Baara kɛ ni Bibulu sariyakolow ye walisa ka dusukun jɛlen sɔrɔ Ala ɲɛkɔrɔ

1-2. (a) Jehova ye nilifɛn jumɛn de di Hadama ni Hawa ma? (b) Hadama ni Hawa tun bɛ se k’u ka waleɲumandɔn jira o nilifɛn ko la cogo di ?

BAGANW bɛ fɛn o fɛn kɛ, u b’o kɛ dɔrɔn, ka d’a kan u dara ten. Masinimafɛn caman fana bɛ se ka baara sugu dɔw kɛ ka d’a kan u dilanbaga ye u dilan o baara de kɛli kama. Nka hadamadenw ma da o cogo la. Ala ye nilifɛn nafamaba dɔ de di hadamadenw ma min nafa ka bon kosɛbɛ krecɛn lakikaw bolo. O nilifɛn ye, Ala ye se min di an ma ka latigɛliw kɛ an yɛrɛw ye. Bibulu b’a fɔ an ye ko Ala ye cɛ fɔlɔ Hadama da a yɛrɛ ja la (Jen. 1:​26, 27). Ikomi Hadama n’a muso Hawa tun ye danfɛn hakilitigiw ye, Ala tun ye se di u ma u ka se ka latigɛli kɛ u yɛrɛw ye.

² Jehova ma sariya caman sigi Hadama ni Hawa kunna. Jehova y’a ɲini u fɛ dɔrɔn u k’u janto dugukolo la, k’a fa n’u denw ye, ani ka sɔn a ma ko ale de ka kan k’a fɔ u ye min ka ɲi ani min man ɲi (Jen. 1:28; 2:​16, 17). Ala ye se min di Hadama ni Hawa ma u ka se ka latigɛliw kɛ u yɛrɛw ye, u tun bɛ se k’u ka waleɲumandɔn jira a la cogo di ka ɲɛsin o nilifɛn ma? Jehova ye fɛn minnu bɛɛ kɛ u ye, o tun ka kan ka u bila u ka sɔn ka tugu a ka o ci fɔlenw kɔ walisa k’a jira k’u b’a kanu ani ko u b’a fɛ k’a dusukun nisɔndiya.—Nt. 23:15.

3. Jehova ye se min di u ma u ka latigɛli kɛ u yɛrɛw ye, Hadama ni Hawa ye baara kɛ ni o nilifɛn ye cogo di?

³ Nka iko Bibulu b’a jira cogo min na, Jehova ye se min di u ma walisa u ka sugandili kɛ u yɛrɛw ye, Hadama ni Hawa ma baara kɛ ni o nilifɛn ye ka ɲɛ. U y’a latigɛ ka Jehova kan sɔsɔ. U m’a to kanuya ni waleɲumandɔn k’u bila ka latigɛli ɲuman kɛ. U ye u yɛrɛw sago de ɲini (Jen. 3:​1-7). U ka o latigɛli ye kɔlɔlɔ lase an ma fo ka se bi ma.—Rom. 5:12.

4. (a) Ka kɛɲɛ ni Galasikaw 6:5 ye, an bɛɛ kelen-kelen ka kan ka mun de kɛ? (b) Nin barokun in kɔnɔ, an bɛna kuma Ala ka nilifɛn wɛrɛ jumɛn de kan?

⁴ Ɲɛnamaya ka gɛlɛn bi an bolo kosɛbɛ. Wa don o don an ka kan ka latigɛliw kɛ ko caman kan (Galasikaw 6:5 kalan). Latigɛli dɔw tali ka nɔgɔ nka dɔw tali ka gɛlɛn kosɛbɛ. Mun de bɛ se k’an dɛmɛ ka latigɛliw kɛ minnu ka di Jehova ye? Fɔlɔ, an ka kan ka sɔn a ma ko an mago bɛ Jehova ka dɛmɛ la walisa ka latigɛli ɲumanw kɛ (Nt. 16:3; Jer. 10:23). Hali Yesu, min tun ye mɔgɔ dafalen ye, a y’a jira ko a mago tun bɛ Jehova ka dɛmɛ la (Heb. 5:7). An minnu ye hadamaden dafabaliw ye, an mago bɛ Jehova ka dɛmɛ la ka tɛmɛ Yesu kan. Sisan an ka kuma nilifɛn wɛrɛ kan min bɛ se k’an dɛmɛ ka latigɛli ɲumanw kɛ, n’o ye ka dusukun jɛlen sɔrɔ Ala ɲɛ kɔrɔ.

KA DUSUKUN JƐLEN SƆRƆ ALA ƝƐ KƆRƆ, O KƆRƆ YE MUN DE YE?

5. (a) Daɲɛ min ye ko dusukun, o kɔrɔ ye mun de ye? (b) Dusukun bɛ se k’an dɛmɛ ka latigɛli ɲumanw kɛ cogo di? (Romɛkaw 2:​14, 15).

⁵ Daɲɛ min ye ko dusukun, o ye an kɔnɔna miirili de ye min b’a to an bɛ ko ɲuman ni ko jugu faranfasi ka bɔ ɲɔgɔn na. Ala ye mɔgɔ bɛɛ da n’o de ye hali minnu tɛ fosi dɔn a ka sariyaw ko la (2 Kɔr. 4:2). Dusukun bɛ iko kiritigɛla min bɛ an kɔnɔ. A bɛ an dɛmɛ k’a dɔn n’an hakilinataw ni an ka kɛwalew ka ɲi walima ni u man ɲi (Romɛkaw 2:​14, 15 kalan). An dusukun bɛ se k’an lasɔmi walisa an kana ko jugu kɛ (1 Sa. 26:​8-11). A bɛ se k’an dɛmɛ fana ka ko ɲuman kɛ. Jehova ye se di an ma ka latigɛli kɛ an yɛrɛw ye. Nka o t’a jira ko an bɛ latigɛli minnu kɛ, olu bɛɛ bɛna diya Jehova ye. An dusukun de bɛ se k’an dɛmɛ k’a dɔn n’a y’a sɔrɔ an b’a fɛ ka latigɛli min kɛ, o ka ɲi walima o man ɲi.

6. Mun de bɛ se k’a to an dusukun tɛ an jalaki tun?

⁶ Nka a bɛ se ka kɛ ko an dusukun t’an jalaki tun. Ikomi an ye mɔgɔ dafabaliw ye, an dusukun fana dafalen tɛ. An lamɔcogo, an ka laadalakow, ani an ka nege juguw, olu bɛɛ bɛ se ka nɔ bila an dusukun na. Bibulu b’a jira ko an dusukun bɛ se ka kɛ dusukun “sinsinbali” ye, “nɔgɔlen”, ka kɛ “i n’a fɔ nɛgɛ bilen ka fɛn jeni da” walima ka kɛ dusukun “jugu” ye. O dusukun sugu tɛ se k’an dɛmɛ cogo si la ka latigɛli ɲumanw kɛ (1 Kɔr. 8:12; Tite 1:15; 1 Tim. 4:2; Heb. 10:22). A bɛ iko balansi tiɲɛlen min ka kan ka dilan kokura. O b’a jira ko, an ka kan k’an jija kosɛbɛ walisa an dusukun ka kɛ jalakibali ye Ala ɲɛ kɔrɔ (1 Pi. 3:16). An bɛ se k’o kɛ cogo di?

AN BƐ SE K’AN DUSUKUN KOLO COGO MIN NA

7-8. (a) Mun de bɛna an dɛmɛ k’an dusukun kolo? (b) Bibulu sariyakolow bɛ se k’an ɲɛminɛ cogo di? Misali dɔ fɔ (Ja fana lajɛ).

⁷ An bɛ se k’an dusukun kolo cogo di? An ka kan ka Bibulu kalan don o don walisa k’a dɔn fɛn min ka ɲi ani fɛn min man ɲi Jehova ɲɛ kɔrɔ. Ka Ala ka sariyaw kalan, o bɛ an dɛmɛ k’a dɔn a hakilinata ye min ye. Nka, iko min an ye a ye barokun tɛmɛnnen na cogo min na, sariya dɔw bɛ waleya hukumu kɛrɛnkɛrɛnnen dɔw de kɔnɔ. O de kosɔn an ka kan k’a ɲini ka Bibulu sariyakolow dɔn, ka d’a kan olu de bɛ se k’an dɛmɛ ka Jehova hakilinataw n’a miirinataw dɔn ka ɲɛ.—Esa. 55:9.

⁸ An bɛ se k’an ka ɲɛnamaya sanga ni dugutaga ye kungokolon kɔnɔ. I miiri k’a filɛ ko i bɛ ka taa dugu dɔ la k’a sɔrɔ sira jɛlen walima panow tɛ yen walisa i ka i taayɔrɔ dɔn. An ka kan ka taa sira min fɛ, tiɲɛ don ko tile ani dolow bɛ se k’an dɛmɛ ka o dɔn. Nka ni karti bɛ an bolo, o bɛ se k’an dɛmɛ ka fɛn dɔw faranfasiya, i n’a fɔ kuluw, kɔgɔjiw o n’a ɲɔgɔnnaw. O bɛ se k’an dɛmɛ k’a dɔn n’an bɛ sira ɲuman kan walima n’an filila. An ka ɲɛnamaya sira kan, an ka kuntilenna ye k’an kodiya Jehova ye. Bibulu bɛ i n’a fɔ karti min b’an bila sira. Nka Bibulu sariyakolow, olu bɛ i n’a fɔ kunnafoni minnu bɛ sɔrɔ karti kan, minnu b’an dɛmɛ k’a dɔn an ka kan ka taa sira min fɛ. N’an bɛ taama ka kɛɲɛ ni Bibulu sariyakolow ye, o bɛna an dɛmɛ ka d’a la ko an bɛ sira ɲuman kan ani ko an bɛna an kuntilenna dafa, n’o ye ka latigɛli ɲumanw kɛ minnu b’a to an ko ka diya Jehova ye.

9. Ka kɛɲɛ ni Romɛkaw 9:1 ye, fɛn wɛrɛ jumɛn de bɛ se k’an dɛmɛ an k’an dusukun kolo ka ɲɛ?

⁹ N’an b’a fɛ an dusukun k’an bila sira ɲuman kan, an mago bɛ Ala ka hakili senu na (Romɛkaw 9:1 kalan). Hakili senu b’an dɛmɛ ka Ala ka hakilinataw dɔn ko dɔw kan. A bɛ se ka fanga di an ma fana ka kow kɛ ka kɛɲɛ ni Jehova sago ye (Fil. 2:13). O la, n’an b’a fɛ ka hakili senu ka dɛmɛ sɔrɔ, an ka kan ka mun de kɛ?

10. An ka kan ka mun de kɛ walisa ka hakili senu ka dɛmɛ sɔrɔ? (Luka 11:​10, 13).

¹⁰ Delili kɛ walisa ka hakili senu sɔrɔ (Luka 11:​10, 13 kalan). An bɛ se ka d’a la ko Jehova b’a fɛ k’a ka hakili senu di an ma (Yuh. 3:34). Mɔgɔ minnu bɛ sɔn a k’u bila sira, Jehova labɛnnen don k’a ka hakili senu di olu ma. (Nt. 1:23; Yak. 1:5). Nka fɛn wɛrɛ jumɛn de bɛ se k’an dɛmɛ k’an dusukun kolo?

11. (a) Mun de ka kan ka kɛ an kuntilenna fɔlɔ ye an ka ɲɛnamaya kɔnɔ? (b) Mun na a nafa ka bon an k’a ɲini k’a dɔn n’an dusukun kololen don ka ɲɛ?

¹¹ A ɲini k’i ko diya Jehova ye tuma bɛɛ (Nt. 8:​34, 35). O de ka kan ka kɛ an ka kuntilenna fɔlɔ ye. Ni an ye o kuntilenna to an hakili la hukumu bɛɛ kɔnɔ, o bɛna an dɛmɛ k’an dusukun kolo ka ɲɛ. Mɔgɔ min ye a dusukun kolo ka ɲɛ, o ye mɔgɔ ye min bɛ kow ye iko Jehova b’u ye cogo min na ani fɛn o fɛn bɛ digi Jehova dusukun na, a bɛ a yɛrɛ tanga o ma. Bi ɲɛnamaya ka gɛlɛn kosɛbɛ. O de kosɔn, an mago b’a la k’an dusukun kolo ka ɲɛ walisa a ka se k’an dɛmɛ waati gɛlɛn ninnu na. A bɛ se ka kɛ ko an ka kan ka latigɛli kɛ ko dɔw kan, k’a sɔrɔ sariya jɔnjɔn si tɛ o ko kan. Misali la, an ka kan k’an ɲɛnajɛ ni fɛn sugu jumɛnw de ye? An ka kan ka baara sugu jumɛn de sugandi? An ka kan ka kalan sugu jumɛn de kɛ? Ani an bɛ se k’an teriw sugandi ka ɲɛ cogo di? An b’a fɛ ka latigɛli minnu kɛ o kow kan, mun de bɛ se k’an dɛmɛ k’a dɔn ni olu bɛna diya Jehova ye?—2 Kɔr. 1:12.

12. Mun de bɛ se k’an dɛmɛ k’a dɔn n’an dusukun bɛ k’an bila ka latigɛli ɲumanw kɛ? (Efesekaw 5:10).

¹² I bɛ to ka fɛn minnu kalan Ala ka kuma kɔnɔ, to k’i hakili jagabɔ olu kan (Zab. 49:4). N’an bɛ to ka Bibulu kalan, sariyakolo minnu b’an dɛmɛ ka Jehova miirinata dɔn, an ka kan k’a ɲini ka olu faranfasiya (Efesekaw 5:10 kalan). Ni kunko gɛlɛnw bɛ an kan, an ka kan ka ɲinini kɛ Bibulu kɔnɔ walisa sariyakolo minnu bɛ kuma o kunko kan, an ka se k’olu ye. O la, an bɛna a dɔn n’an dusukun b’an bila ka latigɛli ɲumanw kɛ walima ni a tɛ an bila ka latigɛli ɲumanw kɛ (Nt. 2:​4-9, 11-13). O la, o sariyakolo bɛna an dɛmɛ k’an dusukun latilen walisa an ka to ɲɛnamaya sira kan.—Heb. 5:14.

13. An man kan ka mun de kɛ? Misali dɔ fɔ.

¹³ Kana latigɛli kɛ sani i k’a dɔn Jehova bɛ min miiri o ko la. Israɛlka minnu tora Juda jamana na Jerusalɛm halakilen kɔ, san 607 K.T.Ɲ, an man kan ka olu ladege. U y’a fɔ Jeremi ye ko: “I ka Matigi i ka Ala deli an ye walisa an ka kan ka taa yɔrɔ min na ani an ka kan ka ko min kɛ, a ka o jira an na.” (Jer. 42:​3-6). Nka u tun b’a fɛ ka fɛn min kɛ, u tun y’o latigɛ k’a ban. O de kosɔn, Jehova ye bilasirali minnu di u ma, ikomi o ma diya u ye, u nɔrɔlen tora u yɛrɛw ka latigɛli la. O ye tɔɔrɔ caman lase u ma (Jer. 42:​19-22; 43:​1, 2, 4). O la, n’an b’a fɛ ka latigɛliw kɛ, Bibulu sariyakolo minnu bɛ Jehova ka hakilinataw jira an na, an ka kan ka olu de ɲini fɔlɔ, o kɔ ka an ka latigɛliw kɛ ka kɛɲɛ ni o ye.

14. Mun na an ka kan ka tugu Bibulu sariyakolow kɔ n’an b’a fɛ ka latigɛliw kɛ?

¹⁴ Latigɛliw kɛ minnu sinsinnen don Bibulu sariyakolow kan (Mat. 7:​24-29; Yak. 1:​23-25). N’an bɛ to k’an ka latigɛliw kɛ ka kɛɲɛ ni Bibulu sariyakolow ye, an b’a jira ko an sɔnna hakili senu ka bilasirali ma. O bɛna to Jehova ka ta’a fɛ k’a ka hakili senu di an ma (Kɛw. 5:32). Nka n’an t’a to Jehova ka hakili senu k’an bila sira, a bɛ se ka kɛ ko an bɛ ka Jehova ka hakili senu “dusu kasi” (Efe. 4:30; Esa. 63:10; Kɛw. 7:51). Jehova bɛ se k’i ban yɛrɛ k’a ka hakili senu di an ma (Zab. 51:13; 1 Tes. 5:19). O dun bɛna kɛ kasaaraba ye an bolo, ka d’a kan an bɛɛ mago de bɛ Jehova ka hakili senu fanga la.—Efe. 3:16.

AN MAGO BƐ BIBULU SARIYAKOLO MINNU NA, AN BƐ SE KA OLU SƆRƆ COGO DI?

15-16. (a) An mago bɛ sariyakolo minnu na, an bɛ se ka olu sɔrɔ cogo di? (b) Sariyakolo jumɛnw de bɛ se ka Bibulukalanden dɔ dɛmɛ, a ka se ka fanga sɔrɔ ka sigarɛtimin jɔ?

¹⁵ N’an b’a fɛ ka baara kɛ ni Bibulu sariyakolow ye, an ka kan k’a ɲini ka u dɔn fɔlɔ. Misali la, i ka kan ka mun de kɛ, n’a y’a sɔrɔ i ka Bibulukalanden bolo, kun t’a la a ka sigarɛtimin jɔ? A bɛ se ka kɛ ko a b’a fɔ i ye ko sigarɛti kofɔlen tɛ Bibulu fan si. O la ne bɛ se k’a dɔn cogo di ko sigarɛtimin man ɲi?’ I bɛ se k’a dɛmɛ cogo di a ka Bibulu sariyakolo jɔnjɔn dɔw sɔrɔ o ko kan, ani k’a dɛmɛ a k’a hakili jagabɔ olu kan? Jehova Seerew ka sɛgɛsɛgɛli minɛnw bɛ se k’i dɛmɛ o la kosɛbɛ. A sɛbɛnnen bɛ yɔrɔ min na faransɛ kan na ko “Tabagisme”, o jira i ka Bibulukalanden na. O yɔrɔ la, a bɛna barokun dɔ ye min tɔgɔ ko “Tabagisme : qu’en pense Dieu ?” (Ala bɛ mun de miiri sigarɛtimin kan?) (San 2014, Zuwɛnkalo tile 1 kɔlɔsili sankanso, lajɛ). A bɛna Bibulu tɛmɛsira ani Bibulu sariyakolo jumɛnw de sɔrɔ a kɛtɔ k’o kalan?

¹⁶ A bɛ se k’a hakili jagabɔ nin sariyakolo duuru kan minnu bɛ sɔrɔ o barokun in kɔnɔ. (1) Fɛn o fɛn bɛ se k’an lase saya ma, an man kan ka kɛ o fɛn ka jɔn ye (Rom. 6:16). (2) Fɛn o fɛn bɛ an farikolo nɔgɔ, an man kan k’a sɔn o ma (2 Cor. 7:1). (3) Jehova b’a fɛ an k’a bato n’an dusukun bɛɛ ye (Mat. 22:37). (4) An ka kɛwalew man kan ka tɔɔrɔ si de lase mɔgɔ wɛrɛ ma (Mat. 22:39; 1 Kɔr. 10:24). (5) Jehova bɛ se ka ko ɲuman kɛli se di an ma (Fil. 4:13). O la hali ni sigarɛtimin n’a ɲɔgɔnna kofɔlen tɛ kɛrɛnkɛrɛnnenya la Bibulu kɔnɔ, sariyakolo minnu bɛ sɔrɔ a kɔnɔ, olu bɛ se k’i ka Bibulukalanden dɛmɛ a ka Jehova hakilinata dɔn sigarɛtimin kan.

17. Jehova Seere fila minnu bɛ ka u ka kɔɲɔ labɛn, Bibulu sariyakolo jumɛnw de bɛ se k’u dɛmɛ?

¹⁷ Jehova Seere fila minnu bɛ ka u ka kɔɲɔ labɛn, Bibulu sariyakolo jumɛnw de bɛ se k’u dɛmɛ ka latigɛli ɲumanw kɛ o ko la? Jehova Seerew ka ɲininikɛ minɛn bɛ se ka olu fana dɛmɛ kosɛbɛ. A sɛbɛnnen bɛ yɔrɔ min na faransɛ kan na ko “Cérémonies et Fêtes de mariage” (kɔɲɔ ɲɛnajɛw), u bɛna barokun caman sɔrɔ yen. O barokunw bɛ kuma sariyakolow kan minnu bɛ se k’u dɛmɛ ka sugandili ɲuman kɛ. Minnu bɛ k’u ka kɔɲɔ labɛn, sariyakolo wɔɔrɔ minnu bɛ se k’u dɛmɛ, an ka olu lajɛ ɲɔgɔn fɛ.1) U ka kan k’u jija walisa fɛn o fɛn bɛ kɛ u ka kɔɲɔ don, o bɛɛ ka nɔɔrɔ da Jehova kan (1 Kɔr. 10:​31, 32). 2) U ka fini dontaw ka kan ka kɛ fini bɛnnenw ye minnu bɛ u sutura (1 Tim. 2:9; 1 Pi. 3:​3, 4). 3) U ka kɔɲɔ don, u ka kan k’u yɛrɛ tanga yɛrɛjiranciya ma iko diɲɛ mɔgɔw b’a kɛ cogo min na (Yuh. 17:14; Yak. 1:27; 1 Yuh. 2:​15, 16). 4) U ka kan k’u ka kɔɲɔ labɛn ka ɲɛ walisa fɛn o fɛn bɛ kɛ yen, o ka kɛ cogo bɛnnen na (1 Kɔr. 14:40). 5) U ka kan k’u jija walisa u ka ɲɛnajɛ kɛnɛ kan, dɔlɔ kana di mɔgɔw ma k’a dama tɛmɛ (Gal. 5:21). 6) U ka kan ka mɔgɔ dɔ sugandi min bɛna se ka u ka kɔɲɔ ɲɛnajɛ ɲɛminɛ ka ɲɛ.—Yuhana 2:​8, 9.

18-19. (a) Ɲininikɛ minɛn wɛrɛ jumɛn de bɛ se k’an dɛmɛ? (b) Sariyakolo jumɛnw de bɛ sɔrɔ o ɲininikɛ minɛn kɔnɔ, minnu bɛ se k’i dɛmɛ k’a dɔn n’i bɛ se k’i sen don nin diɲɛ ka seliw la? (Nin yɔrɔ koorilen lajɛ “I mago bɛ sariyakolo minnu na, yala i bɛ olu dɔn wa?”).

¹⁸ Ɲinini kɛ minɛn wɛrɛ min ye mɔgɔ caman dɛmɛ, o ye an ka gafe ye min tɔgɔ ye faransɛ kan na ko: Versets pour la vie chretienne. Bibulu tɛmɛsira caman de bɛ sɔrɔ yen barokun dɔw kan. I mana barokun dɔ sugandi o yɔrɔ la, i bɛna ɲininkali caman ani Bibulu tɛmɛsira caman sɔrɔ yen, i bɛ se ka minnu kalan. O cogo la, i mago bɛ Bibulu sariyakolo minnu na i bɛna olu sɔrɔ. Misali la, ni krecɛn dɔ bɛ k’a yɛrɛ ɲininka n’a bɛ se ka taa ɲɛnajɛ dɔ la walima n’a tɛ se ka taa a la, a sɛbɛnnen bɛ yɔrɔ min na ko “Fêtes ; cérémonies” (ɲɛnajɛw), a bɛ se ka o barokun lajɛ, kɛrɛnkɛrɛnnenya la, a sɛbɛnnen bɛ yɔrɔ min na ko “Fêtes que les chrétiens ne célèbrent pas” (krecɛnw tɛ se ka ɲɛnajɛ minnu kɛ).

¹⁹ A sɛbɛnnen bɛ yɔrɔ min na ko: “Pourquoi est-ce mal de prendre part à des fêtes qui ont un lien avec la fausse religion ?” (Mun na krecɛnw man kan k’u sen don diinɛ nkalomaw ka ɲɛnajɛw la?), barokun minnu bɛ o yɔrɔ la, a bɛ se ka olu lajɛ (1 Kɔr. 10:21; 2 Kɔr. 6:​14-18; Efe. 5:​10, 11). Ɲɛnajɛ minnu ko man di Ala ye, a bɛ olu sɔrɔ yen. A sɛbɛnnen bɛ yɔrɔ min na ko “Cérémonies nationalistes” (jamanaw ka seliw), Bibulu tɛmɛsira caman bɛ sɔrɔ yen, minnu bɛ se k’an dɛmɛ k’a dɔn ni krecɛn ka kan k’a sen don jamanaw ka seliw la, i n’a fɔ seli minnu dabɔra ka nɔɔrɔ da dɔ kan, jamanaw ka se sɔrɔli u ni jamana wɛrɛw ka kɛlɛw la, o seliw, walima seli minnu bɛ nɔɔrɔ da nin diɲɛ ka mɔgɔba dɔ kan. Tiɲɛ yɛrɛ la, an nisɔndiyalenba de bɛ Jehova ka jɛkuluba waleɲumandɔn, ka d’a kan a ye nin ɲininikɛ minɛnw di an ma walisa k’an dɛmɛ k’an dusukun kolo ka ɲɛ.

I JIJA K’I DUSUKUN KOLO KA ƝƐ

20. An bɛ se k’a jira cogo di ko an y’an dusukun kolo ka ɲɛ?

²⁰ Jehova ye se min di an ma walisa ka sugandili kɛ an yɛrɛw ye, an b’a waleɲumandɔn kosɛbɛ o nilifɛn ko la. Nka an b’a dɔn ko n’an b’a fɛ ka baara kɛ ka ɲɛ ni o nilifɛnw ye, fo an k’an dusukun kolo ka ɲɛ fana. N’an dusukun kololen don ka ɲɛ an bɛna se ka latigɛliw kɛ, minnu bɛ nɔɔrɔ da Jehova kan ani minnu bɛ bɛn a sago ma. Siga t’a la ko an mago bɛ Jehova ka hakili senu na walisa ka latigɛli ɲumanw kɛ. O la, ta’a fɛ ka Jehova deli a ka hakili senu di i ma. O kɔ, a mana bilasirali minnu di i ma hakili senu sababu fɛ, tugu olu kɔ. Bibulu sariyakolow fana bɛ se k’an dɛmɛ k’an dusukun kolo ka ɲɛ. O la, an k’an seko bɛɛ kɛ, ka baara kɛ ka ɲɛ ni Jehova ka nilifɛn ninnu bɛɛ ye. N’an y’o kɛ, Ala ka kuma min ɲɛnama don, an bɛna o nɔ ye an ka ɲɛnamaya kɔnɔ.—2 Tim. 3:​16, 17; Heb. 4:12.