Jɛgɛ minɛ jɔw Bibulu sɛbɛn waati la

A bɛ se ka kɛ ko, Bibulu kalanbaga caman bɛ a dɔn ko, Yesu ka kalanden caman tun ye mɔnnikɛlaw de ye. (Mar. 1:​16-20) U tun bɛ baara kɛ ni jɛgɛ minɛ jɔw ye ni u tun bɛ mɔnni kɛ Galile ba kan.

Mɔgɔw tun bɛ jɛgɛ minɛ jɔw dilan ni lin juru de ye. U tun bɛ o juruw siri ɲɔgɔn na fo a ka bonya ka se jɔ hakɛ ma. U tun bɛ jɛgɛ minɛ jɔ juruw siri ɲɔgɔn na ka a wow bonya walima ka u dɔgɔya ka kɛɲɛ ni u tun b’a fɛ ka jɛgɛ sugu minnu minɛ n’a ye. Ni mɔnnikɛla b’a fɛ ka jɛgɛ belebelebaw minɛ, jɛgɛ minɛ jɔ min wo ka bon a bɛ mɔnni kɛ ni o de ye. Jɛgɛ minɛ jɔ fitininw, olu koorilen don. U tun bɛ plomb walima kabakurunw siri u la walisa u ka jigin ji jukɔrɔ ka jɛgɛw minɛ u kɔnɔ. Nka, Jɛgɛ minɛ Jɔ belebelebaw, olu minnu bɛ wele faransɛ kan na ko senne, olu ye jɔ jamanjan sugu dow de ye, u bɛ to ka fɛn girimanw siri minnu duguma yɔrɔ la ani ka fɛn fɛgɛnmanw siri u sanfɛ yɔrɔ la. O cogo la, jɔ in duguma yɔrɔ bɛ jigin ji jukɔrɔ, nka a sanfɛla bɛ fogon ji sanfɛ. U bɛ o jɔ suguw de ta walisa ka jɛgɛw lamini ani ka u minɛ.

Jɛgɛ minɛ jɔw tun sɔngɔ ka gɛlɛn kosɛbɛ. Farakurun minnu bɛ ji jukɔrɔ, olu bɛ se ka u tiɲɛ. U bɛ se ka fara fana ni jɛgɛ minɛta cayara u kɔnɔ (Luka 5:6). Bibulu tɛmɛsira dɔ kɔnɔ, a fɔra yen ko, Yakuba ni Yuhana tun bɛ “ka u ka jɔw kala” (Mat. 4:21). A bɛ se ka kɛ ko, mɔnnikɛlaw tun bɛ u ka jɔw labɛn tuma o tuma ni u tilala mɔnni na. Ciden Luka fana tun kuma na mɔnnikɛla dɔw kan minnu “tun bɛ ka jɔw ko” (Luka 5:2). U tun bɛ u ka jɔw ko walisa kala ni nɔgɔ minnu bɛ nɔrɔ u ka jɔw la, ka u to jɛgɛ minɛ na, ka olu bɔ a la. U mana u ka jɔw ko, u tun bɛ u dulon walisa u ka ja ani u kana toli.—Eze. 47:10.

Mɔgɔ minnu tun degelen don ka baara kɛ ni jɛgɛ minɛ jɔw ye, Yesu y’a ɲini olu de fɛ, u ka na a ma walisa a ka u kɛ mɔgɔ mɔnnaw ye, o kɔrɔ “mɔgɔ ɲininaw ye.”