ƝININKALIW KA BƆ AN KA GAFEW KALANBAGAW YƆRƆ

Ciden Paul kumana layidu fila jumɛnw de kan Galasikaw 4:24 kɔnɔ?

Jɛɲɔgɔnya min bɛ Ibrahima, Sara ani Agar ni ɲɔgɔn cɛ, a kumalen kɔ o kan, ciden Paul y’a fɔ ko: “Kɔrɔ wɛrɛ bɛ o ko la: O muso fila ye layidu fila bisigiw ye. Kelen ye Agar ye, o ye Sinayi kulu bisigi ye” (Gal. 4:​22-24). Kɔrɔlen, an tun y’a ɲɛfɔ ko, o layidu fila ninnu tun ye, layidu min tun tara Musa ka sariya sababu fɛ ani layidu kura ye. Nka an kɛlen kɔ ka o tɛmɛsira sɛgɛsɛgɛ kokura, an y’a ye ko faamuyali cogo wɛrɛ bɛ u la. A bɛ ikomi Paul tun tɛ ka kuma layidu kura kan, nka Jehova ye layidu min ta Ibrahima ye, a tun bɛ ka kuma o de kan. Kun minnu na an ye o fɔ, an k’o dɔw lajɛ ɲɔgɔn fɛ.a

Paul y’a fɔ ko layidu min tara Sinayi kulu kan san 1513 K.T.Ɲ, Musa ka Sariya sababu fɛ, Agar ye o bisigi ye (Ek. 19:​5, 6). Ikomi Yahutuw bɛɛ tun ye hadamaden dafabaliw ye, u tun tɛ se cogo si la, ka Musa ka sariya labato ka ɲɛ. Ka o dɔn, o tun ka kan k’u dɛmɛ k’a dɔn ko, u ye jurumu ka jɔnw de ye. Layidu min tara ni u ye Musa ka sariya sababu fɛ, o tun ka kan ka Israɛlkaw dɛmɛ, u ka Masiya faranfasiya, ale min kelenpe tun bɛ se ka sariya labato ka ɲɛ. Masiya kɛlen k’a ka ɲɛnamaya dafalen saraka, a ye cogoya di hadamaden dafabaliw ma, u ka se ka hɔrɔnya ka bɔ jurumu ni saya la (Gal. 3:​19, 24, 25). Yesu kɛlen kɔ ka Ala ka sariya dafa o cogoya la, nafa tun tɛ Musa ka sariya la tuguni.—Rom. 10:4.

Ciden Paul ye danfara don Agar ni “hɔrɔnmuso” Sara ni ɲɔgɔn cɛ, ale min denkɛ bangera “Ala ka layidu barika la” (Gal. 4:23). O layidu tun ye layidu ye: Ala ye layidu min ta ni Ibrahima ye (Gal. 3:29; 4:​28, 30). Jehova kumana o layidu kan, Jenɛse 22:18 kɔnɔ a kɛlen k’a fɔ ko: “Dugukolo kan siyaw bɛɛ na duba sɔrɔ i bɔnsɔn de la, k’a masɔrɔ i ye ne kan minɛ”.

Jehova ye o layidu min ta ni Ibrahima ye, o ye kunnafoni wɛrɛ lase an ma a ye layidu min ta Edɛn nakɔ kɔnɔ ko la (Jen. 3:15). O b’a jira ko bɔnsɔn min kofɔra, o ye Ibrahima bɔnsɔn de ye. Paul y’a ɲɛfɔ ko, n’a fɔra “bɔnsɔn”, kuma bɛ ka kɛ Yesu de kan kɛrɛnkɛrɛnnenyala. Nka minnu ye “Krisita taw ye,” o kɔrɔ ye krecɛn munnenw mɔgɔ 144.000, olu minnu ni Yesu bɛna mara kɛ a ka masaya la, olu fana sen bɛ o bɔnsɔn na (Gal. 3:​16, 29; Jir. 14:​1-3). Jehova ye layidu min ta ni Ibrahima ye, o tiimɛli bɛna duba caman lase hadamadenw ma, minnu bɛ sɔn Yesu la ani k’a kan minɛ.

O tuma la, Paul b’a fɛ ka mun de fɔ a kɛlen k’a fɔ “kɔrɔ wɛrɛ bɛ o ko la”? A tun b’a fɛ ka fɔ de ko, Yahutu minnu tun bɛ ɲɛnamaya la a ka tile la, ni olu taara fɛ ka nɔrɔ Musa ka sariya la, iko Agar, u bɛ to jɔnya la. Nka, n’u sɔnna Ibrahima “bɔnsɔn” ma n’o ye Yesu Krisita ye kɛrɛnkɛrɛnnenyala, iko Sara, u bɛna hɔrɔnya. U bɛna hɔrɔnya ka bɔ jurumu ni saya la (Yuh. 8:​32-34). N’u ma sɔn Yesu la, Musa ka sariya kun fɔlɔ ye min ye, n’o ye ka u lase Krisita ma, u tun bɛna o jɛ.

Ciden Paul ye bataki ci Galasika minnu ma, olu tun tɛ Yahutuw ye wa u ma deli ka kɛ Musa ka sariya kɔrɔ. Krecɛn minnu tun tɛ Yahutuw ye, Yahutuw tun bɛ k’a wajibiya olu ma, u ka Musa ka sariya kumaw labato i n’a fɔ bolokoli. Paul y’a jira u la ko, o tun ye hakilitanya de ye. Ikomi u tun sɔnna Krisita la ka ban u “hɔrɔnyalen” tun don. O la u mago t’a la ka kɛ sariya ka “jɔn” ye tuguni.—Gal. 5:​1, 10-14.