KALANSEN 21
Kibaru duman waajuli bɛ ka kɛ cogo jumɛn na?
Sɔɔni Jehova bɛna an ka gɛlɛyaw bɛɛ ban a ka Masaya sababu la. O kibaru duman ka di kosɛbɛ fo an tɛ se ka o mara an yɛrɛw dɔrɔn ye. Yesu tun b’a fɛ a nɔfɛmɔgɔw ka o cikan fɔ mɔgɔw bɛɛ ye! (Matiyu 28:19, 20) Jehova Seerew bɛ ka Yesu ka o cikan waleya cogo jumɛn na?
1. Matiyu 24:14 bɛ ka waleya cogo jumɛn na bi?
Yesu tun kɔnna k’a fɔ ko: “Nin Kibaru Duman waajuli na kɛ diɲɛ yɔrɔw bɛɛ la sankolo masaya ko la”. (Matiyu 24:14) Jehova Seerew nisɔndiyalen don ka u sen don o baara nafamaba in kɛli la. An bɛ ka kibaru duman waajuli kɛ diɲɛ fan bɛɛ la, kan 1 000 ni kɔ la! O baaraba in kɛli tɛ taa cɛsiribaw ani labɛnw kɔ. O baara in tɛ se ka kɛ ni Jehova ka dɛmɛ tɛ.
2. An bɛ cɛsiri jumɛnw de kɛ walasa ka mɔgɔw waaju?
An bɛ se ka mɔgɔw sɔrɔ yɔrɔ o yɔrɔ, an bɛ waajuli kɛ o yɔrɔw bɛɛ la. Iko an san kɛmɛ fɔlɔ krecɛnw, an bɛ waajuli kɛ “mɔgɔw ka duw kɔnɔ”. (Kɛwalew 5:42) O cogo kɛrɛnkɛrɛnnen b’a to an ka se ka mɔgɔ miliyɔn caman lasɔrɔ san o san. Ikomi mɔgɔw tɛ kɛ so tuma bɛɛ, an bɛ waajuli kɛ fana forobayɔrɔw caman na. Tuma bɛɛ, an bɛ cogoyaw ɲini walasa ka Jehova ni a sagonataw ko fɔ mɔgɔ wɛrɛw ye.
3. Jɔni de ka kan ka kibaru duman waajuli kɛ?
Krecɛn lakikaw bɛɛ de ka kan ka mɔgɔ wɛrɛw waaju kibaru duman ko la. O baara min kalifara an ma, an bɛ o ta sɛbɛ la. Ni an ka kow cogoya b’a to an ka waajuli kɛ fo ka se hakɛ min ma, an b’a kɛ fo ka se yen. Ka d’a kan an b’a dɔn ko mɔgɔw ka ɲɛnamaya bɛ farati la. (1 Timote 4:16 kalan) An tɛ sara waajuli kɛli kama bawo Bibulu b’a fɔ: “Aw y’a sɔrɔ gansan, aw fana k’a di gansan.” (Matiyu 10:7, 8) An bɛ ka cikan min lase, mɔgɔ dɔw tɛ sɔn o ma. Nka an bɛ ta’a fɛ ka waajuli kɛ bawo waajuli kɛli sen bɛ an ka bato la ani o bɛ Jehova nisɔndiya.
DƆ FARA I KA DƆNNIYA KAN
Jehova Seerew bɛ cɛsiri minnu kɛ walasa ka waajuli kɛ diɲɛ fan bɛɛ, an k’a ɲini ka fɛn caman dɔn o kan. An b’a lajɛ fana Jehova bɛ ka an dɛmɛ cogo min na.
Waajuli bɛ ka kɛ diɲɛ fan bɛɛ: (A) Kosta Rika, (B) États-Unis, (C) Benɛn, (D) Tayilandi, (E) Yap, (F) Suwɛde
4. An bɛ baaraba kɛ walasa ka mɔgɔw bɛɛ lasɔrɔ
Jehova Seerew bɛ cɛsiri kɛrɛnkɛrɛnnenw kɛ walasa ka mɔgɔw waaju kibaru duman ko la fan bɛɛ. A’ye WIDEYO lajɛ, o kɔ aw ka baro kɛ nin ɲininkali kan.
Jehova Seerew bɛ cɛsiri minnu kɛ walasa ka waajuli kɛ, mun de bɛ i dabali ban o cɛsiriw ko la?
Matiyu 22:39 ani Romɛkaw 10:13-15 kalan, o kɔ aw ka baro kɛ nin ɲininkaliw kan:
An ka waajuli b’a jira cogo di ko an bɛ an mɔgɔ ɲɔgɔnw kanu?
Jehova bɛ mun de miiri mɔgɔw ko la minnu bɛ kibaru duman waajuli kɛ?—Tilayɔrɔdennin 15nan lajɛ.
5. An ni Ala ye baarakɛɲɔgɔnw ye
Ko kɛlen caman b’a jira ko Jehova bɛ ka an ka baara ɲɛminɛ. Misali la, don dɔ wulada fɛ, balimakɛ dɔ min tɔgɔ ko Paul, o ye muso dɔ sɔrɔ du ni du waajuli la Nuwɛl Zelandi jamana na. O don yɛrɛ sɔgɔmada fɛ, o muso ye Ala deli a kɛtɔ ka a wele a tɔgɔ Jehova la ani k’a ɲini a fɛ mɔgɔ dɔ ka na bɔ a ye. Paul y’a fɔ ko, “Ne sera muso ka da la lɛrɛ saba o kɔ.”
1 Kɔrɛntekaw 3: 9 kalan, o kɔ aw ka baro kɛ nin ɲininkali kan:
Ko kɛlenw, i n’a fɔ nin min kɛra Nuwɛl Zelandi, olu b’a jira cogo di ko Jehova bɛ ka waajulibaara ɲɛminɛ?
Kɛwalew 1:8 kalan, o kɔ aw ka baro kɛ nin ɲininkali kan:
Mun na an mago bɛ Jehova ka dɛmɛ na walasa ka waajulibaara kɛ?
I tun bɛ nin dɔn wa?
Dɔgɔkun o dɔgɔkun, an ka dɔgɔkun kɔnɔ lajɛ la, an bɛ dege waajuli kɛli la. Ni i delila ka taa o lajɛw dɔ la kelen na, i hakilina ye mun ye o degeli in ko la?
6. An bɛ Ala ka cikan waleya, o min ye ka waajuli kɛ
An san kɛmɛ fɔlɔ la, mɔgɔ minnu tun bɛ ka Yesu nɔfɛmɔgɔw kɛlɛ, olu tun b’a ɲini ka u bali waajuli kɛli la. Yamaruya min tun bɛ krecɛn fɔlɔw bolo ka kibaru duman fɔ, u ye o lafasa u kɛtɔ ka kibaru duman ‘sabati’ kiritigɛ yɔrɔ la. (Filipekaw 1:7) Jehova Seerew fana bɛ ka o ɲɔgɔn kɛ bi.a
Kɛwalew 5:27-42 kalan, o kɔ aw ka baro kɛ nin ɲininkali kan:
Mun na an tɛna waajuli kɛli dabila?—Tilayɔrɔdenninw 29, 38, ani 39 lajɛ.
MƆGƆ DƆ BƐ SE KA NIN ƝININKALI KƐ: “Mun na Jehova Seerew bɛ taa du ni du?”
I bɛ o tigi jaabi cogo di?
BAKURUBAFƆLI
Yesu ye ci di a nɔfɛmɔgɔw ma ko u ka kibaru duman waajuli kɛ siyaw bɛɛ ye. Jehova bɛ ka a ka mɔgɔw dɛmɛ o baara kɛli la.
Seginnkanni
Kibaru duman waajuli bɛ ka kɛ cogo jumɛn na diɲɛ fan bɛɛ la?
An ka waajuli b’a jira cogo di ko an bɛ an mɔgɔ ɲɔgɔnw kanu?
Yala e hakili la waajulibaara bɛ se ka an nisɔndiya wa? Mun na?
NINNU LAJƐ
Jehova Seerew bɛ ka mun de kɛ walasa ka mɔgɔw dɛmɛ minnu bolila kɛlɛ ɲɛ?
Minnu bolila kɛlɛ ɲɛ, Jehova Seerew bɛ ka minnɔgɔ bɔ olu la alako ta fan fɛ (5:59)
Mɔgɔ dɔ bɛ k’a ka ɲɛnamaya bɛɛ kɛ waajuli kɛli la. O tigi lamɛn a kɛtɔ k’a ɲɛfɔ kun min na o y’a nisɔndiya.
Se minnu sɔrɔla kiritigɛ yɔrɔw la ni olu ye kibaru duman waajuli kɛli lataa ɲɛ, olu dɔw lajɛ.
“Masaya kibaru duman waajulikɛlaw bɛ kibaru duman lafasa kiritigɛ yɔrɔ la” (kr)
a Ala de y’a fɔ ko an ka waajuli kɛ. O de kama Jehova Seerew mago tɛ Hadamaden kuntigiw ka yamaruya la walasa ka kibaru duman waajuli kɛ.