Mun na an bɛ se ka nisɔndiya sɔrɔ hali ni u bɛ an koniya?

1. Yesu ye dabaliban kuma jumɛn de fɔ?

A MAN di mɔgɔ si ye u k’a kɔniya. K’a sɔrɔ Yezu ye kalan min kɛ kulu kan, a ye kuma dɔ fɔ min barila a lamɛnbagaw la. A ko: “Ni mɔgɔw b’aw kɔniya . . . , aw dagamunin lo.” (Luka 6:22). Mun na Yezu y’o kumaw fɔ? O ye ɲiningali ɲuman ye sabu bi bi nin na mɔgɔ caaman be Yezu ka kalandenw kɔniya. Barokun nin na, an bena a ye fɛɛn min kama mɔgɔw b’an kɔniya ani fɛɛn min kama an ninsɔndiyanin be se ka to hali ni u b’an kɔniya.

MUN NA MƆGƆW B’AN KONIYA

2-3. Kun jumɛn de kosɔn u bɛ krecɛn lakikaw tɔɔrɔ? Ka o dɔn, o bɛ se k’an dɛmɛ cogo di? (Yuhana 16:​2, 3).

² Mɔgɔw b’an kɔniya sabu an be Jehova lo batora. Minw be Yezu ka kalandenw tɔɔrɔ wala k’u faga yɛrɛ, Yezu y’a fɔ u koo la ko: “U te ne lɔn, u te n Faa fana lɔn.” (Zan 16:2, 3 kalan). Jɔn lo be mɔgɔw lasun u ka Jehova sagokɛlaw kɛlɛ? Sutana lo sabu Bibulu b’a fɔ ko ale lo ye “diɲɛ kuntigi” ye (2 Kor. 4:3, 4). A be mɔgɔw bali u ka tiɲɛn lɔn Jehova koo la. Ka fara o kan, minw be Jehova lɔn ani u b’a kanu, a be mɔgɔw lasun u k’olu kɛlɛ (Zan 8:42-44). An b’o kalama minkɛ, o b’a to an b’an kɛlɛbagaw jati cogo di? N’an y’a faamu ko Sutana lo b’u lafilila, o bena a to an t’u kɔniya.

³ An ka balimacɛ dɔ ka koo lajɛ. A tɔgɔ ko Pascala ani a be jamana dɔ la yɔrɔ min na bali sigira a ka baara kan. Polisiw y’a minɛ, k’a bugɔ ani k’a ta ka taga don kasobon yɔrɔ dɔ la a kelen n’a kelen kalo caaman kɔnɔ sabu a bele be Jehova sago kɛra kantigiya la. A ko: “A gwɛnin lo ne ɲɛɛ na ko batoli senuman man di Sutana n’a ka jinaw ye minkɛ, o lo kama u be Jehova sagokɛlaw kɛlɛla. Mɔgɔ minw be baara kɛra kasobon na, u caaman tɛ Jehova sagokɛlaw kɔniya. U b’u ka baara dɔrɔn lo kɛra.” Balimacɛ dɔ be bɔ Krowasi. A bangebagaw tɛ Jehova Seerew ye ani u y’a kɛlɛ bɛrɛbɛrɛ a ka lanaya kosɔn. A ko: “Sisan, n’ b’a faamu ko Sutana lo ye n’ jugu yɛrɛ yɛrɛ ye, n’ bangebagaw tɛ.”—Efɛz. 6:12.

4. An bɛ kalan jumɛn de sɔrɔ ka bɔ Yesu ni a ka kalanden Etiɛni ka misali la? (Ja fana lajɛ).

⁴ An t’an kɛlɛbagaw kɔniya, an yɛrɛ be delili kɛ u ye le (Mat. 5:44). Yezu ni Etiyɛni ka koo b’o lo yira an na. Tuma min na Ɔrɔmu sɔrɔdasiw ye Yezu gwengwe lɔgɔ kan, a ye delili kɛ u ye ko: “N Faa, yafa u ma.” (Luka 23:34). Yezu ye Jehova deli a ka yafa o sɔrɔdasiw ma sabu mɔgɔw lo tun y’u ci u ka n’ale faga. N’a sɔrɔ a tun be miirila mɔgɔ dɔw koo la jama cɛma diinan kuntigiw ye minw lasun u k’a fɔ ko u k’ale faga. Yezu y’a faamu k’o mɔgɔw tun t’a lɔn u be min kɛra. O cogo kelen na, mɔgɔ minw tun bena Etiyɛni faga, Etiyɛni ye Ala deli ko a ka yafa u ma (Kɛw. 7:58-60). Yala Jehova ye Yezu ni Etiyɛni ka deliliw jaabi wa? Ɔnhɔn. Mɔgɔ minw tun ko u ka Yezu faga, kɔfɛ u caaman nimisara, u limaniyara a la ani u batizera (Kɛw. 2:36-41). Mɔgɔ minw tun ko u ka Etiyɛni faga, u la kelen tɔgɔ tun ko Sɔli ka bɔ Tarisi. A nana kɛ kerecɛn ye kɔfɛ, ani a nimisara kosɔbɛ a ka koo juguw kosɔn.—1 Tim. 1:13.

5. An bɛ kalan jumɛn de sɔrɔ ka bɔ balimakɛ César ka ko la?

⁵ Bi fana, an be delili minw kɛ an kɛlɛbagaw ye, Jehova b’u jaabi. Balimacɛ César ka koo b’o lo yira. A be bɔ Venezuwela. A facɛ tun be ale, a bamuso, ani a dɔgɔ n’a kɔrɔw kɛlɛ kosɔbɛ u ka lannakow kosɔn. César ko: “N’ bamuso tun ye furumuso ɲuman ani bamuso ɲuman ye yɛrɛ le! Hali n’a bolo tun degunnin lo Alakow la, a tun be wagati kɛ ni n’ facɛ ye. A tun b’a fɔ ne ni n’ dɔgɔ ni n’ kɔrɔw ye fana ko an k’an facɛ bonya ani ka mɛnni kɛ a fɛ, fɔɔ n’a y’a ɲini an fɛ an ka koo dɔ lo kɛ min bɛnnin tɛ Jehova sago ma.” Saan caaman o kɔ, César facɛ sɔɔn yɛlɛmana. César ko: “Loon dɔ, n’ ye delili kɛ ni n’ dusu bɛɛ ye. O kɔ n’ y’a fɔ n’ facɛ ye ni n’ be se ka bibulukalan kɛ n’a ye, ani a sɔnna. N’ dusu diyara cogo min na, a tɛ se ka fɔ!” Kɔfɛ, César facɛ nana batize. Tiɲɛn lo ko an kɛlɛbagaw bɛɛ lo t’u sɔɔn yɛlɛma ten. Nga dɔw b’u yɛrɛ mala n’u y’a ye an ka kumaw n’an ka kɛwalew fɛ ko an be mɔgɔ bonya. N’o kɛra, o b’an ninsɔndiya yɛrɛ le! An kɔrɔtɔnin lo Jehova ka o mɔgɔw dɛmɛ u k’ale lɔn sabu makaritigi lo ani ale lo be “adamadenw bɛɛ kiti.”—Zɛnɛzi 18:25.

6. Ka kɛɲɛ ni Marka 13:13 ye, kun wɛrɛ jumɛn de kosɔn mɔgɔw bɛ an koniya?

⁶ Mɔgɔw b’an kɔniya sabu an be tugura Yezu kɔ. Yezu y’a fɔ ko mɔgɔw bena kerecɛn sɔbɛw kɔniya ale “tɔgɔ kosɔn.” (Mariki 13:13 kalan). Yezu “tɔgɔ” ɲɛsinna mun lo ma? A ye mɔgɔ min ye tigitigi ani joo min b’a fɛ ka kɛ Ala ka Masaya Masacɛ ye, a tɔgɔ ɲɛsinna o le ma. Mɔgɔw b’an kɔniya sabu u y’u jigi la duniɲa kuntigiw lo kan, nga u m’u jigi la Yezu Krista kan Jehova ye ale min sugandi ka kɛ duniɲa kuru bɛɛ kuntigi ye. Yezu ye Ala ka Masaya Masacɛ ye kabi saan 1914. Yanni dɔɔni, a bena adamadenw ka gofɛrɛnɛmanw bɛɛ halaki.

7-8. Mun na mɔgɔw bɛ to k’u yɛlɛ bɔ Jehova batobagaw la? (Yuhana 15:18-​20) (Jaw fana lajɛ).

⁷ Mɔgɔw b’an kɔniya sabu an tɛ koow kɛ i n’a fɔ duniɲamɔgɔw b’a kɛ cogo min na. Yezu yɛrɛ y’a ɲɛfɔ ko mɔgɔw bena ale ka kalandenw kɔniya sabu u “te diɲɛ ta ye.” (Zan 15:18-20 kalan). O la, miiricogo, kɛwalew ani kumacogo minw man di Ala ye, an tɛ sɔn u ma i n’a fɔ saan kɛmɛkulu fɔlɔ kerecɛnw. O lo kama mɔgɔw be an balima caaman lɔgɔbɔ baarakɛyɔrɔ wala lakɔliso la (1 Piyɛri 4:3, 4). Nga an ninsɔn ka di k’a ye ko tuma dɔw la, an kɛlɛbaga dɔw b’u ka miiriya yɛlɛma an koo la ani u b’a daminɛ k’an bonya.

⁸ An ka balimacɛ dɔ ka koo lajɛ. A tɔgɔ ko Ignacio ani a be Ameriki mara cɛmancɛ la. Saan caaman kɔnɔ, a ka kalanfa dɔ tun be to k’a lɔgɔbɔ sabu a b’a ka ɲɛnamaya kɛ ka kɛɲɛ ni Bibulu ka sariyakolow ye. Nga sanni Ignacio ka tila a ka lakɔli kalan na, o kalanfa y’a ɲininga ko a be sera k’o kɛ cogo di hali k’a sɔrɔ mɔgɔ caaman b’a lɔgɔbɔ o kosɔn? Ignacio y’a ɲɛfɔ a ye ko ale b’a jati ko Ala ka sariyaw be an latanga le ani a y’a weele ka na kafo ka lajɛn dɔ la. A barila a la k’a ye k’o kalanfa nana. Kafomɔgɔw y’a bisimila cogo min na, o diyara a ye fɔɔ a tora ka na lajɛnw na. Kɔfɛ, o cɛɛ ye bibulukalan daminɛ ani mɔgɔw y’a daminɛ k’ale fana kɛlɛ a ka lannakow kosɔn. Nga a tora ka ɲɛtaga kɛ ani a kɔfɛ, a batizera.

9-10. (a) Danfara wɛrɛ jumɛn de bɛ Jehova batobagaw ni nin diɲɛ mɔgɔw cɛ? (b) An bɛ kalan jumɛn de sɔrɔ ka bɔ ciden Paul ka misali la?

⁹ An be dan na duniɲamɔgɔw la sabu an t’an niin don politikikow ni kɛlɛkow la fana (Zan 18:36). Ka kɛɲɛ ni Ɔrɔmukaw 13:1 ka ladili ye, an b’an jija ka bonya la faamanw kan, nga an t’an niin don politikikow la. Misali la, an t’a ɲini ka kɛ politiki ɲɛmɔgɔ dɔ ye ani an tɛ politiki ɲɛmɔgɔ si vote. Mun na do? Sabu an be kantigiya kɛ Jehova lo ye ani an b’a ka Masaya lo lafasa, a ye Yezu Krista sigi o min kun na. Duniɲa kɔnɔ, u ye Jehova Seere caaman don kaso la u ka limaniya kosɔn. O bɛɛ n’a ta, u bele be to ka kibaro diiman fɔ. O cogo la, u be ciden Pol lo ladegira. Saan caaman kɔnɔ, u y’a datugu boon dɔ kɔnɔ ani kaso la fana (Kɛw. 24:27; 28:16, 30). Nga a tora k’a lamɛnbagaw waaju i n’a fɔ kasobon garadiw, kititigɛlaw, gofɛrɛnɛrɛw ani masacɛw. N’a sɔrɔ a yɛrɛ ye Ɔrɔmu masacɛ Nerɔn ka baarakɛla dɔw waaju.—Kɛw. 9:15.

¹⁰ O cogo kelen na, u y’an balima minw minɛ k’u don kaso la, mɔgɔ o mɔgɔ be sɔn k’u lamɛn, u b’olu waaju. O mɔgɔ dɔw ye kititigɛlaw, faamanw ani kasobon garadiw. Misali la, u ye balimacɛ dɔ minɛ k’a datugu kaso kɔnɔ saan wɔɔrɔ ni kɔ kɔnɔ sabu a banna k’a seen don politikikow ni kɛlɛkow la. O balimacɛ ko ale fɛ o tɛ ɲangili ye, nga a ko ale b’a jati ko Jehova lo y’ale ci o yɔrɔ la walisa a ka se ka mɔgɔ kɔnɔgwɛw dɛmɛ. Ni Jehova tɛmɛna an fana fɛ ka kibaro diiman lase o ɲɔgɔnna mɔgɔw ma, o b’an ninsɔndiya kosɔbɛ! (Kɔlɔs. 4:3). An k’a filɛ an be se ka ninsɔndiya kuun wɛrɛ minw kosɔn hali ni mɔgɔw b’an kɔniya an ka lannakow kosɔn.

MUN NA AN BƐ SE KA NISƆNDIYA K’A SƆRƆ AN KONIYALEN DON

11. Kɔrɔbɔli bɛ se k’an ka limaniya barika bonya cogo di? Misali dɔ fɔ.

¹¹ An b’a lɔn ko ni mɔgɔw b’an kɔniya, o be Bibulu ka kiraya kumaw lo dafara. Kiraya kuma fɔlɔ min be sɔrɔ Bibulu kɔnɔ, Jehova tun y’a fɔ o kiraya kuma kɔnɔ ko minw b’ale kanu ani u b’ale sago kɛ, Sutana n’a kɔmɔgɔw bena u kɔniya (Zɛnɛzi 3:15). Yezu fana y’a fɔ Evanziliw kɔnɔ siɲɛ caaman na ko minw be Jehova sago kɛ, mɔgɔw bena u kɔniya (Mat. 10:22; Mariki 13:9-12; Luka 6:22, 23; Zan 15:20). Bibulu sɛbɛbaga dɔw fana y’o lo fɔ (2 Tim. 3:12; Zaki 1:2; 1 Piyɛri 4:12-14; Zude 3, 17-19). O la ni mɔgɔw b’an kɛlɛ an ka limaniya kosɔn, o tɛ bari an na. Nga, o yɛrɛ b’an ninsɔn diya le sabu o be Bibulu ka kiraya kumaw lo dafara. O fana b’an hakili sigi ko an be tiɲɛn Ala lo batora. Balimamuso dɔ be jamana dɔ la bali sigira an ka baara kan yɔrɔ min na. A y’a fɔ ko: “N’ ye n’ yɛrɛkun di Jehova ma tuma min na, n’ tun b’a lɔn ko a mɛɛn o mɛɛn, u tun bena n’ kɛlɛ n’ ka limaniya kosɔn. O la, ni kɔrɔbɔliw cunna n’ kan, o tɛ siranya bila n’ na ani o tɛ bari n’ na fana.” A cɛɛ tun y’a kɛlɛbaga dɔ ye. A y’a tɔɔrɔ, k’a ka Bibulu n’a ka gafew jɛni. Nga, balimamuso m’a to o ka siranya bila a la ani k’a fari faga. O yɛrɛ y’a to a ka limaniya barika bonyana kosɔbɛ le (Eburuw 10:39). A ko: “Bibulu tun kɔnna k’a fɔ ko u bena Jehova sagokɛlaw tɔɔrɔ. O la, n’ tun b’a lɔn ko o koo bena n’ sɔrɔ loon dɔ. Tuma min na o kɛra, o y’a to n’ lara a la kosɔbɛ ko n’ be tiɲɛn diiman na le.”

12. Mun de ye balimakɛ dɔ dɛmɛ ka se ka kɔrɔbɔli muɲu?

¹² Tiɲɛn lo ko an b’an lɔn ko u bena an tɔɔrɔ an ka limaniya kosɔn. Nga n’o koo y’an sɔrɔ, a bele be se ka gwɛlɛya an ma ka muɲuli kɛ. Balimacɛ dɔ ye wagati dɔ kɛ kaso la ani a y’a fɔ o koo la ko: “Tuma dɔw la, n’ hakili tun be ɲagami ani n’ tun be hami fɔɔ n’ be kasi.” Mun lo y’a dɛmɛ ka se ka muɲuli kɛ? A ko: “N’ tun be delili kɛ tuma bɛɛ. Loon bɛɛ sɔgɔma n’ tun be delili kɛ. Tile kɔnɔ, gwɛlɛya o gwɛlɛya tun mana n’ sɔrɔ n’ tun be delili kɛ. Ni n’ dusu tun gwanna tilenbaliyakow kosɔn, n’ tun be don ɲɛgɛn na, ka daa tugu n’ yɛrɛ la ani ka delili kɛ.” Ka fara o kan, mɔgɔ minw sera ka kɔrɔbɔliw muɲu kantigiya galen ani an ka wagati la, balimacɛ tun be miiri olu ka koo la. O y’a dɛmɛ ka kɔrɔbɔliw muɲu. O y’a dɛmɛ fana ka hɛɛrɛ sɔrɔ, Yezu tun ko a bena min di a ka kalandenw ma.—Zan 14:27; 16:33.

13. Mun de bɛ se k’an dɛmɛ ka se sɔrɔ koniya kan?

¹³ Kanuya b’an dɛmɛ ka muɲuli kɛ hali ni mɔgɔw b’an kɔniya. Yezu y’a Faa kanu n’a dusu bɛɛ ye fɔɔ ka taga se a saya ma. A tun b’a teriw fana kanu (Zan 13:1; 15:13). Ni mɔgɔw b’an kɔniya, an fana bena se k’o muɲu n’an be Jehova n’an balimaw kanu kosɔbɛ. Mun na an b’o fɔ? An ka ciden Pol ka koo lajɛ.

14. Mun de ye ciden Paul dɛmɛ ka to kantigiya la fo ka se saya ma?

¹⁴ Dɔɔni ka kɔn Pol fagatuma ɲɛ, a ye lɛtɛrɛ sɛbɛ a tericɛ Timote ma ko: “Ala ye Nii Senuman min d’an ma, o ma d’an ma waasa an ka kɛ siranbagatɔw ye, o be fanga le d’an ma, ka kanuya don an dusu la.” (2 Tim. 1:7). Pol tun b’a fɛ ka mun lo fɔ do? A tun b’a fɔra le ko n’an be Jehova kanu kosɔbɛ, o be se k’an dɛmɛ ka gwɛlɛyabaw muɲu (2 Tim. 1:8). Siga t’a la, Pol tun be Jehova kanu kosɔbɛ. O y’a dɛmɛ a y’a jaa gwɛlɛya ani ka to kantigiya la, hali k’a sɔrɔ a tun b’a lɔn k’u bena a faga.—Kɛw. 20:22-24.

15. Bi, balimakɛw ni balimamusow bɛ kanuya jira ɲɔgɔnna cogo di? (Ja fana lajɛ).

¹⁵ An balima minw be kantigiya kɛ Jehova ye kɔrɔbɔli bɛɛ n’a ta, siga t’a la u koo ka di an ye. Saan kɛmɛkulu fɔlɔ la, Akilasi ni Pirisili y’u niin bila farati la walisa ka ciden Pol dɛmɛ (Ɔrɔm. 16:3, 4). Bi bi nin na fana, balima dɔw be sɔn k’u niin bila farati la balima wɛrɛw kosɔn. Misali la, Irisi jamana na u ye balima minw minɛ k’u don kaso la, balima caaman be taga kititigɛsow la walisa k’u jija. U y’an balimamuso dɔ minɛ k’a don kaso la. Tuma min na a ye balima caaman ye u nana kititigɛso la, o y’a dusu sɔrɔ fɔɔ a ma se ka kuma wagati damanin kɔnɔ. A balimaw ka kanuya ye barika don a la o wagati gwɛlɛ na. Kanuya min b’an ni ɲɔgɔn cɛ, o b’a to an be see sɔrɔ kɔniya kan! Yala o tɛ ninsɔndiyakun bɔ wa?

16. Mun na ciden Piɛrɛ y’a fɔ ko, u bɛ minnu tɔɔrɔ ka d’a kan u bɛ Ala bato, kun bɛ olu bolo ka nisɔndiya? (1 Piɛrɛ 4:​14).

¹⁶ Ni mɔgɔw b’an kɔniya ani an b’o muɲu, o b’a to an koo be diya Jehova ye (1 Piyɛri 4:14 kalan). N’u b’an tɔɔrɔ sabu an be Jehova sago kɛra, ciden Piyɛri ko n’an b’o muɲu, kuun b’a la an ka ninsɔndiya. Mun na an be se ka ninsɔndiya o kosɔn? Sabu o b’a yira ko Ala ka hakili senu b’an kan. Ka kɔrɔbɔliw muɲu ani ka Jehova dusu diya, Piyɛri tun b’a lɔn o be min kɛ mɔgɔ la. Dɔɔni saan 33 Pantekɔte tɛmɛnin kɔ, u ye Alabatosoba kɔrɔsibagaw ci ka taga Piyɛri ni ciden tɔɔw minɛ sabu u tun be waajuli kɛra. Nga Piyɛri y’a jaa gwɛlɛya k’a ka limaniya lafasa (Kɛw. 5:24-29). Hali k’a sɔrɔ u ye ale ni ciden tɔɔw bugɔ, u ma waajuli baara dabila. Nga, u ninsɔndiyanin tun lo sabu “ka maloya sɔrɔ Yesu tɔgɔ kosɔn, u y’o jate bonyali ye.” An fana ninsɔndiyanin be se ka to kɔrɔbɔliw tuma na.—Kɛw. 5:40-42, Bible senuma.

17. Su laban sani a ka sa, Yesu ye mun de fɔ a ka kalandenw ye?

¹⁷ Suu min kɔnna Yezu saya ɲɛ, a y’a fɔ a ka kalandenw ye ko: “Mɔgɔ min be ne kanu, n Faa fana bena o tigi kanu, ne fana bena o tigi kanu.” (Zan 14:21). Wagati min na mɔgɔw bena an kanu ani u tɛna an kɔniya sabu an be Jehova sago kɛra, an kɔrɔtɔnin lo o wagati ka se! (2 Tes. 1:6-8). Nga yanni o cɛ, kuun caaman minw kosɔn an be se ka ninsɔndiya hali ni mɔgɔw b’an kɔniya, an ka to ka miiri o la.