¿Achkë njalatäj taq naläx jun neʼy?

Taq yixok teʼej tataʼaj, rkʼë jbʼaʼ kan kiʼ ikʼuʼx niʼän, ye kʼa rkʼë jbʼaʼ ninaʼ chqä chë kan kʼïy samaj xtpë chiwij. Xtqʼalajin chiwäch chë ri nakʼiytisaj jun neʼy kan kʼïy tiempo xtkʼwaj. Rma ma más ta chik yixuxlan, ya riʼ rkʼë jbʼaʼ nuʼän chë npë chʼaʼoj pan ikʼlajil chqä chë ma kiʼ ta chik ikʼuʼx niʼän. Rma riʼ chixkaʼiʼ kʼo chë nitzʼët achkë nkʼatzin che rä ineʼy chqä achkë nkʼatzin niʼän rchë ütz yixbʼä pan ikʼlajil. ¿Achkë rbʼanik yixurtoʼ ri naʼoj ye kʼo chpan le Biblia rchë yixqʼax chpan ya reʼ?

1 TKʼLUJ CHAWÄ RI ACHKË XJALATÄJ

RI NUʼIJ LE BIBLIA: «Ri winäq ri najowan nkochʼon chqä ütz rnaʼoj [...], ma xa xuʼ ta ryä nuquʼ qa riʼ, ma chanin ta npë ryowal» (1 Corintios 13:4, 5). Rma kʼa naʼäy awal xjeʼ, rkʼë jbʼaʼ kan xa xuʼ ryä nawajoʼ natzʼët. Ye kʼa ya riʼ rkʼë jbʼaʼ nuʼän chë awachjil nunaʼ chë xa amestan qa. Rma riʼ ma tamestaj ta chë ryä chqä kʼo nkʼatzin che rä. Takʼutuʼ chwäch awachjil chë nkʼatzin rtoʼik chawä chqä chë naloqʼoqʼej ri toʼïk nuyaʼ chawä rkʼë rchajxik ineʼy.

«Rïx achiʼaʼ, ronojel mul tikʼutuʼ chë nqʼax chiwäch ri nunaʼ iwixjayil» (1 Pedro 3:7). We rït kʼa naʼäy awalkʼwal xjeʼ, tqʼax pan ajolon chë komä ri awixjayil yë rneʼy ya riʼ ri más xttzʼët. Rkʼë jbʼaʼ rma ya riʼ kowan xtkos chqä ma kiʼ ta chik rkʼuʼx xtuʼän rma kʼïy samaj xtjeʼ chrij. Rkʼë jbʼaʼ jantäq xtpë ryowal chawä, ye kʼa ma tmeqʼeʼ ta awkʼë, rma «más ütz jun achï ri ma chanin ta npë ryowal chwäch jun achï ri kowan rchqʼaʼ» (Proverbios 16:32). Tatzʼetaʼ na achkë najin nuqʼaxaj y tabʼanaʼ ri nkʼatzin che rä (Proverbios 14:29).

RI ÜTZ NAʼÄN:

• We rït yït ri tataʼaj: Tatoʼ awixjayil chuchajxik rneʼy, tapeʼ chaqʼaʼ. Ma taksaj ta kʼïy tiempo chrij xa bʼa achkë jun naʼän, ke riʼ xkakowin xkajeʼ más rkʼë awixjayil chqä awalkʼwal

• We rït yït ri teʼej: Taq awachjil nrajoʼ yaturtoʼ rkʼë aneʼy, tawajoʼ chwäch. We ma nuʼän ta kan achiʼel nawajoʼ rït, ma kachapon ta che rä, xa kan pa rbʼeyal takʼutuʼ chwäch achkë rbʼanik nuʼän che rä

2 TITJAʼ IQʼIJ RCHË MÁS JNAN NUʼÄN IWÄCH

RI NUʼIJ LE BIBLIA: «Y xkeʼok xa jun chʼakulaj» (Génesis 2:24). Tapeʼ komä kʼo chik jun más pan ifamilia, ma tamestaj ta chë rït chqä akʼlaj kʼa yïx «jun chʼakulaj» na. Rma riʼ titjaʼ iqʼij rchë más jnan nuʼän iwäch.

We rït yït ri ixöq, tatyoxij ri toʼïk nuyaʼ awachjil chawä, rma taq rït yatyoxin, achiʼel ta najin naknaj jun sokotajïk (Proverbios 12:18). We rït yït ri achï, taʼij che rä awixjayil chë kowan nawajoʼ chqä chë naloqʼoqʼej jontir ri nuʼän pa rwiʼ ifamilia (Proverbios 31:10, 28).

«Ma xa xuʼ ta rït taquʼ qa awiʼ, xa taquʼ kij ri nkʼaj chik chqä» (1 Corintios 10:24). Ronojel mul tabʼanaʼ ri achkë nkʼatzin che rä akʼlaj chqä takʼutuʼ chë naloqʼoqʼej rsamaj. Tijamaʼ iwäch rchë yixtzjon. Chrij ri sexo, ma xa xuʼ ta rït taquʼ awij, xa kan taquʼ chqä achkë nkʼatzin che rä akʼlaj. Le Biblia nuʼij: «Ma tiqʼät ta iwiʼ rchë yixjeʼ jnan, xa xuʼ we chixkaʼiʼ xiyaʼ jun tiempo chiwäch rchë niʼän riʼ» (1 Corintios 7:3-5). Rma riʼ kan chöj kixtzjon chiwäch chrij riʼ. Taq nqʼax chawäch ri nunaʼ akʼlaj chqä ma nikʼo ta akʼuʼx rkʼë, ya riʼ xtuʼän chë más jnan xtuʼän iwäch.

RI ÜTZ NAʼÄN:

• Tajamaʼ awäch rchë yajeʼ rkʼë akʼlaj

• Tikʼutuʼ chë niwajoʼ iwiʼ. Rkʼë jbʼaʼ ütz nitäq jun imensaje o niʼän jun koʼöl ispanik

3 TATJOJ ANEʼY

RI NUʼIJ LE BIBLIA: «Kan xa xuʼ xataläx ataman pä ri loqʼoläj rchʼaʼäl Dios, ri yekowin nkiyaʼ anaʼoj ri xtkʼatzin rchë xtawïl kolotajïk» (2 Timoteo 3:15). Tachʼobʼoʼ achkë rbʼanik natjoj awal. Tayaʼ pan ajolon chë ryä kan kʼïy nkowin nutamaj tapeʼ majanä taläx, achiʼel chë ya nutamaj chik achʼaʼäl chqä nunaʼ ri achkë nanaʼ rït. Kan xa xuʼ xaläx, taskʼij rwäch wuj chwäch tapeʼ ma nqä ta pa rjolon ri tzij, ye kʼa ya riʼ xttoʼ rchë taq xtkʼïy xtqä chwäch xtskʼij rwäch wuj.

Ma taquʼ ta chë rma aneʼy kʼa koʼöl na, ma ütz ta natzjoj chrij Dios che rä. Katzjon rkʼë Jehová taq yat kʼo rkʼë (Deuteronomio 11:19). Taq yatetzʼan rkʼë, tatzjoj che rä achkë rbʼanon qa Dios (Salmo 78:3, 4). Ke riʼ, taq awal xtkʼïy, xtzʼët chë rït kowan nawajoʼ Jehová, y ya riʼ xtuʼän chë ryä chqä ke riʼ xtnaʼ.

RI ÜTZ NAʼÄN:

• Takʼutuj anaʼoj che rä Jehová rchë ütz rbʼanik nakʼiytisaj awal

• Takamluj che rä aneʼy ri naʼoj kan kʼo kejqalen rchë ryä chanin nutamaj