOJ

17. Tres minutos. Ri nukʼwan bʼey chpan ri moloj xtkamluj jojun naʼoj ri xetzʼet chpan ri moloj ri xtkʼatzin che rä ri congregación. Si kʼa kʼo na tiempo, ütz nuʼij chkë qachʼalal chë tkiʼij jojun naʼoj ri xkitzʼët ryeʼ chë xkekʼatzin chkë. Chqä xttzjoj jbʼaʼ ri xttzʼet chpan ri jun chik semana y, si ütz nuʼän, xtuʼij kibʼiʼ ri qachʼalal ri kʼo kasignación ri semana riʼ. Chpan re peraj reʼ xtyaʼöx wä ri anuncios chqä xkeskʼïx ri cartas; xa xuʼ ma xtbʼan ta riʼ si xbʼix chë ma xtbʼan ta. Ri rtzjol chrij ri yebʼan pa congregación, achiʼel ri hora ri xtbʼan ri moloj rchë xttzjöx le Biblia o achkë xkejosqʼin ri Salón, ma xtbʼix ta pä pa plataforma, xa xkeyaʼöx chwäch ri tablero. Si ma xtqʼiʼ ta ri tiempo rchë yeskʼïx ri cartas o rchë yeyaʼöx ri anuncios, ri qachʼalal ri nukʼwan bʼey chpan ri moloj xtuʼij chkë qachʼalal ri kʼo kasignación chpan ri peraj «Ri qakʼaslemal röj ri cristianos» chë tkiqasaj jbʼaʼ kitiempo. (Tatzʼetaʼ ri peraj 16 chqä 19). Ri moloj xtkʼis rkʼë jun bʼix chqä jun oración.

NAʼOJ CHKË RI YEQʼAXAN ASIGNACIONES

18. Taq jun qachʼalal nukʼïs rasignación, ri nukʼwan bʼey chpan ri moloj kʼo jbʼaʼ ma jun minuto chwäch rchë nuʼän felicitar ri qachʼalal chqä rchë nuyaʼ jojun naʼoj che rä ri lesan pä chpan ri lección ri najin nusmajij. Taq xtuʼij achkë qachʼalal xtqʼax, ryä kʼo chë ma nuʼij ta achkë naʼoj xtsmajij. Ye kʼa taq ri qachʼalal xkʼïs yän rasignación, y ya xuʼän yän felicitar, ütz nuʼij achkë naʼoj najin nusmajij y achkë rma ütz xuʼän che rä, o pa rbʼeyal nuʼij che rä achkë rma nkʼatzin na nusmajij ri naʼoj riʼ y achkë rbʼanik nuʼän che rä. Ri nukʼwan bʼey chpan ri moloj ütz chqä nutzjoj jojun naʼoj rchë ri demostración ri rkʼë jbʼaʼ xttoʼ ri qachʼalal ri xqʼaxan rchë o xttoʼ ri congregación. Taq xtkʼis ri moloj o jun chik qʼij, ütz chqä chë pa ryonïl nuyaʼ chik jojun naʼoj che rä ri resan pä chpan ri folleto Keʼawajoʼ ri winäq, ri folleto Tijonelaʼ o ri libro Benefíciese. Rkʼë jbʼaʼ ütz ntzjon chrij ri naʼoj ri najin nusmajij o chrij jun chik naʼoj. (Chpan ri peraj 19, 24 chqä 25 xtawïl más naʼoj chrij ri samaj nkʼatzin nuʼän ri qachʼalal ri nukʼwan bʼey chpan ri moloj Qakʼaslemal chqä Qasamaj chqä chrij ri qachʼalal ri nyaʼö naʼoj).

TIEMPO

19. Jontir ri nkiqʼaxaj jun kasignación kʼo chë ma yeqʼax ta rkʼë kitiempo (yajün ri nukʼwan bʼey chpan ri moloj). Tapeʼ chpan ri Wuj rchë qamoloj nuʼij jaruʼ tiempo nkʼatzin nkiʼän ri yeqʼaxan ri asignaciones, si ryeʼ xkikʼüt yän jontir ri naʼoj ri kʼo chpan kasignación, ma nkʼatzin ta nkikʼüt nkʼaj chik naʼoj xa xuʼ rchë yeʼapon rkʼë ri tiempo yaʼon chkë. Si jun qachʼalal nqʼax rkʼë rtiempo, pa ryonïl xtyaʼöx rnaʼoj rma ri nukʼwan bʼey chpan ri moloj o rma ri qachʼalal ri nyaʼö naʼoj. (Tatzʼetaʼ ri peraj 24 chqä 25). Ri moloj kʼo chë nyalöj 1 hora rkʼë 45 minutos; aweʼ chqä jlan chik ri minutos ri nksäx rchë nqbʼixan chqä rchë yebʼan ri oraciones.

VISITA RCHË RI UKʼWÄY BʼEY RCHË CIRCUITO

20. Chpan ri semana taq nqrbʼechʼaʼej ri ukʼwäy bʼey rchë circuito, xtbʼan ri nuʼij chpan ri Wuj rchë qamoloj, ye kʼa kʼo jojun xkejal. Pa rkʼexel ri «Tjonïk chrij le Biblia pa congregación», ri ukʼwäy bʼey rchë circuito xtyaʼ jun tzijonem ri xtyalöj 30 minutos. Taq ya nchap ri tzijonem riʼ, ri nukʼwan bʼey chpan ri moloj xtkamluj achkë xtzʼet chpan ri moloj, xtuʼij achkë xttzʼet chpan ri jun chik semana, xtyaʼ ri anuncios, xtskʼij ri cartas chqä xtuʼij chë ri ukʼwäy bʼey rchë circuito xtyaʼ jun tzijonem. Taq ri ukʼwäy bʼey rchë circuito xtkʼïs rtzijonem, ryä xtuʼij achkë bʼix xtbʼixäx. Ryä chqä ütz nuʼij che rä jun qachʼalal chë tbʼanaʼ ri oración. Chpan ri semana riʼ, ma xkeyaʼöx ta asignaciones chpan ri sala B. Ri grupos ri yetzjon jun chik chʼaʼäl ütz nkimöl kiʼ chpan ri semana riʼ, ye kʼa kʼo chë nkikʼoxaj rkʼë ri congregación ri tzijonem ri xtyaʼ ri ukʼwäy bʼey rchë circuito ri qʼij martes.

SEMANA RCHË QASAMBLEA

21. Chpan ri semana rchë qasamblea ma xtqamöl ta qiʼ pa Salón. Xtnatäx chkë qachʼalal chë nkʼatzin nkitjoj kiʼ chrij ri moloj rchë ri semana riʼ pa kiyonïl o rkʼë kifamilia.

RI SEMANA TAQ NQANATAJ RKAMIK JESÚS

22. Taq xtqanataj rkamik Jesús chukojöl qʼij, ma xtbʼan ta ri moloj Qakʼaslemal chqä Qasamaj.

RI NYAʼÖ KISAMAJ JONTIR QACHʼALAL CHPAN RI MOLOJ QAKʼASLEMAL CHQÄ QASAMAJ

23. Re samaj reʼ yë jun ukʼwäy bʼey ri chaʼon kimä ri ukʼwäy taq bʼey xtbʼanö rchë. Ryä kʼo chë nutzʼët chë ütz ntel ri moloj chqä chë najin yesmajïx ri naʼoj ye kʼo chpan re wuj reʼ. Chqä kʼo chë chaq taqïl ntzjon rkʼë ri qachʼalal ri nyaʼö naʼoj. Kan xa xuʼ ntel chik jun kʼakʼakʼ Wuj rchë qamoloj, ryä kʼo chë nuʼän ri programa rchë ri asignaciones ri xkeqʼaxäx ri kaʼiʼ ikʼ riʼ, achiʼel ri asignación «Rskʼixik rwäch wuj», ri asignaciones rchë ri peraj «Kan pa rbʼeyal keqatjoj ri winäq», ri asignaciones ri xa xuʼ ri ukʼwäy taq bʼey o ri siervos ministeriales yeqʼaxan rchë chqä ri qachʼalal xkekʼwan bʼey chpan qamoloj chukojöl qʼij. Chkë ri kaʼiʼ rkʼisbʼäl asignaciones xqaʼij qa, kʼo chë yeksäx ri qachʼalal ri yechaʼon kimä ri ukʼwäy taq bʼey. (Tatzʼetaʼ ri peraj 3-16 chqä 24). Taq re qachʼalal reʼ xtyaʼ kisamaj jontir qachʼalal, ryä kʼo chë nutzʼët jaruʼ kijnaʼ, jaruʼ tiempo kitzjon pä chik le Biblia chqä si ütz nuʼän chkiwäch yetzjon chrij ri naʼoj ri nkʼatzin nkikʼüt. Jontir ri asignaciones kʼo chë yeyaʼöx chkë qachʼalal taq nrajoʼ na jun oxiʼ semanas rchë nkiqʼaxaj. Che rä ri peraj «Rskʼixik rwäch wuj» chqä ri asignaciones rchë ri peraj «Kan pa rbʼeyal keqatjoj ri winäq», kʼo chë nksäx ri wuj Ri asamaj pa moloj Qakʼaslemal chqä Qasamaj röj ri Cristianos (S-89). Ri nyaʼö kisamaj jontir kʼo chë nutzʼët chë ri programa nyaʼöx chwäch ri tablero. Ri ukʼwäy taq bʼey ütz nkichaʼ jun chik ukʼwäy bʼey o jun siervo ministerial rchë nutoʼ ri qachʼalal riʼ; ye kʼa xa xuʼ ri ukʼwäy taq bʼey yekowin yechaʼö achkë xkeqʼaxan ri asignaciones ri xa xuʼ jun ukʼwäy bʼey o jun siervo ministerial nqʼaxan rchë.

RI NUKʼWAN BʼEY CHPAN RI MOLOJ QAKʼASLEMAL CHQÄ QASAMAJ

24. Ronojel semanas, jun ukʼwäy bʼey xtkʼwan bʼey chpan ri moloj Qakʼaslemal chqä Qasamaj (chpan ri congregaciones akuchï ma ye kʼïy ta ukʼwäy taq bʼey ye kʼo, ütz yeksäx siervos ministeriales). Re qachʼalal reʼ xtchäp qamoloj chqä xtkʼïs. Chqä kʼo chë yeruʼän presentar jontir qachʼalal ri kʼo kasignación y, si ma ye kʼïy ta ukʼwäy taq bʼey ye kʼo, rkʼë jbʼaʼ xtkʼatzin xtqʼaxaj nkʼaj chik asignaciones, y más ri peraj akuchï xa xuʼ nkʼatzin nkʼut jun video. Ryä kʼo chë ma nyalöj ta ntzjon taq nkʼis jun asignación y nuʼän presentar jun chik. Ri ukʼwäy taq bʼey xkechaʼö achkë qachʼalal ütz yeksäx rchë nkiʼän re samaj reʼ. Ri xkechaʼöx xtkijäl kiʼ rchë xtkikʼwaj bʼey chpan qamoloj. Rkʼë jbʼaʼ ri nyaʼö kisamaj jontir qachʼalal chpan ri moloj Qakʼaslemal chqä Qasamaj, ya riʼ ri más kʼïy mul xtkʼatzin xtuʼän re samaj reʼ chkiwäch ri nkʼaj chik ukʼwäy taq bʼey. Si jun ukʼwäy bʼey nchaʼöx rchë nuqʼaxaj ri «Tjonïk chrij le Biblia pa congregación», rkʼë jbʼaʼ ütz chqä nksäx rchë nukʼwaj bʼey chpan qamoloj. Tapeʼ ke riʼ, ri nchaʼöx rchë nuʼän ri samaj riʼ kʼo chë rtaman yeruʼän felicitar qachʼalal y, taq nkʼatzin, kan pa rbʼeyal nuyaʼ kinaʼoj. Chqä, pa rqʼaʼ ryä kʼo wä rchë ri moloj nkʼis a tiempo. (Tatzʼetaʼ ri peraj 17 chqä 19). Si nüm ri plataforma chqä si ri qachʼalal riʼ nrajoʼ, ütz nuksaj jun chik micrófono rkʼë pedestal rchë nuʼän presentar ri asignaciones loman ri qachʼalal yeqʼax chrij ri atril. Ütz chqä nyaʼöx jun mesa y jun chʼakät pa plataforma rchë nuksaj ri qachʼalal riʼ taq nqʼaxäx ri peraj «Rskʼixik rwäch wuj» chqä ri asignaciones rchë ri peraj «Kan pa rbʼeyal keqatjoj ri winäq».

RI NYAʼÖ NAʼOJ

25. Taq nkʼatzin, re qachʼalal reʼ xtyaʼ kinaʼoj ri ukʼwäy taq bʼey chqä ri siervos ministeriales ri nkiqʼaxaj jun kasignación chpan ri moloj Qakʼaslemal chqä Qasamaj, ri yeyaʼö tzijonem, ri yeqʼaxan ri tjonïk chrij ri wuj Ri Chajinel o ri «Tjonïk chrij le Biblia pa congregación», o ri yeskʼin rwäch qawuj pa qamoloj; ryä pa kiyonïl xttzjon kikʼë. (Tatzʼetaʼ ri eraj 19).

SALA B

26. Si kan ye kʼïy qachʼalal ye kʼo rchë yeqʼax chpan ri peraj «Kan pa rbʼeyal keqatjoj ri winäq», ri congregación ütz nuʼän jun sala B. Chpan ri sala riʼ xtjeʼ jun qachʼalal ri xtyaʼ kinaʼoj ri xkeqʼax chriʼ. Más ütz si kan yë jun ukʼwäy bʼey xtbʼanö ri samaj riʼ. Si ma ye kʼïy ta ukʼwäy taq bʼey ye kʼo, ütz chqä nksäx jun siervo ministerial. Ri ukʼwäy taq bʼey xkechaʼö achkë xkebʼanö re samaj reʼ chqä si xtkijalalaʼ kiʼ chubʼanik. Ri xtyaʼö kinaʼoj ri qachʼalal chpan ri sala riʼ, kʼo chë nusmajij ri naʼoj kʼo chpan ri peraj 18. Ri qachʼalal ri kʼo kasignación chpan ri sala B, xtbʼix chkë chë ütz yebʼä chpan ri sala riʼ taq xtkʼis ri peraj «Keqakanuj bʼeyomäl chpan le Biblia», ri kʼo chpan ri peraj «Ri bʼeyomäl yeqïl chpan le Biblia». Ryeʼ xketzolin pä chik jmul kikʼë nkʼaj chik taq xtkʼis ri peraj «Kan pa rbʼeyal keqatjoj ri winäq».

VIDEOS

27. Chpan ri moloj ri nbʼan chukojöl qʼij xkekʼut jojun videos ri xkeyaʼöx chpan ri aplicación JW Library®, ri kʼo chpan kʼïy dispositivos.

S-38-CQ 9/25