9. Tatamaj achkë nqä chawäch chqä achkë nawajoʼ naʼän

¿ACHKË NTEL CHË TZIJ?

Ri winäq ma xa xuʼ ta nkitamaj awäch rma abʼiʼ o rma ri abʼanik, xa kan rma ri achkë nanmaj chqä achkë anaʼoj.

¿ACHKË RMA KAN KOWAN NKʼATZIN RE NAʼOJ REʼ?

Taq rït ataman achkë nawajoʼ naʼän, ma xtayaʼ ta qʼij chë ri nkʼaj chik qʼopojiʼ kʼojolaʼ yebʼin chawä achkë nkʼatzin naʼän.

«Ye kʼïy winäq ye achiʼel maniquís, nixta yekowin nkichaʼ achkë tzyäq nkiksaj» (Adrian).

«Tapeʼ kʼayewal nuʼän chi nwäch, nqʼalajsan chkiwäch ri nkʼaj chik achkë riʼ ri ütz. Rïn ntaman achkë ye wachiʼil rma kinaʼoj y rma achkë nnaʼoj nbʼan rïn taq yïn kʼo kikʼë» (Courtney).

RI NAʼOJ NUYAʼ LE BIBLIA: «Ma tikʼän ta chik apü inaʼoj chkij ri winäq ri ma nkiyaʼ ta ruqʼij Dios, pa rukʼexel riʼ, xa tichapaʼ rujalik ri ichʼobʼonik» (Romanos 12:2).

¿ACHKË ÜTZ NAʼÄN?

Rchë natamaj achkë nqä chawäch komä, achkë anaʼoj y achkë chë winäq nawajoʼ yatok chawäch apü, taquʼ rij achkë ütz taq naʼoj ye kʼo awkʼë, achkë ma kan ta ütz y achkë nanmaj. Rchë riʼ ütz naʼän qa re kʼutunïk reʼ chawäch.

Ri ütz taq naʼoj ye kʼo awkʼë o achkë yakowin naʼän: «¿Achkë yikowin yenbʼän? ¿Achkë kan ütz ntel chi nwäch? ¿Yikowin nqʼät ri nnaʼ? ¿Chanin yinapon pa nsamaj? ¿Nqä chi nwäch yisamäj chqä yispan?».

RI ÜTZ NAʼÄN: We kʼayewal nuʼän chawäch natzʼët achkë ütz taq naʼoj ye kʼo awkʼë, takʼutuj utzil chkë ateʼ atat o chkë awachiʼil.

RI NAʼOJ NUYAʼ LE BIBLIA: «Chijujnal rïx titzʼetaʼ qa ri ibʼanobʼal, ke riʼ kʼo rma kiʼ ikʼuʼx xtiʼän rma ri ibʼanon pä, y ma tijnamaj ta iwiʼ rkʼë jun chik winäq» (Gálatas 6:4).

Ri ma kan ta ütz taq naʼoj ye kʼo awkʼë: «¿Achkë jojun naʼoj ye kʼo wkʼë nkʼatzin njäl? ¿Ajän riʼ taq rkʼë jbʼaʼ nnaʼ chë xkiqä chpan jun mak? ¿Ajän riʼ taq kʼo chë nqʼät ri nnaʼ?».

RI NAʼOJ NUYAʼ LE BIBLIA: «We nqaʼij ‹Majun qamak ta›, xa qayonïl najin nqaqʼöl qa qiʼ y ri kantzij ma aponäq ta pa qan» (1 Juan 1:8).

Ri nanmaj: «¿Achkë naʼoj yensmajij rïn pa nkʼaslemal, y achkë rma? ¿Nnmaj chë kʼo Dios? ¿Achkë rma nbʼij chë ryä kantzij kʼo? ¿Achkë nnaʼ rïn chë ma pa rubʼeyal ta nbʼan rkʼë jun winäq, y achkë rma? ¿Achkë nnmaj rïn chë xtbʼanatäj chqawäch apü?».

RI NAʼOJ NUYAʼ LE BIBLIA: «Ri achʼobʼonik xkaturchajij, ri xtatzʼët achkë ri ütz chqä ri ma ütz ta xkaturköl» (Proverbios 2:11).